ភ្នំពេញៈ សវនាការក្នុងថ្ងៃទី ២ នៅសាលាឧទ្ធរណ៍ទៅលើអតីតសកម្មជន អតីតគណបក្សសង្គ្រោះជាតិចំនួន ១១ រូបក្នុងសំណុំរឿងផ្ទុះអំពើហិង្សា នៅក្បែរទីលានប្រជាធិបតេយ្យរវាងក្រុមសន្តិសុខខណ្ឌដូនពេញ និងអ្នកគាំទ្រអតីតគណបក្សប្រឆាំងកាលពីឆ្នាំ ២០១៤ តុលាការបានអានចម្លើយមនុស្សចំនួន ៣៩ រូបស្តាប់ចម្លើយផ្ទាល់របស់សន្តិសុខ ២ រូប និងមើលវីដេអូឃ្លីបជាច្រើនដែលដាក់បន្ទុកទៅលើជនជាប់ចោទដែលធ្វើឲ្យមានការតវ៉ាពីជនជាប់ចោទ និងមេធាវី។
សាលាឧទ្ធរណ៍កាលពីម្សិលមិញបានបន្តបើកសវនាការលើសំណុំរឿងហិង្សា នៅស្ពាននាគកាលពីថ្ងៃទី ១៥ ខែកក្កដា ឆ្នាំ ២០១៤ ដែលអំពើហិង្សានេះត្រូវបានតុលាការក្រុងភ្នំពេញចាត់ទុកថាជាអំពើ «កុបកម្ម» ហើយបានកាត់ទោសសកម្មជន និងអ្នកគាំទ្រអតីតគណបក្សសង្គ្រោះជាតិសរុបចំនួន ១៤ រូបដាក់ពន្ធនាគារពី ៧ ឆ្នាំទៅ ២០ ឆ្នាំពីបទចូលរួម និងដឹកនាំកុបកម្ម។ ប៉ុន្តែសំណុំរឿងដែលបើកសវនាការពីម្សិលមិញពាក់ព័ន្ធនឹងជនជាប់ចោទតែ ១១ រូបប៉ុណ្ណោះ។
នៅក្នុងសវនាការនាពេលព្រឹក សន្តិសុខខណ្ឌដូនពេញ ២ រូបដែលជាដើមបណ្ដឹងមានឈ្មោះ មាស ភឿន និង ណន ផល្លា បានធ្វើសក្ខីកម្មដោយអះអាងថាពួកគេត្រូវបានក្រុមបាតុករវាយឲ្យរងរបួសដោយគ្រាន់តែទៅសម្រួលចរាចរណ៍នៅស្ពាននាគ។ ពួកគេថាពួកគេបានប្តឹងដើម្បីទាមទាររកយុត្តិធម៌។
ប៉ុន្តែលោក សំ សុគង់ មេធាវីការពារជនជាប់ចោទទាំង ១១ រូបបានសួរដេញដោលលើដើមបណ្ដឹងទាំង ២ រូបលើចំណុចដែលដើមបណ្ដឹងបានរៀបរាប់ឈ្មោះអ្នកដឹកនាំបាតុកម្ម ដែលពួកគេបានប្រាប់ចៅក្រមស៊ើបអង្កេតនៃសាលាដំបូងរាជធានីថាមានឈ្មោះ លោក ស្រី មូរ សុខហួរ លោក ហូ វ៉ាន់ លោក រៀល ខេមរិន្ទ្រ លោក ម៉ែន សុថាវរិន្ទ និងលោក លោក កែវ ភិរម្យ ជាដើម។
នៅពេលលោក លោក សំ សុគង់ សួរដេញទាំងលោក មាស ភឿន និងលោក ណន ផល្លា ថ្លែងថាពួកគាត់មិនបានសរសេរពាក្យបណ្ដឹងដោយខ្លួនឯងទេគឺមានគេយកពាក្យបណ្ដឹងទៅឲ្យគាត់ផ្ដិតមេដៃនៅពេលពួកគាត់នៅមន្ទីរពេទ្យ។
លោក ផល្លា និយាយថា៖ «ខ្ញុំបានទៅណែនាំបាតុករឲ្យបំបែក កុំឲ្យស្ទះចរាចរណ៍ ខ្ញុំប្រាប់កុំឲ្យប្រមូលផ្តុំគ្នា។ ខ្ញុំស្គាល់ច្បាស់ជាងគេគឺលោកស្រី មូរ សុខហួរ និងលោក មាជ សុវណ្ណារ៉ា។ ខ្ញុំឃើញគាត់ចងបដា ខ្ញុំទៅឃាត់ តែខ្ញុំដើរចេញព្រោះឃាត់អត់ស្តាប់»។
នៅពេលសួរដេញដោលដោយមេធាវី ជូង ជូងី ដែលការពារជនជាប់ចោទទាំង ១១ រូប ថាតើអំពើហិង្សា ឬភាពប្រទាំងប្រទើសកើតឡើងដោយសារអ្វីនោះលោក ផល្លា ថា៖ «ការប្រទាំងប្រទើសកើតឡើងនៅពេលសន្តិសុខទៅដកបដាពីបាតុករបើអត់មានការដកបដា ក៏អត់មានការប្រទាំងប្រទើសដែរ»។
