The Phnom Penh Post Search

Search form




Logo of Phnom Penh Post newspaper Phnom Penh Post - សហជីព​បដិសេធ​ការ​ដំឡើង​ប្រាក់​ឈ្នួល​គោល​១៥​ដុល្លារ នៅ​ឆ្នាំ​ថ្មី

សហជីព​បដិសេធ​ការ​ដំឡើង​ប្រាក់​ឈ្នួល​គោល​១៥​ដុល្លារ នៅ​ឆ្នាំ​ថ្មី

កម្មករ​ធ្វើ​បាតុកម្ម​ទាម​ទារ​ដំឡើង​ប្រាក់ខែ​នៅចុង​​ឆ្នាំ​​​មុន។
កម្មករ​ធ្វើ​បាតុកម្ម​ទាម​ទារ​ដំឡើង​ប្រាក់ខែ​នៅចុង​​ឆ្នាំ​​​មុន។ ហេង ជីវ័ន

សហជីព​បដិសេធ​ការ​ដំឡើង​ប្រាក់​ឈ្នួល​គោល​១៥​ដុល្លារ នៅ​ឆ្នាំ​ថ្មី

ភ្នំពេញៈ សហជីព ​និង​កម្ម​ករ​មិន​ពេញ​ចិត្ត​នឹង​ការ​ដំឡើង​ប្រាក់​​ឈ្នួល​ថ្មី​សម្រាប់​ឆ្នាំ​២០១៥​ដែល​សមា​គម​រោង​ចក្រ​កាត់​ដេ​រ​នៅ​កម្ពុជា​ផ្តល់​ឲ្យ​តែ​១៥​ដុល្លារ​បន្ថែម​លើ​ប្រាក់​ឈ្នួល​បច្ចុប្បន្ន ​១០០​ដុល្លារ​ ដែល​ឃ្លាត​ឆ្ងាយ​ពេក​ពី​សំណើ​របស់​ខ្លួន​ដែល​ទាម​ទារ​១៧៧​ដុល្លារ​ក្នុង​១ខែ​​។

អ្នក​នាង​ កេន ឆេង​ឡាង ប្រធាន​ស្តីទី​សហព័ន្ធ​ជាតិ​នៃ​ឧស្សាហកម្ម​វាយនភ័ណ្ឌ​កាត់​ដេរ​កម្ពុជា ​កាល​ពី​​ថ្ងៃ​អង្គារ​បាន​ប្រាប់​ថា ក្រុម​សហជីព​ ​ជា​សមាជិក​របស់​គណៈ​កម្មការ​ប្រឹក្សា​ការងារ​បាន​ប្រជុំ​សម្រេច​ដាក់​សំណើ​ទៅ​ខាង​និយោជក​ទាមទារ​ ១៧៧​ ដុល្លារ ​ប៉ុន្តែ​ខាង​សមាគម​រោង​ចក្រ​កាត់​ដេរ ​(GMAC) ​ឆ្លើយ​តប​វិញ ​គេ​ផ្តល់​ឲ្យ​តែ​១៥​ដុល្លារ​បន្ថែម​លើ​ប្រាក់​ឈ្នួល​គោល​បច្ចុប្បន្ន​ប៉ុណ្ណោះ។

អ្នក​នាង​ ឆេង​ឡាង ​និយាយ​ថា៖ «ខាង​សមាគម​រោង​ចក្រ​លើក​យក​ហេតុ​ផល​ថា ​ពួក​គេ​ដំឡើង​បាន​១៥​ដុល្លារ​ដោយ​ធ្វើ​តាម​រូប​មន្ត​ទី២​ របស់​ក្រ​សួង​ការ-​ងារ​ដែល​កំណត់​ដំឡើង​ ១៥​ ដុល្លារ​ក្នុង​មួយ​​ឆ្នាំ​ រហូត​ដល់​ឆ្នាំ ​២០១៨​ កម្មករ​នឹង​ទទួល​បាន ​១៦០ ​ដុល្លារ​ក្នុង​មួយ​ខែ​ជាប្រាក់​ឈ្នួល​គោល​របស់​កម្មករ​»។

