The Phnom Penh Post Search

Search form

Logo of Phnom Penh Post newspaper Phnom Penh Post - សវនាការ​ករណី យ៉ោម បុប្ផា នៅ​ឧទ្ធរណ៍​មិន​ទាន់​បញ្ចប់

សវនាការ​ករណី យ៉ោម បុប្ផា នៅ​ឧទ្ធរណ៍​មិន​ទាន់​បញ្ចប់

សវនាការ​ករណី យ៉ោម បុប្ផា នៅ​ឧទ្ធរណ៍​មិន​ទាន់​បញ្ចប់

130606_01
អ្នកស្រីយ៉ោម បុប្ជា លើកបង្ហាញខ្នោះដៃ ស្រែកទាំងការឈឺចាប់ ខណៈឆ្មាំពន្ធនាគារ ដឹកពីពន្ធនាគារមកដល់មុខសាលាឧទ្ធរណ៍កាលពីម្សិលមិញ ម៉ៃ វីរៈ

ភ្នំពេញៈ សកម្មជន​តវ៉ា​បញ្ហា​ដី​ធ្លី​តំបន់​បឹងកក់​អ្នក​ស្រី យ៉ោម បុប្ផា បាន​ចាក​ចេញ​ពី​សាលា​ឧទ្ធរណ៍​ក្នុង​រាជធានី​ភ្នំពេញ​កាល​ពី​ម្សិលមិញ​ដោយ​ស្រែក​សុំ​ឲ្យ​មាន​យុត្តិធម៌​បន្ទាប់​ពី​ចៅក្រម​បាន​ផ្អាក​សវនាការ​របស់​អ្នក​ស្រី​រហូត​ថ្ងៃ​សុក្រ​សប្តាហ៍​ក្រោយ​ទើប​បន្ត​និង​បាន​បញ្ជា​ឲ្យ​នាំ​អ្នក​ស្រី​ទៅ​ពន្ធនាគារ​វិញ។

ស្រ្តី​សកម្ម​ជន​វ័យ​២៩ឆ្នាំ​រូប​នេះ​ដែល​ត្រូវ​បាន​កាត់​ទោស​ឲ្យ​ជាប់​ពន្ធនាគារ​ចំនួន​៣​ឆ្នាំ​កាល​ពី​ខែ​ធ្នូ​ឆ្នាំ​មុន​ពាក់​ព័ន្ធ​នឹង​ករណី​ចោទ​ប្រកាន់​ថា អ្នក​ស្រី​បាន​បញ្ជា​ឲ្យ​មាន​ការ​វាយ​ប្រហារ​ដោយ​ប្រើ​ពូថៅ និង​ទួរណឺវីស​ទៅ​លើ​អ្នក​រត់​ម៉ូតូ​ឌុប​ពីរ​នាក់​ត្រូវ​បាន​នាំ​ឡើង​រថយន្ត​ពន្ធនាគារ PJ បន្ទាប់​ពី​សវនាការ​នៅ​តុលាការ​ប្រព្រឹត្ត​ទៅ​អស់​រយៈ​ពេល​ជាង​បី​ម៉ោង។

លោក​ចៅ​ក្រម ចាយ ច័ន្ទតារាវណ្ណ បាន​ថ្លែង​ថា​៖ «យើង​នឹង​បន្ត​ការ​ជំនុំ​ជម្រះ​នៅ​ថ្ងៃ​ទី១៤ មិថុនា វេលា​ម៉ោង​២​រសៀល​ពី​ព្រោះ​ឥឡូវ​នេះ​វា​ម៉ោង​៦​ល្ងាច ហើយ យើង​ត្រូវ​បន្ត​ស្តាប់​សាក្សី​ទាំង​៦​នាក់​ដែល​មក​ពី​ភាគី​ទាំង​ពីរ​»។ តែ​លោក​បន្ត​ថា​៖ «យើង​មិន​អាច​បន្ត​សវនាការ​លើ​សំណុំ​រឿង​នេះ​ទាំង​យប់​បាន​ទេ»។

