.jpg)
គ្រោងឆ្អឹងសត្វព្រៃត្រូវបានប្រទះឃើញនៅតំបន់ដែនជម្រកសត្វព្រៃសង្ឃរុក្ខវ័ននៅខេត្តឧត្តរមានជ័យ។ រូប សហការី
ឧត្តរមានជ័យៈ ក្រុមគណៈកម្មការសហគមន៍សង្ឃរុក្ខវ័ន និយាយថា បទល្មើសព្រៃឈើ និងសត្វព្រៃនៅក្នុងតំបន់ដែនជម្រកសត្វព្រៃសង្ឃរុក្ខវ័នមានសកម្មភាពកក្រើកឡើងវិញគួរឲ្យកត់សម្គាល់ដោយអំពាវនាវដល់សមត្ថកិច្ចពាក់ព័ន្ធ ពិសេសអាជ្ញាធរមូលដ្ឋានចូលរួមឲ្យបានសកម្មក្នុងកិច្ចការពារ ទប់ស្កាត់ និងបង្ក្រាបបទល្មើសធនធានធម្មជាតិក្នុងតំបន់នេះឲ្យមានប្រសិទ្ធភាព។
ខណៈកំពុងបន្តដំណើរចុះល្បាតព្រៃក្នុងភូមិសាស្ត្រតំបន់ភ្នំស្វាយ និងភ្នំក្រោលនៃដែនជម្រកសត្វព្រៃសង្ឃរុក្ខវ័នដែលមានទីតាំងស្ថិតក្នុងឃុំលំទង ស្រុកអន្លង់វែង ខេត្តឧត្តរមានជ័យកាលពីថ្ងៃទី ២២ មេសា ព្រះតេជគុណ ប៊ុន សាលួត ប្រធានគណៈកម្មការសហគមន៍សង្ឃរុក្ខវ័នប្រាប់ភ្នំពេញប៉ុស្តិ៍ថាបទល្មើសសត្វព្រៃ និងព្រៃឈើក្នុងតំបន់ដែនជម្រកសត្វព្រៃសង្ឃរុក្ខវ័នបានកក្រើកឡើងវិញគួរឲ្យកត់សម្គាល់។
ព្រះអង្គមានព្រះថេរដីកាថា៖ «ក្នុងដំណើរចុះល្បាតព្រៃរយៈពេល ១ សប្ដាហ៍ កន្លងមកនេះក្រុមការងាររបស់អាត្មាបានរកឃើញសត្វទន្សោង ១ ក្បាល និងសត្វប្រើស ២ ក្បាលងាប់នៅក្បែរខ្សែលួស ដែលជាអន្ទាក់ភ្ជាប់ដោយឧបករណ៍ឆក់នៅចំណុចភូមិសាស្ត្រភ្នំស្វាយ និងភ្នំក្រោល។ សពសត្វព្រៃទាំងនោះបានរលួយនៅសល់តែស្បែក និងគ្រោងឆ្អឹង។ ក្រៅពីនេះ ក្រុមការងាររបស់អាត្មាក៏បានរកឃើញករណីកាប់ផ្ដួលរំលំដើមឈើថ្មីៗប្រមាណ ៤០ ដើមព្រមទាំងរណារយន្តចំនួន ១ គ្រឿង ដែលក្រុមជនប្រព្រឹត្តបទល្មើសបានលាក់ទុកនៅក្នុងតំបន់នោះផងដែរ»។
ព្រះតេជគុណ ប៊ុន សាលួត បន្តថា កាលពីខែមីនាកន្លងទៅក្រុមគណៈកម្មការសហគមន៍សង្ឃរុក្ខវ័នបានរកឃើញសពសត្វទន្សោង ១ ក្បាល និងសពសត្វប្រើសចំនួន ៤ ក្បាលព្រមទាំងខ្សែអន្ទាក់សរុបជាង ៣០០ ខ្សែ និង អន្ទាក់ខ្សែលួសជាង ៣០០០ ម៉ែត្រដែលមានភ្ជាប់ដោយឧបករណ៍ឆក់អាគុយ ៣ គ្រឿង និងដុំអាំងស៊ីវ៉ាទ័រចំនួន ៣ គ្រឿង។
ជាមួយគ្នានេះព្រះអង្គបានអំពាវនាវដល់គ្រប់ភាគីពាក់ព័ន្ធទាំងអស់រួមទាំងប្រជាពលរដ្ឋក្នុងសហគមន៍មូលដ្ឋានចូលរួមឲ្យបានសកម្មក្នុងកិច្ចការពារទប់ស្កាត់ និងបង្ក្រាបបទល្មើសព្រៃឈើ និងសត្វព្រៃនៅក្នុងតំបន់ដែនជម្រកមួយនេះ ដើម្បីជាប្រយោជន៍សម្រាប់សាធារណជនទូទៅនៅក្នុងប្រទេសកម្ពុជា និងនៅទូទាំងសកលលោកទាំងមូល។
