.jpg)
ប្រជាសហគមន៍រៀបចំតំបន់អភិរក្សបរិស្ថាន។ រូបថត សហការី
ភ្នំពេញៈ អគ្គនាយកសហគមន៍មូលដ្ឋាននៃក្រសួងបរិស្ថាន និង UNDP បានសម្រេចជ្រើសរើសសហគមន៍តំបន់ការពារធម្មជាតិចំនួន ៥ ដើម្បីផ្ដល់ហិរញ្ញប្បទានខ្នាតតូចបន្តសម្រាប់កម្មវិធី (Global Environment Facility) របស់អង្គការ UNDP ដើម្បីអភិវឌ្ឍន៍សហគមន៍នៅក្នុងប្រទេសកម្ពុជា។
យោងតាមលោក គឹម សារិន អនុប្រធាននាយកដ្ឋានជីវភាពសហគមន៍នៃអគ្គនាយកដ្ឋានសហគមន៍មូលដ្ឋានថ្លែងប្រាប់ភ្នំពេញប៉ុស្ដិ៍កាលពីថ្ងៃអាទិត្យម្សិលមិញថា ក្រោយបានចូលរួមកិច្ចប្រជុំជាមួយគណៈកម្មការវាយតម្លៃថ្នាក់ជាតិសម្រាប់ការផ្តល់គម្រោងខ្នាតតូចរបស់អង្គការ UNDP ដើម្បីវាយតម្លៃចុងក្រោយក្នុងការផ្តល់ហិរញ្ញប្បទានកាលពីថ្ងៃសុក្រ ទី ៥ ខែមិថុនា ឆ្នាំ ២០២០។
លោកថ្លែងថា អង្គប្រជុំបានសម្រេចយកសហគមន៍ចំនួន ៦ ដើម្បីបន្តសរសេរគម្រោងពេញលេញ។ ក្នុងចំណោមសហគមន៍ទាំង ៦ នោះគឺមានសហគមន៍តំបន់ការពារធម្មជាតិចំនួន ៥ នឹងទទួលហិរញ្ញប្បទានខ្នាតតូចតាមរយៈកម្មវិធីអភិវឌ្ឍបរិស្ថាន (Global Environment Facility) របស់អង្គការ UNDP ដើម្បីអភិវឌ្ឍន៍សហគមន៍។ សហគមន៍ទាំង ៥ នោះរួមមាន ១- សហគមន៍តំបន់ការពារធម្មជាតិ ភ្នំណាមលៀ ខេត្តមណ្ឌលគិរី។ ២- សហគមន៍តំបន់ការពារធម្មជាតិ មណ្ឌលយ៉ន ខេត្តមណ្ឌលគិរី។ ៣- សហគមន៍តំបន់ការពារធម្មជាតិ រាំងខ្វាវ ខេត្តពោធិ៍សាត់។ ៤- សហគមន៍តំបន់ការពារធម្មជាតិ ភ្នំទំព័រ ខេត្តពោធិ៍សាត់។ ៥- សហគមន៍តំបន់ការពារធម្មជាតិ ជាំពេន ខេត្តព្រះវិហារ។ ដោយឡែកសម្រាប់សហគមន៍តំបន់ការពារធម្មជាតិ ភ្នំទំព័រ និងជាំពេន នឹងត្រូវបំពេញលក្ខខណ្ឌក្នុងការសុំការឯកភាពពីក្រសួងបរិស្ថានលើការអនុញ្ញាតពង្រីកផ្ទៃដីព្រៃសហគមន៍លើទីតាំងគ្រោងធ្វើទេសចរណ៍ធម្មជាតិ។
