ភ្នំពេញៈ ក្រុមសហជីពនៅក្នុងកិច្ចប្រជុំកាលពីម្សិលមិញបានបន្ទន់ឥរិយាបថដោយបញ្ចុះតម្លៃបន្តិចលើការទាមទារដំឡើងប្រាក់ឈ្នួលគោលថ្មីអប្បបរមារបស់កម្មករមកនៅត្រឹម ១៧៧,៥៩ ដុល្លារខណៈដែលកម្មកររោងចក្រកាត់ដេរមួយនៅក្នុងសង្កាត់ទួលសង្កែ ខណ្ឌឫស្សីកែវបានធ្វើកូដកម្មបន្ទាប់ពីថៅកែរត់ចោលមិនបើកប្រាក់ខែឲ្យ។
កន្លងមកសមាគមរោងចក្រកាត់ដេរនៅកម្ពុជា (GMAC) បានកំណត់ប្រាក់ឈ្នួលគោលកម្មករនិយោជិតចំនួន ១៤៤ ដុល្លារសម្រាប់ឆ្នាំ ២០១៧ ខណៈក្រសួងការងារស្នើឱ្យបានចំនួន ១៤៨,២០ ដុល្លារតែសហជីពទាមទារដល់ ១៧៩,៦០ ដុល្លារ។
តែក្រោយពីមានកិច្ចប្រជុំស្តីពីការកំណត់ប្រាក់ឈ្នួលជាច្រើនលើកមក GMAC បានយល់ព្រមដំឡើងប្រាក់ឈ្នួលពី ១៤៤ ដុល្លារដល់ ១៤៦,៣៧ ដុល្លារខណៈដែលភាគីសហជីពព្រមទម្លាក់តម្លៃពី ១៧៩,៦០ ដុល្លារមកនៅត្រឹម ១៧៧,៥៩ ដុល្លារដើម្បីបង្កបរិយាកាសល្អក្នុងកិច្ចប្រជុំនៅថ្ងៃខាងមុខទៀត។
បច្ចុប្បន្នប្រាក់ឈ្នួលគោលកម្មករក្នុងវិស័យវាយនភណ្ឌ និងស្បែកជើងនៅកម្ពុជាមានចំនួន ១៤០ ដុល្លារខណៈដែលមានកម្មករនិយោជិតបម្រើការងារនេះមានចំនួនជិត ៧០ ម៉ឺននាក់គិតត្រឹមខែធ្នូ ឆ្នាំ ២០១៥ ។
ប្រធានសម្ព័ន្ធសហជីពស៊ីខាវឌូលោក អាត់ ធន់ បានបញ្ជាក់បន្ទាប់ពីបញ្ចប់កិច្ចប្រជុំកាលពីម្សិលមិញថាខាងសហជីពនៅតែរកឃើញថាប្រាក់ឈ្នួលកម្មករអាចបានរង្វង់ ១៨០ ដុល្លារដដែល។
តែលោកថាការបញ្ចុះតម្លៃ ២ ដុល្លារនេះដើម្បីបន្តការចរចានៅថ្ងៃទី ២៦ ខែកញ្ញាម្តងទៀតខណៈភាគី GMAC ព្រមដំឡើងប្រាក់ឈ្នួល ២ ដុល្លារដែរ។
លោកថា៖ «នេះគ្រាន់តែជានីតិវិធីចរចានៅមានការកើនឡើងជាងនេះហើយខាងសហជីពនឹងមានយុទ្ធសាស្ត្រជំរុញបន្ថែមទៀតដើម្បីឱ្យមានការផ្តល់ប្រាក់ឈ្នួលសមរម្យដល់កម្មករ»។
ប្រធានសម្ព័ន្ធសហជីពជាតិលោក ហ្វា សាលី ថ្លែងថាសហជីពនឹងមិនបញ្ចុះតម្លៃបន្ថែមទៀតទេដោយសារបានរកឃើញថាការចំណាយរបស់កម្មករបច្ចុប្បន្នមិនតិចជាង ១៧០ ដុល្លារនោះទេក្នុងមួយខែ។
