ភ្នំពេញៈ ក្នុងការប្រជុំត្រីភាគីម្សិលមិញស្តីពីប្រាក់ខែកម្មករ ភាគីសហជីពតំណាងឲ្យកម្មករនិយោជិតបានស្នើសុំឲ្យមានការដំឡើងប្រាក់ឈ្នួលកម្មករចំនួន ១៨២ ដុល្លារអាមេរិកក្នុង ១ ខែសម្រាប់ឆ្នាំ ២០១៩ ខណៈភាគីនិយោជកហ៊ានត្រឹម ១៧៧ ដុល្លារ ហើយដែលភាគីទាំង ២ បានស្នើឲ្យមានការជួយពីរដ្ឋាភិបាលចំពោះភាគីរៀងៗខ្លួន ដើម្បីធ្វើយ៉ាងណាឲ្យមានផលប្រយោជន៍ដល់កម្មករ និងនិយោជក។
ទោះជាយ៉ាងណាទាំង ៣ ភាគីគឺភាគីតំណាងរដ្ឋាភិបាល ភាគីនិយោជក និងភាគីសហជីពទាំងអស់គ្នាដែលជាក្រុមបច្ចេកទេសនេះមិនទាន់សម្រេចជាលទ្ធផលផ្លូវការណាមួយនោះនៅឡើយទេក្នុងកិច្ចប្រជុំចុងក្រោយលើកទី ៩ នេះដោយរង់ចាំយកសំណើទាំង ២ ខាងលើទៅដាក់ក្នុងកិច្ចប្រជុំរបស់គណៈកម្មការប្រឹក្សាការងារ ដើម្បីសម្រេចនាថ្ងៃនេះ។
បើទោះបីមិនទាន់មានការឯកភាពជាមួយគ្នាក៏ពិតមែន ប៉ុន្តែភាគីនិយោជក និងនិយោជិតបានយល់ស្របនូវចំណុចខ្លះចំពោះគ្នាទៅវិញទៅមក ដោយខាងកម្មករបានកែសម្រួលពីការស្នើដំឡើងប្រាក់ឈ្នួលខ្ពស់ចុះមកទាបបន្តិច។ ឯខាងក្រុមហ៊ុនក៏បានកែសម្រួលពីទាបមកខ្ពស់បន្តិច។
លោក ហេង សួរ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈបានថ្លែងថា បើទោះបីជាមានការព្រមព្រៀងគ្នាឈានដល់មានការកែសម្រួលទៅវិញទៅមកបន្តិចម្នាក់មែន ក៏ប៉ុន្តែតួលេខដែលភាគីទាំង ២ ស្នើឡើងនេះនៅតែមានគម្លាតឆ្ងាយពីគ្នា។
លោក ហេង សួរ បញ្ជាក់ថា៖ «អ៊ីចឹងទោះបីជាមានការកែសម្រួលយ៉ាងដូចម្តេចក៏ដោយ ក៏យើងឃើញថាគម្លាតវានៅតែមានដោយសារតែព្រឹកមិញ គោលជំហររបស់ភាគីនិយោជកគឺឡើងត្រឹម ១៧៧ ដុល្លារ»។
មុនស្នើប្រាក់ខែ ១៨២ ដុលា្លរនេះខាងសហជីពដែលមានសមាជិក ១៦ រូបបានបោះឆ្នោតផ្ទៃក្នុងដើម្បីលើកស្នើប្រាក់ខែដោយអ្នកខ្លះស្នើ ១៨៩ ដុល្លារ ឯខ្លះស្នើ ១៨២ ដុល្លារ។ ដល់តែពេលបោះឆ្នោតនោះគឺបានតួលេខ ១៨២ ដុល្លារ ចេញពី ១០ សំឡេងលើ ១៥ សំឡេង ឯ ១៨៩ ដុល្លារបាន ២ សំឡេង ហើយ ៣ សំឡេងទៀត អនុបវាទ។ ដូច្នេះតាមលទ្ធផល ១៨២ ដុល្លារត្រូវបានភាគីនិយោជិតប្រើប្រាស់ជាផ្លូវការក្នុងក្រុមការងារត្រីភាគីបច្ចេកទេស។