ផ្អែក​លើ​ការ​ជំនុំ​ជម្រះ​នៅ​សាលា​ឧទ្ធរណ៍​ក្នុង​សវនាការ​កាល​ពី​ម្សិលមិញ​មាន​ការ​កត់​សម្គាល់​ចំពោះ​ការ​ឆ្លើយ​តប​ហាក់​បី​ដូច​ជា​ផ្ទុយ​ដោយ លោក ង៉ែត ចិត្រ អាយុ​២៨ឆ្នាំ និង​បង​ប្អូន​ជីដូន​មួយ​របស់​គាត់​គឺ លោក វ៉ាត ថៃ​សេង អាយុ​២៤​ឆ្នាំ ដែល​អ្នក​រត់​ម៉ូតូ​ឌុប​ទាំង​ពីរ​នាក់​នេះ បាន​អះ​អាង​ថា អ្នក​ស្រី យ៉ោម បុប្ផា​បាន​បញ្ជា​បង​ប្អូន​ប្រុស​ឈ្មោះ យ៉ោម កន្លង់ និង យ៉ោម សិដ្ឋ វាយ​ពួក​គេ​នៅ​ក្នុង​បារ៍ និង​ផ្ទះ​សំណាក់​កាល​ពី​ខែ​សីហា។

លោក វ៉ាត ថៃសេង បាន​ថ្លែង​ថា ឈ្មោះ យ៉ោម កន្លង់ បាន​វាយ​ប្រហារ​គាត់​ដោយ​ប្រើ​ទួរណឺវីស​ចាក់​ត្រូវ​ចំ​សៀត​ផ្កា​និង​ត្រូវ​ចំ​កណ្តាល​ក្បាល។

លោក វ៉ាត ថៃសេង បាន​បន្ត​និយាយ​ថា​៖ «​នៅ​ពេល​យ៉ោម កន្លង់ វាយ​ខ្ញុំ យ៉ោម សិដ្ឋ បាន​វាយ​ប្រហារ​មិត្ត​របស់​ខ្ញុំ​ដោយ​ប្រើ​ពូថៅ​កាប់​ហើយ​បាន​បណ្តាល​ឲ្យ​គាត់​ដួល​សន្លប់​»។

Content image - Phnom Penh Post

ប៉ុន្តែ​លោក ច័ន្ទ​តារាវណ្ណ​ដែល​ជា​ចៅក្រម​ម្នាក់​ក្នុង​ចំណោម​ចៅក្រម​បី​នាក់​លើ​សំណុំ​រឿង​នេះ​បាន​ចោទ​សួរ​ចំពោះ​ការ​រៀប​រាប់​នេះ​ដោយ​ថ្លែង​ថា ថៃសេង កាល​ពី​ដំបូង​បាន​ប្រាប់​ចៅក្រម​ស៊ើប​សួរ​ក្នុង​សំណុំ​រឿង​នេះ​ថា បង​ប្អូន​ប្រុស​របស់​អ្នក​ស្រី យ៉ោម បុប្ផា​ដទៃ​ទៀត​ជា​អ្នក​វាយ​គាត់។

លោក​ចៅក្រម​បាន​បន្ត​ថា​៖ «អ្នក​និយាយ​ក្នុង​អំឡុង​ការ​ស៊ើប​អង្កេត​ពី​ដំបូង​ថា យ៉ោម សិដ្ឋ បាន​វាយ​ប្រហារ​អ្នក»។

លោក ថៃសេង​មិន​បាន​ផ្តល់​ការ​ឆ្លើយ​តប ចំពោះ​ការ​លើក​ឡើង​នេះ​ទេ​។​លោក​ចិត្រ បាន​និយាយ​ថា ឈ្មោះ សិដ្ឋ បាន​វាយ​គាត់​ពីរ​ដង​ចំ​ក្បាល​ដោយ​ប្រើ​ពូថៅ​។ តែ​ចៅក្រម ច័ន្ទ​តារាវណ្ណ បាន​រំឭក​ថា កាល​ពី​ពេល​មុន​គាត់​និយាយ​ថា​ឈ្មោះ កន្លង់ ជា​អ្នក​វាយ​ប្រហារ​គាត់​។

