តាកែវៈ ចៅក្រមសាលាដំបូងខេត្តតាកែវសម្រេចឃុំខ្លួនជនសង្ស័យម្នាក់ពីបទ «ប៉ុនប៉ងមនុស្សឃាត» បន្ទាប់ពីបានកាប់ប្រហារលើស្ត្រីម្នាក់ជាច្រើនកាំបិតបណ្តាលឲ្យដាច់កដៃខាងឆ្វេង និងជះទឹកអាស៊ីតកាលពីខែកុម្ភៈ ឆ្នាំ ២០១៩ នៅភូមិព្រះម្លប់ ឃុំកណ្ដឹង ស្រុកបាទី ខេត្តតាកែវដែលកាលនោះជនសង្ស័យបានរត់គេចខ្លួនទៅខេត្តប៉ៃលិន ពោធិ៍សាត់ និងខេត្តបាត់ដំបង។
លោក លឹម សុខន អ្នកនាំពាក្យសាលាដំបូងខេត្តតាកែវថ្លែងពីម្សិលមិញថា ជនសង្ស័យឈ្មោះ គុប ផា ភេទប្រុស អាយុ ៤៣ ឆ្នាំ រស់នៅភូមិព្រះម្លប់ ឃុំកណ្តឹង ស្រុកបាទី ខេត្តតាកែវត្រូវបានលោកចៅក្រមនៃសាលាដំបូងខេត្តតាកែវសម្រេចឃុំខ្លួននៅល្ងាចថ្ងៃទី ៦ ខែកញ្ញា នៅក្នុងពន្ធនាគារខេត្ត។ ជននេះត្រូវបានចោទប្រកាន់ពីបទប៉ុនប៉ងមនុស្សឃាតដោយចេតនាតាមមាត្រា ២៧ និងមាត្រា ១៩៩ នៃក្រមព្រហ្មទណ្ឌ។
លោកបានបញ្ជាក់ថា៖ «យើងបានសម្រេចឃុំខ្លួនតាមសាលក្រមរបស់តុលាការ ខេត្តតាកែវ ចុះថ្ងៃទី ១៨ ខែមេសា ឆ្នាំ ២០២០ ដែលត្រូវផ្តន្ទាទោសតាមច្បាប់ដោយការឃុំខ្លួនក្នុងពន្ធនាគារខេត្តតាកែវរយៈពេល ១៤ ឆ្នាំ បន្ទាប់ពីគាត់បានប្រព្រឹត្តបទល្មើស ហើយរត់គេចខ្លួនជិត ២ ឆ្នាំ»។
លោក ង៉េង ជួ ប្រធាននាយកដ្ឋាននគរបាលព្រហ្មទណ្ឌនៃអគ្គស្នងការដ្ឋាននគរបាលជាតិថ្លែងពីម្សិលមិញថា មន្ត្រីជំនាញនៃនាយកដ្ឋាននគរបាលព្រហ្មទណ្ឌបានបញ្ជូនជនសង្ស័យទៅសាលាដំបូងខេត្តតាកែវនៅព្រឹកថ្ងៃទី ៦ ខែកញ្ញា ដើម្បីផ្តន្ទាទោសតាមផ្លូវច្បាប់។
លោកបន្តថា កាលពីថ្ងៃទី ៥ ខែកញ្ញា លោក ខេង ម៉េងឈាង នាយការិយាល័យព្រហ្មទណ្ឌកម្រិតស្រាលបានដឹកនាំកម្លាំងសហការជាមួយកម្លាំងស្នងការដ្ឋាននគរបាលខេត្តប៉ៃលិន និងកម្លាំងស្នងការដ្ឋានខេត្តបាត់ដំបងបានអនុវត្តដីកាបង្គាប់ឲ្យចាប់ខ្លួនឃុំខ្លួនលេខ ១០៤/២០២០ ចុះថ្ងៃទី ៨ មេសា ឆ្នាំ ២០២០ របស់សាលាដំបូងខេត្តតាកែវ។ ក្នុងការអនុវត្តនេះ សមត្ថកិច្ចឃាត់ខ្លួនជនសង្ស័យឈ្មោះ គុប ផា នៅចំណុចភូមិចម្លងរមាំងលើ ឃុំអូរសំរិល ស្រុកសំឡូត ខេត្តបាត់ដំបង។
លោកបញ្ជាក់ថា៖ «តាមដីកាតុលាការគឺចោទប្រកាន់គាត់ពីបទប៉ុនប៉ងមនុស្សឃាត ប៉ុន្ដែខ្ញុំមិនទាន់ដឹងនីតិវិធីតុលាការសម្រេច ឃុំខ្លួន ឬបែបណាទេ»។
ស្ត្រីរងគ្រោះឈ្មោះ សាន ចិន្តា ពីម្សិលមិញមិនអាចស្វែងរកប្រភពទាក់ទងសុំការបញ្ជាក់ជុំវិញ ដើមហេតុនៃករណីនេះបានទេ។
របាយការណ៍របស់នាយកដ្ឋាននគរបាលព្រហ្មទណ្ឌនៃអគ្គស្នងការដ្ឋាននគរបាលជាតិឲ្យដឹងពីម្សិលមិញថា ជនសង្ស័យឈ្មោះ គុប ផា កាលពីថ្ងៃទី ២៧ កុម្ភៈ ឆ្នាំ ២០១៩ បានធ្វើសកម្មភាពយកកាំបិតប៉័ងតោ កាប់ប្រហារទៅលើស្ត្រីឈ្មោះ សាន ចិន្តា ជាច្រើនកាំបិតបណ្តាលឲ្យដាច់កដៃខាងឆ្វេង បន្ទាប់មកជះទឹកអាស៊ីតបន្ថែមទៅលើជនរងគ្រោះបណ្ដាលឲ្យរលាកពេញផ្ទៃមុខ និងខ្លួននៅភូមិឃុំខាងលើ ដោយសារទំនាស់ពាក្យសម្តី។
របាយការណ៍បន្តថា បន្ទាប់ពីប្រព្រឹត្តអំពើដ៏សាហាវទៅលើស្ដ្រីរងគ្រោះ ជនសង្ស័យបានរត់ទៅសំងំលាក់ខ្លួននៅតាមបណ្ដាខេត្តនានាដូចជានៅខេត្តប៉ៃលិន ខេត្តពោធិ៍សាត់ និងខេត្តបាត់ដំបងជាដើម។ ប៉ុន្តែតុលាការខេត្តតាកែវ បានសម្រេចបើកសវនាការកាត់ទោសកំបាំងមុខជនត្រូវចោទឲ្យជាប់គុកចំនួន ១៤ ឆ្នាំ ដោយតំណាងអយ្យការចោទប្រកាន់ពីបទ «ប៉ុនប៉ងមនុស្សឃាតដោយចេតនា» ហើយការដាក់ទោសនេះដោយគិតចាប់ពីថ្ងៃចាប់ខ្លួនបាន៕