The Phnom Penh Post Search

Search form




Logo of Phnom Penh Post newspaper Phnom Penh Post - សហជីព​ប៉ះទង្គិច​គ្នា​ក្នុង​កូដកម្ម​រោង​ចក្រ ស៊ិនហ្វាង

សហជីព​ប៉ះទង្គិច​គ្នា​ក្នុង​កូដកម្ម​រោង​ចក្រ ស៊ិនហ្វាង

កម្មករ​រោង​ចក្រ​កាត់​ដេរ​ធ្វើ​កូដកម្ម​ទាមទារ​លក្ខខណ្ឌ​ការងារ​កន្លង​មក។
កម្មករ​រោង​ចក្រ​កាត់​ដេរ​ធ្វើ​កូដកម្ម​ទាមទារ​លក្ខខណ្ឌ​ការងារ​កន្លង​មក។ ម៉ៃ វីរៈ

សហជីព​ប៉ះទង្គិច​គ្នា​ក្នុង​កូដកម្ម​រោង​ចក្រ ស៊ិនហ្វាង

ភ្នំពេញៈ មន្រ្តី​សម្ព័ន្ធ​សហជីព​ប្រជាធិបតេយ្យ​កម្មករ​កាត់​ដេរ​កម្ពុជា (ស៊ីខៅឌូ) និង​កម្មករ​រោងចក្រ ស៊ីនហ្វាង ហ្គាមេន នៅ​ក្នុង ខណ្ឌ​ពោធិ៍​សែន​ជ័យ ជាង ១០ នាក់​បាន​រង​របួស​ធ្ងន់​និង​ស្រាល​ក្នុង​ការ​ប៉ះទង្គិច​គ្នា​មួយ​ប្រាវ​ជាមួយ​នឹង​ក្រុម​សហជីព ៦ ផ្សេង​ទៀត​ក្នុង​ការ​តវ៉ា​ទាម​ទារ​លក្ខខណ្ឌ​ការងារ​មួយ​ចំនួន​កាល​ពី​ថ្ងៃ​អង្គារ។

លោក សៀង យ៉ូត មន្រ្តី​ច្បាប់​នៃ​សម្ព័ន្ធ​សហជីព​ស៊ីខៅឌូ បាន​ឲ្យ​ដឹង កាល​ពី​ម្សិល​មិញ​ថា មន្រ្តី​ដោះស្រាយ​វិវាទ​របស់ ស៊ីខៅឌូ ពីរ​រូប​បាន​រង​របួស​ធ្ងន់ និង​កម្មករ​ប្រមាណ​ជា ១០ នាក់​បាន​រង​របួស​ស្រាល​ដែល​ពួក​គេ​ភាគ​ច្រើន​ជា​ស្រ្តី​នៅ​ក្នុង​ជម្លោះ​រវាង​សហជីព​ផ្សេង​ទៀត​ដែល​បង្ក​ការ​អុកឡុក​ក្នុង​ការ​តវ៉ា​របស់​កម្មករ​នៅ​ខាង​មុខ​រោងចក្រ។

លោក សៀង យ៉ូត បាន​ប្រាប់​ឲ្យ​ដឹង​ថា៖ «ក្រុម​មន្រ្តី​សហជីព​យើង​បាន​ចុះ​ជួយ​អន្តរាគមន៍​ដោះ​ស្រាយ​ការ​ទាម​ទារ​លើ​លក្ខខណ្ឌ​មួយ​ចំនួន​ជូន​កម្មករ​នៅ​រោងចក្រ ស៊ីនហ្វាង តាំង​ពី​ថ្ងៃ​ចន្ទ ប៉ុន្តែ​នៅ​ថ្ងៃ​អង្គារ​ក៏​កើត​មាន​ទំនាស់​គ្នា​រហូត​មាន​ហិង្សា​កើត​ឡើង ដោយ​សារ​មាន​សហជីព​មួយ​ផ្សេង​ទៀត​ដែល​នៅ​ខាង​ក្រុម​ហ៊ុន​បាន​បង្ក​ឲ្យ​មាន​ហិង្សា​នេះ»។

កម្មករ​ប្រមាណ​ជា ៤០០ នាក់​បាន​តវ៉ា​ទាម​ទារ​លក្ខខណ្ឌ​ការងារ​មាន​ចំនួន ១៩ ចំណុច រួម​មាន​ថ្លៃ​បាយ​ថ្ងៃ​ត្រង់ ថ្លៃ​ធ្វើ​ដំណើរ​ស្នាក់​នៅ ទទួល​យក​ថ្នាក់​ដឹក​នាំ​ដែល​ត្រូវ​បាន​ក្រុម​ហ៊ុន​បញ្ឈប់​ឲ្យ​ចូល​ធ្វើ​ការ​វិញ ឈប់​គំរាម​កំហែង​កម្មករ និង​សហជីព និង​គោរព​សិទ្ធិ​សេរីភាព​របស់​សហជីព​ជាដើម។