លោកបន្តថា៖ «សហជីពទាំងអស់ដែលបានរកឃើញដោយវិនិច្ឆ័យលក្ខណៈទាំង ៧ គឺយើងបានធ្វើការយ៉ាងល្អិតល្អន់រកឃើញថាការចំណាយរបស់កម្មករយ៉ាងតិចណាស់ក៏ ១៧១ ដុល្លារដែរប៉ុន្តែដោយសារយើងមិនចង់ឃើញស្ថានភាពនៃការដំឡើងប្រាក់ឈ្នួលខ្ពស់ពេកធ្វើឱ្យអ្នកវិនិយោគងាកពីកម្ពុជាទៅភូមាអ៊ីចឹងយើងសម្រេចចិត្តថាយកតួលេខ ១៧៧,៥៩ ដុល្លារហ្នឹងប៉ុន្តែជំហររបស់សហជីពមិនចុះទេទោះបីជាមានកិច្ចប្រជុំត្រីភាគីនៅពេលខាងមុខក្តី»។
លោក សាលី បានសម្តែងការគាំទ្រចំពោះការលើកឡើងរបស់លោក ធន់ ដែលថាជាជម្រើសចុងក្រោយអាចនឹងមានកូដកម្មបើសិនជាការដំឡើងប្រាក់ឈ្នួលនៅតែមានកម្រិតទាប។
កាលពីម្សិលមិញខណៈ GMAC តំណាងក្រសួងការងារ និងសហជីពកំពុងចរចាពីការដំឡើងប្រាក់ឈ្នួលកម្មករនៅរោងចក្រកាត់ដេរ Co Seek Garment C0., Ltd ក្នុងខណ្ឌឫស្សីកែវមានកម្មករប្រមាណ ២០០ នាក់បានឈរតវ៉ានៅខាងមុខរោងចក្រដើម្បីទាមទារឲ្យថៅកែរោងចក្រចេញមកទូទាត់ប្រាក់ខែសម្រាប់ខែសីហាបន្ទាប់ពីថៅកែរោងចក្របានរត់ចោលពួកគេ។
កម្មកររោងចក្រម្នាក់លោក ឯល សុភ័ក្ត្រ បានថ្លែងថារហូតមកដល់ថ្ងៃម្សិលមិញកម្មករជាង ៤០០ នាក់ក្នុងរោងចក្រនេះមិនទាន់ទទួលបានប្រាក់ខែសម្រាប់ខែសីហានៅឡើយទេ។
លោកថាខាងភាគីរោងចក្របានចាប់ផ្តើមដឹកអីវ៉ាន់ចេញពីរោងចក្រតាំងពីចុងខែសីហាតែលោកថាកម្មករក៏មិនបានចាប់អារម្មណ៍ដែរប៉ុន្តែនៅថ្ងៃទី ១ ខែកញ្ញាទើបមានការដឹកអីវ៉ាន់ជាលក្ខណៈទ្រង់ទ្រាយធំទើបកម្មករបានសង្ស័យ និងឃាត់រថយន្តមិនឲ្យដឹកចេញ។
លោកបន្តថាកម្មករមិនបានធ្វើការចាប់តាំងពីថ្ងៃទី ១ ខែកញ្ញាមកដោយថាពួកគាត់គ្រាន់តែទៅអង្គុយក្នុងរោងចក្រប៉ុណ្ណោះ។
លោកបន្ថែមថា៖ «ថ្ងៃនេះទើបជាថ្ងៃទីពីរប៉ុណ្ណោះដែលពួកខ្ញុំចេញមកឈរនៅខាងក្រៅ...ពួកខ្ញុំសុំឲ្យតែគាត់ (ថៅកែ) បើកប្រាក់ឈ្នួលឲ្យពួកខ្ញុំបើគាត់ចង់បិទរោងចក្រប្តូរថៅកែយ៉ាងម៉េចសុំឲ្យតែបើកប្រាក់ខែឲ្យខ្ញុំ...តែអ្នកគ្រប់គ្រងថាអត់មានលុយបើកឲ្យទេគាត់ថាថៅកែរត់បាត់»។
