ស្ទឹងត្រែង: ប្រជាសហគមន៍ភូមិក្បាលរមាសចាស់ ឃុំក្បាលរមាស ស្រុកសេសាន បានឃាត់ខ្លួន និងផាកពិន័យអ្នកនៅក្រៅសហគមន៍ចំនួន ៣ នាក់ បន្ទាប់ពីអ្នកភូមិបានសម្រេចហាមឃាត់មនុស្សពីខាងក្រៅសហគមន៍ចេញ-ចូលនៅក្នុងភូមិជាបណ្ដោះអាសន្ន ដើម្បីបង្ការទប់ស្កាត់ការឆ្លងរីករាលដាលនៃជំងឺកូវីដ១៩ និងគោរពតាមប្រពៃណីពួកគាត់។
លោក រឿង សម្បត្តិ មេឃុំក្បាលរមាស ស្រុកសេសានថ្លែងពីម្សិលមិញថា ប្រជាពលរដ្ឋរស់នៅក្នុងឃុំក្បាលរមាសទាំងអស់សរុប ៧ ភូមិដោយពួកគាត់តែងតែប្រតិបត្តិតាមជំនឿតពីដូនតារបស់ពួកគាត់ ដែលត្រូវបិទភូមិក្នុង ១ ឆ្នាំម្ដងគឺចាប់ពីខែមីនាដល់ខែមេសាជារៀងរាល់ឆ្នាំ ខណៈភូមិនីមួយៗត្រូវឆ្លាស់គ្នាបិទភូមិម្ដង ១ ភូមិៗហើយក្នុងភូមិនីមួយៗត្រូវបិទរយៈពេលពី ៣ ទៅ ៦ ថ្ងៃដោយអ្នកភូមិហាមឃាត់មនុស្សពីខាងក្រៅចេញ-ចូល នៅក្នុងសហគមន៍របស់ពួកគេ។
លោកបន្តថា ការបិទភូមិនេះគឺធ្វើឡើងតាមទំនៀមទម្លាប់ដូនតាហើយពេលនេះវាជាការល្អដោយសារមន្ត្រីជំនាញ និងអាជ្ញាធរនៅទូទាំងប្រទេសកំពុងមមាញឹកក្នុងការប្រយុទ្ធប្រឆាំងការឆ្លងរីករាលដាលនៃជំងឺកូវីដ១៩ខណៈរាជរដ្ឋាភិបាលបានប្រកាសបិទទីកន្លែងកម្សាន្តមួយចំនួនផងដែរ។
លោក សម្បត្តិ បន្តថា៖ «អ្នកភូមិក្បាលរមាសចាស់បានឃាត់ខ្លួនមនុស្សក្រៅសហគមន៍ ៣ នាក់ ដោយពិន័យជាប្រាក់ចំនួនចន្លោះពី ៣០ ទៅ ៤០ ម៉ឺនរៀល ដោយសារតែមនុស្សទាំង ៣ នាក់នេះបានចចេសចង់ចូលក្នុងភូមិក្បាលរមាសចាស់ក្នុងអំឡុងពេលអ្នកភូមិហាមឃាត់ ហើយអ្នកទាំង ៣ នាក់ មិនបានយល់ដឹងពីទំនៀមទម្លាប់របស់អ្នកភូមិ។ យើងមិនបានដាក់ទោសទណ្ឌអ្វីធ្ងន់ធ្ងរទេគឺគ្រាន់តែពិន័យជាប្រាក់តិចតួច ហើយពួកគាត់ ៣ នាក់នេះជាកម្មករតភ្ជាប់ប្រព័ន្ធទឹក និងប្រព័ន្ធភ្លើងរបស់ក្រុមហ៊ុនមួយនៅតំបន់នោះ»។
