.jpg)
គោយន្ត ដែលមន្ត្រីឧទ្យានុរក្ស និងប្រជាសហគមន៍ ចាប់ឃាត់នៅព្រៃព្រះរកា។ សហការី
ព្រះវិហារៈ គោយន្ត ៦ គ្រឿង និងរណារយន្ត ៥ គ្រឿងថ្មីទៀត ត្រូវបានក្រុមបណ្ដាញសហគមន៍ព្រៃព្រះរកា និងកម្លាំងមន្ត្រីឧទ្យានុរក្សបង្ក្រាបចាប់បានក្នុងអំឡុងពេលនៃយុទ្ធនាការចុះល្បាតការពារព្រៃឈើរយៈពេល ៣ ថ្ងៃ ដែលចាប់ផ្ដើមពីថ្ងៃទី ៧ ដល់ថ្ងៃ ៩ ខែមិថុនា។
លោក ស៊ុន ពៅ តំណាងបណ្ដាញសហគមន៍ព្រៃព្រះរកា ដែលបានចូលរួមនៅក្នុងយុទ្ធនាការនោះ បានប្រាប់ភ្នំពេញប៉ុស្តិ៍កាលពីថ្ងៃម្សិលមិញថា បទល្មើសព្រៃឈើ ក្នុងតំបន់ដែនជម្រកព្រៃព្រះរកា បានកើតមានជាបន្តបន្ទាប់ បើទោះជាមានការការពារពីក្រុមមន្ត្រីឧទ្យានុរក្សនិងប្រជាសហគមន៍ព្រៃឈើយ៉ាងណាក៏ដោយ។
លោកពៅបញ្ជាក់ថា៖ «យុទ្ធនាការចុះល្បាតការពារព្រៃឈើ ដែលមានការចូលរួមពីកម្លាំងមន្ត្រីឧទ្យានុរក្ស ក្នុងរយៈពេល ៣ ថ្ងៃកន្លងមកនេះ ក្រុមការងារបានចាប់ផ្ដើមល្បាតពីចំណុចអូរក្រូចតាវីន (ជាំជ្រេ) រហូតដល់ ចំណុចជាំកី ដោយបានឆ្លងកាត់ចំណុចអូរខ្សាច់ស និងវាលអូរខ្លុង។ ជាលទ្ធផល ក្រុមការងារបានបង្ក្រាបចាប់រឹបអូសបានគោយន្ត ៦ គ្រឿងរណារយន្ត ៥ គ្រឿង និងឈើអារចម្រុះប្រភេទ សរុប ៤ ម៉ែត្រគុប។ វត្ថុតាងទាំង នោះត្រូវបានប្រគល់ឲ្យមន្ត្រីឧទ្យានុរក្សដែនជម្រកព្រៃព្រះរកា យកទៅរក្សាទុកនិងចាត់ចែងបន្តតាមនីតិវិធីច្បាប់»។
ព្រៃព្រះរកាដែលមានទំហំ ៩៦ ០០០ ហិកតា ស្ថិតនៅចន្លោះព្រំប្រទល់ស្រុកចំនួន ៣ គឺស្រុកត្បែងមានជ័យ ស្រុកជាំក្សាន្ត និងស្រុកឆែប នៃខេត្តព្រះវិហារ។ ជនជាតិដើមភាគតិចកួយ ត្រូវបានគេកត់សម្គាល់ឃើញថា បានរស់នៅប្រមូលផ្ដុំគ្នានៅក្បែរតំបន់ព្រៃដ៏ធំនេះ ហើយពួកគេបាននាំគ្នាការពារនិងអភិរក្ស ដោយចាត់ទុកព្រៃដ៏ធំមួយនេះ ជាជង្រុកស្បៀងអាហាររបស់ពួកគេ។
កាលពីខែឧសភាឆ្នាំ ២០១៦ រាជរដ្ឋាភិបាលតាមរយៈក្រសួងបរិស្ថាន បានសម្រេចដាក់បញ្ចូលជាតំបន់ការពារ និងអភិរក្សដោយឲ្យឈ្មោះថា «ដែនជម្រកសត្វព្រៃព្រះរកា»។
