.jpg)
កម្មករក្នុងក្រុមហ៊ុនចិនបំផ្ទុះថ្មនៅខេត្តកំពត អង្គុយសម្រាកក្នុងការដ្ឋានបំផ្ទុះថ្ម។ រូបថត សហការី
កំពតៈ សហព័ន្ធសហជីពកម្មករសំណង់និងព្រៃឈើកម្ពុជា និងមជ្ឈមណ្ឌលសម្ព័ន្ធភាពការងារនិងសិទ្ធិមនុស្ស បានស្នើឲ្យមានការផ្អាកជាបណ្ដោះអាសន្ន នូវសកម្មភាពខួងបំផ្ទុះថ្មភ្នំរបស់ក្រុមហ៊ុនចិនមួយ ដែលទទួលម៉ៅការខួងបំផ្ទុះថ្មភ្នំ សម្រាប់ផ្គត់ផ្គង់ដល់រោងចក្រផលិតស៊ីម៉ង់ត៍ថៃប៊ុនរ៉ុង ក្នុងខេត្តកំពត និងជំរុញឲ្យមានការចុះធ្វើអធិការកិច្ចការងារនៅទីតាំងការដ្ឋានខួងបំផ្ទុះថ្មភ្នំនៃក្រុមហ៊ុននេះ ដើម្បីធានាដល់សុវត្ថិភាពការងាររបស់កម្មករ។
សំណើនេះ បានធ្វើឡើងកាលពីថ្ងៃទី ០២ ខែ មិថុនា ឆ្នាំ ២០២០ បន្ទាប់ពីក្រុមការងារនៃសហព័ន្ធសហជីពកម្មករសំណង់ និងព្រៃឈើកម្ពុជាបានរកឃើញថា ក្រុមហ៊ុនចិនដែលទទួលម៉ៅការបន្តពីក្រុមហ៊ុនរោងចក្រផលិតស៊ីម៉ង់ត៍ថៃប៊ុនរ៉ុង ក្នុងការខួងបំផ្ទុះថ្មភ្នំនេះ មិនបានអនុវត្តត្រឹមត្រូវតាមវិធានណែនាំអំពីសុវត្ថិភាពការងារ និងបទដ្ឋានបច្ចេកទេសមួយចំនួនទៀត ជាពិសេសនៅមិនទាន់បានចុះកិច្ចព្រមព្រៀងជាផ្លូវការជាមួយភ្នាក់ងារបេឡាជាតិនៃរបបសន្តិសុខសង្គមនៅឡើយ ដែលប្រការនេះ ធ្វើឲ្យបាត់បង់ផលប្រយោជន៍ជាច្រើនរបស់កម្មករ។
លោក ស៊ូ ឆ្លូញ អនុប្រធានសហព័ន្ធសហជីពកម្មករសំណង់ និងព្រៃឈើកម្ពុជា បាននិយាយនៅថ្ងៃម្សិលមិញថា បន្ទាប់ពីមានករណី បាក់ផ្ទាំងថ្មភ្នំធ្លាក់សង្កត់លើកម្មករបណ្ដាលឲ្យស្លាប់ពីរនាក់កាលពីរសៀលថ្ងៃទី ២៩ ខែ ឧសភា ឆ្នាំ ២០២០ កន្លងមកនេះ ក្រុមការងារនៃសហព័ន្ធសហជីពរបស់លោក បានចុះពិនិត្យ និងស៊ើបសួរកម្មករ ដែលបម្រើការងារនៅក្នុងការដ្ឋានខួងបំផ្ទុះថ្មភ្នំនោះ ហើយរកឃើញថាការដ្ឋានខួងបំផ្ទុះថ្មភ្នំរបស់ក្រុមហ៊ុនម៉ៅការចិននោះ នៅមិនទាន់បានអនុវត្តពេញលេញតាមសេចក្ដីណែនាំ អំពីគោលការណ៍សុវត្ថិភាពនៅកន្លែងការងារ និងបទដ្ឋានបច្ចេកទេសមួយចំនួនទៀត។
លោក ឆ្លូញ បាននិយាយថា៖ «កម្មករដែលបម្រើការងារនៅក្នុងការដ្ឋានខួងបំផ្ទុះថ្មភ្នំនេះ មិនបានស្លៀកពាក់ឯកសណ្ឋាននិងពាក់ឧបករណ៍សម្រាប់ការពារគ្រោះថ្នាក់ឲ្យបានត្រឹមត្រូវនោះទេ ខណៈការងារក្នុងការដ្ឋាននេះមានបញ្ហាប្រឈមខ្ពស់ចំពោះគ្រោះថ្នាក់ដល់អាយុជីវិត»។
