ភ្នំពេញៈ សហជីពឯករាជ្យចំនួនពីរ ដែលជាសមាជិកគណៈកម្មកាប្រឹក្សាការងារ (LAC) នៃក្រសួងការងារបានសម្រេចចូលរួមការប្រជុំពិភាក្សា ពីការដំឡើងប្រាក់ឈ្នួលកម្មករ នៅថ្ងៃពុធនេះ បន្ទាប់ពីក្រសួងការងារ បានយល់ព្រមដាក់សំណើសុំដំឡើងប្រាក់ឈ្នួល ១៤០ ដុល្លារទៅក្នុងរបៀបវារៈនៃកិច្ចពិភាក្សា។
លោកស្រី កេន ឆេងឡាង ប្រធានស្តីទី សហព័ន្ធសហជីពជាតិឧស្សាហកម្មវាយនភ័ណ្ឌកាត់ដេរកម្ពុជា បានឲ្យដឹងកាលពីម្សិលមិញថា សហជីពលោកស្រី និងសហជីព ស៊ីខៅឌូ របស់លោក អាត់ ធន់ បានសម្រេចជាថ្មីថា នឹងចូលរួមក្នុងកិច្ចប្រជុំជាមួយ LAC នេះវិញបន្ទាប់ពីបានសម្រេចធ្វើពហិការ។
លោកស្រី ថ្លែងថា៖ «ការដែលយើងសម្រេចចិត្តជាថ្មីនេះ ដោយសារក្រសួងបានយល់ព្រមដាក់ចំនួនតួលេខ ១៤០ ដុល្លារ ទៅក្នុងកិច្ចប្រជុំគណៈកម្មការប្រឹក្សាការងារ ដែលជាចំនួនមួយខាងសហជីពបានបោះឆ្នោតយកចំនួននេះ សម្រាប់ប្រាក់ឈ្នួលរបស់កម្មករ»។
លោកស្រី ឆេងឡាង ដែលមិនចង់ឲ្យមានការពន្យារពេលការពិភាក្សាស្តីពីការដំឡើងប្រាក់ឈ្នួលកម្មករយូរតទៅទៀតនោះបានព្រមានថា៖ «ជម្រើសចុងក្រោយ ដែលយើងនឹងធ្វើគឺការតវ៉ា ប្រសិនបើយើងមិនអាចទទួលយកបាននូវតួលេខណាមួយសមរម្យសម្រាប់កម្មករ»។
លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករ ដែលមិនមែនជាសមាជិករបស់ LAC តែក៏ជាសហជីពសកម្មមួយ ក្នុងការទាមទារប្រាក់ឈ្នួលជូនកម្មករបានថ្លែងថា៖ «ខ្ញុំគិតថា នៅក្នុងកិច្ចប្រជុំនេះ អាចនឹងមានតួលេខបី ដែលនឹងយកមកពិភាក្សានោះគឺ ១១០ ដុល្លារពីនិយោជក ១២១ ដុល្លារពីរាជរដ្ឋាភិបាលនិង ១៤០ ដុល្លារពីសហជីព»។
លោក ស៊ីណា រំពឹងថា LAC នឹងផ្តល់នូវការដំឡើងប្រាក់ឈ្នួលដល់កម្មករ ដែលប្រហាក់ប្រហែលទៅនឹងចំនួនស្នើសុំពីខាងសហជីព។
លោក ហេង សួរ អ្នកនាំពាក្យក្រសួងការងារ មិនអាចសុំការអធិប្បាយបានទេ កាលពីម្សិលមិញ៕
