.jpg)
គ្រឿងចក្រឈូសឆាយដី នាពេលកន្លងមក។ រូបថត សហការី
មណ្ឌលគិរី: ក្រុមប្រជាសហមន៍ជនជាតិដើមភាគតិចព្នងនៅខេត្តមណ្ឌលគិរី និងមន្ត្រីសង្គមស៊ីវិលចំនួន ៨ នាក់ បានដាក់ពាក្យប្ដឹងលោក សៀក មុន្នី អភិបាលស្រុកអូររាំង និងមនុស្ស ៣ នាក់ផ្សេងទៀតទៅសាលាដំបូងខេត្តមណ្ឌលគិរីដោយចោទថា បានរំលោភយកដីព្រៃអភិរក្សចំនួន ៣០០ ហិកតា នៅក្នុងភូមិពូរឡេះ ឃុំដាក់ដាំ ស្រុកអូររាំង ប៉ុន្ដែចុងចោទបានបដិសេធ។
តាមពាក្យបណ្ដឹងរបស់ដើមចោទចំនួន ៨ នាក់ រួមមានលោក ប៉ែន ប៊ុណ្ណារ៍ អាយុ ៥៨ ឆ្នាំ រស់នៅខណ្ឌជ្រោយចង្វារ រាជធានីភ្នំពេញដែលជាមន្ត្រីសមាគមអាដហុក, លោក គ្រើង តុលា អាយុ ៣០ ឆ្នាំ, លោក ក្លាង ថូល អាយុ ៤២ ឆ្នាំ, លោក ស្រាំង សឿន អាយុ ៥៦ ឆ្នាំ, លោក វ៉ាន ងាច អាយុ ៦៦ ឆ្នាំ, លោក ព្យាន ច្រេន អាយុ ៥៥ ឆ្នាំ, អ្នកស្រី លីន ឡាក អាយុ ២៧ ឆ្នាំ និងអ្នកស្រី ផ្លឹក ភីរុំ អាយុ ៣៩ ឆ្នាំ។ ពួកគាត់ទាំង ៧ នាក់ គឺជាសកម្មជនព្រៃឈើ និងតំណាងសហគមន៍រស់នៅឃុំប៊ូស្រា ឃុំរយ៉ និងឃុំដាក់ដាំ ស្រុកអូររាំង។
ពាក្យបណ្ដឹងបានប្ដឹងលោក អ៊ុត ស៊ីម៉ាត តំណាងពលរដ្ឋចំនួន ១៩២ គ្រួសាររស់នៅចំណុចទួលស្វាយ ភូមិពូរឡេះ ឃុំដាក់ដាំ, លោក សម វ៉ាន្នី អតីតមេឃុំដាក់ដាំ, លោក វុធ សារុំ ប្រធានដែនជម្រកសត្វព្រៃណាំលៀ និងលោក សៀក មុន្នី អភិបាលស្រុកអូររាំង។
នៅក្នុងពាក្យបណ្ដឹងដែលយកទៅដាក់នៅសាលាដំបូងខេត្តមណ្ឌលគិរីកាលពីថ្ងៃទី ៥ ខែកុម្ភៈ គឺបានប្តឹងចោទបុគ្គលទាំង ៤ នាក់ខាងលើពីបទពាក់ព័ន្ធបទឧក្រិដ្ឋកាប់រានឈូសឆាយដីព្រៃរាប់ពាន់ហិកតាយកជាកម្មសិទ្ធិខុសច្បាប់ បំផ្លាញរុក្ខជាតិកម្រ និងសត្វព្រៃនៅចំណុចទួលស្វាយ ភូមិពូរឡេះ ឃុំដាក់ដាំ។
ពាក្យបណ្ដឹងបានសំណូមពរឲ្យតុលាការខេត្តមណ្ឌលគិរីដកហូតដីព្រៃដែលបានកាប់ទន្ទ្រានយករាប់ពាន់ហិកតាមកដាក់ជាសម្បត្តិរដ្ឋវិញ និងសងតម្លៃខូចខាតព្រៃឈើតាមផ្លូវច្បាប់ដើម្បីធ្វើឲ្យតំបន់បាត់បង់ព្រៃឈើ រុក្ខជាតិកម្រ និងសត្វព្រៃមានសភាពដូចដើមវិញ។ ក្រៅពីនេះក៏បានស្នើឲ្យតុលាការផ្ដន្ទាទោសជនទាំងនេះទៅតាមច្បាប់។
