ស្ទឹងត្រែង៖ ប្រជាសហគមន៍ជនជាតិដើមភាគតិចគ្រឹងប្រមាណជាង ៣០ គ្រួសារ នៅភូមិរំពាត់ និងភូមិតាឡាត ឃុំតាឡាត ស្រុកសេសាន បានអះអាងថា នៅពេលនេះក្រុមហ៊ុន SK Plantation (Cambodia) Pte., Ltd ដែលវិនិយោគលើដំណាំកសិឧស្សាហកម្ម បានឈូសឆាយដីចំការដំណាំរបស់ពួកគាត់ និងគំរាមកំហែងបណ្ដេញពួកគាត់ឲ្យចេញពីទីតាំងដីដែលកំពុងរស់នៅ និងអាស្រ័យផលជាង ២០ ឆ្នាំមកហើយ។
តំណាងសហគមន៍ជនជាតិដើមភាគតិចគ្រឹង នៅភូមិរំពាត់ លោក ស៊ិន ដាវ អាយុ ៤២ ឆ្នាំ បានប្រាប់ ភ្នំពេញ ប៉ុស្តិ៍ នៅថ្ងៃទី ០៣ ខែឧសភាថា នៅពេលនេះ ខាងក្រុមហ៊ុនបានប្រើកម្លាំងសន្តិសុខ មកហាមឃាត់ពួកគាត់មិនឲ្យដាំដុះដំណាំចម្ការវិលជុំលើទីតាំងដីសមូហភាពរបស់ពួកគាត់ទៀតទេ។
បើតាមតំណាងសហគមន៍រូបនេះ ក្រុមហ៊ុនអះអាងថា ដីដែលពលរដ្ឋបានរស់នៅនឹងអាស្រ័យផលតាមលក្ខណៈប្រពៃណីដូនតាមកនោះ បច្ចុប្បន្នជាដីរបស់ក្រុមហ៊ុនដែលទទួលបានសិទ្ធិវិនិយោគពីរដ្ឋាភិបាលតាមរយៈក្រសួងកសិកម្ម រុក្ខាប្រមាញ់ និងនេសាទ ដើម្បីអភិវឌ្ឍនដំណាំកសិឧស្សាហកម្ម។
លោកថ្លែងថា៖ «ឥឡូវនេះ ពួកគេ [ភាគីក្រុមហ៊ុន] បានប្រើគ្រឿងចក្រឈូសឆាយព្រៃអារក្ស និងចម្ការដំណាំរបស់ពួកយើងសរុបប្រមាណជាង ៣០ ហិកតាហើយ និងបានរុះរើផ្ទះរបស់អ្នកភូមិយើងអស់ចំនួន ៣ ខ្នង។ ពួកគេបានហាមពួកយើងមិនឲ្យសង់ផ្ទះថ្មី និងដាំដុះដំណាំចម្ការវិលជុំតទៅទៀតទេ»។
បើតាម ស៊ិន ដាវ ដីព្រៃសមូហភាពរបស់សហគមន៍ទាំងប៉ុន្មាន គឺស្ថិតនៅក្នុងទីតាំងដីរបស់ក្រុមហ៊ុនទាំងអស់។
ចំណែក លោក គ្លីម យឿង អាយុ ៧៥ ឆ្នាំ ដែលជាចាស់ទុំ និងជាមេភូមិរំពាត់ បាននិយាយបន្ទរថា៖ «នៅក្នុងកិច្ចប្រជុំពិគ្រោះយោបល់នាពេលកន្លងមក ទាំងភាគីក្រុមហ៊ុន និងអាជ្ញាធរពាក់ព័ន្ធ បានសម្រេចឯកភាពកាត់ឆ្វៀលដីសហមូហភាពរបស់សហគមន៍យើងខ្ញុំចេញពីគម្រោងអភិវឌ្ឍន៍ដំណាំកសិឧស្សាហកម្មរបស់ក្រុមហ៊ុននេះហើយ»។
ប៉ុន្តែបច្ចុប្បន្នមិនដឹងជាមានរឿងអ្វីទៀតនោះទេ ស្រាប់តែក្រុមហ៊ុនចាត់ឲ្យតំណាងម្នាក់ឈ្មោះ សម្បត្តិ មកឃាត់អ្នកភូមិមិនឲ្យសង់ផ្ទះថ្មី និងដាំដំណាំចម្ការវិលជុំ ដោយអះអាងថា ដីសមូហភាពរបស់សហគមន៍ទាំងនេះគឺ ស្ថិតនៅក្នុងទីតាំងដីរបស់ពួកគេទៅវិញ។