លោក ឆុន រិនដា មន្រ្តី​ដោះ​ស្រាយ​វិវាទ​នៃ​សម្ព័ន្ធ ស៊ីខៅឌូ ដែល​ត្រូវ​រង​របួស​ថ្លោះ​ដៃ​ក្នុង​ការ​ប៉ះ​ទង្គិច​គ្នា​នោះ​បាន​ឲ្យ​ដឹង​ពី​ដើម​ហេតុ​នៃ​ការ​ប៉ះ​ទង្គិច​គ្នា​ថា លោក​កំពុង​តែ​ធ្វើ​ការ​ពន្យល់​ពី​ច្បាប់​និង​ចំណុច​ទាម​ទារ​ផ្សេងៗ​ដល់​កម្មករ ស្រាប់​តែ​សហជីព​មួយ​ក្រុម​ដែល​ដឹក​នាំ​ដោយ​លោក ហ៊ុយ សម្បត្តិ ប្រធាន​សហព័ន្ធ​សហជីព​ដើម្បី​កម្មករ​កម្ពុជា​បាន​ចាក់​មេក្រូ​ជេរ​ប្រមាថ​មក​លើ​សហជីព​និង​កម្មករ​រំខាន​ការ​តវ៉ា​រហូត​កម្មករ​ខឹង​ក៏​ឈាន​ដល់​ការ​ប៉ះ​ទង្គិច​គ្នា។

លោក ឆុន រិនដា និយាយ​ថា៖ «ពួក​គេ​បាន​ជេរ​ប្រមាថ​ដល់​ថ្នាក់​ដឹក​នាំ​របស់​ខ្ញុំ និង​កម្មករ​ដោយ​គ្មាន​មូល​ហេតុ»។

សម្ព័ន្ធ​សហជីព ស៊ីខៅឌូ បាន​ដាក់​ពាក្យ​បណ្តឹង​ទៅ​សាលា ខណ្ឌ​ពោធិ៍​សែន​ជ័យ និង​ទៅ​សាលា​រាជធានី​ភ្នំពេញ​ពី​បទ​សម​គំនិត និង​ប្រើ​អំពើ​ហិង្សា​ដោយ​ចេតនា។

ទាក់ទង​នឹង​ការ​ចោទ​ប្រកាន់​នេះ​លោក ហ៊ុយ សម្បត្តិ បាន​ធ្វើ​ការ​បដិសេធ ហើយ​ថា លោក​មិន​អាច​ទទួល​យក​បាន​នូវ​ការ​ចោទ​ដែល​គ្មាន​មូលដ្ឋាន​ពី​ក្រុម​មន្រ្តី​របស់​សហជីព ស៊ីខៅឌូ នេះ​ទេ។ លោក​និយាយ​ថា៖ «ខ្ញុំ​សុំ​បដិសេធ​និង​មិន​អាច​ទទួល​យក​ការ​ចោទ​ប្រកាន់​នេះ​បាន​ជា​ដាច់​ខាត តែ​ផ្ទុយ​មក​វិញ​ពួក​គេ​ជេរ​ប្រមាថ​រូប​ខ្ញុំ និង​កម្មករ​ផ្សេង​ទៀត​នូវ​ពាក្យ​អសុរោះ​យ៉ាង​ខ្លាំង ក៏​ធ្វើ​ឲ្យ​មាន​ការ​ប៉ះ​ពារ​ពាក្យ​សម្តី​គ្នា»។

លោក ហ៊ុយ សម្បត្តិ បន្ត​ថា លោក​មិន​ដែល​គិត​ថា ការ​ប៉ះ​ទង្គិច​គ្នា​នេះ​អាច​នឹង​កើត​មាន​ទេ តែ​នេះ​ដោយ​សារ​តែ​ពួក​គេ​មាន​ចរិត​អសីលធម៌​ច្រើន​មិន​ខ្វល់​ពី​អ្នក​ដទៃ។ លោក​ថា៖ «ខ្ញុំ​កំពុង​រៀប​ចំ​ពាក្យ​បណ្តឹង​ប្តឹង​បក​ទៅ ស៊ីខៅឌូ វិញ ចោទ​ពី​បទ​ប៉ុន​ប៉ង​មនុស្ស​ឃាត​មក​លើ​មន្រ្តី​ខ្ញុំ និង​កម្មករ​ផ្សេង​ទៀត»។

ប្រធាន​រដ្ឋបាល​រោងចក្រ ស៊ីន ហ្វាង លោក វង្ស ថាវិន មិន​អាច​ទាក់​ទង​សុំ​ការ​បញ្ជាក់​បាន​ទេ ចំណែក​អ្នក​នាង លឹម លីន ជំនួយ​ការ​រដ្ឋបាល​បាន​បដិសេធ​ឆ្លើយ​បំភ្លឺ​ករណី​នេះ​កាល​ពី​ម្សិល​មិញ៕

អត្ថបទគួរចាប់អារម្មណ៍