The Phnom Penh Post Search

Search form

Logo of Phnom Penh Post newspaper Phnom Penh Post - សហជីព​ចោទ​ពី​ការ​ប៉ង​ចាប់​ខ្លួន​សកម្មជន​តែ​សមត្ថកិច្ច​បដិសេធ




សហជីព​ចោទ​ពី​ការ​ប៉ង​ចាប់​ខ្លួន​សកម្មជន​តែ​សមត្ថកិច្ច​បដិសេធ

សហជីព​ចោទ​ពី​ការ​ប៉ង​ចាប់​ខ្លួន​សកម្មជន​តែ​សមត្ថកិច្ច​បដិសេធ

20140508_07a
កម្មកររោងចក្រកាត់ដេរធ្វើកូដកម្មទាមទារលក្ខខណ្ឌការងារកន្លងមក

ភ្នំពេញៈ មន្រ្តី​សម្ព័ន្ធ​សហជីព​ចលនា​កម្មករ​បាន​អះអាង​កាល​ពី​ថ្ងៃ​ពុធ​ម្សិលមិញ​ថា សមត្ថកិច្ច ខេត្ត​តាកែវ បាន​កំពុង​តែ​ស្វែង​រក​ចាប់​ខ្លួន​សកម្មជន​និង​មន្រ្តី​របស់​ខ្លួន​ដោយ​ចោទ​ថា បាន​ញុះញង់​កម្មករ​នៅ​រោងចក្រ​ផលិត​ស្បែក​ជើង អ៊ីចេង ឲ្យ​ធ្វើ​ការ​តវ៉ា​ជាច្រើន​ថ្ងៃ ប៉ុន្តែ​ការ​ចោទ​នេះ​ត្រូវ​សមត្ថកិច្ច​បដិសេធ។

លោក ប៉ាវ ស៊ីណា ប្រធាន​សម្ព័ន្ធ​សហជីព​ចលនា​កម្មករ​បាន​ប្រាប់ ភ្នំពេញ ប៉ុស្តិ៍ កាល​ពី​ថ្ងៃ​ពុធ​ថា កម្លាំង​សមត្ថកិច្ច​មាន​នគរបាល​និង​អាវុធហត្ថ​ខេត្ត ប្រមាណ​ជា ១០០​នាក់ បាន​ចុះ​មក​កាន់​រោងចក្រ អ៊ីចេង ក្នុង ស្រុក​បាទី ខេត្ត​តាកែវ ខណៈ​ដែល​កម្មករ​ជាង ២ ពាន់​នាក់​កំពុង​ធ្វើ​កូដកម្ម​តវ៉ា​ខាង​មុខ​រោងចក្រ។

លោក ប៉ាវ ស៊ីណា បន្ត​និយាយ​ថា៖ «សកម្មជន​សហជីព​ប្រចាំ​រោងចក្រ​ចំនួន ៧ រូប​និង​មន្រ្តី ២ រូប​ដែល​ចុះ​មក​តាម​ដាន​មើល​ការ​តវ៉ា​របស់​ក្រុម​កម្មករ បាន​សម្រេច​ចិត្ត​គេច​ខ្លួន​រក​កន្លែង​មាន​សុវត្ថិភាព បន្ទាប់​ពី​ដឹង​ថា សមត្ថកិច្ច​បាន​តាម​រក​ការ​ឃាត់​ខ្លួន​ពួក​គេ​កាល​ពី​ព្រឹក​ថ្ងៃ​ពុធ»។

លោក ស៊ីណា អះអាង​ថា សមត្ថកិច្ច​ដែល​មក​ដល់​រោងចក្រ​បាន​សួរ​រក​តំណាង​សហជីព​ទាំង​នោះ ហើយ​បាន​ពង្រាយ​កម្លាំង​ដើរ​រក​និង​ស្រែក​សួរ​កម្មករ​ថា មួយ​ណា​តំណាង​សហជីព «ចាប់​ខ្លួន​វា​ឲ្យ​អស់»។