ក្រុម​សហ​ជីព​បាន​ជួប​ប្រជុំ​ពិភាក្សា​ពី​សំណើ​ប្រាក់​ឈ្នួល​គោល​នេះ​ជា​មួយ​សមាគម​រោង​ចក្រ​កាល​ពី​ចុង​សប្តាហ៍​មុន។​

អ្នក​ស្រី ​ឆេង​ឡាង ​បញ្ជាក់​ថា កូដ​កម្ម​តវ៉ា​អាច​នឹង​កើត​មាន​ទៀត​ ​ប្រសិន​បើ​កម្មករ​ត្រូវ​បាន​ដំឡើង​ឲ្យ​តែ​១៥​ដុល្លារ​តាម​ការ​ផ្តល់​ពី​សមាគម​រោង​ចក្រ​នោះ។

ចំណែក លោក​ ប៉ាវ ​ស៊ីណា ​ប្រ​ធាន​សហ​ព័ន្ធ​សហ​ជីព​ចលនា​កម្មករ​ក៏​អះអាង​ថា ​នឹង​ដឹក​នាំ​កម្មករ​ធ្វើ​ការ​តវ៉ា​ប្រឆាំង​ទៅ​នឹង​ការ​ដំ​ឡើង​ប្រាក់​ឈ្នួល​ដ៏​តិច​តួច​នេះ​នៅ​ទូ​ទាំង​ប្រ​ទេស​ដូច​គ្នា​នឹង​ការ​តវ៉ា​កាល​ពី​ដើម​ឆ្នាំ​នេះ ​ដែល​កម្ម​ករ​ទាម​ទារ​១៦០​ដុល្លារ។

លោក​ ​ស៊ីណា​ ​ប្រាប់​​ថា៖​ «យើង​ដាច់​ខាត​មិន​អាច​ទទួល​យក​បាន​នូវ​ការដំ​ឡើង​តែ​ ១៥ ​ដុល្លារ​នេះទេ​។​ ខ្ញុំ​នឹង​ដឹក​នាំ​កម្មករ​ធ្វើ​ការ​តវ៉ា​ប្រ​ឆាំង​ទៅ​នឹង​ការ​ដំឡើង​នេះ។​ តើ​កម្មករ​រស់​នៅ​យ៉ាង​ម៉េច​ជាមួយ​នឹង​ប្រាក់​ដ៏​តិច​តួច​នេះ? ​ពួក​គាត់​គួរ​តែ​ទទួល​បាន​យ៉ាង​ហោច​ក៏​ ១៦០ ​ដុល្លារ​ដែរ​ បើ​មិនបាន​ ១៧៧ ​ដុល្លារ​»​។​​

លោក​ថា ​កម្មករ​​មិន​ខ្លាច​នឹង​តវ៉ា​ទាម​ទារ​ដំឡើង​ប្រាក់​ឈ្នួល​ពួក​គេទេ​ ហើយ​លោក​រំពឹង​ថា ​នឹង​មាន​កម្មករ​ចូល​រួម​ច្រើន។

លោក ​ជួន ​មុំថុល ​ប្រធាន​សហ​ព័ន្ធ​សហ​ជីព​ខ្មែរ​និង​ជា​អនុប្រធាន​គណៈ​កម្ម​ការ​ប្រឹក្សា​ការងារ​ បាន​ឲ្យ​ដឹង​ពី​ម្សិលមិញ​ដែរ​ថា ការ​ពិភាក្សា​ចរចា​គ្នា​ពី​បញ្ហា​នេះ​នៅ​តែ​បន្ត​ធ្វើ​ពីរ​ទៅ​បី​ដង​ទៀត​ រហូត​ទាល់​តែ​ភាគី​ទាំង​អស់​ព្រមព្រៀង​គ្នា។​

