The Phnom Penh Post Search

Search form

Logo of Phnom Penh Post newspaper Phnom Penh Post - សហជីព​ធំ ២ អំពាវនាវ​ឲ្យ​កម្មករ​ចូល​រួម​បាតុកម្ម




សហជីព​ធំ ២ អំពាវនាវ​ឲ្យ​កម្មករ​ចូល​រួម​បាតុកម្ម

សហជីព​ធំ ២ អំពាវនាវ​ឲ្យ​កម្មករ​ចូល​រួម​បាតុកម្ម

130906_03
កម្មករ-កម្មការិនី កំពុងធ្វើការនៅក្នុងរោងចក្រ ផា លីណា

ភ្នំពេញៈ ប្រធាន​សហជីព​ធំៗ​ចំនួន​ពីរ​បាន​អំពាវនាវ​ព្រម​គ្នា​ដល់​សមាជិក​របស់​ខ្លួន​ឲ្យ​ធ្វើ​ពហិការ​ដោយ​មិន​ធ្វើ​ការ​ថែម​ម៉ោង​ដើម្បី​ឆ្លៀត​ពេល​មក​ចូល​រួម​មហា​សមាធិ​ដែល​រៀបចំ​ឡើង​ដោយ​គណបក្ស​សង្គ្រោះ​ជាតិ​នៅ​ថ្ងៃ​សៅរ៍ ទី៧​ខែ កញ្ញា ស្អែក​នេះ​នៅ​ទីលាន​ប្រជាធិបតេយ្យ។

លោក ជា មុនី ប្រធាន​សហជីព​សេរី​កម្មករ​បាន​ធ្វើ​ការ​អំពាវនាវ​ទៅ​ដល់​កម្មករ​កម្មការិនី ដែល​ជា​សមាជិក​របស់​ខ្លួន​ចំនួន ១០ ម៉ឺន នាក់ និង​កម្មករ​ផ្សេង​ទៀត​ឲ្យ​ធ្វើ​ពហិការ​ដោយ​មិន​ធ្វើ​ការ​ក្រៅ​ម៉ោង​ដើម្បី​ចូល​រួម​ក្នុង​អំឡុង​ពេល​ដែល​គណបក្ស​សង្គ្រោះ​ជាតិ​ធ្វើ​ពិធី​តាំង​សមាធិ។ លោក ជា មុនី​បាន​ថ្លែង​ថា៖ «ការ​ធ្វើ​ពហិការ​មិន​ថែម​ម៉ោង​នេះ​គឺ​ដើម្បី​ឲ្យ​គណៈកម្មាធិការ ជាតិ​រៀបចំ​ការ​បោះឆ្នោត និង​ក្រុម​ប្រឹក្សា​ធម្មនញ្ញ​ផ្តល់​យុត្តិធម៌​ដល់​ម្ចាស់​ឆ្នោត និង​ត្រូវ​ដោះលែង​បុគ្គលិក​សហជីព​សេរី​កម្មករ​រួម​ទាំង​កម្មករ​សរុប ៨ នាក់ ឲ្យ​មាន​សេរីភាព​ដែល​តុលាការ​កំពុង​ឃុំ​ខ្លួន​នៅ​ឡើយ»។

លោក ជា មុនី បាន​និយាយ​ថា គ.ជ.ប និង​ក្រុម​ប្រឹក្សា​ធម្មនុញ្ញ​មិន​បាន​ផ្តល់​យុត្តិធម៌​ឲ្យ​ដល់​ពួក​គាត់ ដែល​ជា​ម្ចាស់​ឆ្នោត ដូច​នេះ​ពួកគេ​ត្រូវ​ចូល​រួម​ធ្វើ​ការ​ទាមទារ​នូវ​យុត្តិធម៌​មក​វិញ។ លោក​បាន​ថ្លែង​បន្ត​ថា៖ «ប្រសិន​បើ​ពួក​គេ​មិន​ធ្វើ​ការ​ថែម​ម៉ោង​នោះ​ជា​សញ្ញា មួយ​បង្ហាញ​ថា ពួកគេ​ចូល​រួម​ជាមួយ​នឹង​គណបក្ស​សង្គ្រោះ​ជាតិ ហើយ​ពួកគេ​លែង​មាន​ការ​បារម្ភ​ពី​សុវត្ថិភាព​របស់​ពួក​គេ​ទៀត​ហើយ​ក្នុង​ដំណាក់កាល​នេះ។

ជាមួយ​គ្នា​នេះ​ដែរ​លោក រ៉ុង ឈុន ប្រធាន​សហភាព​សហជីព​កម្ពុជា​បាន​ធ្វើ​សេចក្តី​អំពាវនាវ​ដល់​សមាជិក សមាជិកា​កម្មករ​គ្រូ​បង្រៀន​មន្រ្តី​រាជការ​និង​ពលរដ្ឋ​ខ្មែរ​ទាំង​អស់​ចូល​រួម​មហា​បាតុកម្ម​អហិង្សា​ផង​ដែរ។ លោក​បាន​ថ្លែង​ថា៖ «ស្ថាប័ន​កំពូល​នៃ​ជាតិ​មិន​អាច​ផ្តល់​យុត្តិធម៌​ជូន​ជន​រួម​ជាតិ​ខ្មែរ​បាន​ឡើយ។ ដូច​នេះ មាន​តែ​ការ​ចូល​រួម​របស់​បង​ប្អូន​ជន​រួម​ជាតិ​ខ្មែរ​ឲ្យ​បាន​ច្រើន​កុះករ ហើយ​បង​ប្អូន​នឹង​ទទួល​បាន​ជីវភាព​រស់​នៅ​សមរម្យ សេរីភាព យុត្តិធម៌ និង​ប្រជាធិបតេយ្យ​ពិត​ប្រាកដ។»

សេចក្តី​អំពាវនាវ​នេះ​ត្រូវ​បាន​ចែក​ចាយ​នៅ​តាម​បណ្តា​រោងចក្រ​ផង​ដែរ។ លោក បាន ថារ៉ា អាយុ ៣៩ ឆ្នាំ កម្មករ​នៅ​រោងចក្រ B&N Garment នៅ​សង្កាត់ ទួលសង្កែ បាន​ឲ្យ​ដឹង​ថា​លោក​នឹង​ទៅ​ចូល​រួម​តាម​ការ​អំពាវនាវ​របស់​ប្រធាន​សហជីព​សេរីកម្មករ​នេះ។ លោក​បាន​ថ្លែង​ថា៖ «ខ្ញុំ​ត្រូវ​តែ​ទៅ​ធ្វើ​មហា​បាតុកម្ម​នៅ​ថ្ងៃ​សៅរ៍​នេះ​ព្រោះ​ខ្ញុំ​ចង់​ស្វែង​រក​យុត្តិធម៌​របស់​រូប​ខ្ញុំ​ផ្ទាល់​និង​ប្រជា​ពលរដ្ឋ​ផ្សេង​ទៀត។ ខ្ញុំ​មិន​ខ្លាច​អ្វី​ទាំង​អស់ ហើយ​ទោះ​បី​ជា​មិន​មាន​លិខិត​អំពាវនាវ​នេះ​ក៏​ខ្ញុំ​នៅ​តែ​ចូល​រួម​ដែរ»៕

អត្ថបទគួរចាប់អារម្មណ៍