នៅ​ក្នុង​ការ​ការពារ​អ្នក​រត់​ម៉ូតូ​ឌុប​ទាំង​ពីរ​នាក់​អយ្យការ​លោក តាន់ សេណារ៉ុង បាន​ថ្លែង​ថា ការ​រៀប​រាប់​របស់​ពួកគេ​គឺ​ដូច​នឹង​ការ​រៀប​រាប់​នៅ​ក្នុង​អំឡុង​ការ​ជំនុំ​ជម្រះ​របស់​អ្នក​ស្រី យ៉ោម បុប្ផា នៅ​សាលា​ដំបូង​រាជធានី​ភ្នំពេញ​កាល​ពី​ចុង​ខែ​ធ្នូ​ដែរ។

លោក​បន្ត​ថា​៖ «ដូច្នេះ​តុលាការ​គួរ​ផ្តោត​ទៅ​ករណី​របួស​របស់​ពួក​គេ​វិញ​»។

នៅ​ក្នុង​សក្ខីកម្ម​ខុស​គ្នា​រវាង​លោក ថៃ​សេង លោក ចិត្រ បាន​បដិសេធ​ចំពោះ​ការ​ដួល​សន្លប់​នោះ​ហើយ​ដែល​បាន​និយាយ​ថា គាត់​បាន​ឃើញ​យ៉ាង​ច្បាស់​ចំពោះ​ព្រឹត្តិការណ៍​ដែល​កើត​ឡើង​បន្ត​បន្ទាប់។

លោក​ចៅក្រម ច័ន្ទ​តារាវណ្ណ បាន​សួរ​ថា​៖ «តើ​អ្នក​ស្គាល់​[​បង​ប្អូន​ប្រុស​របស់ យ៉ោម បុប្ផា​]​មុន​ការ​វាយ​ប្រហារ​នោះ​ទេ​?»

លោក ចិត្រ​បាន​ឆ្លើយ​ថា គាត់​មិន​ស្គាល់​ទេ ហើយ​នៅ​ពេល​ជំរុញ​ឲ្យ​ពន្យល់​អំពី​ថា​តើ​គាត់​ស្គាល់​បង​ប្អូន​របស់ យ៉ោម បុប្ផា បែប​ណា​គាត់​ថ្លែង​ថា គាត់​«ឮ​គេ​និយាយ​ថា​បង​ប្អូន​ប្រុស​ទាំង​ពីរ​នាក់​នេះ​វាយ​ពួក​គាត់»។

លោក​ចៅ​ក្រម ច័ន្ទ​តារាវណ្ណ សាក​សួរ​បន្ត​ថា​៖ «តើ​អ្នក​បាន​ឮ​ពី​នរណា​ម្នាក់​ឬ​តើ​អ្នក​ស្គាល់​ប្រាកដ​ថា ពិត​ជា​បង​ប្អូន​ប្រុស​ទាំង​ពីរ​នាក់​របស់​យ៉ោម បុប្ផា?»។

លោក ង៉ែត ចិត្រ ឆ្លើយ​តប​ទៅ​ចៅ​ក្រម​វិញ​ថា​៖ «ខ្ញុំ​បាន​ឮ​ត​ពី​គេ​ដែរ​ទេ​»។

ឯ​សំណួរ​ពាក់​ព័ន្ធ​ថា​តើ​បុរស​ទាំង​ពីរ​នាក់​នោះ​បាន​ផឹក​ស្រា​កម្រិត​ណា​នៅ​យប់​នោះ​ក៏​ត្រូវ​បាន​លើក​ឡើង​ផង​ដែរ៕ PS

អត្ថបទគួរចាប់អារម្មណ៍