.jpg)
ទិដ្ឋភាពផ្ទះជួលឲ្យកម្មករ១កន្លែងនៅក្នុងខណ្ឌពោធិ៍សែនជ័យ រាជធានីភ្នំពេញ។ ហុង មិនា
ភ្នំពេញ៖ សហជីពមួយចំនួនបានស្នើដល់រដ្ឋាភិបាលថា គួរទប់ស្កាត់ការដំឡើងថ្លៃផ្ទះជួលនៅឆ្នាំថ្មីនេះ ដោយការដាក់បទបញ្ជាឲ្យមន្ត្រីមូលដ្ឋានចុះតាមដានផ្ទាល់នៅទីតាំងមានផ្ទះជួលនានា ដើម្បីកុំឲ្យឡើងថ្លៃជាជាងគ្រាន់តែអំពាវនាវដែលហាក់មិនអាចទប់ស្កាត់ឲ្យមានប្រសិទ្ធភាពបាន។
ការស្នើឡើងនេះ ធ្វើឡើងបន្ទាប់ពីលោកនាយករដ្ឋមន្ត្រី ហ៊ុន សែន បានអំពាវនាវក្នុងពេលថ្មីៗនេះ ហើយក៏តែងធ្វើជារៀងរាល់ឆ្នាំកុំឲ្យមានការឡើងថ្លៃផ្ទះជួល ប៉ុន្តែសហជីពសង្កេតឃើញថា តម្លៃផ្ទះជួលទំនិញ និងសេវាដឹកជញ្ជូនសម្រាប់កម្មករ តែងឡើងថ្លៃជារៀងរាល់ឆ្នាំ។
លោក ប៉ាវ ស៊ីណា ប្រធានសហជីពចលនាកម្មករកម្ពុជាបានប្រាប់ភ្នំពេញប៉ុស្តិ៍ពីថ្ងៃចន្ទថា ជារៀងរាល់ឆ្នាំរដ្ឋាភិបាលតែងអំពាវនាវដល់ម្ចាស់ផ្ទះជួលកុំឲ្យដំឡើងថ្លៃផ្ទះជួល។ ប៉ុន្តែហាក់មិនមានប្រសិទ្ធភាពទេព្រោះផ្ទះដែលកម្មករជួលនៅតែឡើងថ្លៃចន្លោះពី ៥ ដល់ ២០ ដុល្លារ ទៅតាមទំហំផ្ទះ។
លោកបញ្ជាក់ថា៖ «ការអំពាវនាវកុំឲ្យម្ចាស់ផ្ទះជួលដំឡើងថ្លៃជារឿងមួយល្អ។ ប៉ុន្តែខ្ញុំគិតថា វាមិនសូវជាមានប្រសិទ្ធភាពទេ ព្រោះវាមិនមែនជាបទបញ្ជាទេគ្រាន់តែជាការអំពាវនាវ។ អ៊ីចឹងប្រសិនបើអាច សម្តេចគួរចាត់មន្ត្រីខណ្ឌ សង្កាត់ឲ្យគាត់ចុះត្រួតពិនិត្យគោលដៅដែលជាមូលដ្ឋានរបស់ខ្លួន ព្រោះម្ចាស់ផ្ទះជួលស្ថិតនៅក្នុងការគ្រប់គ្រងរបស់អាជ្ញាធរមូលដ្ឋាន អាចក្តាប់ព័ត៌មានបានច្រើន»។
លោក ស៊ីណា បានអះអាងថា បើរដ្ឋាភិបាលមិនអាចទប់ស្កាត់ករណីនេះបាន នឹងធ្វើឲ្យមានបន្ទុកដល់កម្មករ ហើយម្ចាស់ផ្ទះជួលទាំងនោះ នឹងនៅតែបន្តឡើងថ្លៃឥតឈប់ឈរ។
លោក អាត់ ធន់ ប្រធានសហភាពការងារកម្ពុជាបានប្រាប់ភ្នំពេញប៉ុស្តិ៍ដែរថា តាមការអង្កេតរបស់លោក ការឡើងថ្លៃផ្ទះជួលនេះ គឺធ្វើតាមចិត្តម្ចាស់ផ្ទះ បើទោះកម្ពុជា មានច្បាប់សម្រាប់គ្រប់គ្រងផ្ទះជួលក៏ដោយ។ លោកបញ្ជាក់ថា៖ «ម្ចាស់ផ្ទះ ឡើងថ្លៃគ្មានពេលវេលានោះទេ អ្នកណាចង់ឡើងពេលណា ហើយឡើងប៉ុន្មាន ក៏ស្រេចតែម្ចាស់ផ្ទះ។ អ្នកណាចង់ ១ ឆ្នាំឡើងម្តង អ្នកណាចង់ ២ ឆ្នាំឡើងម្តង ជារឿងរបស់ម្ចាស់ផ្ទះ គ្មានអ្នកណាមកគ្រប់គ្រង ឬចាត់វិធានការនោះទេ...»។
