The Phnom Penh Post Search

Search form

Logo of Phnom Penh Post newspaper Phnom Penh Post - សហជីព​មាន​និន្នាការ​ប្រឆាំង​ពីរ​អំពាវនាវ​ឲ្យ​កម្មករ​ចូល​រួម​មហា​បាតុកម្ម




សហជីព​មាន​និន្នាការ​ប្រឆាំង​ពីរ​អំពាវនាវ​ឲ្យ​កម្មករ​ចូល​រួម​មហា​បាតុកម្ម

សហជីព​មាន​និន្នាការ​ប្រឆាំង​ពីរ​អំពាវនាវ​ឲ្យ​កម្មករ​ចូល​រួម​មហា​បាតុកម្ម

130911_03
មេសហជីពមាននិន្នាការគាំទ្របក្សប្រឆាំងពីរគឺ លោក រ៉ុង ឈុន និងលោក ជា មុនី ផា លីណា

ភ្នំពេញៈ ប្រធាន​សហជីព​ដែល​មាន​និន្នាការ​ប្រឆាំង​រដ្ឋាភិបាល​បាន​អំពាវនាវ​ជា​ថ្មី​ទៀត​កាល​ពី​ម្សិលមិញ ឲ្យ​កម្មករ​រោងចក្រ​ចូល​រួម​នៅ​ក្នុង​មហា​បាតុកម្ម​អហិង្សា​បី​យប់​បី ថ្ងៃ ដែល​រៀបចំ​ដោយ​គណបក្ស​សង្គ្រោះ​ជាតិ​នៅ ថ្ងៃទី១៥ ដល់ ថ្ងៃ ទី១៧ ខែ កញ្ញា ខាង​មុខ​នេះ។

លោក រ៉ុង ឈុន ប្រធាន​សហភាព​សហជីព​កម្ពុជា (CCU) បាន​ថ្លែង​ពី​ថ្ងៃ​ម្សិលមិញ​ថា លោក​កំពុង​តែ​ចាប់ផ្ដើម​ធ្វើ​យុទ្ធនាការ​ប្រមែ​ប្រមូល​សមាជិក សមាជិកា កម្មករ កម្មការិនី ឲ្យ​មក​ចូល​រួម​មហា​បាតុកម្ម​អហិង្សា​ជា​លើក​ទីពីរ​នេះ។

លោក រ៉ុង ឈុន បាន​ថ្លែង​ថា យុទ្ធនាការ​ប្រមែ​ប្រមូល​កម្មករ​នេះ សង្ឃឹម​ថា​យ៉ាង​តិច​ក៏​មាន​កម្មករ កម្មការិនី ប្រមាណ ១ ម៉ឺន​នាក់​មក​ចូល​រួម​ក្នុង​មហា​បាតុកម្ម​បី​ថ្ងៃ​នេះ​ដែរ​។ លោក​ថ្លែង​ថា៖ «ខ្ញុំ​គិត​ថា នេះ​ជា​ឱកាស​មាស​ពេជ្រ​សម្រាប់​ពួក​គេ​ដើម្បី​ស្វែង​រក​ការ​ពិត​និង​យុត្តិធម៌»។

លោក​បាន​បន្ត​ថា វា​ក៏​ជា​ពេល​វេលា​មួយ​ដែល​ពួក​គេ​ទទួល​បាន​នូវ​ផល​ប្រយោជន៍ និង​ទទួល​បាន​នូវ​ប្រាក់​ឈ្នួល ប្រាក់​បៀវត្សរ៍​ច្រើន ហើយ​សេរីភាព និង​លក្ខខណ្ឌ​ការងារ​ក៏​កាន់​តែ​ល្អ​ប្រសើរ​ផង​ដែរ។

លោក រ៉ុង ឈុន បាន​មាន​ប្រសាសន៍​ទៀត​ថា៖ «បើ​យើង​ទុក​ឲ្យ​ឱកាស​នេះ​កន្លង​ហួស យើង​នឹង​ប្រឈម​កាន់​តែ​ធ្ងន់ធ្ងរ​ជាង​នេះ​ទៀត»។

