ភ្នំពេញៈ សហភាពសហព័ន្ធអ្នកសារព័ត៌មានកម្ពុជា (ស.ស.ស.ក) កាលថ្ងៃទី ២៩ ខែតុលា បានផ្ដួចផ្ដើមគំនិតបង្កើត «គណៈកម្មាធិការកម្ពុជា វាយតម្លៃសេរីភាពសារព័ត៌មាន» ដែលហៅកាត់ថា «ស៊ីម៉ា» ដើម្បីជាយន្ដការថ្មីមួយក្នុងការដើរតួនាទីសរសេររបាយការណ៍វាយតម្លៃអំពីស្ថានភាព និងលំហសេរីភាពសារព័ត៌មាននៅក្នុងប្រទេសកម្ពុជា។
សេចក្ដីប្រកាសព័ត៌មានរបស់ ស.ស.ស.ក បានបញ្ជាក់ថា៖ «គណៈកម្មាធិការកម្ពុជាវាយតម្លៃសេរីភាពសារព័ត៌មាន» ហៅកាត់ថា «ស៊ីម៉ា» ឈ្មោះជាភាសាអង់គ្លេសថា The Cambodian Committee for Media Assessment (CCMA) កើតឡើងដោយផ្តើមចេញពីលទ្ធផលសមាជលើកទី ២ របស់ ស.ស.ស.ក កាលពីថ្ងៃទី ១២ ខែតុលា ឆ្នាំ ២០១៩។ ការបង្កើតគណៈកម្មាធិការនេះដើម្បីជាយន្តការថ្មីមួយដើរតួនាទីសរសេររបាយការណ៍វាយតម្លៃអំពីស្ថានភាព និងលំហសេរីភាពសារព័ត៌មាននៅប្រទេសកម្ពុជា។
សេចក្ដីប្រកាសបញ្ជាក់ថា៖ «នេះគឺជាលើកដំបូងក្នុងប្រវត្តិសាស្ត្រវិស័យសារព័ត៌មាននៅប្រទេសកម្ពុជា ដែលរៀបចំយន្តការវាយតម្លៃខ្លួនឯង ឆ្លុះបញ្ចាំងពីខ្លួនឯង ហ៊ានទទួលស្គាល់ការពិតដើម្បីកែលម្អក៏ដូចជាស្នើសុំផ្នែកពាក់ព័ន្ធឲ្យចូលរួមកែលម្អទាំងអស់គ្នា ដើម្បីធ្វើឲ្យគុណភាពសារព័ត៌មានកាន់តែប្រសើរឡើង ដើម្បីធ្វើឲ្យលំហសេរីភាពនៅប្រទេសកម្ពុជាកាន់តែទូលំទូលាយ ធ្វើឲ្យសារព័ត៌មានមានតួនាទីកាន់តែសំខាន់នៅក្នុងដំណើរការប្រជាធិបតេយ្យ និងរួមចំណែកអភិវឌ្ឍសង្គមជាតិមួយមានវិបុលភាពសុខដុមរមនា និងចីរភាព»។
ស.ស.ស.ក បានចាត់ទុកថាក្នុងនាមជាអ្នកសារព័ត៌មាន និងជាពលរដ្ឋរបស់ប្រជាជាតិមួយមិនគួរនៅស្ងៀមបន្តស្តាប់ និងអានតែរបាយការណ៍របស់ភ្នាក់ងារបរទេសដែលវាយតម្លៃពីខាងក្រៅអំពីគុណតម្លៃសារព័ត៌មាននៅកម្ពុជានោះឡើយ។
ស.ស.ស.ក បានបញ្ជាក់ថា៖ «យើងត្រូវតែឈរលើការពិត ឆ្លុះបញ្ចាំងចេញពីខ្លួនយើងជាមុន ដើម្បីយកជាមូលដ្ឋានប្រៀបធៀបជាមួយនឹងរបាយការណ៍បរទេសដើម្បីរកឲ្យឃើញនូវសុចរិតភាពនៃរបាយការណ៍នីមួយៗ ហើយយកមកកែលម្អ។ យើងទទួលស្គាល់ថា តួនាទីសារព័ត៌មានដែលមានគុណភាព សេរី និងប្រកបដោយវិជ្ជាជីវៈ គឺមានគុណតម្លៃរួមចំណែកជួយដល់សង្គមមួយមានអភិបាលកិច្ចល្អ និងធ្វើឲ្យលំហប្រជាធិបតេយ្យកាន់តែទូលំទូលាយ»។