លោកបន្ថែមថា ក្នុងរយៈពេលប៉ុន្មានថ្ងៃជាប់គ្នានេះអាជ្ញាធរមូលដ្ឋានបានសហការជាមួយមន្ត្រីនៃមន្ទីរសុខាភិបាលខេត្តស្ទឹងត្រែងចុះផ្សព្វផ្សាយអំពីវិធានការបង្ការទប់ស្កាត់ការឆ្លងជំងឺកូវីដ១៩ដល់ប្រជាពលរដ្ឋនៅក្នុងសហគមន៍មូលដ្ឋាន។ អាជ្ញាធរបានអំពាវនាវឲ្យពលរដ្ឋ អនុវត្តវិធានអនាម័យស្អាតជាប្រចាំដោយត្រូវលាងសម្អាតដៃនឹងសាប៊ូ ឬអាល់កុលមុននិងក្រោយពេលប៉ះពាល់វត្ថុអ្វីមួយដែលមិនស្អាត។
អ្នកស្រី យ៉ៅ សុង អាយុ ៥៤ ឆ្នាំ ជាតំណាងសហគមន៍ភូមិក្របីជ្រុំបានប្រាប់ភ្នំពេញប៉ុស្តិ៍ថា អ្នកភូមិក្របីជ្រុំក៏ដូចអ្នកភូមិក្បាលរមាសចាស់ដែរ ភាគច្រើនជាជនជាតិភាគតិចឡាវ និងព្នងស្ថិតនៅក្នុងឃុំក្បាលរមាសបានអនុវត្តទំនៀមទម្លាប់ដូនតាដូចគ្នា។ ចំពោះភូមិក្របីជ្រុំនឹងចាប់ផ្ដើមបិទពីថ្ងៃទី ២៩ ដល់ថ្ងៃទី ៦ ខែមេសា ខាងមុខ ហើយនឹងមានការហាមមនុស្សក្រៅសហគមន៍ចូល ឬចេញពីសហគមន៍ដោយត្រូវរង់ចាំដល់ផុតកំណត់ថ្ងៃបិទភូមិនេះ។
អ្នកស្រីបន្តថា ការបិទភូមិនេះស្របពេលដែលមន្ត្រីសុខាភិបាលរួមទាំងអាជ្ញាធរមូលដ្ឋានចុះផ្សព្វផ្សាយអប់រំណែនាំអំពីវិធីបង្ការទប់ស្កាត់ការឆ្លងជំងឺកូវីដ១៩។
អ្នកស្រីនិយាយថា៖ «តាមជំនឿពីដូនតារបស់ពួកយើងបើក្នុង ១ ខែមានអ្នកភូមិចាប់ពី ៣ នាក់ឡើងទៅស្លាប់បន្តបន្ទាប់គ្នានោះ អ្នកភូមិទាំងអស់ត្រូវនាំគ្នារៀបចំពិធីបន់ស្រន់ដល់ព្រលឹងដូនតា និងអារុកអារក្ខអ្នកតាម្ចាស់ស្រុកដើម្បីសុំសេចក្ដីសុខហើយបើមានជំងឺរាតត្បាតគឺត្រូវនាំគ្នាហាមឃាត់មនុស្សពីក្រៅសហគមន៍ចេញ-ចូលនៅក្នុងភូមិ»។
អ្នកស្រី យ៉ៅ សុង បានឲ្យដឹងថានៅក្នុងខែមីនានេះមានអ្នកភូមិ ៣ នាក់ បានឈឺស្លាប់ដោយជំងឺផ្សេងៗ ប៉ុន្តែមិនពាក់ព័ន្ធជំងឺកូវីដ១៩ នោះទេ។ អ្នកភូមិម្នាក់បានស្លាប់កាលពីដើមខែមីនា ដោយជំងឺគ្រុនពោះវៀន ចំណែកម្នាក់ទៀតបានស្លាប់កាលពី ១ សប្តាហ៍មុន ដោយសារខ្យល់គ ឬគាំងបេះដូង។ ចំណែកអ្នកភូមិម្នាក់ទៀតឈ្មោះ ប៉ម អាយុ ៥៨ ឆ្នាំ ជាជនជាតិព្នងបានស្លាប់កាលពីថ្ងៃទី ២៣ ខែមីនា ដោយសារជំងឺរលាកក្រពះ៕