ភ្នំពេញៈ បណ្តាញសហគមន៍នេសាទមកពី ៣ តំបន់ នៅជុំវិញបឹងទន្លេសាប ទន្លេមេគង្គ និងតំបន់ឆ្នេរនឹងជួបពិភាក្សាគ្នានៅថ្ងៃសុក្រ ដើម្បីស្វែងរកយន្តការសម្រាប់ធ្វើការគ្រប់គ្រង និងអភិរក្សធនធានជលផលនៅក្នុងប្រទេសកម្ពុជា ខណៈបណ្តាញសហគមន៍ទាំងនោះបារម្ភពីបទល្មើសនេសាទកើនឡើង ស្របពេលរដូវនេសាទចាប់ផ្តើមបើក។
លោក ឱម សាវ៉ាត នាយកប្រតិបត្តិសម្ព័ន្ធភាពដើម្បីការអភិរក្សធនធានជលផល (FACT) បានប្រាប់ភ្នំពេញប៉ុស្តិ៍កាលពីម្សិលមិញថា ការជួបពិភាក្សានេះនឹងធ្វើឡើងនៅរាជធានីភ្នំពេញ ដោយមានប្រជាសហគមន៍នេសាទប្រមាណជិត ១០០ នាក់ មកពី ៣ តំបន់ក្នុងខេត្តចំនួន ៦ ជុំវិញបឹងទន្លេសាប និងមកពីខេត្តចំនួន ៣ ជុំវិញទន្លេមេគង្គព្រមទាំងមកពីខេត្តចំនួន ៤ ដែលនៅជាប់មាត់សមុទ្រ។
លោកបន្តថា ការជួបពិភាក្សាគ្នានេះគឺធ្វើកម្មវិធីមួយដែលធ្វើឡើងជាទៀងទាត់ ២ ដងក្នុង ១ ឆ្នាំ ដើម្បីលើកពីបញ្ហាប្រឈមដែលប្រជាសហគមន៍ជួបប្រទះក្នុងរយៈពេល ៦ ខែ សម្រាប់ធ្វើការចែករំលែកគ្នា និងលើកយកបញ្ហាជាអតិភាពដាក់ជូនអាជ្ញាធរមានសមត្ថកិច្ចតាមមូលដ្ឋានរបស់ពួកគេដោះស្រាយ ខណៈបញ្ហាប្រឈមដែលថ្នាក់មូលដ្ឋាន មិនអាចដោះស្រាយបាននឹងដាក់ជូនថ្នាក់ជាតិបន្តទៀត។
លោកបញ្ជាក់ថា៖ «បញ្ហាប្រឈមរបស់ប្រជាសហគមន៍នេសាទគឺទាក់ទងនឹងបទល្មើសនេសាទ ព្រោះបទល្មើសនេះគឺជារឿងមួយដ៏រសើប ហើយក្តៅគគុកដែលយើងខិតខំប្រឹងប្រែងទប់ស្កាត់ ប៉ុន្តែនៅតែបន្តមានហើយឥឡូវរដូវបើកនេសាទចាប់ផ្ដើមផង។ ចំណែកចំណុចមួយទៀតការខ្វះខាតធនធាន (ថវិកា) ដែលប្រជាសហគមន៍ត្រូវធ្វើសកម្មភាពក្នុងមូលដ្ឋានរបស់គាត់ដោយត្រូវតែសហការជាមួយស្ថាប័នជំនាញតាមមូលដ្ឋាន»។
ក្រៅពីបញ្ហាទាំងនេះលោក សាវ៉ាត ក៏បានថ្លែងដែរថា គួរបញ្ជ្រាបការយល់ដឹងដល់ពលរដ្ឋឲ្យយល់អំពីច្បាប់ ជាពិសេសច្បាប់ជលផល និងការប្រើប្រាស់ឧបករណ៍នេសាទដើម្បីចៀសវាងនូវទោសទណ្ឌនានា ព្រោះតែចំណេះដឹងរបស់ប្រជានេសាទនៅមានកម្រិតនៅឡើយ ដែលទាមទារនូវការអប់រំផ្សព្វផ្សាយដល់ពួកគាត់បន្ថែមទៀត។
តាមលោក ឱម សាវ៉ាត ក្តីបារម្ភ និងលទ្ធផលដែលសម្រេចបានក្នុងកិច្ចប្រជុំរបស់សហគមន៍នេសាទទាំង ៣ តំបន់នេះនឹងត្រូវដាក់បញ្ចូលក្នុងកិច្ចប្រជុំថ្នាក់ជាតិនាពាក់កណ្តាលខែនេះដែលមានក្រសួងស្ថាប័នពាក់ព័ន្ធចូលរួមដើម្បីពិនិត្យ និងធ្វើផែនការបន្តដើម្បីឈានទៅរកវិធានការដោះស្រាយរួមគ្នា។
លោក ឡុង សូចែត ប្រធានសម្ព័ន្ធប្រជានេសាទកម្ពុជារំពឹងថា កិច្ចប្រជុំនេះនឹងបានលើកឡើងអំពីបញ្ហាគ្រប់តំបន់ដែលប្រជាសហគមន៍បានជួបប្រទះស្របពេលរដូវបើកនេសាទបានចាប់ផ្តើម។
លោកបានបញ្ជាក់ថា៖ «បញ្ហាការនេសាទខុសច្បាប់នៅតែកើតមាន សំខាន់ការប្រែប្រួលអាកាសធាតុដែលទឹកឡើងចុះ មិនទៀងខុសពេលវេលានាំឲ្យអ្នកធ្វើនេសាទ បើនិយាយនៅតាមទន្លេសាបពិបាករកផលអនុផលត្រីតែម្តងព្រោះរកមិនបានដោយសារតែត្រីខ្សត់ទៅ»។
លោក អេង ជាសាន ប្រតិភូរាជរដ្ឋាភិបាលទទួលបន្ទុកប្រធានរដ្ឋបាលជលផលសុំមិនធ្វើការអត្ថាធិប្បាយជុំវិញបញ្ហានេះទេ ដោយគ្រាន់តែអះអាងថា រដ្ឋបាលជលផលបានចូលរួមសហការជាមួយប្រជាសហគមន៍ជាប្រចាំ និងទៀងទាត់។
លោកបញ្ជាក់ថា៖ «យើងបានចូលរួមជាប្រចាំដោយសារតែការជួបប្រជុំ មិនទាន់ចាប់ផ្តើម ដូច្នេះមិននិយាយអីទេ ចាំលោកស្រីចូលរួមកិច្ចពិភាក្សាក្នុងពេលនោះតែម្តងទៅ ព្រោះយើងមិនទាន់បានជួបគ្នាទេ»។
តាមព្រឹត្តិបត្រសម្ព័ន្ធភាពដើម្បីការអភិរក្សធនធានជលផល បច្ចុប្បន្នកម្ពុជាមានសហគមន៍នេសាទចំនួន ៥១៦ សហគមន៍ ដែលសហគមន៍ទាំងនេះកំពុងរស់នៅតាមដងទន្លេសាប ទន្លេមេគង្គ និងតាមតំបន់ឆ្នេរ៕