ឧត្ដរមានជ័យៈ សហគមន៍ព្រៃសង្ឃរុក្ខវ័ន និងអាជ្ញាធរពាក់ព័ន្ធក្នុងខេត្តឧត្តរមានជ័យកាលថ្ងៃ ២ កុម្ភៈ បានអំពាវនាវដល់ពលរដ្ឋទាំងក្នុង និងក្រៅប្រទេសឲ្យចូលរួមការពារ និងអភិរក្សព្រៃឈើ និងសត្វព្រៃទាំងអស់គ្នាដើម្បីប្រយោជន៍ជាតិទាំងពេលបច្ចុប្បន្ន និងអនាគត។
នៅក្នុងពិធីប្រារព្ធខួបទី ១៩ នៃការបង្កើតទីស្នាក់ការកណ្ដាលនៃសហគមន៍ព្រៃសង្ឃរុក្ខវ័នដែលបានប្រព្រឹត្តទៅកាលពីថ្ងៃអាទិត្យ ព្រះតេជគុណ ប៊ុន សាលួត មេគណខេត្តឧត្តរមានជ័យ និងជាប្រធានសហគមន៍ព្រៃសង្ឃរុក្ខវ័នមានសង្ឃដីកាថា មានបញ្ហាប្រឈមចំនួន ៤ ដែលជាឧបសគ្គក្នុងកិច្ចការពារ និងអភិរក្សធនធានធម្មជាតិក្នុងតំបន់ដែនជម្រកសត្វព្រៃសង្ឃរុក្ខវ័នក្នុងនោះរួមមាន បញ្ហាភ្លើងឆេះព្រៃ ការដកហូតព្រៃឈើ ការបរបាញ់សត្វព្រៃ និងការនេសាទត្រីក្នុងតំបន់ការពារ និងអភិរក្សដោយខុសច្បាប់។
ព្រះអង្គបានបញ្ជាក់ថា៖ «បញ្ហាទាំងនេះមិនគ្រាន់តែធ្វើឲ្យបាត់បង់នូវព្រៃឈើ និងជីវចម្រុះដែលជាជម្រក និងចំណីរបស់សត្វព្រៃ និងមច្ឆជាតិប៉ុណ្ណោះទេ តែថែមទាំងធ្វើឲ្យបាត់បង់ជីវិតសត្វព្រៃ និងមច្ឆជាតិរបស់យើងផងដែរ ពិសេសប្រភេទឈើប្រណីត និងប្រភេទសត្វកម្រដែលងាយរងគ្រោះ និងជិតផុតពូជតែម្ដង»។
បើតាមព្រះតេជគុណ សាលួត ក្រុមជនប្រព្រឹត្តល្មើសធនធានធម្មជាតិភាគច្រើនបានប្រើអន្ទាក់ ឧបករណ៍ឆក់ រណារយន្ត និងអាវុធជាតិផ្ទុះដែលឧបករណ៍ទាំងនេះត្រូវបានចាប់ និងរឹបអូសបានរាប់ពាន់គ្រឿងក្នុង ១ ឆ្នាំៗ។ ព្រះអង្គបានអំពាវនាវដល់ពលរដ្ឋដែលធ្លាប់បានប្រព្រឹត្តបទល្មើសទាំងនេះឲ្យទម្លាក់ចោលនូវគំនិតទុទ្ទិដ្ឋិនិយមចោល ហើយចូលរួមក្នុងកិច្ចការការពារ និងអភិរក្សធនធានធម្មជាតិជាមួយសហគមន៍របស់ព្រះអង្គដើម្បីជាប្រយោជន៍ដល់មនុស្សជាតិទាំងអស់គ្នា។
ព្រះអង្គមានសង្ឃដីកាបន្ថែមថា៖ «ចូរយើងទាំងអស់គ្នាទម្លាក់ចោលនូវគំនិតអស្មិមានះដែលនាំឲ្យខ្លួនឯង និងសហគមន៍រួមទាំងសង្គមជាតិទាំងមូលឈានទៅរកសេចក្ដីវិនាស។ យើងត្រូវរួមគ្នាធ្វើល្អដើម្បីភាពចម្រុងចម្រើននៃសហគមន៍ និងប្រទេសជាតិយើង ព្រមទាំងពិភពលោកទាំងមូល»។
ក្នុងឱកាសនោះ ភួង លីណា ប្រធានមន្ទីរបរិស្ថានខេត្តឧត្តរមានជ័យក៏បានថ្លែងដែរថា កិច្ចការពារធនធានធម្មជាតិក្នុងតំបន់ដែនជម្រកសត្វព្រៃ មិនមែនជាតួនាទីផ្ដាច់មុខរបស់ប្រជាសហគមន៍ការពារព្រៃ ឬមន្ត្រីឧទ្យានុរក្សនៃមន្ទីរ ឬក្រសួងបរិស្ថាននោះទេ ប៉ុន្តែជាតួនាទី និងការទទួលខុសត្រូវរួមរបស់ភាគីពាក់ព័ន្ធ។
