The Phnom Penh Post Search

Search form

Logo of Phnom Penh Post newspaper Phnom Penh Post - សហគមន៍​កំពុង​រង់​ចាំ​ការ​សន្យា​របស់​អភិបាល​ថ្មី

សហគមន៍​កំពុង​រង់​ចាំ​ការ​សន្យា​របស់​អភិបាល​ថ្មី

សហគមន៍​កំពុង​រង់​ចាំ​ការ​សន្យា​របស់​អភិបាល​ថ្មី

130506_05
សកម្មជនស្ត្រីនៃសហគមន៍បឹងកក់ ក្នុងកូដកម្មតវ៉ារកដំណោះស្រាយកាលពីអាទិត្យមុន ហុង មិនា

ភ្នំពេញៈ អភិបាល​រាជធានី​ភ្នំពេញ​ថ្មី​ទើប​ចូល​កាន់​តំណែង​លោក ប៉ា សុជាតិវង្ស បាន​ធ្វើ​ការ​សន្យា​ថា​នឹង​ដោះស្រាយ​បញ្ហា​ជម្លោះ​តំបន់​បឹងកក់ និង​បុរីកីឡា​ដ៏​រ៉ាំរ៉ៃ​ជា​យូរ​មក​ហើយ​នោះ​បាន​ធ្វើ​ឲ្យ​មាន​ការ​តាម​ដាន​មើល​។ នេះ​បើ​តាម​តំណាង​សហគមន៍​ទាំង​ពីរ​ដែល​បាន​អះអាង​កាល​ពី​ម្សិលមិញ។

អ្នក​ស្រី ហេង មុំ សកម្មជន​ដី​ធ្លី​នៅ​តំបន់​បឹងកក់ បាន​ថ្លែង​ថា​៖ «ខ្ញុំ​មាន​ជំនឿ​មុត​មាំ​ថា អភិបាល​ក្រុង​ថ្មី លោក ប៉ា សុជាតិវង្ស មិន​អាច​មិន​អើ​ពើ​ចំពោះ​បញ្ហា​របស់​យើង​ដូច​អភិបាល​ចាស់​នោះ​ទេ​ប្រសិន​បើ​គាត់​ពិត​ជា​ចាត់​ទុក​យើង​ជា​ប្រជាជន​របស់​គាត់​»។

អ្នក​ស្រី​បាន​បន្ថែម​ថា អ្នក​ស្រី​គាំទ្រ​អត្ថាធិប្បាយ​របស់​លោក ប៉ា សុជាតិវង្ស ដែល​លោក​បាន​ថ្លែង​ក្នុង​អំឡុង​ពេល​លោក​ស្បថ​ចូល​កាន់​តំណែង​ជា​អភិបាល​រាជធានី កាល​ពី​ថ្ងៃ​សុក្រ។

អ្នក​ស្រី ឆាយ គឹមហ៊ន ជា​តំណាង​សហគមន៍​បុរី​កីឡា​មាន​ការ​រំពឹង​ស្រដៀង​គ្នា​នេះ​ដែរ​។ អ្នក​ស្រី​ថ្លែង​ថា៖ «យើង​រំពឹង​ថា ឥឡូវ​នេះ​គាត់​នឹង​ធ្វើ​ដូច​អ្វី​ដែល​គាត់​សន្យា»។

លោក អ៊ី សារ៉ុម មន្រ្តី​សម្រប​សម្រួល​កម្មវិធី​សម្រាប់​សមាគម​ធាង​ត្នោត ដែល​ជា​អង្គការ​ការពារ​សិទ្ធិ​ដី​ធ្លី​ថ្លែង​ថា ខណៈ​ការ​បោះឆ្នោត​ជិត​មក​ដល់​លោក​នឹង​រង់​ចាំ​មើល​ថា តើ​ជម្លោះ​ដី​ធ្លី​នៅ​ក្នុង​រាជធានី​នឹង​អាច​ដោះស្រាយ​បាន​ឬ​យ៉ាង​ណា?

លោក​បន្ត​ថា​៖«យើង​ទាំង​អស់​គ្នា​នឹង​រង់​ចាំ​មើល​ការ​សន្យា​នេះ​ក្លាយ​ជា​ការ​អនុវត្ត​ពិត​ឬ​ទេ​?»។

សហគមន៍​បឹងកក់ និង​សមាគម​ធាង​ត្នោត ពី​សប្តាហ៍​មុន​បាន​ចេញ​ផែន​ទី​នៃ​សំណើ​ផែនការ​កាត់​ចែក​ដី​ធ្លី​ថ្មី​នៅ​តំបន់​បឹងកក់​ដែល​ពួក​គេ​និយាយ​ថា អាច​ជួយ​ដោះ​ស្រាយ​បញ្ហា​ជម្លោះ​រ៉ាំរ៉ៃ​ជា​យូរ​មក​នេះ​បាន៕ PS

អត្ថបទគួរចាប់អារម្មណ៍