.jpg)
លោក មាស មុត នៅក្នុងផ្ទះលោកនៅខេត្តបាត់ដំបង។ រូប ភ្នំពេញប៉ុស្ដិ៍
ភ្នំពេញៈ សហចៅក្រមស៊ើបអង្កេតជាតិនៅក្នុងអង្គជំនុំជម្រះវិសាមញ្ញក្នុងតុលាការកម្ពុជាកាលពីម្សិលមិញបានចេញដីកាលើកលែងការចោទប្រកាន់លើលោក មាស មុត ពាក់ព័ន្ធក្នុងអំពើប្រល័យពូជសាសន៍ឧក្រិដ្ឋកម្មប្រឆាំងមនុស្សជាតិ និងឧក្រិដ្ឋកម្មសង្គ្រាម និងអំពើឃាតកម្មគិតទុកជាមុននៅក្នុងរបប ប៉ុល ពត ប៉ុន្តែសហចៅក្រមស៊ើបអង្កេតអន្តរជាតិបានបដិសេធសេចក្ដីសម្រេចរបស់សហចៅក្រមស៊ើបអង្កេតជាតិដោយលើកឡើងថា មានភ័ស្តុតាងគ្រប់ដើម្បីចោទប្រកាន់។
យោងតាមសេចក្ដីប្រកាសព័ត៌មានដែលចេញផ្សាយដោយការិយាល័យសហចៅក្រមស៊ើបអង្កេតរបស់អង្គជំនុំជម្រះសាលាដំបូងនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) កាលពីថ្ងៃទី ២៨ ខែវិច្ឆិកាបានឲ្យដឹងថា៖ «សហចៅក្រមស៊ើបអង្កេតជាតិយល់ឃើញថា មាស មុត មិនស្ថិតនៅក្នុងយុតា្តធិការបុគ្គលរបស់ អ.វ.ត.ក ក្នុងនាមមេដឹកនាំជាន់ខ្ពស់ ឬជាជនម្នាក់ដែលទទួលខុសត្រូវខ្ពស់បំផុតនោះទេ ហើយបានលើកលែងការចោទប្រកាន់លើ មាស មុត ដោយសារមូលហេតុនេះ»។
យោងតាមសេចក្ដីថ្លែងការណ៍ដដែលនេះសហចៅក្រមស៊ើបអង្កេតអន្តរជាតិយល់ឃើញថា មាស មុត ត្រូវស្ថិតនៅក្នុងយុត្តាធិការបុគ្គលរបស់ អ.វ.ត.ក ក្នុងនាមជាជនម្នាក់ក្នុងចំណោមជនទាំងឡាយដែលទទួលខុសត្រូវខ្ពស់បំផុតហើយមានភ័ស្តុតាងគ្រប់គ្រាន់ដើម្បីចោទបញ្ជូនគាត់ទៅជំនុំជម្រះចំពោះបទចោទនៃអំពើប្រល័យពូជសាសន៍លើជនវៀតណាម ឧក្រិដ្ឋកម្មប្រឆាំងមនុស្សជាតិ ឧក្រិដ្ឋកម្មសង្គ្រាម និងអំពើឃាតកម្មគិតទុកជាមុនយោងតាមច្បាប់កម្ពុជា។
លោក នេត្រ ភក្ត្រា អ្នកនាំពាក្យ អ.វ.ត.ក ថ្លែងថាដីកាដំណោះស្រាយនេះមិនទាន់ដឹងថាតើត្រូវយក មាស មុត ទៅជំនុំជម្រះ ឬក៏លើកលែងការចោទប្រកាន់ទេព្រោះសហចៅក្រមស៊ើបអង្កេតខ្វែងយោបល់គ្នា ហើយការសម្រេចចុងក្រោយគឺអាស្រ័យលើចៅក្រមនៃអង្គបុរេជំនុំជម្រះ៕
