The Phnom Penh Post Search

Search form

Logo of Phnom Penh Post newspaper Phnom Penh Post - សហជីព​អំពាវនាវ​ឲ្យ​កម្មករ​ធ្វើ​កូដកម្ម​ទូទាំង​ប្រទេស




សហជីព​អំពាវនាវ​ឲ្យ​កម្មករ​ធ្វើ​កូដកម្ម​ទូទាំង​ប្រទេស

សហជីព​អំពាវនាវ​ឲ្យ​កម្មករ​ធ្វើ​កូដកម្ម​ទូទាំង​ប្រទេស

ភ្នំពេញៈ ដោយ​សារ​តែ​សេចក្តី​សម្រេច​របស់​តុលាការ​កាល​ពី​ថ្ងៃ​អង្គារ​បាន​បដិសេធ​មិន​ដោះលែង​អ្នក ២១ នាក់​ឲ្យ​នៅ​ក្រៅ​ឃុំ​បន្ទាប់​ពី​ត្រូវ​បាន​ចាប់​ខ្លួន​នៅ​ក្នុង​បាតុកម្ម​គាំទ្រ​កូដកម្ម​របស់​កម្មករ​កាត់​ដេរ​ទូទាំង​ប្រទេស​កាល​ពេល​ថ្មី​កន្លង​ទៅ ក្រុម​សហជីព​កាល​ពី​ម្សិលមិញ​បាន​ថ្លែង​ថា ពួក​គេ​ឯកភាព​គ្នា​ថា នឹង​បញ្ឆេះ​កូដកម្ម​ជា​ថ្មី ប៉ុន្តែ​ប្រើ​ទិចនិក​ផ្សេង​ខុស​ពី​មុន។

មេដឹកនាំ​សហជីព​ចំនួន ៩ បាន​បង្ហាញ​អំពី​គម្រោង​ពេល​វេលា​ធ្វើ​កូដកម្ម​របស់​ខ្លួន​ដែល​នឹង​ចាប់​ផ្តើម​នៅ​ពាក់​កណ្តាល​ខែ​ក្រោយ​ហើយ​នឹង​អំពាវនាវ​ឲ្យ​កម្មករ​នៅ​ផ្ទះ​ក្នុង​អំឡុង​រយៈ​ពេល​ធ្វើ​កូដកម្ម​នោះ​ជា​ជាង​ចូល​រួម​នៅ​ក្នុង​បាតុកម្ម។

លោក រ៉ុង ឈុន ប្រធាន​សហភាព​សហជីព​កម្ពុជា បាន​ថ្លែង​ថា៖ «យើង​នឹង​រៀបចំ​ចែក​ចាយ​លិខិត​ទៅ​កម្មករ​ដើម្បី​ឲ្យ​កម្មករ​ទាំង​អស់​ដឹង និង​យល់​អំពី​គោល​បំណង​សម្រាប់​យុទ្ធសាស្រ្ត​នេះ»។

កូដកម្ម កាល​ពី​លើក​មុន​មាន​រយៈ​ពេល​ចាប់​ពី​ថ្ងៃ ទី២៤ ខែ ធ្នូ រហូត​ដល់​ថ្ងៃ ទី៣ ខែ មករា ហើយ​មាន​តែ​កម្មករ​ក្នុង​វិស័យ​កាត់ដេរ​ប៉ុណ្ណោះ ប៉ុន្តែ​មេ​ដឹក​នាំ​សហជីព​លើក​នេះ​នឹង​អំពាវនាវ​កម្មករ​ក្នុង​គ្រប់​វិស័យ​ទាំង​អស់​ចូល​រួម។

ថ្ងៃ​នេះ​មេ​ដឹក​នាំ​សហជីព​នឹង​ចាប់​ផ្តើម​ចែក​ចាយ​ទៅ​មន្រ្តី​រដ្ឋាភិបាល និង​កម្មករ​នូវ​លិខិត​មួយ​ដែល​រៀប​រាប់​លម្អិត​អំពី​ផែនការ ធ្វើ​ពហិការ​ការងារ​ថែម​ម៉ោង​នៅ​តាម​រោងចក្រ​នានា​ពី​ថ្ងៃ ទី២៤ កុម្ភៈ រហូត​ដល់​ថ្ងៃ ទី២៨ កុម្ភៈ និង​ធ្វើ​វេទិកា​សាធារណៈ​នៅ​ថ្ងៃ ទី៨ មីនា ដែល​នៅ​វេទិកា​នោះ​ពួក​គេ​គ្រោង​អញ្ជើញ​លោក​ឧប​នាយក​រដ្ឋ​មន្រ្តី គាត ឈន់ ដែល​ជា​ប្រធាន​គណៈកម្មការ​ស៊ើប​អង្កេត​ប្រាក់​ឈ្នួល​អប្បបរមា ហើយ​ចុង​ក្រោយ​នឹង​ធ្វើ​កូដកម្ម​នៅ​ផ្ទះ​ពី​ថ្ងៃ ទី១២ មីនា រហូត​ដល់​ថ្ងៃ ទី១៩ មីនា។