លោក ហេង សួរ ថ្លែងថាការបោះឆ្នោតនេះគ្រាន់តែធ្វើឡើងក្នុងរូបភាពក្រុមការងារបច្ចេកទេសទេ ដើម្បីលើកតួលេខនេះជូនទៅគណៈកម្មការប្រឹក្សាការងារដែលជាអ្នកមានសិទ្ធិសម្រេចចុងក្រោយទៅលើតួលេខដែលក្រុមបច្ចេកទេសត្រីភាគីបានសម្រេចពីម្សិលមិញ។
លោកឲ្យដឹងថា៖ «ថ្ងៃស្អែក (ថ្ងៃនេះ) គណៈកម្មការប្រឹក្សាការងារនឹងបើកប្រជុំម្តងទៀតដើម្បីសម្រេចប្រជុំលទ្ធផលត្រីភាគីបានសម្រេចនៅថ្ងៃនេះ (ម្សិលមិញ)។ អ៊ីចឹងយើងសង្ឃឹមថាថ្ងៃស្អែក (ថ្ងៃនេះ) យើងនឹងមានតួលេខផ្លូវការពាក់ព័ន្ធប្រាក់ឈ្នួលអតិបរមាឆ្នាំ ២០១៩»។
អ្នកនាំពាក្យរូបនេះបន្ថែមទៀតថាក្នុងកិច្ចប្រជុំនេះទាំងភាគីនិយោជក និងភាគីនិយោជិតបានសំណូមពរដូចគ្នាដល់រដ្ឋាភិបាលដោយគោលបំណងធំរបស់សហជីពបានសំណូមពរលោកនាយករដ្ឋមន្ត្រី ហ៊ុន សែន បន្តជួបជាមួយកម្មករជួយដោះស្រាយតម្រូវការជាក់ស្តែង។
លោកបន្ថែមថាសហជីពក៏សុំឲ្យក្រសួងសេដ្ឋកិច្ចលើកលែងពន្ធលើស្លាកសហជីព និងប្រាក់ចំណូលដែលសហជីពទទួលបានសូមឲ្យនិយោជកពិចារណាផ្តល់អត្ថប្រយោជន៍ផ្សេងៗ និងសូមឲ្យភាគីរដ្ឋាភិបាលចុះពិនិត្យរោងចក្រមួយចំនួនដែលគាត់មានស្លាកឈ្មោះ ប៉ុន្តែមិនដូចនៅក្នុងបញ្ជីពាណិជ្ជកម្ម។ ជាងនេះទៀតសហជីពក៏ស្នើសុំរដ្ឋាភិបាលលើកលែងទោសដល់មន្ត្រីសហជីពដែលរងការចោទប្រកាន់នានាផងដែរ។
ដោយឡែកខាងនិយោជកក៏សូមឲ្យរដ្ឋាភិបាលបញ្ចុះតម្លៃអគ្គិសនីពី ០,១៦៧ ដុល្លារអាមេរិកក្នុង ១ គីឡូវ៉ាត់ម៉ោង (/kw/h) មក ០,១២ ដុល្លារអាមេរិកក្នុង ១ គីឡូវ៉ាត់ម៉ោង (kw/h) ដែលនេះជាសំណូមពរតែ ១ គត់។
លោក ហេង សួរ បន្តថា៖ «ខ្ញុំគិតថាភាគីពាក់ព័ន្ធ ភាគីនិយោជក និងភាគីសហជីពមានភាពចាស់ទុំច្រើន។ យើងបានប្រើប្រាស់យន្តការនេះបាន ៥ ឆ្នាំ។ យើងឃើញថាការចរចាមានភាពរលូនច្រើន។ គ្រប់ជ្រុងជ្រោយតួលេខដែលជាដៃគូប្រកួតប្រជែងបើមិនដឹងពីស្ថានភាពច្រើនទេការសម្រេចចិត្តណាមួយអាចធ្វើឲ្យប៉ះពាល់ដល់បងប្អូននិយោជិតយើងវិញ»។
លោក កាំង ម៉ូនីកា អគ្គលេខាធិការរងនៃសមាគមរោងចក្រកាត់ដេរកម្ពុជា (GMAC) ថ្លែងថាវាជាសញ្ញាមិនសូវល្អសម្រាប់ភាគីវិនិយោគ ព្រោះជាទូទៅនៅពេលមានការចរចាប្រាក់ខែម្តងៗខាងនិយោជកមានការព្រួយបារម្ភទៅលើតួលេខខ្ពស់ៗដែលខាងសហជីពបានដាក់ស្នើ។
