.jpg)
ភ្នំពេញ តំណាងសហគមន៍នៅឃុំប្រមេរុ ស្រុកត្បែងមានជ័យ ខេត្តព្រះវិហារ ដែលកំពុងមានជម្លោះដីធ្លីជាមួយក្រុមហ៊ុនដាំស្ករអំពៅចិនចំនួន ២ បានស្នើឱ្យស្ថាប័នពាក់ព័ន្ធ ជាពិសេស ក្រសួងដែនដីនគរូបនីយកម្ម និង សំណង់ពន្លឿនការដោះស្រាយដីធ្លីជូនពួកគាត់ ខណៈពួកគាត់កំពុងត្អូញត្អែរអំពីការបាត់បង់មុខរបរចិញ្ចឹមជីវិត។
កាលពីព្រឹកថ្ងៃទី ៨ សីហានេះ សហគមន៍ចំនួន ១៧ នាក់ដែលតំណាងឱ្យពលរដ្ឋចំនួន ៣ ភូមិ គឺភូមិប្រមេរុ ភូមិស្រែព្រាង និងភូមិបុះធំ នៃឃុំប្រមេរុ បានធ្វើសន្និសីទកាសែតមួយនៅឯភោជនីយដ្ឋានទន្លេបាសាក់ ១ ដើម្បីស្នើសុំឱ្យរដ្ឋមន្ត្រីក្រសួងដែនដី លោក ជា សុផារ៉ា ចាត់មន្ត្រីបច្ចេកទេសចុះវាស់វែងដីធ្លីសហគមន៍ ដែលត្រូវបានក្រុមហ៊ុនចិនឈ្មោះ ឡានហ្វេង និងក្រុមហ៊ុន រូយហ្វេង (ខេមបូឌា) អ៊ីនធើណេសិនណល ខមភេនី លីមីតធីត ឈូសឆាយរំលោភយក តាំងពីឆ្នាំ ២០១២ ដើម្បីចុះបញ្ជីជាដីកម្មសិទ្ធិសមូហភាពវិញ។
លោក ស៊ុត សាវន ប្រធានគណៈកម្មាធិការសហគមន៍ឃុំប្រមេរុ បានលើកឡើងថា ពលរដ្ឋទាំង៣ភូមិ ខ្លះបានជាប់បំណុលធនាគារ និងខ្លះទៀតចំណាកស្រុកបន្ទាប់ពីដីសហគមន៍ដែលធ្លាប់តែមានបឹងបួព្រៃឈើនិងសត្វព្រៃជាច្រើនប្រភេទដែលអាចជួយឱ្យពលរដ្ឋបរបាញ់ នេសាទ បោកវល្លិ ធ្វើចម្ការវិលជុំនិងការទទួលបានផលអនុផលព្រៃឈើជាច្រើនទៀតដើម្បីចិញ្ចឹមជីវិត។ ប៉ុន្តែបច្ចុប្បន្ននេះ មុខរបរប្រពៃណីទាំងនោះត្រូវបានបាត់បង់ទាំងស្រុងក្រោយពីមានក្រុមហ៊ុនចិនចូលទៅឈូសឆាយបំផ្លាញនិងដាំចម្ការអំពៅដោយគ្មានការពិភាក្សាជាមួយពលរដ្ឋ ។
លោកថា៖ «បើទោះបីជាខ្ញុំមិនបានស្រង់ស្ថិតិ ប៉ុន្តែបងប្អូននៅឃុំប្រមេរុហ្នឹងគឺមានជំពាក់ធនាគារច្រើនមែនទែនដោយសារតែមុខរបរប្រពៃណីរបស់ពួកគាត់ត្រូវបាត់បង់ ដូចជាដងជ័រទឹកអីជាដើម»។
ការធ្វើសន្និសីទកាសែតនេះ បន្ទាប់ពីក្រុមពលរដ្ឋទាំង ១៧ នាក់ បានឡើងមកភ្នំពេញ តាំងពីថ្ងៃទី ៤ សីហា ដើម្បីយកញត្តិទៅដាក់នៅក្រសួងដែនដី ខុទ្ទកាល័យលោក ហ៊ុន សែន និងសហភាពអឺរ៉ុបដើម្បីស្នើសុំពន្លឿនដំណោះស្រាយដីធ្លី ខណៈពួកគាត់បានអះអាងថា ក្រុមការងារជំនាញរបស់ក្រសួងដែនដី ទើបចុះទៅវាស់វែងដីជូនប្រជាពលរដ្ឋនៅឃុំប្រមេរ ចាប់ពីថ្ងៃទី ២៤ ខែមិថុនា និង បញ្ចប់វិញនៅថ្ងៃទី ៩ កក្កដានេះ ប៉ុន្តែ ពួកគាត់ថា ការចុះទៅរបស់មន្ត្រីនេះ គឺវាស់វែងបានតែដីលំនៅឋាន ដីថ្មកប់ខ្មោច និងស្រែតិចតួចប៉ុណ្ណោះនៅភូមិប្រមេរុ ដោយឡែកមិនបានវាស់វែងដីកំពុងមានជម្លោះដែលសហគមន៍កំពុងទាមទារឡើយ។
លោកស្រី ទេព ទឹម តំណាងសហគមន៍នៅភូមិប្រមេរុបានលើកឡើងដែរថា ចាប់តាំងពីកើតមានជម្លោះរយៈពេល ៧ ឆ្នាំមកនេះ គឺខាងពលរដ្ឋបានធ្វើការតវ៉ាដាក់ញត្តិនិងការដើរដាក់ពាក្យបណ្ដឹងគ្រប់ស្ថាប័នពាក់ព័ន្ធទាំងអស់របស់រដ្ឋាភិបាលក្នុងនោះ រួមមានទាំងតុលា