បើតាមលោក សុភ័ក្រ្ត កម្មករម្នាក់ត្រូវទទួលបានប្រាក់ខែយ៉ាងតិចក៏ ២៥០ ដុល្លារដែរបូកទាំងប្រាក់ធ្វើការថែមម៉ោង និងប្រាក់អត្ថប្រយោន៍ផ្សេងៗដូចជាថ្លៃស្នាក់នៅ និងថ្លៃបាយជាដើម។
កម្មករម្នាក់ទៀតគឺអ្នកស្រី ហន សេងហ៊ន ថ្លែងថាពួកអ្នកស្រីទាមទារប្រាក់អតីតភាពការងារប្រាក់បំណាច់ និងប្រាក់ខែសម្រាប់ខែសីហាដែលសរុបអ្នកស្រីអាចទទួលបានដល់ ៥០០ ដុល្លារ។
បុគ្គលិកផ្នែករដ្ឋបាលរបស់រោងចក្រលោក លូ កុកឆាយ ដែលថាខ្លួនក៏មិនទាន់បានទទួលប្រាក់ខែដែរនោះបានថ្លែងថាជនជាតិចិនដែលជាអ្នកគ្រប់គ្រងរោងចក្រនេះបានព្យាយាមទាក់ទងថៅកែរោងចក្រជាច្រើនដងមកហើយតាំងពីដើមខែដើម្បីរកប្រាក់ខែបើកឲ្យកម្មករប៉ុន្តែមិនអាចទាក់ទងបាន។
លោកបន្តថាថៅកែបានរត់ចោលរោងចក្រនេះ។
ទោះបីយ៉ាងណាលោក កុក ឆាយ ថ្លែងថាកាលពីសប្តាហ៍មុនម្ចាស់អគារបានចេញមុខដោះស្រាយបញ្ហានេះដោយបានសន្យាផ្តល់ប្រាក់ខែគោល ១៤០ ដុល្លារ និងប្រាក់បន្ថែមម៉ោងដល់កម្មករដែលកម្មករអាចបាត់បង់ប្រាក់ដែលខ្លួនត្រូវទទួលបានប្រហែល ២០ ដុល្លារក្នុងម្នាក់ៗ។
លោក ឡោ សុភ័ក្រ អនុប្រធានសម្ព័ន្ធសហជីពអំណាចយុវជនកម្ពុជាដែលបានចូលរួមជួយរកដំណោះស្រាយដល់កម្មករបានដាក់ការសង្ស័យថាម្ចាស់អគារ និងថៅកែរោងចក្រអាចមានទំនាក់ទំនងគ្នាទើបម្ចាស់អគារហ៊ានចេញមុខដោះស្រាយបែបនេះ។
លោកបន្ថែមថា៖ «តាមពិតកន្លែងហ្នឹងបើតាមខ្ញុំយល់ម្ចាស់អគារអត់មានតួនាទីអ្វីមកសងជំនួសថៅកែទេ...ប៉ុន្តែបើសិនជាម្ចាស់អគារចេញមុខសងអ៊ីចឹងវាអាចថាមានប្រាស្រ័យទាក់ទងគ្នាជាមួយម្ចាស់រោងចក្រហើយ»។
អ្នកនាំពាក្យក្រសួងការងារលោក ហេង សួរ ប្រាប់ភ្នំពេញប៉ុស្តិ៍តាមសារអេឡិចត្រូនិកកាលពីម្សិលមិញថាសម្រាប់ករណីនេះក្រសួងការងារអាចជួយបំពេញបែបបទប្តឹងទៅតុលាការដើម្បីបង្កកទ្រព្យសម្បត្តិរបស់រោងចក្រទុកសម្រាប់លក់ និងផ្តល់សំណងដល់កម្មករ៕