លោក ខៀវ កាញារីទ្ធ រដ្ឋមន្ដ្រីក្រសួងព័ត៌មានកាលពីពេលចូលរួមជាអធិបតីបិទសមាជលើកទី ២ របស់ ស.ស.ស.ក បានថ្លែងគាំទ្រគំនិតផ្ដួចផ្ដើមបង្កើត គណៈកម្មាធិការនេះឡើង។
លោកបានថ្លែងថា៖ «បរទេសដែលសរសេររបាយការណ៍អំពីសេរីភាពសារព័ត៌មានគឺមួយចំនួនមិនមែនជាអ្នកកាសែត ឬអ្នកសារព័ត៌មានផងទេ។ ចង់ឲ្យតួនាទីសារព័ត៌មានចូលរួមចំណែកលើកកិត្តិយសជាតិ គឺត្រូវចាប់ផ្ដើមពីការលើកកិត្ដិយសអ្នកសារព័ត៌មានជាមុនសិន»។
លោក ហ៊ុយ វណ្ណៈ ប្រធាន ស.ស.ស.ក បានបញ្ជាក់បន្ថែមថា គណៈកម្មាធិការនេះនឹងរួមគ្នាជាមួយសហភាពសហព័ន្ធសារព័ត៌មាន, ក្លិបសារព័ត៌មាន,សម្ព័ន្ធសារព័ត៌មាន, សហជីពសារព័ត៌មាន, សមាគមសារព័ត៌មាន, ប្រធានអង្គភាពសារព័ត៌មាន និពន្ធនាយក គ្រូបង្រៀនសារព័ត៌មាន ព្រឹទ្ធាចារ្យសារព័ត៌មាន និងនីតិបុគ្គលជាអ្នកសារព័ត៌មានជាដើម ដើម្បីពិនិត្យលើភាពពិតជាក់ស្ដែងអំពីទិដ្ឋភាពនៃសារព័ត៌មាននៅកម្ពុជា។
លោកថ្លែងថា៖ «យើងមានផែនការ ១៣ ចំណុច ដើម្បីវាយតម្លៃលើទិដ្ឋភាព គុណភាព ការរំលោភបំពាន ឬក៏សិទ្ធិនៃការបំពេញតួនាទីរបស់សារព័ត៌មាន ដើម្បីអាចឲ្យយើងរួមគ្នាកែលម្អសម្រាប់ទុកជាម៉ែត្រវាស់សេរីភាពសារព័ត៌មានរបស់យើង»។
លោក ណុប វី នាយកមជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ (CCIM) មិនទាន់អាចអះអាងបានថា អាចនឹងចូលរួមជាមួយគណៈកម្មាធិការនេះឬអត់នោះទេ តែនឹងរង់ចាំការពិនិត្យជាមុនសិនលើគុណតម្លៃនៃគណៈកម្មាធិការនេះ។
លោកថ្លែងថា៖ «អ្វីក៏ដោយដែលមានប្រយោជន៍ដល់អ្នកសារព័ត៌មានខ្មែរមានសារៈប្រយោជន៍ដល់ការលើកកម្ពស់សេរីភាពវិជ្ជាជីវៈសារព័ត៌មាន និងការជួយការពារវិជ្ជាជីវៈសារព័ត៌មានដោយសេរី នោះគឺជាអ្វីដែលយើងទាំងអស់គ្នាកំពុងធ្វើ។ ដូច្នេះឲ្យតែមានតម្លៃដូចការលើកឡើងនេះ យើងនឹងចូលរួម ។ ប៉ុន្ដែត្រង់ថាតើគណៈកម្មាធិការនេះមានគុណតម្លៃបែបនេះ ឬក៏អត់យើងនឹងរង់ចាំពិនិត្យមើលជាបន្តទៀត»៕