ចំណែក លោក ឃុន ថារ៉ូ អ្នកគ្រប់គ្រងកម្មវិធីការងារនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្សបាននិយាយថា ក្រៅពីកង្វះការអនុវត្តនូវវិធានសុវត្ថិភាពនៅកន្លែងការងារ ក្រុមហ៊ុននេះនៅមិនទាន់មានការទទួលខុសត្រូវអំពីរបបសន្តិសុខសង្គមចំពោះកម្មកររបស់ខ្លួននោះទេ ដោយរហូតមកទល់ពេលនេះ ក្រុមហ៊ុននៅមិនទាន់ចុះកិច្ចព្រមព្រៀងជាមួយក្រុម បេឡាជាតិនៃរបបសន្តិសុខសង្គម នៃមន្ទីរឬក្រសួងការងារនៅឡើយទេ។
លោកបានថ្លែងថា៖ «ថ្វីត្បិតតែភាគីក្រុមហ៊ុនបានផ្ដល់សំណងសម្រាប់ជនរងគ្រោះម្នាក់ៗចំនួន ៣៥ ០០០ ដុល្លារ ដល់ក្រុមគ្រួសារជនរងគ្រោះរួចទៅហើយមែន ប៉ុន្តែក្រុមហ៊ុនមិនបានបំពេញកាតព្វកិច្ចក្នុងការ ជួយឧបត្ថម្ភគាំទ្រផ្នែករបបសន្តិសុខសង្គម ដល់សមាជិកក្រុមគ្រួសារនៃជនរងគ្រោះ ទៅតាមបទបញ្ញតិនៃច្បាប់ការងារនោះទេ ដោយសារតែក្រុមហ៊ុន មិនបានចុះបញ្ជីជាមួយ ប.ស.ស »។
លោក ថារ៉ូ បានបន្តថា៖ «តាមរយៈការរកឃើញនូវភាពខ្វះចន្លោះរបស់ក្រុមហ៊ុនម៉ៅការមួយនេះ ទើបក្រុមការងារយើងបានសម្រេចដាក់សំណើទៅស្ថាប័នមានសមត្ថកិច្ចពាក់ព័ន្ធ ចុះផ្អាកសកម្មភាពរបស់ហ៊ុននេះជាបណ្ដោះសន្ន និងត្រូវធ្វើអធិការកិច្ចការងារឲ្យបានជាប្រចាំ ប្រកបដោយប្រសិទ្ធិភាព និងតម្លាភាព។ ជាពិសេស ត្រូវបង្ខំឲ្យក្រុមហ៊ុននេះចុះបញ្ជីការជាមួយ ប.ស.ស ជាបន្ទាន់ ដើម្បីធានាដល់ផលប្រយោជន៍របស់កម្មករទៅតាមបទបញ្ញតិនៃច្បាប់ការងារ»។
ជុំវិញករណីនេះ លោក អ៊ឹង ប៉ូហេង ប្រធានមន្ទីការងារ និងបណ្ដុះបណ្ដាលមុខវិជ្ជាជីវៈ ខេត្តកំពត បានប្រាប់ភ្នំពេញប៉ុស្តិ៍នៅថ្ងៃម្សិលមិញថា លោកបានចាត់ឲ្យមន្ត្រីជំនាញចុះអធិការកិច្ចនៅការដ្ឋានខួងបំផ្ទុះថ្មភ្នំនោះហើយ បន្ទាប់ពីបានជួយអន្តរាគមន៍ដល់គ្រួសារជនរងគ្រោះ ក្នុងការរៀបចំបុណ្យសព និងជំរុញឲ្យមានការជួយផ្ដល់សំណងជួសជុលការខូចខាត ដល់ក្រុមគ្រួសារជនរងគ្រោះទាំង ២ នាក់នោះ។
លោក ប៉ូហេង បានបញ្ជាក់ថា៖ «នៅពេលនេះ ខាងភាគីក្រុមហ៊ុនចិននោះ បានផ្ដល់សំណងគ្រោះថ្នាក់ការងារ សម្រាប់ជនរងគ្រោះម្នាក់ៗ ៣៥ ០០០ ដុល្លារ ដល់គ្រួសារជនរងគ្រោះអស់ហើយ។ ចំណែកភាគីគ្រួសារជនរងគ្រោះ ក៏មិនបានតវ៉ាទាមទារសំណងអ្វីបន្ថែមទៀតដែរ»។
បើតាមលោក ប៉ូហេង ក្រុមហ៊ុនចិនដែលទទួលម៉ៅការខួងបំផ្ទុះថ្មភ្នំសម្រាប់ផ្គត់ផ្គង់ដល់ផ្នែកផលិតកម្មនៃរោងចក្រផលិតស៊ីម៉ង់ត៍ថៃ ប៊ុនរ៉ុង នេះ គឺ ជាបុត្រសម្ព័ន្ធនៃក្រុមហ៊ុនថៃប៊ុន រ៉ុងហ្គ្រុប ដែលមានចុះបញ្ជីការត្រឹមត្រូវ៕