លោក​ ​មុំ​ថុល​ បញ្ជាក់​​ថា៖ ​«ខ្ញុំ​រំពឹង​ថា ​ពួក​យើង​នឹ​ង​ទទួល​បាន​នូវ​​ចំនួន​មួយ​ដែល​គ្រប់​ភាគី​អាច​ទទួល​យក​បាន ​ហើយ​យើង​នឹង​ព្យា​យាម​ធ្វើ​យ៉ាង​ណា​បញ្ចៀស​ការ​តវ៉ា​ឬ​កូដ​កម្ម​​ពី​បញ្ហា​នេះ​»​។

លោកប​ន្ថែមថា ​​នៅ​មិន​ទាន់ដឹង​ថា​​ ការ​ប្រជុំ​គ្នាថ្មី​ទៀត​ ជាមួ​យ​ភា​គី​​សមា​គម​រោង​ចក្រ​នឹង​ធ្វើ​នៅ​ពេល​ណា​ទេ ​ប៉ុន្តែ​ខាង​សមាគម​ទទួល​យក​សំ​ណើ​សហ​ជីព​​ទៅ​ពិភា​ក្សា​ជាមួយ​នឹង​ថ្នាក់​ដឹក​នាំ​របស់​គេ​បន្ត​ហើយ​។

នៅ​ពេល​ដឹង​ថា​ប្រាក់​ឈ្នួល​ថ្មី​សម្រាប់​ឆ្នាំ​២០១៥​ ដំឡើង​​បាន​តែ ​​១៥​ដុល្លារ​​នោះ កញ្ញា​ សុត ​សោ​ផេង​ អាយុ​២៣​ឆ្នាំ​ជា​កម្មការិនី​​រោង​ចក្រ​យូដា​ ក្នុង​ខណ្ឌ​ពោធិ៍សែនជ័យ​ប្រតិកម្ម​មិន​ទទួល​យក​ការ​ដំឡើង​ដ៏​តិច​តួច​នេះ​ទេ។ ​

កញ្ញា​​ថា៖​ «ខ្ញុំ​នឹង​ចូល​រួម​ធ្វើ​ការ​តវ៉ា​ប្រឆាំង​ទៅ​នឹង​ការ​ដំឡើង​ក្នុង​ចំនួន​ដ៏​តិច​តួច​នេះ»។

រីឯ​អ្នក​នាង ​ផា សុភ័ណ្ឌ អាយុ​៤៥​ឆ្នាំ​ ធ្វើ​ការ​នៅ​រោង​ចក្រ​យ៉ុនស៊ីង ក្នុង​ខណ្ឌ​ឫស្សីកែវ ក៏​បាន​បដិសេធ​មិន​ទទួល​យក​និង​ត្រៀម​ខ្លួន​ក្នុង​ការ​តវ៉ា​ផង​ដែរ​។

អ្នក​នាង​ថា៖​ «យើង​មិន​មែន​ទាមទារ​ប្រាក់​ឈ្នួល​ច្រើន​ហួស​ហេតុ​ឬ​ទាមទារ​ដើម្បី​ធ្វើ​ជា​អ្នក​មាន​ទេ ​ប៉ុន្តែ​ យើង​គ្រាន់​តែ​ទាមទារ​ប្រាក់​ឈ្នួល​ដើម្បី​រស់​នៅ​សមរម្យ​តែ​ប៉ុណ្ណោះ។ ​បើ​មិន​បាន​១៦០​ឬ១​៧៧​ដុល្លារ ក៏​គួរ​បាន​ត្រឹម​១៤០​ឬ​១៥០​ដុល្លារ​ក៏​បាន​ដែរ»៕​

អត្ថបទគួរចាប់អារម្មណ៍