លោកបានបញ្ជាក់ថា៖ «ខ្ញុំមិនហ៊ានឆ្លើយទេ ពីព្រោះនៅសល់ការប្រជុំស្អែកទៀត នៅសល់របស់គណៈកម្មការប្រឹក្សាការងារដឹកនាំដោយរដ្ឋមន្ត្រី។ ស្អែក (ថ្ងៃនេះ) និងមានសមាជិក ២៨ នាក់»។
លោក អាត់ ធន បានបន្ថែមថា៖ «១៧៧ ដុល្លារយើងបានដាក់ យើងបានស្នើឲ្យរដ្ឋាភិបាលជួយអគ្គិសនីឲ្យបាន ៤ សេន ប៉ុន្តែការឆ្លើយតបយ៉ាងណាយើងនៅថ្ងៃស្អែក បន្ទាប់ពីគណៈកម្មការប្រឹក្សាការងារលោកសម្រេចជាតួលេខ»។
លោកថា៖ «ខ្ញុំគិតថាតួលេខ ១៧៧ គឺជាតួលេខបច្ចេកទេសត្រឹមត្រូវដែលយើងខ្ញុំមានការសង្ឃឹមយ៉ាងខ្ពស់ថា លេខចុងក្រោយ និងជាលេខ ១៧៧ ដុលា្លរពីព្រោះមានមូលដ្ឋានច្បាស់លាស់»។
លោក អាត់ ធន ប្រធានសម្ព័នសហជីពប្រជាធិបតេយ្យកម្មករកាត់ដេរកម្ពុជាថ្លែងថា ការជជែកគ្នានេះគឺសហជីពចង់បាន ១៨៩ ដុល្លារ តែដោយសារសហជីពមួយចំនួនមាននិន្នាការនយោបាយ ដូច្នេះសហជីពដែលមិនសូវឯករាជ្យគាត់ចង់បានលេខទាប ដល់អ៊ីចឹងសហជីពមានការឈ្លោះគ្នាច្រើនណាស់ទម្រាំបានចេញលេខប៉ុណ្ណឹងនោះ។
លោកឲ្យដឹងថាគឺចុងក្រោយសម្រេចនៅលេខ ២ មាន ១៨២ ដុល្លារ និង ១៨៩ ដុល្លារ។
លោក អាត់ ធន បានបញ្ជាក់ថា៖ «យើងមាន ៥ សំឡេងដែលអត់បោះ អ៊ីចឹងមានន័យថាជំហរគេស្នើសុំច្រើនជាងហ្នឹងសម្រាប់ ៥ សហជីពវាមានន័យថាគេមិនពេញចិត្តលេខទាំង ២ ហ្នឹងទេ។ គេចង់យកលេខច្រើនជាងហ្នឹង ហើយ process (ដំណើរការ) ហ្នឹងវាអត់អាចឲ្យគេជ្រើសរើសបាន»។
លោក អាត់ ធន បន្ថែមថា៖ «សហជីពស្រុកខ្មែរសហជីពមួយចំនួនឯករាជ្យសហជីពមួយចំនួនទៀតគាត់មាននិន្នាការគណបក្ស គាត់នៅក្រោមឥទ្ធិពលនិយោជក។ អ៊ីចឹងគាត់មិនអាចមានសំឡេងតែមួយដូចសំឡេងកម្មករបានទេ។ ខ្ញុំគិតថាថៅកែ ៣-៤ ឆ្នាំនេះបានបង្កើនការងារដែលបង្ខំឲ្យកម្មករធ្វើទាល់តែហើយ»។
លោកបន្តថា៖ «តួលេខទាំង ២ ហ្នឹងខ្ញុំអត់សប្បាយចិត្តទេ វាតិចណាស់ដោយសារកម្មករយើងរស់នៅពិបាកចំណាយខ្ពស់គាត់សន្លប់ច្រើនគាត់មានការទទួលខុសត្រូវបន្ទុកច្រើនដល់ពេលប្រាក់ខែតិច គាត់ធ្វើម៉េចគាត់អាចផ្គត់ផ្គង់បានអ៊ីចឹងធ្វើឲ្យគាត់លំបាក»៕