យោងតាមរបាយការណ៍អង្កេតដំបូង ស្ដីពីការងារចុះល្បាតព្រៃរបស់បណ្ដាញសហគមន៍ព្រៃព្រះរកាបានឲ្យដឹងថា ការរស់នៅរបស់ប្រជាពលរដ្ឋនៅក្នុងតំបន់នោះ ៧៧ ភាគរយ ពឹងផ្អែកទៅលើដើមច្បោះជ័រខណៈជាង ២០ ភាគរយទៀតពឹងផ្អែកលើការបរបាញ់សត្វ នេសាទ និងការរុករករុក្ខជាតិឱសថនៅក្នុងព្រៃនោះ។ ប៉ុន្តែបច្ចុប្បន្នដើមច្បោះជ័រជាច្រើនត្រូវបានក្រុមជនខិលខូចមួយចំនួនលួចកាប់បំផ្លាញជាបន្តបន្ទាប់។
របាយការណ៍ដែលត្រូវបានផ្សព្វផ្សាយនៅលើទំព័រ Facebook របស់បណ្ដាញសហគមន៍នេះ កាលពីម្សិលមិញ បានបង្ហាញថា ព្រៃឈើក្នុងតំបន់ព្រៃព្រះរកា ត្រូវបានគេកាប់រានជាបន្តបន្ទាប់ ដែលចាប់តាំងពីមុនពេលតំបន់នេះ ត្រូវបានដាក់បញ្ចូលជាតំបន់ដែនជម្រកសត្វព្រៃព្រះរកា រហូតមកទល់ពេលនេះ ត្រូវបានគេរកឃើញថា មានការកាប់រានអស់ជាង ១០០ ហិកតា។
របាយការណ៍បញ្ជាក់ផងដែរថា ក្នុងរយៈពេល ៤ ខែ គឺពីដើមខែកុម្ភៈ ដល់ដើមខែមិថុនា ឆ្នាំ ២០១៩ ក្រុមល្បាតបានរកឃើញដើមច្បោះជ័រ ៧៣ដើមត្រូវបានគេកាប់ផ្ដួលរំលំ និងអារច្រៀកនាំយកទៅលក់នៅតាមដេប៉ូឈើនានានៅទូទាំងប្រទេស។ ជាមួយគ្នានេះ ក្រុមល្បាត បានបង្ក្រាបចាប់រឹបអូសវត្ថុតាងរបស់ជនប្រព្រឹត្តបទល្មើស បានចំនួន ១៧ គ្រឿង និងរឹបអូសបានឈើក្ដារបន្ទះចំនួន ៣១ សន្លឹក ប្រគល់ឲ្យសមត្ថកិច្ចជំនាញចាត់ការបន្តតាមនីតិវិធី។
អ្នកនាំពាក្យក្រសួងបរិស្ថាន លោក នេត្រ ភត្ត្រា កាលពីម្សិលមិញ បានសម្ដែងការស្វាគមន៍ ចំពោះកិច្ចខិតខំប្រឹងប្រែងរបស់ក្រុមបណ្ដាញសហគមន៍ព្រៃព្រះរកា ដែលបានចូលរួមល្បាតនៅក្នុងតំបន់ការពារធម្មជាតិគ្រប់គ្រងដោយក្រសួងបរិស្ថាន ដើម្បីសហការគ្នាទប់ស្កាត់បទល្មើសព្រៃឈើ ការកាប់បំផ្លាញឈើខុសច្បាប់ និងការបរបាញ់សត្វព្រៃដោយខុសច្បាប់ពីក្រុមជនខិលខូច។
លោកបញ្ជាក់ថា៖ «ក្រសួងបរិស្ថាននឹងបន្តចាត់វិធានការតឹងរឹុងទាំងផ្នែកការអប់រំ និងការអនុវត្តផ្លូវច្បាប់ប្រឆាំងនឹងក្រុមជនល្មើសក្នុងគោលដៅធ្វើយ៉ាងណាការពារនិងអភិរក្សឲ្យបាននូវតំបន់ការពារធម្មជាតិដែលជាព្រៃអភិរក្សទាំងនេះ។ ក្រសួងបរិស្ថាន ក៏សូមអរគុណផងដែរ ចំពោះការចូលរួមរបស់សហគមន៍ ក្នុងការចុះល្បាតចូលរួមទប់ស្កាត់ និងបង្ក្រាបបទល្មើសធនធានធម្មជាតិ នៅតាមតំបន់ការពារធម្មជាតិនានា»៕