ការនិងការដាក់ញត្តិទៅដល់ស្ថានទូតចិនផងដែរ ប៉ុន្តែ អាជ្ញាធរមិនបានចេញមកដោះស្រាយជូនពលរដ្ឋឡើយ។ រីឯ អាជ្ញាធរខេត្តវិញថែមទាំងឆ្លើយថា បើទោះបីជាពលរដ្ឋដើរតវ៉ាយ៉ាងណាក្ដី ក៏អាជ្ញាធរមិនអាចទៅដកហូតយកដីពីក្រុមហ៊ុនចិនវិញដែរ។
លោកស្រីថា៖ «នៅពេលយើងទៅតវ៉ាឱ្យក្រុមហ៊ុនបញ្ឈប់ការឈូសឆាយដូចកាប់បំផ្លាញដើមជ័រច្បោះអ៊ីហ្នឹងគេចោទប្រកាន់យើងថា យើងទៅលួចដីរដ្ឋទៅវិញ ហើយកន្លងមក ពេលយើងតវ៉ាតាមផ្លូវច្បាប់ ពាក្យបណ្ដឹងគ្មានចំណាត់ការអីទេ ប៉ុន្តែនៅពេលក្រុមហ៊ុនប្ដឹងពលរដ្ឋបែរជាតុលាការខេត្តកោះហៅពលរដ្ឋជាបន្តបន្ទាប់ ម្ដង៤នាក់ទៅដល់ ១០ នាក់អ៊ីចឹង»។
ទោះជាយ៉ាងពលរដ្ឋនៅក្នុងសន្និសីទសារព័ត៌មាន មិនអាចបញ្ជាក់អំពីចំនួនពលរដ្ឋនៅក្នុងភូមិទាំង៣ និងផ្ទៃដីរបស់សមូហភាពប៉ុន្មានហិកតាដែលត្រូវបានក្រុមហ៊ុនរំលោភយកឡើយ ដោយសារពួកគាត់អះអាងថា មិនដែលធ្វើស្ថិតិនិងវាស់វែងដីទាំងនោះទេ។
កាលពីថ្ងៃម្សិលមិញ ភ្នំពេញ ប៉ុស្ដិ៍ មិនអាចទាក់ទងលោក សេង ឡូត មន្ត្រីនាំពាក្យក្រសួងដែនដីបានទេដោយសារលោកមិនលើកទូរស័ព្ទ។
លោក ធាង ហេង មេឃុំប្រមេរុបានប្រាប់ភ្នំពេញប៉ុស្ដិ៍ម្សិលមិញថា អាជ្ញាធរខេត្ត និងមន្ត្រីក្រសួងដែដីកំពុងចុះដោះស្រាយដីធ្លីនៅក្នុងឃុំប្រមេរុនេះ ប៉ុន្តែលោកចោទប្រកាន់ភាគីពលរដ្ឋថា នៅពេលអាជ្ញាធរចុះដោះស្រាយ បែរពលរដ្ឋមិនចូលរួមសហការទៅវិញ។
លោកថា៖«អាជ្ញាធរខ្ញុំប្រឹងជួយណាស់ប៉ុន្តែពួកគាត់ដូចមិនសហការសោះដូចជានៅពេលយើងបង្ខំឱ្យគាត់ធ្វើលិខិតស្នើសុំបង្កើតសហគមន៍ឡើងវិញ គាត់អត់ធ្វើហើយអត់សហការសោះ»។
ទោះជាយ៉ាងណា លោកបន្តថា ការអភិវឌ្ឍគឺតែងមានការប៉ះពាល់ ប៉ុន្តែមានតិចតួចប៉ុណ្ណោះ មិនធំធេងដូចការលើកឡើងរបស់ពលរដ្ឋឡើយហើយបច្ចុប្បន្នខាងមន្ត្រីក្រសួងនឹងបន្តចុះវាស់វែងបន្តទៀត ហើយចំពោះដីសហគមន៍ដែលមានជម្លោះជាមួយក្រុមហ៊ុន នឹងត្រូវដោះស្រាយនៅពេលបន្តបន្ទាប់។
ក្រុមហ៊ុនហេងហ្វូដែលជាក្រុមហ៊ុនធំរបស់ក្រុមហ៊ុនឡានហ្វេងនិងរូយហ្វេងទទួលបានដីសម្បទានសេដ្ឋកិច្ចចំនួន៩០១៥ហិកតាស្ថិតក្នុងឃុំប្រមេរុ និងបានឈូសឆាយដើម្បីដាំអំពៅ ។
ប៉ុន្តែ លោក ឡោ ច័ន្ទ មន្ត្រីសម្របសម្រួលសមាគមអាដហុក ប្រចាំខេត្តព្រះវិហារ បានលើកឡើងថា តាមការចុះពិនិត្យផ្ទាល់ លោកសង្កេតឃើញក្រុមហ៊ុននេះបានប្ដូរមកដាំជាស្រូវវិញបានប្រហែល ៨០% នៃផ្ទៃដីវិនិយោគ ។
លោកបន្តថា តាមផ្លូវច្បាប់ ប្រសិនបើអាជ្ញាធររកឃើញថា ការវិនិយោគរបស់ក្រុមពិតជារំលោភលើដីសហគមន៍ គឺរដ្ឋមានសិទ្ធិដកហូតប្រគល់ឱ្យពលរដ្ឋវិញ។
លោកថា៖ «ប៉ុន្តែខ្ញុំឮអាជ្ញាធរថាដោះស្រាយ ប៉ុន្តែគេថាមិនដឹងដោះដោយរបៀបណា»៕