លោកថ្លែងថា៖ «ជាការពិតក្នុងចំណោមតំបន់ដែនជម្រកសត្វព្រៃទាំងអស់ក្នុងខេត្តឧត្តរមានជ័យរបស់យើង ដែនជម្រកសត្វព្រៃសង្ឃរុក្ខវ័នមានភាពល្អប្រសើរជាងគេ ដោយសារប្រជាសហគមន៍ក្នុងមូលដ្ឋាន អង្គការសង្គមស៊ីវិល និងអាជ្ញាធរពាក់ព័ន្ធរួមទាំងស្ថាប័នជំនាញមានកិច្ចសហការគ្នាល្អ ក្នុងការការពារ អភិរក្ស និងចុះអង្កេតតាមដាន និងបង្ក្រាបបទល្មើសជាប្រចាំ»។
ទន្ទឹមនឹងនេះលោកបានទទួលស្គាល់ថា បទល្មើសធនធានធម្មជាតិនៅតែបន្តកើតមានក្នុងតំបន់ដែនជម្រកសត្វព្រៃមួយនេះ និងបានទាមទារឲ្យមានការចូលរួមទាំងអស់គ្នាដើម្បីប្រយុទ្ធប្រឆាំងនឹងទង្វើបែបនេះ ដោយពង្រឹងការអនុវត្តច្បាប់ឲ្យមានប្រសិទ្ធភាព។
បើតាមលោក លីណា កាលពីឆ្នាំមុនក្រៅពីការងារពង្រឹងការល្បាតទប់ស្កាត់ និងបង្ក្រាបបទល្មើសព្រៃឈើ និងសត្វព្រៃ មន្ត្រីឧទ្យានុរក្សនៃតំបន់ដែនជម្រកសត្វព្រៃសង្ឃរុក្ខវ័នបានដាំឈើគ្រញូងដើម្បីស្ដារព្រៃឈើប្រណីតនេះឡើងវិញបានចំនួន ៣ ហិកតា និងបានរៀបចំជីកព្រំតំបន់ការពារព្រមទាំងគន្លងផ្លូវសម្រាប់ការពារភ្លើងឆេះព្រៃបានប្រមាណ ៧០ ភាគរយ នៃផ្ទៃដីសរុប ៣០ ២៥៦ ហិកតា ក្នុងតំបន់ដែនជម្រកសត្វព្រៃមួយនេះផងដែរ។
ចំណែកលោក ហួន ម៉ានិត អភិបាលរងខេត្តឧត្តរមានជ័យបានជំរុញឲ្យអាជ្ញាធរពាក់ព័ន្ធពង្រឹងការអនុវត្តច្បាប់ និងកិច្ចសហប្រតិបត្តិការល្អបន្ថែមទៀតជាមួយពលរដ្ឋក្នុងមូលដ្ឋានពិសេសជាមួយសហគមន៍ព្រៃសង្ឃរុក្ខវ័ន និងមន្ត្រីឧទ្យានុរក្សក្នុងខេត្តឧត្តរមានជ័យដើម្បីចុះស្រាវជ្រាវបង្ក្រាបបទល្មើសធនធានធម្មជាតិក៏ដូចជា ចុះអប់រំផ្សព្វផ្សាយច្បាប់នានាផងដែរ។ លោកបានអំពាវនាវឲ្យប្រជាសហគមន៍ប្រគល់នូវឧបករណ៍ខុសច្បាប់នានាដែលពួកគេបានលាក់ទុកសម្រាប់ប្រព្រឹត្តបទល្មើសកាលពីកន្លងមកជូនដល់សមត្ថកិច្ចដើម្បីចៀសវាងការប្រឈមចំពោះផ្លូវច្បាប់។
គួរបញ្ជាក់ផងដែរថា នៅក្នុងពិធីអបអរសាទរខួប ១៩ ឆ្នាំនៃការបង្កើតទីស្នាក់ការកណ្ដាលនៃសហគមន៍សង្ឃរុក្ខវ័ននេះក្រុមគណៈកម្មការនៃសហគមន៍រួមទាំងអ្នកចូលរួមប្រមាណជាង ២០០ នាក់ ក៏បានរួមគ្នាបំបួសដើមឈើមួយចំនួនក្នុងតំបន់ស្នូលនៃដែនជម្រកសត្វព្រៃសង្ឃរុក្ខវ័នផងដែរ ដោយភាគច្រើននៃដើមឈើទាំងនោះរួមមាន ឈើទាល ផ្ដៀក ត្រាច គគីរ ធ្នង់និងសុក្រំជាដើម៕