The Phnom Penh Post Search

Search form




Logo of Phnom Penh Post newspaper Phnom Penh Post - សហជីព​មួយ​ក្រុម​ប្រញាប់​ដាក់​សំណើ​សុំ​ជួប​ជុំ​នៅ​ទីលាន​ប្រជាធិបតេយ្យ

សហជីព​មួយ​ក្រុម​ប្រញាប់​ដាក់​សំណើ​សុំ​ជួប​ជុំ​នៅ​ទីលាន​ប្រជាធិបតេយ្យ

សហជីព​មួយ​ក្រុម​ប្រញាប់​ដាក់​សំណើ​សុំ​ជួប​ជុំ​នៅ​ទីលាន​ប្រជាធិបតេយ្យ

ភ្នំពេញៈ ខណៈ​ដែល​បន្លា​លួស ត្រូវ​បាន​គេ​រើ​ចេញ​ពី​ទីលាន​ប្រជាធិបតេយ្យ​ កាល​ពី​ថ្ងៃ​ពុធ សហជីព​មួយ​ក្រុម​ បាន​ប្រញាប់​ដាក់​សំណើ​មួយ​ ទៅ​សាលា​រាជធានី ដើម្បី​ធ្វើ​ការ​ជួបជុំ ​នៅ​ទីលាន​នេះ​ ចាប់​តាំង​ពី​វា ត្រូវ​បាន​គេ​បិទ បន្ទាប់​ពី​កើត​មាន​អំពើ​ហិង្សា​កាលពី​ដើម​ខែ​មករា។

លិខិត​ដែល​កាសែត​ភ្នំពេញប៉ុស្តិ៍​ទទួល​បាន​កាល​ពី​ថ្ងៃ​ម្សិលមិញ បាន​អំពាវ​​នាវ​ឲ្យ​អភិបាល​រាជ​ធានី​ភ្នំ​ពេញ​លោក ប៉ា សុជាតិវង្ស អនុញ្ញាត​ឲ្យ​សហជីព​ចំនួន​ ៦ ​ធ្វើ​ការ​ជួប​ជុំ​ នៅ​​ថ្ងៃ​ទិវា​យុវជន​អន្តរជាតិ​នៅ​ថ្ងៃ​អង្គារ​សប្តាហ៍​ក្រោយ។

លោក ស ម៉ូរា ប្រធាន​សហព័ន្ធ​ចំណី​អាហារ និង​សេវា​កម្មករ​ បាន​ថ្លែង​ថា ការ​ជួបជុំ​នេះ នឹង​ទាមទារ​ដំឡើង​ប្រាក់​ខែ កែ​លម្អ​លក្ខខណ្ឌ​ការ​ងារ​ គុណ​ភាព​អប់រំ​ឲ្យ​កាន់​តែ​ប្រសើរ​ និង​ការ​បណ្តុះ​បណ្តាល​វិជ្ជាជីវៈ ដល់​យុវជន​កម្ពុជា​។

លោក​បាន​ថ្លែង​ថា​៖«​បន្ទាប់​ពី​ជួប​ជុំ​នៅ​ទីលាន​ប្រជាធិបតេយ្យ យើង​មាន​គម្រោង​ដើរ​ទៅ​ក្រសួង​ការងារ ក្រសួង​អប់រំ និង​សភា​ជាតិ​។ យើង​សង្ឃឹម​ថា នឹង​មិន​មាន​បញ្ហា​ទេ ព្រោះ​មិន​មាន​ភាព​តាន​តឹង​ទៀត​ទេ​ ជាមួយ​នឹង​បញ្ហា​នយោបាយ»។