លោក គ្រើង តុលា តំណាងជនជាតិដើមភាគតិចព្នងបានឲ្យដឹងពីម្សិលមិញថា កាលពីមុនតំបន់ទួលស្វាយគឺជាចំណុចស្នូលព្រៃស្រោង និងជាតំបន់រុក្ខជាតិកម្រ (ដើមស្លឹកព្យាប) ក្នុងដែនជម្រកសត្វព្រៃណាមលៀដែលស្ថិតនៅក្រោមការគ្រប់គ្រងរបស់ក្រសួងបរិស្ថាន។
ប៉ុន្ដែនៅឆ្នាំ ២០១៣ មានចលនាចូលមកកាប់ទន្ទ្រានយកដីព្រៃស្រោងរាប់ពាន់ហិកតាដោយមិនមានការទប់ស្កាត់ ហើយចលនានេះនៅតែបន្តរហូតមកដល់សព្វថ្ងៃបង្កឲ្យមានទំនាស់ ដណ្ដើមដីគ្នារវាងក្រុម លោក អ៊ុត ស៊ីម៉ាត និងក្រុមឈ្មោះ សៀក មុន្នី អភិបាលស្រុកអូររាំងលើដីព្រៃស្រោងចំនួន ៣០០ ហិកតា ដែលក្រុមលោក អ៊ុត ស៊ីម៉ាត ចោទថាក្រុមលោក សៀក មុន្នី បានរួមចំណែកកាប់រានដីព្រៃប្រមាណ ១០ ហិកតាដែរ។
លោកបញ្ជាក់ថា៖ «យើងខ្ញុំមានការសោកស្ដាយចំពោះការបាត់បង់ព្រៃឈើរាប់ពាន់ហិកតា រុក្ខជាតិកម្រ និងសត្វព្រៃស្ទើរជិតផុតពូជទៅហើយ ដោយសារមន្ត្រីទទួលខុសត្រូវពាក់ព័ន្ធនឹងផលប្រយោជន៍ផ្ទាល់ខ្លួនដែលមកដល់ពេលនេះនៅសល់ប្រមាណ ១ ពាន់ហិកតាមានម្ចាស់អស់ហើយ ព្រោះមានការធ្វើផ្លូវចូលទៅកាន់ទីនោះមានភាពមិនប្រក្រតី ដើម្បីជំនួញដីព្រៃខុសច្បាប់»។
លោកបន្ថែមថា ដីព្រៃអភិរក្សដែលអាជ្ញាធរស្រុករំលោភយកនោះ ជាកន្លែងអាស្រ័យផលបែបប្រពៃណីរបស់ជនជាតិដើមភាគតិចព្នងរាប់ពាន់គ្រួសារ រស់នៅតំបន់នោះដូចជា រកវល្លិ៍ រកថ្នាំបុរាណ បេះបន្លែ ចិញ្ចឹមសត្វ និងរុក្ខជាតិកម្រ ជាដើម។
លោកបញ្ជាក់ថាការដាក់បណ្តឹងនេះគឺជាជម្រើសចុងក្រោយរបស់សហគមន៍ ដោយសារអ្នកភូមិភាគច្រើនមិនហ៊ានងើបតវ៉ាទាមទារដីដែលមន្ត្រីអាជ្ញាធរមួយចំនួនរំលោភនោះទេ ព្រោះពួកគេខ្លាចអាជ្ញាធរធ្វើទុក្ខបុកម្នេញ។
