.jpg)
លោក សម រង្ស៊ី កាលពីអំឡុងឆ្នាំ ២០១៥។ ភ្នំពេញ ប៉ុសិ៍្ត
ភ្នំពេញៈ លោក សម រង្ស៊ី បានប្រតិកម្មខ្លាំងៗក្រោយពេលលោកត្រូវបានសាលាដំបូងរាជធានីភ្នំពេញកាត់ទោសឲ្យជាប់ពន្ធនាគារកំណត់ពេល ៤ ឆ្នាំ កាលពីសប្ដាហ៍មុនរឿងប្រមាថលើអង្គព្រះមហាក្សត្រ ព្រះបាទសម្ដេចព្រះបរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជា។
លោក សម រង្ស៊ី ដែលជាប្រធានស្តីទី គណបក្សសង្គ្រោះជាតិ ដែលតុលាការកំពូលរំលាយកាលពីចុងឆ្នាំ ២០១៧ បានប្រតិកម្មលើសាលក្រមរបស់សាលាដំបូងរាជធានីភ្នំពេញ ដែលកាត់ទោសរូបលោកចំពោះការលើកឡើងរបស់លោកថា សារលិខិតរបស់ព្រះមហាក្សត្រ ដែលអំពាវនាវឲ្យពលរដ្ឋទៅបោះឆ្នោតនៅឆ្នាំ ២០១៨ គឺជាសារ «ក្លែងក្លាយ» ឬធ្វើឡើងដោយការបង្ខិតបង្ខំ។
កាលពីថ្ងៃព្រហស្បតិ៍ សាលាដំបូងរាជធានីភ្នំពេញបានកាត់ ទោសលោកឲ្យជាប់ពន្ធនាគារ ៤ ឆ្នាំទៀត ក្នុងបទល្មើសញុះញង់យោធិនកុំឲ្យស្ដាប់បង្គាប់ និងធ្វើឲ្យខូចទឹកចិត្តកងទ័ព។
ឆ្លើយតបនឹងការផ្ដន្ទាទោសទាំង ២ នេះលោក សម រង្ស៊ី បានថ្លែងតាមហ្វេសប៊ុករបស់លោក កាលពីថ្ងៃសុក្រថា លោកគ្រាន់តែនិយាយការពិតប៉ុណ្ណោះ។
លោកថ្លែងថា «លើការចោទប្រកាន់ទី២ ដែលថា ខ្ញុំ "ប្រមាថព្រះមហាក្សត្រ" ខ្ញុំគ្រាន់តែនិយាយការពិតទេ»។
ក្រៅពីនេះលោក សម រង្ស៊ី ក៏បានធ្វើការរិះគន់ធ្ងន់ៗផងដែរទៅលើព្រះមហក្សត្រ។ លោក ជិន ម៉ាលីន អ្នកនាំពាក្យក្រសួងយុត្តិធម៌ បានថ្លែងកាលពីថ្ងៃអាទិត្យម្សិលមិញថា អ្វីដែលលោក សម រង្ស៊ី សរសេរគឺជា «សារប្រមាថយ៉ាងធ្ងន់ធ្ងរ លើព្រះមហាក្សត្រ»។
ប៉ុន្តែថា តើនឹងមានការចោទប្រកាន់សាជាថ្មីពីបទ «ប្រមាថចំពោះអង្គព្រះមហាក្សត្រ» លើលោក សម រង្ស៊ី នោះ គឺអាស្រ័យលើតុលាការអ្នកសម្រេច។ លោកថា ប្រសិនបើមិនមានបទចោទថ្មីទេអ្វីដែលលោក សម រង្ស៊ី ថ្លែងនេះក៏អាចត្រូវបានដាក់បញ្ជូលលើបទល្មើសដែលមានស្រាប់ដើម្បីបន្ថែមស្ថានទម្ងន់ទោស។
