សៀមរាបៈ សម្ភាររបស់ភ្ញៀវទេសចរជាតិនិងអន្តរជាតិចំនួន ២៤៥ ករណី ក្នុងចំណោមសម្ភារចំនួន ២៧៩ ករណីដែលភ្ញៀវបានភ្លេចឬជ្រុះនៅក្នុងអំឡុងពេលដើរទស្សនានៅក្នុងតំបន់ប្រាសាទអង្គរត្រូវបានរកឃើញ និងបានប្រគល់ឲ្យភ្ញៀវវិញនៅក្នុងឆ្នាំ ២០១៨។ យោងតាមរបាយការណ៍ប្រចាំឆ្នាំ ២០១៨ របស់អាជ្ញាធរជាតិអប្សរា ក្នុងឆ្នាំ ២០១៨។
លោកស្រី ចៅ ស៊ុនកិរិយា អ្នកនាំពាក្យអាជ្ញាធរជាតិអប្សរា ប្រាប់ភ្នំពេញប៉ុស្តិ៍ពីម្សិលមិញថា ឥរិយាបថនេះបានបង្ហាញអំពីការចូលរួមអភិរក្សថែរក្សា និងផ្តល់តម្លៃដល់តំបន់រមណីយដ្ឋានអង្គរជាសម្បត្តិបេតិកភណ្ឌពិភពលោក ព្រោះតែមន្ត្រីអភិរក្សការពារតំបន់អង្គរទាំងអស់ បានទទួលការបណ្តុះបណ្តាល និងមានការយល់ដឹងខ្ពស់ ក្នុងការអនុវត្តតួនាទីរបស់ពួកគេ។
លោកស្រី ស៊ុនកិរិយា ថ្លែងថា៖ «ភ្ញៀវទេសចរភាគច្រើនជាជនបរទេស ដែលបានបាត់សម្ភារ និងរកឃើញវិញ ហើយពួកគេបានសរសើរអង្គរយើង នៅពេលបាត់អីវ៉ាន់ ច្រើនតែរកឃើញវិញ ព្រោះពលរដ្ឋយើង រួមទាំងអ្នកអភិរក្សអង្គរ (ជាង ៥០០ នាក់) គាត់អត់លោភលន់ ពេលឃើញរបស់អ៊ឹចឹង»។
លោកស្រី អះអាងថា អាជ្ញាធរអប្សរា ក៏នៅតែបន្តការតាំងចិត្ត ក្នុងការបណ្តុះបណ្តាលដល់មន្ត្រីអភិរក្សអង្គរឲ្យពួកគេកាន់តែយល់ដឹងបន្ថែមទៀត ក្នុងការចូលរួមការពារនិងទប់ស្កាត់បាតុភាពផ្សេងៗ ដែលកើតមានក្នុងតំបន់អង្គរ ដើម្បីលើកកម្ពស់តំបន់រមណីយដ្ឋានអង្គរ ឲ្យស្របតាមអនុសាសន៍ណែនាំរបស់គណៈកម្មាធិការ ICC-Angkor ហើយក៏បានសម្រេចឆ្លាក់ផ្ទាំងថ្មឈ្មោះប្រាសាទដែលមានទាំងអក្សរខ្មែរ និងអក្សរអង់គ្លេស ធ្វើពីថ្មភក់ប្រមាណ ១១៨ ផ្ទាំង សម្រាប់ដាក់តាមប្រាសាទនានាប្រមាណជាង ៥០ ប្រាសាទ ក្នុងរមណីយដ្ឋានអង្គរនេះដែរ។
លោកស្រីបន្តថា៖ «យើងដាក់ប្រមាណ ៥០ ទៅ ៦០ ប្រាសាទ ដែលប្រាសាទខ្លះ យើងដាក់ ១ ឬ ២ ខ្លះទៀត ដល់ទៅ ៣ បើទ្វារចូលប្រាសាទមានគ្រប់ទិស គឺដាក់ទាំងអស់ នៅតាមច្រកទ្វរចូលប្រាសាទ។ ហើយផ្ទាំងទាំងនេះ គឺចាប់ផ្តើមដាក់ជាបន្តបន្ទាប់ នៅពេលផ្ទាំងឈ្មោះទាំងនោះ បានឆ្លាក់ហើយ»។
បើតាមគេហទំព័ររបស់អាជ្ញាធរនេះ ផ្ទាំងស្លាកឈ្មោះប្រាសាទ គឺនឹងបង្ហាញជូននូវព័ត៌មានសំខាន់ៗមួយចំនួនពាក់ព័ន្ធនឹងប្រាសាទដូចជា ឈ្មោះប្រាសាទ អាយុកាលសាងសង់ប្រាសាទ ទិសច្រកចូលប្រាសាទ និងអមដោយស្លាកសញ្ញា (Logo) ចំនួន ៤ គឺ ស្លាកសញ្ញាអាជ្ញាធរជាតិអប្សរានៅចំកណ្តាលខាងលើឈ្មោះប្រាសាទ និងស្លាកសញ្ញា ៣ ផ្សេងទៀត ដែលនៅខាងក្រោមគឺ ស្លាកសញ្ញាយូណេស្កូ ស្លាកសញ្ញាបេតិកភណ្ឌពិភពលោក និងស្លាកសញ្ញាអនុសញ្ញាក្រុងឡាអេឆ្នាំ ១៩៥៤ សម្រាប់ការការពារសម្បត្តិវប្បធម៌ក្នុងគ្រាមានជម្លោះប្រដាប់អាវុធ ដែលមាន ០៣ ទំហំផ្សេងគ្នា។
លោក សុខ សង្វារ អគ្គនាយករងទទួលបន្ទុកនាយកដ្ឋានអភិវឌ្ឍន៍ទេសចរណ៍អង្គរ បានឲ្យដឹងថាផ្ទាំងនេះគឺមិនបានដំឡើងគ្រប់ប្រាសាទទាំងអស់ក្នុងតំបន់រមណីយដ្ឋានអង្គរឡើយ ដោយហេតុថា ប្រាសាទខ្លះនៅជ្រៅក្នុងព្រៃមិនមានទីតាំងដាក់បាន។ ចំពោះទីតាំងដែលដំឡើងស្លាកឈ្មោះប្រាសាទនេះ ក្រុមការងារបានគិតទៅចំណុច ៣ គឺ នៅក្បែរច្រកចូលទស្សនាប្រាសាទ ទីតាំងងាយមើលឃើញរបស់ភ្ញៀវទេសចរនិងទីតាំងដែលមិនប៉ះពាល់ដល់ទិដ្ឋភាពប្រាសាទទាំងមូល។
លោកថ្លែងថា៖ «សមិទ្ធផលនេះនឹងជួយផ្ដល់ភាពងាយស្រួល និងបទពិសោធល្អសម្រាប់ភ្ញៀវទេសចរ ក្នុងការទស្សនាតំបន់អង្គរ ឆ្លើយតបតាមតម្រូវការចាំបាច់របស់ភ្ញៀវទេសចរ លើកតម្លៃប្រាសាទនិងកិត្យានុភាពជាតិ និងទទួលបាននូវព័ត៌មានមួយចំនួនដែលធ្វើឲ្យដំណើរកម្សាន្ត កាន់តែមានភាពងាយស្រួល និងច្បាស់លាស់បន្ថែមទៀត»។
ជួយសង្គ្រោះបឋមដល់ភ្ញៀវទេសចរជាតិនិងអន្តរជាតិ ចំនួន ២០៥ ករណីផង៕