.jpg)
សត្វទន្សោងមានរស់នៅស្រុកថ្ពង ខេត្តកំពង់ស្ពឺនាពេលបច្ចុប្បន្ន ។ រូបថត Wildlife Alliance
កំពង់ស្ពឺៈ ប្រជាសហគមន៍ប្រាំបីមុំបានរួមគ្នាការពារ និងអភិរក្សព្រៃឈើព្រមទាំងសត្វព្រៃគ្រប់ប្រភេទក្នុងតំបន់ព្រៃការពាររបស់សហគមន៍ដែលមានផ្ទៃដី ៩៣៧ ហិកតា ក្នុងភូមិត្រពាំងក្រើញ ឃុំប្រាំបីមុំ ស្រុកថ្ពង ខេត្តកំពង់ស្ពឺ ដោយមានអង្គការ Wildlife Alliance ជួយគាំទ្រផងដែរ។
លោក សឿន ឡាយ ប្រធានសហគមន៍ប្រាំបីមុំបានប្រាប់ភ្នំពេញប៉ុស្តិ៍ថា តំបន់ព្រៃការពាររបស់សហគមន៍ប្រាំបីមុំជាតំបន់ទេសភាពខ្ពង់រាប និងជួរភ្នំដែលសម្បូរធនធានសត្វព្រៃច្រើនប្រភេទ ដូចជា មាន់ព្រៃ ជ្រូកព្រៃ ឆ្កែចចក ត្រកួត ទន្សង ឈ្លូស ក្ងោក ជាពិសេសសត្វទន្សោងដែលជាប្រភេទសត្វកម្រ និងជិតផុតពូជ។
លោក ឡាយ បានបញ្ជាក់ថា៖ «សព្វថ្ងៃនេះសហគមន៍របស់យើងមានក្រុមឧទ្យានុរក្ស ១៦ នាក់។ ក្រោមកិច្ចការពារ និងអភិរក្សរបស់យើងក្នុងរយៈពេល ១៧ ឆ្នាំកន្លងមកនេះ តំបន់ព្រៃការពាររបស់យើង មានសត្វព្រៃជាច្រើនប្រភេទបានបង្ហាញវត្តមានដ៏គួរឲ្យកត់សម្គាល់ក្នុងនោះមានទាំងសត្វទន្សោងដែលជាសត្វកម្រ និងជិតផុតពូជពីពិភពលោកប្រមាណជិត ១០០ ក្បាលផងដែរ»។
លោក ឡាយ បានឲ្យដឹងផងដែរថាពលរដ្ឋក្នុងសហគមន៍របស់លោកសរុប ៦៧៨ គ្រួសារ ស្មើនឹង ២ ២៦៩ នាក់ (ស្រី ១ ៣៧២ នាក់) តែនាំគ្នាចុះល្បាតការពារព្រៃឈើ និងសត្វព្រៃដោយស្ម័គ្រចិត្តទាំងយប់ទាំងថ្ងៃតាំងពីឆ្នាំ ២០០៣ មក។ ដោយសារកិច្ចប្រឹងប្រែងនេះ ក្រសួងកសិកម្ម រុក្ខាប្រមាញ់ និងនេសាទនៅថ្ងៃទី ៣ ខែ មេសា ឆ្នាំ ២០១៨ បានប្រកាសទទួលស្គាល់ជាផ្លូវការហើយនៅថ្ងៃទី ១០ ខែកញ្ញា ឆ្នាំដដែលបានចុះកិច្ចព្រមព្រៀងផ្ដល់ដីព្រៃក្នុងទំហំខាងលើនេះដល់សហគមន៍ជាអ្នកគ្រប់គ្រងថែរក្សាការពារ និងប្រើប្រាស់ជាប្រយោជន៍ក្នុងសហគមន៍។
លោកបានបន្ថែមថា៖ «ស្របពេលជាមួយគ្នានេះអង្គការ Wildlife Alliance បានបញ្ជូនក្រុមឧទ្យានុរក្សមួយចំនួនមកជួយធ្វើកិច្ចការរបស់យើងរួមទាំងជួយផ្ដល់ថវិកា ១ ចំនួនទៀតសម្រាប់គាំទ្រដល់ការចុះល្បាតផងដែរដោយក្នុង ១ ខែៗបានផ្ដល់សាំង ៣ កាន (៩០ លីត្រ) ទឹកសុទ្ធ ១០០ យួរ អង្ករ ១០០ គីឡូក្រាម រួមទាំងសម្លៀកបំពាក់ និងគ្រឿងបរិក្ខារមួយចំនួនទៀតដល់សហគមន៍យើង»។
លោកបានបន្តថា ដើម្បីតាមដានពីសត្វព្រៃនៅតំបន់នេះក្រុមឧទ្យានុរក្សរបស់អង្គការ Wildlife Alliance បានបំពាក់កាំមេរ៉ាវីដេអូ ៧ គ្រឿងក្នុងព្រៃ ហើយក្នុង ១ ខែក្រុមឧទ្យានុរក្សនៃអង្គការនេះបានមកប្រមូលយកទិន្នន័យពីកាមេរ៉ាទាំងនោះម្ដង។
ជុំវិញករណីនេះកាលពីថ្ងៃចន្ទ អង្គការ Wildlife Alliance(Cambodia) បានបញ្ជាក់ថា ការគាំទ្រដល់សហគមន៍នេះគឺជាផ្នែកមួយនៃកម្មវិធីរបស់អង្គការ ព្រោះសហគមន៍នេះបានដើរតួនាទីយ៉ាងសំខាន់ក្នុងការកំណត់ជោគវាសនាសត្វព្រៃនៅក្នុងតំបន់ព្រៃការពារ និងអភិរក្សរបស់ពួកគេ។ ក្រុមឧទ្យានុរក្សនៃសហគមន៍នេះបានយល់ដឹងថា «ព្រៃឈើគឺជាផ្ទះរបស់ហ្វូងសត្វព្រៃ» ដូចជា សត្វទន្សោងដែលជាប្រភេទសត្វកម្រ និងជិតផុតពូជជាដើម។
បើតាមអង្គការនេះបច្ចុប្បន្នក្នុងព្រៃនៃតំបន់អាស៊ីអាគ្នេយ៍ត្រូវបានគេប៉ាន់ប្រមាណថា មានសត្វទន្សោងនៅសេសសល់ប្រមាណ ៤ ០០០ ក្បាលប៉ុណ្ណោះ ។
អង្គការនេះបានបញ្ជាក់បន្ថែមថា តាមរយៈកិច្ចខិតខំប្រឹងប្រែងរបស់សហគមន៍នេះក្រុមសង្គ្រោះសត្វព្រៃបន្ទាន់ និងក្រុមថែទាំសត្វរបស់អង្គការ Wildlife Alliance បានបញ្ជូនមន្ត្រីឧទ្យានុរក្សឲ្យទៅជួយធ្វើការពួកគេបន្ថែមទៀត ហើយបាននិងកំពុងជួយគាំទ្រផ្នែកហិរញ្ញវត្ថុសម្រាប់ចុះល្បាតរយៈពេល ២ ឆ្នាំបន្តទៀត ដោយគិតចាប់ពីពេលនេះទៅ៕