លោក ខៀវ បូរិន អគ្គនាយកសហគមន៍មូលដ្ឋាននៃក្រសួងបរិស្ថានបានបញ្ជាក់បន្ថែមកាលពីម្សិលមិញថា តាមរយៈកម្មវិធីផ្ដល់ហិរញ្ញប្បទានរបស់អង្គការ UNDP ដើម្បីអភិវឌ្ឍន៍សហគមន៍សម្របតាមគោលនយោបាយរបស់រាជរដ្ឋាភិបាលក៏ដូចជាក្រសួងបរិស្ថានក្នុងការធ្វើយ៉ាងណាដើម្បីឲ្យជីវភាពប្រជាពលរដ្ឋនៅសហគមន៍មានភាពប្រសើរឡើង និងឲ្យពួកគាត់ចូលរួមការពារ អភិរក្សបរិស្ថាន និងធនធានធម្មជាតិ។
លោកថ្លែងថា៖ «ដូច្នេះដើម្បីឲ្យប្រជាពលរដ្ឋនៅក្នុងសហគមន៍ងាកមកចូលរួមថែរក្សា និងអភិរក្សបរិស្ថានគឺទាល់តែយើងរកជម្រើសថ្មីដែលអាចឲ្យពួកគាត់រកចំណូលបានក្នុងរយៈពេលមធ្យម និងខ្លីដែលមានការងារពាក់ព័ន្ធទៅនឹងការងារ កសិរុក្ខកម្មដូចជាការដាំដុះបន្ថែម ចិញ្ចឹម មាន់ ត្រី ឃ្មុំ និងស្វែងរកទីផ្សារសម្រាប់ពួកគាត់»។
លោក ខៀវ បូរិន បានឲ្យដឹងថា បច្ចុប្បន្នក្រសួងបរិស្ថានបានបង្កើតសហគមន៍ដែលជាតំបន់ការពារធនធានធម្មជាតិនៅទូទាំងប្រទេសបានចំនួន ១៧៤ សហគមន៍ និងកំពុងបន្តជំរុញបង្កើតសហគមន៍នៅតំបន់ការពារធនធានធម្មជាតិនៅតាមសហគមន៍ផ្សេងៗទៀត។ លោកបន្តថា ជារៀងរាល់ឆ្នាំតាមរយៈកម្មវិធីហិរញ្ញប្បទានខ្នាតតូចរបស់អង្គការ UNDP ដើម្បីអភិវឌ្ឍន៍សហគមន៍បានផ្ដល់ថវិកាប្រមាណ ៥ ម៉ឺនដុល្លារអាមេរិកក្នុង ១ សហគមន៍សម្រាប់រយៈពេល ១ ឆ្នាំកន្លះ។
លោក នេត្រភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថានបានឲ្យដឹងថា ការរៀបចំបង្កើតសហគមន៍តំបន់ការពារធម្មជាតិធ្វើឡើងដើម្បីបង្កើតជាដៃគូសន្ទនារវាងប្រជាសហគមន៍ និងរាជរដ្ឋាភិបាលផ្លាស់ប្តូរយោបល់គ្នា ស្វែងរកដំណោះស្រាយរួមគ្នាចូលរួមក្នុងការការពារ និងអភិរក្សធនធានធម្មជាតិក៏ដូចជាចូលរួមអភិរក្សបេតិកភណ្ឌវប្បធម៌ប្រពៃណីទាំងរូបី និងអរូបីឲ្យបានគង់វង្ស និងចូលរួមជាមួយរាជរដ្ឋាភិបាលក្នុងការបង្កើតអេកូទេសចរណ៍ដើម្បីបង្កើនសេដ្ឋកិច្ចមូលដ្ឋាន។
លោកថ្លែងថា៖ «រាជរដ្ឋាភិបាលកម្ពុជា ក្រសួងបរិស្ថានចង់ឃើញស្នាមញញឹម សាមគ្គីភាពរបស់បងប្អូនប្រជាសហគមន៍កាន់តែរឹងមាំ កូនៗរបស់បងប្អូនប្រជាពលរដ្ឋសិក្សាបានជ្រៅជ្រះ រៀបចំសេដ្ឋកិច្ចសហគមន៍មានការរីកចម្រើននិងធនធានធម្មជាតិត្រូវបានការពារបានល្អប្រសើរសម្រាប់មនុស្សរាប់ជំនាន់តទៅមុខទៀត»៕