លោក មាស ប្រុស អ្នកនាំពាក្យសាលាដំបូងខេត្តមណ្ឌលគិរីបានថ្លែងពីម្សិលមិញថា លោកកំពុងត្រួតពិនិត្យខ្លឹមសារនៃពាក្យបណ្តឹងរបស់ប្រជាពលរដ្ឋនោះហើយប្រសិនមានអ្វីកែតម្រូវ លោកនឹងបញ្ជូនទៅដើមបណ្ដឹងវិញ ដើម្បីឲ្យកែតម្រូវ ប៉ុន្ដែបើគ្មានកន្លែងកែសម្រួលទេលោកនឹងបញ្ជូនបណ្តឹងនោះទៅព្រះរាជអាជ្ញា ដើម្បីចាត់ចែងទៅតាមនីតិវិធីច្បាប់។
លោកបញ្ជាក់ថា៖ «ខ្ញុំកំពុងពិនិត្យសិន ខ្លាចមានខុសខ្លឹមសារ ឬតួអក្សរ»។
លោក សៀក មុន្នី អភិបាលស្រុកអូររាំងកាលពីម្សិលមិញបានបដិសេធថា លោកមិនបានជាប់ពាក់ព័ន្ធទៅនឹងការរំលោភយកដីព្រៃអភិរក្ស ៣០០ ហិកតានោះទេ។ លោកថ្លែងថាលោកនឹងចូលទៅបំភ្លឺទៅតាមដីកាកោះហៅរបស់សាលាដំបូងខេត្តមណ្ឌលគិរី ដើម្បីឆ្លើយតបនូវអ្វីដែលជាការចោទប្រកាន់មកលើរូបលោកដោយគ្មានមូលដ្ឋានច្បាស់លាស់។
លោកបញ្ជាក់ថា៖ «ខ្ញុំទើបឡើងកាន់តំណែងជាអភិបាលស្រុកអូររាំងត្រឹមឆ្នាំ ២០១៧ ហើយដីកំពុងមានទំនាស់នេះ គឺបានមានទំនាស់តាំងពីឆ្នាំ ២០១៣ ម្ល៉េះ ហើយអ៊ីចឹងខ្ញុំទៅឃុបឃិតគ្នាយកដីហ្នឹងម៉េចកើត អ៊ីចឹងវាខុសពីការពិត»។
ចំណែក លោក វុធ សារុំ នាយកដែនជម្រកសត្វព្រៃណាមលៀមិនទាន់អាចទាក់ទងសុំការបញ្ជាក់ជុំវិញការចោទប្រកាន់នេះបានទេកាលពីម្សិលមិញ ដោយទូរស័ព្ទរបស់លោកគ្មានអ្នកទទួល។
លោក ប៉ែន ប៊ុណ្ណារ៍ មន្ត្រីកម្មវិធីពង្រឹងសិទ្ធិអំណាចសហគមន៍មូលដ្ឋាននៃសមាគមអាដហុកដែលបានចូលរួមដាក់ពាក្យប្តឹងដែរបានថ្លែងកាលពីម្សិលមិញថា ការរំលោភដីព្រៃអភិរក្សរបស់រដ្ឋគឺជាទង្វើល្មើសច្បាប់ ហើយតុលាការ និងអាជ្ញាធរពាក់ព័ន្ធត្រូវស៊ើបអង្កេតរឿងនេះឲ្យត្រឹមត្រូវ និងយុត្តិធម៌ ដើម្បីស្រោចស្រង់ព្រៃអភិរក្សដែលនៅសល់ចុងក្រោយ។
លោកបានបញ្ជាក់ថា៖ «យើងឃើញថា នេះជាជំហានមួយដែលបង្ហាញពីភាពគំរូរបស់សហគមន៍ខេត្តមណ្ឌលគិរីដែលពួកគាត់មានឆន្ទៈដាក់បណ្ដឹងបរិហារតាមផ្លូវច្បាប់ហ្នឹង ដើម្បីឲ្យមានការបំបាត់អំពើពុករលួយ និងអំពើកេងប្រវ័ញ្ចទ្រព្យសម្បត្តិរដ្ឋយកធ្វើជាកម្មសិទ្ធិដោយខុសច្បាប់»៕
វីដេអូ៖