រាជរដ្ឋាភិបាលកម្ពុជាបានដាក់ចេញនូវគោលនយោបាយដំឡើងប្រាក់ឈ្នួលអប្បបរមាដល់កម្មករនិយោជិតក្នុងវិស័យកាត់ដេរចាប់តាំងពីឆ្នាំ ២០១៤ មកហើយ នៅឆ្នាំ ២០២០ នេះ ប្រាក់ឈ្នួលអប្បបរមារបស់កម្មករនិយោជិត ឡើងដល់ ១៩០ ដុល្លារ ក្នុង ១ ខែ ខណៈឆ្នាំ ២០១៩ ប្រាក់ឈ្នួលអប្បបរមារបស់កម្មករទទួលបាន ១៨២ ដុល្លារ។
លោក ហេង សួរ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានប្រាប់ភ្នំពេញប៉ុស្តិ៍ពីម្សិលមិញថា តាមច្បាប់ភតិសន្យាពិសេស គឺម្ចាស់ផ្ទះមិនត្រូវដំឡើងថ្លៃឈ្នួលផ្ទះកម្មករនិយោជិតខ្ពស់ហួសហេតុ និងគ្មានហេតុផលនោះទេ។ លោកអះអាងថា ប្រសិនបើមានការឡើងថ្លៃហួសហេតុ និងខុសហេតុផលនោះ អាជ្ញាធរមូលដ្ឋានត្រូវតែមានវិធានការជាបន្ទាន់។
លោកបន្តថា៖ «យោងតាមច្បាប់នេះអាជ្ញាធរមូលដ្ឋាននឹងទទួលសំណើពិនិត្យដោះស្រាយករណីនីមួយៗ ប្រសិនបើមានការដំឡើងថ្លៃឈ្នួលខ្ពស់ហួសហេតុ។ ក្រសួងក៏តែងតែទទួលយកនូវករណីប្តឹងរបស់បងប្អូនកម្មករនិយោជិត ដើម្បីរួមគ្នាជាមួយអាជ្ញាធរមូលដ្ឋានចុះពិនិត្យ និងសម្របសម្រួលផងដែរ»។
ច្បាប់ភតិសន្យាពិសេស ឬហៅថា ច្បាប់គ្រប់គ្រងផ្ទះជួលដែលរដ្ឋសភាបានអនុម័ត កាលពីឆ្នាំ ២០១៥ បានហាមឃាត់ដល់ម្ចាស់ផ្ទះជួលមិនឲ្យដំឡើងថ្លៃឈ្នួលផ្ទះសម្រាប់កម្មករ និស្សិត និងសិស្សដែលជួលផ្ទះក្នុងអំឡុងពេល ២ ឆ្នាំ នៃការជួលផ្ទះ។ ប៉ុន្តែច្បាប់នេះ ក៏បានផ្តល់សិទ្ធិដល់អ្នកជួលផ្ទះមានសិទ្ធិរំលាយភតិសន្យាពិសេសនៅពេលណាក៏បាន។
អ្នកស្រី អិង សាន ជាកម្មករម្នាក់ ដែលស្នាក់នៅបន្ទប់ជួលក្នុងសង្កាត់ចោមចៅ ១ បានប្រាប់ភ្នំពេញប៉ុស្តិ៍ពីម្សិលមិញថា បន្ទប់ជួលដែលអ្នកស្រីជួល បានឡើងថ្លៃជាបន្តបន្ទាប់ហើយនៅក្នុងឆ្នាំ ២០២០ នេះ អ្នកស្រីមានការបារម្ភពីការឡើងថ្លៃបន្ថែមទៀត ខណៈបន្ទប់ជួល ឬផ្ទះជួលរបស់កម្មករដទៃទៀត ត្រូវបានប្រកាសឡើងថ្លៃជាហូរហែហើយនោះ។
អ្នកស្រីបានបន្តថា៖ «បើឡើងថ្លៃអ៊ីចឹង ប៉ះពាល់ដែរ ព្រោះអីប្រាក់ខែយើងឆ្នាំហ្នឹង ឡើងតែបន្តិច ហើយបើឡើង (ផ្ទះ) ចំនួន ៥ ដុល្លារ អស់បាត់ទៅហើយ គ្មានបានអីទេ។ ខ្ញុំមិនចង់ឲ្យឡើងថ្លៃទេ ចង់ឲ្យនៅប៉ុណ្ណឹងដដែល ព្រោះបើអ្វីៗឡើងរហូតអ៊ីចឹងមិនល្អទេ»៕