លោក រ៉ុង ឈុន ថ្លែង​ថា ប្រសិន​បើ​មន្រ្តី​រដ្ឋាភិបាល​មិន​ដោះលែង​អ្នក​ដែល​ត្រូវ​បាន​ចាប់​ខ្លួន​ទាំង ២១ នាក់ និង​មិន​យល់​ព្រម​ដំឡើង​ប្រាក់​ឈ្នួល​អប្បបរមា​ចំនួន ១៦០ ដុល្លារ​នៅ​ក្នុង​វិស័យ​កាត់ដេរ​សម្លៀក​បំពាក់​និង​ស្បែក​ជើង និង​មិន​ធ្វើ​តាម​ការ​ទាមទារ ៥ ចំណុច​ដទៃ​ផ្សេង​ទៀត នោះ​កូដកម្ម​នឹង​បន្ត​គ្មាន​ពេល​កំណត់។

រយៈ​ពេល​នៃ​គម្រោង​ធ្វើ​កូដកម្ម​ជា​ថ្មី​នេះ​ទុក​ពេល​វេលា​ឲ្យ​រដ្ឋាភិបាល​ពិចារណា​និង​ចរចា​អំពី​ការ​ទាមទារ ៧ ចំណុច​របស់​សហជីព ហើយ​ក៏​ធ្វើ​ឲ្យ​សហជីព​មាន​ពេល​វេលា​ច្រើន​ផង​ដែរ​ក្នុង​ការ​ប្រមូល​កម្មករ​ចូល​រួម​កូដកម្ម​នេះ។ នេះ​បើ​តាម លោក អាត់ ធន់ ប្រធាន​សម្ព័ន្ធ​សហជីព​ប្រជាធិបតេយ្យ​កម្មករ​កាត់ដេរ​កម្ពុជា ហៅ​កាត់​ថា ស៊ីខៅឌូ។

លោក អាត់ ធន់ បាន​ថ្លែង​តាម​ទូរស័ព្ទ​បន្ទាប់​ពី​កិច្ច​ប្រជុំ​ថា៖ «ឥឡូវ​នេះ ខ្ញុំ​គិត​ថា យើង​ទុក​រយៈ​ពេល​មួយ​ខែ​សម្រាប់​រដ្ឋាភិបាល​ធ្វើ​ការ​ពិចារណា​លើ​ចំណុច​ទាមទារ​របស់​យើង»។

លោក​ថា ការ​ពន្យារ​ពេល​ធ្វើ​កូដកម្ម​នេះ​ក៏​នឹង​ផ្តល់​ពេល​វេលា​ឲ្យ​អ្នក​បញ្ជា​ទិញ​ដាក់​សម្ពាធ​ទៅ​លើ​រដ្ឋាភិបាល​ផង​ដែរ។

កាល​ពី​ថ្ងៃ ទី១១ ខែ កុម្ភៈ សាលា​ឧទ្ធរណ៍ បាន​បដិសេធ​នៅ​ក្រៅ​ឃុំ​ដោយ​ផ្អែក​លើ​ហេតុផល​បទ​ល្មើស​មិន​ទាន់​ត្រូវ​បាន​តុលាការ​សាលា​ដំបូង​បើក​ការ​ស៊ើប​អង្កេត​នៅ​ឡើយ ដើម្បី​បង្ការ​កុំ​ឲ្យ​មាន​បទល្មើស​ដែល​ត្រូវ​បាន​ចោទ​ប្រកាន់​កើត​មាន​ឡើង​ជា​ថ្មី​ទៀត និង​ដើម្បី​កុំ​ឲ្យ​មាន​ការ​ត្រូវរ៉ូវ​គ្នា​រវាង​ជន​ជាប់​ចោទ​សាក្សី និង​សហការី៕ PS

អត្ថបទគួរចាប់អារម្មណ៍