ភ្នំពេញៈ ភាគីសហជីពដែលតំណាងឱ្យកម្មករនិយោជិតបានបង្ហើបឲ្យដឹងពីតួលេខសម្រាប់ដាក់ធ្វើការចរចាជាមួយនឹងភាគីនិយោជក និងតំណាងរដ្ឋាភិបាលលើការស្នើសុំដំឡើងប្រាក់ឈ្នួលអប្បបរមាផ្នែកវាយនភណ្ឌកាត់ដេរ និងផលិតស្បែកជើងសម្រាប់ឆ្នាំ ២០២១ គឺចំនួន ១១,៥៩ ដុល្លារអាមេរិក ឬស្មើនឹង ៦,១%។
តួលេខនេះនឹងត្រូវដាក់ធ្វើការចរចាក្នុងកិច្ចប្រជុំក្រុមប្រឹក្សាជាតិប្រាក់ឈ្នួលអប្បបរមានៅក្រសួងការងារដែលចាប់ផ្តើមនៅថ្ងៃទី ៣ ខែកញ្ញាដែលមានការចូលរួមពីត្រីភាគី ដែលមានសហជីពតំណាងឱ្យកម្មករ សមាគមរោងចក្រកាត់ដេរនៅកម្ពុជាដែលតំណាងឱ្យនិយោជក និងក្រសួងការងារ។
លោក ប៉ាវ ស៊ីណា ប្រធានសហភាពចលនាកម្មករកម្ពុជាបានឲ្យដឹងថា៖ «យើងបានកំណត់យកចំនួន ១១,៥៩ ដុល្លារ ជាតួលេខមួយដែលយើងបានឯកភាពគ្នាក្នុងការដាក់តួលេខនេះសម្រាប់ធ្វើការចរចាជាមួយនឹងសមាគមរោងចក្រកាត់ដេរនៅកម្ពុជា ប៉ុន្តែលេខនេះគ្រាន់តែជាលេខរួមមួយដែលយើងបានរកឃើញដើម្បីចរចា តែលទ្ធផលនៃការចរចានោះនឹងទទួលបានអាចមានការប្រែប្រួលយ៉ាងណាយើងមិនទាន់ដឹងនៅឡើយទេ»។
លោក អាត់ ធន់ ប្រធានសហភាពការងារកម្ពុជាបានឲ្យដឹងផងដែរថា តួលេខដែលខាងសហជីពបានកំណត់សម្រាប់ធ្វើការចរចានេះ គឺបានមកពីការគណនាដោយផ្អែកលើកត្តាធំៗចំនួន ៣ គឺអតិផរណាប្រចាំឆ្នាំចំនួន ២,៨% ផលិតភាពរបស់រោងចក្រចំនួន ២% និងកម្រិតចំណេញរបស់ថៅកែរោងចក្រចំនួន ១,៣% ដែលសរុបមានចំនួន ៦,១%។
អ្នកនាំពាក្យនៃក្រសួងការងារលោក ហេង សួរ បានឲ្យដឹងដែរថា ដំណើរការនៃការចរចាប្រាក់ឈ្នួលសម្រាប់កម្មករកាត់ដេរ និងផលិតស្បែកជើងសម្រាប់ឆ្នាំ ២០២១ នឹងមិនមានអ្វីដែលនាំឱ្យមានការរអាក់រអួលនោះទេ ហើយក្រសួងនៅបន្តអនុវត្តតាមកម្មវិធីដែលបានកំណត់រួចហើយដដែល។
លោក កាំង ម៉ូនីកា អគ្គលេខាធិការរងនៃសមាគមរោងចក្រកាត់ដេរនៅកម្ពុជា បានឱ្យដឹងដែរថា សមាគមកំពុងបញ្ចូលទិន្នន័យទៅក្នុងលក្ខណៈវិនិច្ឆ័យបែបសេដ្ឋកិច្ចមុនពេលឈានទៅដល់ការកំណត់តួលេខ ដោយផ្អែកលើស្ថានភាពបច្ចុប្បន្នដែលគ្រប់គ្នាអាចមើលឃើញថា ប្រាក់ឈ្នួលអប្បបរមាឆ្នាំ ២០២១ នឹងត្រូវប្រឈមនឹងការធ្លាក់ចុះបន្តិច ប្រសិនបើកំណត់ឱ្យនូវភាពត្រឹមត្រូវផ្អែកទៅលើភាពជាក់ស្តែងនៃសេដ្ឋកិច្ច៕