លោក ហេង ជឿន ប្រធាន​សមាគម​កសិករ​សម្រាប់​សន្តិភាព និង​ការ​អភិវឌ្ឍ ​រំពឹង​ថា នឹង​មាន​យុវជន និង​និស្សិត​ប្រមាណ ​៦០០​នាក់​នឹង​មក​ចូល​រួម​ក្នុង​ពិធី​នេះ​។ លោក​បញ្ជាក់​ថា​​៖«​ខ្ញុំ​សង្ឃឹម​ ១០០ ភាគ​រយ​ថា យើង​អាច​ប្រើ​ប្រាស់​ទីលាន​នោះ​ជា​លើក​ដំបូង​ចាប់​តាំង​ពី​គេ​បើក​វា​ជា​ថ្មី តាម​ការ​គ្រោង​ទុក ហើយ​ថា នឹង​មិន​មាន​ប៉ូលិស ឬ​អាជ្ញាធរ មក​បញ្ឈប់​យើង​ដូច​កាល​ពី​មុន​ទេ​»​។

ទីលាន​ប្រជាធិបតេយ្យ ត្រូវ​បាន​គេ​ហាម​ឃាត់​មិន​ឲ្យ​ចូល​ចាប់​តាំង​ពី​កើត​មាន​អំពើ​ហិង្សា​នៅ​ផ្លូវ​វេង​ស្រេង​ ដែល​មាន​មនុស្ស​ស្លាប់ និង​ការ​បំបែក​បាតុកម្ម​នៅ​មួយ​កន្លែង របស់​គណបក្ស​សង្គ្រោះ​ជាតិ ចេញ​ពី​ទីលាន​នេះ ​កាល​ពី​ដើម​ខែ​មករា​។

ទីលាន​ប្រជាធិបតេយ្យ​ត្រូវ​បាន​បើក​ឡើង​វិញ​កាល​ពី​ថ្ងៃ​ពុធ គឺ​មួយ​ថ្ងៃ​ បន្ទាប់​ពី​តំណាង​រាស្ត្រ​គណបក្ស​សង្គ្រោះ​ជាតិ បាន​ចូល​ស្បថ​ក្នុង​ព្រះ​បរម​រាជ​វាំង ដែល​ជា​ការ​អនុវត្ត​ទៅ​តាម​កិច្ច​ព្រម​ព្រៀង​របស់​គណ​បក្ស​ជាប់​ឆ្នោត​ទាំង​ពីរ​កាល​ពី​ថ្ងៃ​ទី២២ ខែ​កក្កដា​។

លោក​ ហេង ជឿន បាន​ថ្លែង​ថា ប្រសិន​បើ​គេ​មិន​អនុញ្ញាត ក្រុម​នេះ នឹង​ធ្វើ​ការ​ជួបជុំ នៅ​កន្លែង​ផ្សេង​គ្នា​ក្បែរ​ទីលាន​ប្រជាធិបតេយ្យ​។

អ្នក​នាំ​ពាក្យ​សាលា​រាជធានី​លោក ឡុង ឌីម៉ង់ បាន​ប្រាប់​កាសែត​ភ្នំពេញ ប៉ុស្តិ៍​ថា ​ក្រុម​មន្រ្តី នឹង​ជួប​ជា​មួយ​ក្រុម​តំណាង​សហជីព​នៅ​ថ្ងៃ​នេះ​ ដើម្បី​ពិភាក្សា​ពី​សំណើ​របស់​ពួក​គេ​។ លោក​បន្ត​ថា ប៉ុន្តែ​ប្រសិន​បើ​សំណើ​នោះ ត្រូវ​គេ​យល់​ព្រម​កម្លាំង​សន្តិសុខ​ នឹង​ត្រូវ​ដាក់​ពង្រាយ​។ លោក បាន​បញ្ជាក់​ថា ប្រសិន​បើ​ពល​រដ្ឋ​«​សម្តែង​មតិ ឬ​ធ្វើ​អ្វី​តាម​ច្បាប់​ យើង​នឹង​ដាក់​ពង្រាយ​កម្លាំង​ប្រដាប់​អាវុធ ឬ​អាជ្ញាធរ​ដើម្បី​ការ​ពារ​ពួក​គេ និង​ជួយ​សម្រួល​ចរាចរណ៍​ ដូច​ដែល​យើង​តែង​តែ​ធ្វើ​»​៕

អត្ថបទគួរចាប់អារម្មណ៍