លោក ប៉ាវ ស៊ីណា បញ្ជាក់​ទៀត​ថា៖ «ដោយ​ឃើញ​រូបភាព​ដូច​នេះ បាន​ជា​ខ្ញុំ​សម្រេច​ឲ្យ​ពួក​គេ​គេច​ខ្លួន​សិន ដើម្បី​ចៀស​វាង​ហេតុ​ការណ៍​អាក្រក់​ណា​មួយ​កើត​ឡើង»។

កម្មករ​រោងចក្រ អ៊ីចេង បាន​ធ្វើ​ការ​តវ៉ា​តាំង​ពី​ថ្ងៃ ទី​២១ ខែ​មេសា មក​ដល់​ពេល​នេះ​នៅ​មិន​ទាន់​មាន​ដំណោះស្រាយ​នៅ​ឡើយ។ ពួក​គេ​ធ្វើ​កូដកម្ម​ទាមទារ​លក្ខខណ្ឌ​មួយ​ចំនួន ដូច​ជា ស្នើ​ឲ្យ​មាន​ការ​បំពាក់​កង្ហា​នៅ​កន្លែង​ធ្វើ​ការ ថែម​លុយ​ថ្លៃ​ទឹក​ដោះ​គោ​កូន​ចំនួន ៥ ដុល្លារ ក្នុង​មួយ​ខែ សុំ​បើក​ប្រាក់​ម៉ោង​មួយ​សប្តាហ៍​ម្តង និង​ចំណុច​មួយ​ចំនួន​ទៀត។

លោក សុខ ជា ប្រធាន​សម្ព័ន្ធ​សហជីព​ចលនា​កម្មករ​ប្រចាំ​រោងចក្រ​បាន​ប្រាប់​ថា លោក​កំពុង​លាក់​ខ្លួន​នៅ​ទី​មាន​សុវត្ថិភាព​បន្ទាប់​ពី​សមត្ថកិច្ច​ប៉ុនប៉ង​ឃាត់​ខ្លួន​សកម្មជន​សហជីព។

លោក សុខ ជា និយាយ​ថា៖ «ពួក​យើង​ពិបាក​ធ្វើ​ការងារ​ដោយ​សារ​កន្លែង​ធ្វើ​ការ​ក្តៅ និង​ហប់ ទើប​កម្មករ​ស្នើ​សុំ​ឲ្យ​រោងចក្រ​មាន​ដាក់​កង្ហារ។ ថៅកែ​សន្យា​ដាក់​ឲ្យ​បន្ទាប់​ពី​ផុត​រដូវ​រងា​កាល​ពី​ចុង ឆ្នាំ​២០១៣ តែ​មក​ទល់​ពេល​នេះ​មិន​ទាន់​ដាក់​ទើប​កម្មករ​នាំ​គ្នា​តវ៉ា»។​លោក​បន្ត​ឲ្យ​ដឹង​ថា រោងចក្រ​ក៏​បាន​សន្យា​សង់​ទារកដ្ឋាន​មួយ​ដែរ តែ​អ្វី​ដែល​ពួកគេ​សន្យា គឺ​មិន​ពិត​ទាំង​អស់។

លោក​បន្ត​ថា៖ « រាល់​ថ្ងៃ​កម្មករ​ពី ៣ ទៅ ៤ នាក់​បាន​សន្លប់​ដោយ​សារ​តែ​ក្នុង​រោងចក្រ​ក្តៅ និង​ហប់​ខ្លាំង គ្មាន​ខ្យល់​ចេញ​ចូល​គ្រប់​គ្រាន់»។

លោក​វរ​សេនីយ៍​ឯក ឈឹម សវ៉ាក់ឌី មេ​បញ្ជាការ​រង ខេត្ត​តាកែវ ដែល​ដឹក​នាំ កម្លាំង​ចុះ​ទៅ​រោងចក្រ អ៊ីចេង កាល​ពី​ព្រឹក​ថ្ងៃ​ពុធ​បាន​បដិសេធ​ទៅ​នឹង​ការ​ចោទ​ថា សមត្ថកិច្ច​មាន​បំណង​ចាប់​ខ្លួន​សកម្មជន​សហជីព​កម្មករ។