ក្រោយសួរលើដើមបណ្ដឹង តុលាការបានអានចម្លើយរបស់សាក្សី ៣២ រូបទៀតដែលចម្លើយពួកគេ មានភាពប្រហាក់ប្រហែលគ្នា។ ចម្លើយដើមបណ្ដឹងដែលជាក្រុមសន្តិសុខសង្កាត់ និងខណ្ឌដូនពេញបញ្ជាក់ថានៅថ្ងៃទី ១៥ កក្កដា ២០១៤ ពួកគេបានទៅប្រជុំជួរនៅខាងកើតស្ពាននាគ ដើម្បីចែកកិច្ចការគ្នាធ្វើ ដោយមានអ្នកខ្លះត្រូវទៅសម្រួលចរាចរណ៍ ហើយអ្នកខ្លះទៅហាមឃាត់ក្រុមបាតុករ មិនឲ្យជួបជុំគ្នា និងហាមមិនឲ្យយកក្រណាត់ទៅដាក់លើរបងលួសដែលអាជ្ញាធរបានដាក់នៅជុំវិញទីលានប្រជាធិបតេយ្យ។ ចម្លើយរបស់សន្តិសុខភាគច្រើនអះអាងថាបាតុកម្មត្រូវបានដឹកនាំដោយលោកស្រី មូរ សុខហួរ លោក ហូ វ៉ាន់ និងលោក រៀល ខេមរិន្ទ។
ក៏ប៉ុន្តែក្នុងសវនាការនៅពេលរសៀលតុលាការបានអានចម្លើយរបស់តំណាងរាស្ត្រ និងមន្ត្រីគណបក្សសង្គ្រោះជាតិ ៧ រូបដោយចម្លើយរបស់លោកស្រី មូរ សុខហួរ បានអះអាងប្រាប់ចៅក្រមស៊ើបអង្កេតនៃសាលាដំបូងថា លោកស្រីមិនបានដឹកនាំបាតុកម្មនោះទេ។ ទោះយ៉ាងណាមានវីដេអូឃ្លីបមួយដែលតុលាការបានចាក់ដោយមានលោកស្រី សុខហួរ និងលោក រៀល ខេមរិន្ទ្រ បានអំពាវនាវឲ្យអ្នកគាំទ្រទៅចូលរួមរំដោះទីលានប្រជាធិបតេយ្យនៅថ្ងៃទី ១៥ កក្ដដា ២០១៤។
ក្រៅពីអានសក្ខីកម្មរបស់មន្ត្រីជាន់ខ្ពស់គណបក្សសង្គ្រោះជាតិ តុលាការបានចាក់វីដេអូឃ្លីបជាច្រើនដែលវីដេអូឃ្លីបខ្លះមានរយៈពេលប្រហែលតែ ៥ វិនាទីប៉ុណ្ណោះ ខណៈវីដេអូផ្សេងទៀតមានរយៈពេលជាច្រើននាទីជាពិសេសវីដេអូដែលបង្ហាញក្រុមបាតុករវាយទៅលើក្រុមសន្តិសុខ និងការថ្លែងរបស់មន្ត្រីគណបក្សសង្គ្រោះជាតិ។
ទោះយ៉ាងណាវីដេអូឃ្លីបទាំងនេះត្រូវបានចាក់នៅលើអេក្រង់ទំហំ ៣២ អ៊ីញតែមួយសម្រាប់អង្គសវនាការទាំងមូលដែលការណ៍នេះបានធ្វើឲ្យក្រុមមេធាវីការពារក្តី និងជនជាប់ចោទតវ៉ា។ លោកមេធាវី ជូង ជូងី បានស្នើឲ្យតុលាការបង្ហាញវីដេអូឃ្លីបឲ្យបានច្បាស់ និងទូលំទូលាយសម្រាប់សាធារណៈជនដែលចូលរួមដោយលោកនិយាយថា៖ «ដំណាក់កាលពិនិត្យភ័ស្តុតាងសំខាន់ណាស់។ វីដេអូឃ្លីបនេះ យើងមើលអត់ច្បាស់»។ ក៏ប៉ុន្តែលោក ចៅក្រម ប្លង់ សំណាង ថ្លែងថា លោកធ្វើតាមលទ្ធភាពរបស់ឧទ្ធរណ៍។ «លទ្ធភាពរបស់សាលាឧទ្ធរណ៍មានប៉ុណ្ណឹង» ។
សវនាការបានចាក់វីដេអូឃ្លីបជាច្រើនដោយភាគច្រើនបង្ហាញការវាយដំលើក្រុមសន្តិសុខពីសំណាក់ក្រុមបាតុករ និងការថ្លែងអំពីការរំដោះទីលានប្រជាធិបតេយ្យ។ ប៉ុន្តែលោក មាជ សុវណ្ណារ៉ា និងមេធាវីបានតវ៉ាឲ្យតុលាការចាក់វីដេអូឃ្លីបចំនួន ២ ដែលមិនត្រូវបានប្រគល់ដោយសាលាដំបូង។ វីដេអូមួយបង្ហាញពីក្រុមសន្តិសុខ ពាក់អាវ ពណ៌ទឹកប៊ិកលើកដំបងក្នុងការ៉ុងចេញពីឡាន ហើយចែកដំបងគ្នា។ វីដេអូមួយទៀតបង្ហាញក្រុមសន្តិសុខដើរទៅបកបដាចេញពីរបងលួសហើយហិង្សាបានកើតឡើងដោយក្រុមសន្តិសុខ និងបាតុករបានវាយប្រតាយប្រតប់គ្នាទៅវិញទៅមក។
សវនាការនឹងបន្តនៅថ្ងៃពុធនេះទៀត៕