ទន្ទឹមនឹងនេះ លោក យឿង បានអំពាវនាវសុំឲ្យអាជ្ញាធរឃុំ-ស្រុក និងថ្នាក់ខេត្ត ព្រមទាំងអង្គភាពពាក់ព័ន្ធនានា ជួយអន្តរាគមន៍រកដំណោះស្រាយលើករណីនេះ ជូនប្រជាពលរដ្ឋនៅក្នុងសហគមន៍ពួកគាត់ផង។
ភ្នំពេញ ប៉ុស្តិ៍ បានព្យាយាមទាក់ទងទៅភាគីក្រុមហ៊ុន SK Plantation (Cambodia) Pte., Ltd ជាច្រើនដង ហើយបុរសម្នាក់ដែលប្រាប់ថា ឈ្មោះ សម្បត្តិ ជាមេការក្រុមហ៊ុនប្រចាំក្នុងតំបន់ខាងលើនេះ បាននិយាយយ៉ាងខ្លីថា នៅពេលនេះក្រុមហ៊ុនកំពុងដំណើរការអភិឌ្ឍន៍លើវិស័យដាំដុះដំណាំកសិឧស្សាហកម្ម តាមផែនការដែលបានគ្រោងទុក។
លោកបានបន្ថែមថា៖ «ខ្ញុំអាចប្រាប់បានតែប៉ុណ្ណឹង បើចង់ដឹងលើសពីនេះ សូមសួរទៅក្រសួង ឬមន្ទីរកសិកម្ម រុក្ខាប្រមាញ់ និងនេសាទ ដែលជាស្ថាប័នជំនាញ ទទួលបន្ទុកក្នុងការឃ្លាំមើលអំពីដំណើរការអភិវឌ្ឍន៍របស់ក្រុមហ៊ុនយើងខ្ញុំចុះ ព្រោះនៅពេលនេះ ខ្ញុំមានកិច្ចការជាច្រើនទៀត ដែលត្រូវធ្វើ»។
លោក ជា កុណារ៉ា នាយផ្នែករដ្ឋបាលព្រៃឈើ ស្រុកកូនមុំបានប្រាប់ ភ្នំពេញ ប៉ុស្តិ៍ថា រដ្ឋាភិបាលតាមរយៈក្រសួងកសិកម្មបានផ្ដល់ដីសម្បទានសេដ្ឋកិច្ចទៅឲ្យក្រុមហ៊ុន SK Plantation (Cambodia) Pte., Ltd ជាង ៦ ៥០០ ហិកតា នៅក្នុងភូមិសាស្ត្រស្រុកចំនួន ២ គឺស្រុកកូនមុំ នៃខេត្តរតនគិរី និងស្រុកសេសាន នៃខេត្តស្ទឹងត្រែង ដើម្បីដាំដុះដំណាំកសិឧស្សាហកម្ម។
លោកបានថ្លែងថា៖ «មុនពេលចុះបញ្ជីផ្ទេរកម្មសិទ្ធិទៅឲ្យក្រុមហ៊ុននេះ ក្រុមគណៈកម្មការជំនាញដែលមានក្រសួងកសិកម្ម ជាប្រធានបានសម្រេចកាត់ឆ្វៀលដីសមូហភាពរបស់ប្រជាពលរដ្ឋជនជាតិដើមភាគតិចទាំងអស់ចេញពីគម្រោងហើយ។ យ៉ាងណាក៏ដោយ បញ្ហាវិវាទដីធ្លីនេះ នៅតែបន្តកើតមាននៅគ្រប់កន្លែង ដោយនៅកន្លែងខ្លះអ្នកភូមិជាអ្នកបំពាន ហើយកន្លែងខ្លះក៏មានការបំពានពីខាងក្រុមហ៊ុនផងដែរ»។
បើតាមលោក កុណារ៉ា អ្នកភូមិដែលមានបញ្ហាខាងលើនេះ គួរដាក់សំណើសុំកិច្ចអន្តរាគមន៍ទៅអាជ្ញាធរមូលដ្ឋាន ឬគណៈកម្មការគ្រប់គ្រងដីរដ្ឋថ្នាក់ស្រុក និងថ្នាក់ខេត្ត និងស្ថាប័នពាក់ព័ន្ធមួយចំនួនទៀត ដោយភ្ជាប់មកនូវឯកសារយោងមួយចំនួន ដើម្បីមានដំណោះស្រាយទៅតាមនីតិវិធីច្បាប់៕