លោក ឈឹម សវ៉ាក់ឌី បាន​ថ្លែង​ប្រាប់ ភ្នំពេញ ប៉ុស្តិ៍ ម្សិលមិញ​ថា៖ «ការ​ដែល​កម្លាំង​សមត្ថកិច្ច​ចុះ​ទៅ​នោះ​មិន​មែន​ទៅ​ធ្វើ​ការ​ឃាត់​ខ្លួន​អ្នក​ណា​ម្នាក់​ទេ ប៉ុន្តែ​យើង​ទៅ​ដើម្បី​ការពារ​អន្តរាគមន៍ និង​ទប់ស្កាត់​ក្រែង​ពួក​គេ​ធ្វើ​ការ​បិទ​ផ្លូវ​ជាតិ​ដូច​កម្មករ​រោងចក្រ វីងស្តាស៊ូ កាល​ពី​ថ្ងៃ​អង្គារ​ទៀត»។

លោក​បន្ថែម​ថា ការ​បិទ​ផ្លូវ​នេះ​នាំ​ឲ្យ​មាន​ការ​ប៉ះពាល់​ខ្លាំង​ដល់​សណ្តាប់ធ្នាប់​សង្គម និង​អ្នក​ធ្វើ​ដំណើរ។

មន្ត្រី​រោងចក្រ អ៊ីចេង បាន​បដិសេធ​ធ្វើ​ការ​អធិប្បាយ​ដោយ​បាន​ចុច​ទូរស័ព្ទ​បិទ មុន​ពេល​ទទួល​បាន​សំណួរ​ពី ភ្នំពេញ ប៉ុស្តិ៍ កាល​ពី​ម្សិលមិញ។

ជាមួយ​គ្នា​ដែរ​ពី​ថ្ងៃ​អង្គារ មនុស្ស ៦​នាក់ ជា​មន្រ្តី​សហជីព​អំណាច​កម្មករ​ខ្មែរ និង​សហជីព​មិត្តភាព​ការងារ​កម្ពុជា ដែល​ចុះ​អន្តរាគមន៍​ជួយ​ក្នុង​កូដកម្ម​កម្មករ​នៅ​រោងចក្រ វី​ស្តាស៊ូ ក្នុង ស្រុក​គងពិសី ខេត្ត​កំពង់ស្ពឺ ត្រូវ​បាន​សមត្ថកិច្ច​ឃាត់​ខ្លួន​និង​បញ្ជូន​ទៅ​កាន់​ស្នងការដ្ឋាន​នគរបាល​ខេត្ត ដើម្បី​ធ្វើ​ការ​សាក​សួរ។

លោក ប៉ាវ ស៊ីណា ដែល​តាម​ដាន​រឿង​នេះ​ប្រាប់​ថា មន្រ្តី​សហជីព​ទាំង​នោះ​ត្រូវ​គេ​ចោទ​ពី​បទ​ញុះញង់​ឲ្យ​មាន​ការ​បិទ​ផ្លូវ​នាំ​ឲ្យ​ខូច​សណ្តាប់ធ្នាប់​សាធារណៈ។