ទន្ទឹម​នឹង​នេះ​ដែរ លោក ជា មុនី ប្រធាន​សហជីព​សេរី​កម្មករ​នៃ​ព្រះ​រាជាណាចក្រ កម្ពុជា​បាន​ផ្ញើ​លិខិត​មួយ​ច្បាប់​ទៅ​ប្រធាន​សមាគម​រោងចក្រ​កាត់ដេរ​នៅ​កម្ពុជា (GMAC) កាល​ពី​ម្សិលមិញ ដើម្បី​ស្នើ​ឲ្យ GMAC ជួយ​ធ្វើ​អន្តរាគមន៍​ដល់​រោងចក្រ​កាត់ដេរ​សម្លៀក​បំពាក់ និង​ស្បែក​ជើង ឲ្យ​ផ្អាក​ចង្វាក់​ផលិតកម្ម​មួយ​សប្ដាហ៍ ចាប់​ពី​ថ្ងៃ ទី១៥ ដល់​ថ្ងៃ ទី២១ ខែ កញ្ញា ឆ្នាំ ២០១៣ ដើម្បី​ឲ្យ​កម្មករ​បាន​ចូល​រួម​នៅ​ក្នុង​មហា​បាតុកម្ម​ជាមួយ​គណបក្ស​សង្គ្រោះ​ជាតិ។

ក្នុង​លិខិត​ផ្ញើ​ទៅ​ប្រធាន​សមាគម​រោងចក្រ​កាត់ដេរ​នៅ​កម្ពុជា លោក ជា មុនី លើក​ឡើង​ថា ក្នុង​វិស័យ​ឧស្សាហកម្ម​កាត់ដេរ និង​ស្បែក​ជើង ដែល​ស្រូប​យក​កម្លាំង​កម្មករ កម្មការិនី​ភាគច្រើន​ជា​ម្ចាស់​ឆ្នោត ក្នុង​នោះ​ពួក​គាត់​មាន​ទំនោរ​ខ្លាំង​ទៅ​លើ​គណបក្ស​សង្គ្រោះ​ជាតិ។

លោក​បាន​បន្ត​ថា៖ «ខ្ញុំ​សង្កេត​ឃើញ​ថា ការ​រំជើប​រំជួល​នេះ​បាន​ធ្វើ​ឲ្យ​កម្មករ កម្មការិនី ភាគ​ច្រើន​មាន​ភាព​អល់​អែក​នៅ​ក្នុង​ការ​បំពេញ​ការងារ ដោយ​អ្នក​ខ្លះ​ត្រូវ​ឪពុក​ម្តាយ​ឬ​ក្រុម​គ្រួសារ​ជំរុញ​ឲ្យ​ត្រឡប់​ទៅ​ផ្ទះ​វិញ ឯ​អ្នក​ខ្លះ​ទៀត​ប្តេជ្ញា​ចូល​រួម​ធ្វើ​មហា​បាតុកម្ម​អហិង្សា​ចំនួន ៣ យប់ ៣ ថ្ងៃ​នា​ពេល​ខាង​មុខ​នេះ​ជាមួយ​នឹង​គណបក្ស​សង្គ្រោះ​ជាតិ»។

ប៉ុន្តែ សម្រាប់​លោក សោម អូន ប្រធាន​ក្រុម​ប្រឹក្សា​សហជីព​ជាតិ​កម្ពុជា​វិញ​បាន​ថ្លែង​ពី​ថ្ងៃ​ម្សិលមិញ​ថា លោក​មិន​គាំទ្រ​នឹង​អ្វី​ដែល​សហជីព​ទាំង​ពីរ​នេះ​កំពុង​ធ្វើ​នោះ​ទេ ហើយ​លោក​សូម​អំពាវនាវ​ឲ្យ​កម្មករ​គិត​ពិចារណា និង​កុំ​ចូល​រួម​ក្នុង​មហា​បាតុកម្ម​នេះ ដោយ​ទុក​ឲ្យ​គណបក្ស​នយោបាយ​ជា​អ្នក​ដោះស្រាយ​នូវ​បញ្ហា​ពួក​គេ​នោះ​វិញ។

លោក សោម អូន បាន​ថ្លែង​ថា៖ «កម្មករ​គួរ​តែ​នៅ​ឲ្យ​ឆ្ងាយ​ពី​បញ្ហា​នេះ ព្រោះ​នេះ​ជា​បញ្ហា​នយោបាយ​ដែល​វា​មិន​មែន​ជា​សិទ្ធិ និង​ប្រយោជន៍​របស់​កម្មករ​យើង​ទេ»៕ PN

អត្ថបទគួរចាប់អារម្មណ៍