ព្រះអង្គបន្ថែមថា ដែនជម្រកសត្វព្រៃសង្ឃរុក្ខវ័នជាតំបន់ចុងក្រោយបំផុតនៃខេត្តភាគឧត្តរនៃប្រទេសកម្ពុជាដែលនៅមានវត្តមានសត្វព្រៃច្រើនជាងគេ។ ពិសេសប្រភេទសត្វកម្រ និងជិតផុតពូជនៅលើពិភពលោក ដូចជា សត្វទន្សោង ប្រើស ខ្ទីង ខ្លា សត្វទោច និង ស្វាព្រាមជាដើម។
ជុំវិញករណីនេះលោក ភួង លីណា ប្រធានមន្ទីរបរិស្ថានខេត្តឧត្តរមានជ័យ ប្រាប់ភ្នំពេញប៉ុស្តិ៍នៅថ្ងៃទី ២២ មេសា ថាលោកបានទទួលដំណឹងអំពីករណីប្រទះឃើញសពសត្វទន្សោង និងសត្វប្រើសនោះពីក្រុមមន្ត្រីឧទ្យានុរក្សដែលបានចូលរួមចុះល្បាតជាមួយគណៈកម្មការសហគមន៍សង្ឃរុក្ខវ័ននោះហើយ។
លោកថា៖ «ដោយឡែកករណីគល់ឈើប្រមាណ ៣០-៤០ ដើមដែលក្រុមគណៈកម្មការសហគមន៍សង្ឃរុក្ខវ័នបានប្រទះឃើញនោះ គឺមិនមែនជាករណីថ្មីទេ។ ករណីនេះត្រូវបានក្រុមកម្លាំងមន្ត្រីឧទ្យានុរក្សយើង ស្រាវជ្រាវរកឃើញ និងបង្ក្រាបចាប់ជនប្រព្រឹត្តបទល្មើសព្រមទាំងរឹបអូសគោយន្ត ២០ គ្រឿង តាំងពីជាង ១ សប្ដាហ៍មុនមកម៉្លេះ ហើយករណីនេះសមត្ថកិច្ចយើងបានកសាងសំណុំរឿងបញ្ជូនទៅតុលាការរួចហើយដែរ»។
បើតាមលោក លីណា កាលពី ៣-៤ ថ្ងៃមុន ក្រុមមន្ត្រីឧទ្យានុរក្សនៃមន្ទីរបរិស្ថានខេត្តឧត្តរមានជ័យបានសហការជាមួយមន្ត្រីឧទ្យានុរក្សស្នាក់ការភ្នំរូងដែក ចុះល្បាតការពារបទល្មើសធនធានធម្មជាតិ ហើយបានប្រទះឃើញ និងបង្ក្រាបរឹបអូសគោយន្តដឹកបទល្មើសព្រៃឈើ ១ គ្រឿងថែមទៀតនៅចំណុចភ្នំក្រោលក្នុងភូមិចារ ឃុំលំទង ស្រុកអន្លង់វែង។
លោកបន្ថែមថា នៅពេលនេះលោកកំពុងដំណើរការសាងសង់ប៉មយាម ២ និងទីស្នាក់ការបរិស្ថាន ១ បន្ថែមទៀតក្នុងតំបន់ដែនជម្រកសត្វព្រៃសង្ឃរុក្ខវ័ន ដើម្បីពង្រឹង និងសម្រួលដល់ការងារចុះល្បាតការពារ និងបង្ក្រាបបទល្មើសព្រៃឈើ និងសត្វព្រៃ។ មកទល់ពេលនេះ ប៉មយាម និងស្នាក់ការនោះត្រូវបានសង់រួចបានប្រមាណ ៦០ ភាគរយហើយ។ ទីស្នាក់ការបរិស្ថានថ្មីនេះមានទីតាំងក្នុងតំបន់ភ្នំអណ្ដូងមានចម្ងាយប្រមាណ ១០ គីឡូម៉ែត្រពីស្នាក់ការបរិស្ថានភ្នំរូងដែក។
លោកបន្ថែមថា៖ «នៅថ្ងៃសៅរ៍ចុងសប្ដាហ៍នេះខ្ញុំនឹងដឹកនាំកម្លាំងមន្ត្រីឧទ្យានុរក្សពីថ្នាក់ខេត្តបន្ថែមទៀតទៅចូលរួមជាមួយក្រុមការងារនៃគណៈកម្មការសហគមន៍សង្ឃរុក្ខវ័នដែលដឹកនាំដោយព្រះតេជគុណ ប៊ុន សាលួត ដើម្បីរួមជាកម្លាំងឲ្យកាន់តែរឹងមាំថែមទៀត»៕