លោក ស៊ីណា លើក​ឡើង​ថា៖ «ខ្ញុំ​យល់​ថា សិទ្ធិ​សេរីភាព​របស់​សហជីព​នៅ​រយៈ​ពេល​ចុង​ក្រោយ​នេះ កំពុង​តែ​រង​ការ​រឹតត្បិត​តឹងរ៉ឹង​បំផុត ជា​ពិសេស​ពួក​យើង​រង​នូវ​ការ​គំរាម​កំហែង​ធ្ងន់ធ្ងរ ដែល​មាន​ការ​ផ្ទុយ​ពី​ច្បាប់​ជាតិ និង​អន្តរជាតិ​ទាំង​ស្រុង។ យើង​ក៏​សូម​អំពាវនាវ​ឲ្យ​រដ្ឋាភិបាល ក៏​ដូចជា ស្ថាប័ន​អន្តរជាតិ​មេត្តា​ធ្វើ​ការ​ពិនិត្យ​ឡើង​វិញ​នូវ​រូបភាព​នៃ​ការ​គំរាម​កំហែង​នេះ ដោយ​ធ្វើ​ការ​ពិចារណា និង​ត្រួត​មើល​ឡើង​វិញ​ទៅ​លើ​ប្រព័ន្ធ​ច្បាប់»។

លោក ជា មុនី ប្រធាន​សហជីព​សេរី​កម្មករ​នៃ​ព្រះ​រាជា​ណាចក្រ​កម្ពុជា បាន​ឲ្យ​ដឹង​កាល​ពី​ថ្ងៃ​ម្សិលមិញ​ថា ការ​ចាប់​ខ្លួន​ដោយ​គ្មាន​ដីកា បញ្ជាក់​ពី​បទ​ល្មើស​ជាក់ស្តែង​ណា​មួយ​នោះ គឺ​ជា​ការ​ធ្វើ​ឡើង​ដោយ​ខុស​ច្បាប់។

លោក​និយាយ​ថា៖ «សព្វ​ថ្ងៃ​នេះ​ទាំង​កម្មករ ទាំង​សហជីព ទទួល​រង​នូវ​ការ​គំរាម​កំហែង​ច្រើន​ណាស់ ហើយ​អ្វី​ដែល​កម្មករ​ទាមទារ យើង​គិត​ថា ជម្រើស​មួយ​ដ៏​ល្អ​សម្រាប់​ពួក​គេ​គឺ​ការ​ចរចា ប៉ុន្តែ​ការ​ចាប់​ខ្លួន​កម្មករ ឬ​សហជីព​នេះ​គឺ​គ្រាន់​តែ​ជា​រឿង​ទិញ​ដូរ និង​ជា​ផ្នែក​នយោបាយ​ទាំង​អស់។ ចាប់​ដើម្បី​បំបាក់​ស្មារតី​ដើម្បី​កុំ​ឲ្យ​មាន​ការ​ប៉ះ​បោរ ឬ​មាន​ការ​ចូល​រួម»។

លោក កែវ ពិសី ស្នងការ​នគរបាល ខេត្ត​កំពង់ស្ពឺ មិន​អាច​សុំ​ការ​អធិប្បាយ​បាន​ទេ កាល​ពី​ម្សិលមិញ។ តែ​លោក អ៊ុក សុផល ស្នងការ​រង​បាន​និយាយ​ថា លោក​មិន​ធ្វើ​ការងារ​នេះ​ទេ គឺ​មាន​តែ​លោក​ស្នងការ​ទេ​ទើប​ដឹង​រឿង។

អ្នក​នាង ប៊ិន ស្រីមុំ តំណាង​កម្មករ​រោងចក្រ​បាន​និយាយ​ថា កម្មករ​បាន​សម្រេច​ចិត្ត​ចូល​ធ្វើ​ការ​អស់​ហើយ បន្ទាប់​ពី​រោងចក្រ​បាន​ផ្តល់​លុយ ២០០០ រៀល​ក្នុង ១ ម៉ោង ថ្លៃ​បាយ​ពេល​ល្ងាច លុយ ៥ ដុល្លារ​ក្នុង ១ ខែ សម្រាប់​ទ្រទ្រង់សុខភាព និង​កាត់​ប្រាក់​តាម​សមាមាត្រ​ក្នុង​អំឡុង​ពេល​ដែល​ពួក​គេ​ធ្វើ​ការ​តវ៉ា​នេះ៕

អត្ថបទគួរចាប់អារម្មណ៍