លោក សម រង្ស៊ី បានថ្លែងតាមរយៈអីុមែល កាលពីម្សិលមិញថា លោកគិតថា នឹងមានបណ្តឹងជាច្រើនទៀតនៅតុលាការ ដែលប្តឹងដោយរដ្ឋាភិបាល។ លោកសង្ឃឹមថា លោក ហ៊ុន សែន នឹងប្តឹងលោកកាន់តែច្រើន ប៉ុន្តែជាបណ្ដឹងដែល «គ្មានប្រសិទ្ធភាព» និង «គួរឲ្យអស់សំណើច» ហើយបណ្តឹងទាំងនោះ ធ្វើឲ្យលោកមានឱកាសរិះគន់លើ «របបផ្ដាច់ការបច្ចុប្បន្ន»។
លោក ឡៅ ម៉ុងហៃ អ្នកវិភាគនយោបាយយល់ឃើញថា វាមិនសមទាល់តែសោះ ដែលលោក សម រង្ស៊ី ធ្វើការវិនិច្ឆ័យជាសាធារណៈបែបនេះ អំពីព្រះមហាក្សត្រ។ ការធ្វើបែបនេះ មិនបានផលចំណេញអ្វីទេ ផ្ទុយទៅវិញវាធ្វើឲ្យលោកក្លាយជាសត្រូវរបស់ព្រះមហាក្សត្រ និងអ្នករាជានិយម ហើយទីបំផុត ប្រឈមនឹងការចោទ ប្រកាន់បទ «ប្រមាថចំពោះអង្គព្រះមហាក្សត្រ» សាជាថ្មី។
លោកថ្លែងថា៖ «គាត់អាចឆ្លាតជាងនេះក្នុងនាមធ្លាប់ជាថ្នាក់ដឹកនាំគណបក្សប្រឆាំងដ៏ធំមួយ ហើយត្រូវបានគេយល់ថា ជាគូប្រជែងជាមួយលោកនាយករដ្ឋមន្ត្រី ហ៊ុន សែន បើសិនគាត់សរសើរដល់ការលំបាករបស់ព្រះមហាក្សត្រ ដែលគេដឹងគ្រប់គ្នា ហើយទូលថ្វាយដល់ព្រះអង្គដោយស្ងាត់ៗ ឲ្យចាកចេញពីស្ថានការណ៍នេះ ហើយបំពេញតួនាទីប្រកបដោយប្រសិទ្ធភាពលើតួនាទីជាច្រើន ដែលចែងក្នុងរដ្ឋធម្មនុញ្ញ និងតួនាទីក្នុងការបម្រើប្រជាពលរដ្ឋ»។
ប៉ុន្តែអ្នកសិក្សាបញ្ហាសង្គម លោក មាស នី យល់ថា អ្នកនយោបាយកម្ពុជា ដែលរួមមានទាំងលោក សម រង្ស៊ី ផង តែងតែបញ្ចេញមតិញុះគ្នាទៅវិញទៅមក។ លោកថា នៅកម្ពុជា គណបក្សកាន់អំណាចតែងតែឈ្នះបណ្តឹងទាំងអស់នៅតុលាការ។
លោកថ្លែងថា៖ «ខ្ញុំគិតថា លោក សម រង្ស៊ី បានដឹងហើយ ពីទោសដែលគាត់ជាប់ គឺជាងមួយជីវិត។ ដូច្នេះ វាក្លាយជារឿងសាមញ្ញសម្រាប់គាត់សម្រាប់តុលាការនិងសម្រាប់រដ្ឋាភិបាល ក្នុងការចំអកដាក់គ្នាទៅវិញទៅមក»។
លោកបន្តថា ការលើកឡើងរបស់លោក សម រង្ស៊ី ធ្វើឡើងក្នុងន័យរុញឲ្យមានប្រតិកម្មពីលោក ហ៊ុន សែន ដែលបានប្រកាសកាលពីពេលថ្មីៗនេះថា ឈប់ឆ្លើយឆ្លងជាមួយលោក។ លោកថា គូភាគីទាំង ២ គឺលោក សម រង្ស៊ី និងលោក ហ៊ុន សែន មិនស្ងប់ស្ងាត់បានទេពេលភាគីម្ខាងចំអកដោយប្រើពាក្យខ្លាំងៗ៕
