ភ្នំពេញៈ សហជីព និងសមាគមជាង ២០ ស្ថាប័ន កាលពីម្សិលមិញបានប្រមូលផ្តុំគ្នានៅមុខខុទ្ទកាល័យលោកនាយករដ្ឋមន្ត្រី ហ៊ុន សែន នៅទល់មុខវត្តបទុមវតី ដើម្បីដាក់ញត្តិសុំអន្តរាគមន៍ឲ្យជួយជំរុញទៅនិយោជក អនុវត្តការបើកប្រាក់រំឭកអតីតភាពការងារដែលមានមុនឆ្នាំ ២០១៩ និងប្រាក់បំណាច់អតីតភាពការងារថ្មីក្នុងឆ្នាំ ២០២០ ដល់កម្មករនិយោជិតបន្ទាប់ពីក្រសួងការងារបានប្រកាសពន្យារពេលអនុវត្តទៅឆ្នាំ ២០២១ ខាងមុខ។
លោកស្រី យ៉ាង សុភ័ណ្ឌ ប្រធានសម្ព័ន្ធសហជីពកម្ពុជាបានថ្លែង បន្ទាប់ពីដាក់ញត្តិរួចកាលពីម្សិលមិញថា ក្រសួងការងារបានចេញលិខិតមួយច្បាប់ដោយពន្យារពេលក្នុងការបើកប្រាក់បំណាច់អតីតភាពការងារដែលធ្វើឲ្យប៉ះពាល់ដល់ស្ថានភាពរស់នៅរបស់កម្មករដែលកំពុងប្រឈមមុខនឹងការបាត់បង់ការងារ និងកំពុងត្រូវបានព្យួរការងារ។
លោកស្រីបន្តថា ការពន្យារពេលបើកប្រាក់អតីតភាពការងារនេះគឺបានធ្វើឲ្យប៉ះពាល់ដល់សេដ្ឋកិច្ចគ្រួសាររបស់កម្មករ ខណៈដែលប្រាក់ទាំងនោះបានចូលរួមចំណែកគាំទ្រជីវភាពរបស់កម្មករក្នុងគ្រាដ៏លំបាកនេះ។
លោកស្រី សុភ័ណ្ឌ លើកឡើងទៀតថា កន្លងទៅក្រុមសហជីពទាំងអស់បានដាក់ញត្តិទៅក្រសួងការងារម្តងរួចមកហើយដើម្បីទាមទារឲ្យមានការផ្តល់ប្រាក់រំឭកអតីតភាពការងារកម្មករដែលមានមុនឆ្នាំ ២០១៩ និងប្រាក់អតីតភាពការងារសម្រាប់ឆ្នាំ ២០២០ ប៉ុន្តែមិនមានដំណោះស្រាយនោះទេទើបសហជីពទាំងអស់រួមគ្នាស្វែងរកអន្តរាគមន៍ពីលោកនាយករដ្ឋមន្ត្រី។
លោកស្រីបញ្ជាក់ថា៖ «យើងទទូចឲ្យសម្តេចនាយករដ្ឋមន្ត្រីគិតគូរពីផលប្រយោជន៍របស់បងប្អូនកម្មករឡើងវិញ ហើយបើគាត់គិតគូរពីផលប្រយោជន៍របស់បងប្អូនកម្មករយើង គាត់នឹងបានទទួលផលប្រយោជន៍មកវិញ។ ខ្ញុំជឿថា មានតែបងប្អូនកម្មករនេះហើយ ដែលផ្តល់នូវសិទ្ធិអំណាចដល់ពួកគាត់បានតាមរយៈការបោះឆ្នោត ដូច្នេះយើងស្នើសុំឲ្យគាត់គិតគូរពីកម្មករ»។
បើតាមលោកស្រី សុភ័ណ្ឌ ក្នុងអំឡុងពេលនេះមានរោងចក្រជាច្រើនបានព្យួរការងារកម្មករ ហើយមានកម្មករជាច្រើនបានទទួលប្រាក់ឧបត្ថម្ភតិចតួចបំផុតពីរដ្ឋាភិបាល និងពីថៅកែដែលមិនអាចយកទៅដោះស្រាយបញ្ហាជីវភាពរបស់ពួកគាត់បានល្អប្រសើរនោះទេ។
លោកស្រីរំពឹងថា លោកនាយករដ្ឋមន្ត្រីនឹងផ្តល់ដំណោះស្រាយមួយដ៏ល្អសម្រាប់កម្មករ ព្រោះខុទ្ទកាល័យលោក ហ៊ុន សែន គឺជាកន្លែងចុងក្រោយដែលត្រូវស្វែងរកកិច្ចអន្តរាគមន៍បន្ទាប់ពីបានស្វះស្វែងរកគ្រប់ស្ថាប័ន តែមិនមានដំណោះស្រាយ។
លោក គង់ ចំរើន មន្ត្រីទទួលបន្ទុកខុទ្ទកាល័យលោកនាយករដ្ឋមន្ត្រីប្រាប់ភ្នំពេញប៉ុស្តិ៍ថា ក្រុមការងារនៃខុទ្ទកាល័យកំពុងពិនិត្យលើសំណើក្នុងញត្តិនេះហើយ ជាលទ្ធផលយ៉ាងណានោះនឹងជម្រាបជូននៅពេលក្រោយ។ លោកបញ្ជាក់ថា៖ «ការទាមទាររបស់ពួកគាត់ គឺពួកគាត់មានសិទ្ធិតើ គ្រាន់តែញត្តិរបស់ពួកគាត់បានបញ្ជូនទៅខាងលើហើយ ចំណែកការសម្រេចយ៉ាងណាទៀតនឹងជូនដំណឹងនៅថ្ងៃស្អែក ឬខានស្អែកបានដឹង»។
លោក ហេង សួរ អ្នកនាំពាក្យក្រសួងការងារថ្លែងពីថ្ងៃចន្ទថា បុគ្គលគ្រប់រូបមានសិទ្ធិធ្វើញត្តិស្នើសុំ រីឯការឆ្លើយតបយ៉ាងម៉េចគឺអាស្រ័យលើផលប្រយោជន៍សាធារណៈ ឬផលប្រយោជន៍នៃវិស័យទាំងមូល។
ប៉ុន្តែលោកថា ការស្នើទាំងនោះគឺត្រូវតែផ្អែកតាមលិខិតបទដ្ឋានគតិយុត្ត ឬវិធានការណាមួយដែលសមស្រប ខណៈដែលលោកអះអាងថា ការដែលក្រសួងដាក់ចេញនូវវិធានការទាំងនេះក៏ព្រោះតែដើម្បីរក្សាការងារ និងកុំឲ្យមានផលប៉ះពាល់កាន់តែធ្ងន់ធ្ងរដល់កម្មករផងដែរ។
លោកថា៖ «ចំពោះមុខការងារអាទិភាពគឺ (ក្រសួងការងារ) ត្រូវរក្សាចង្វាក់ផលិតកម្ម ដើម្បីរក្សាការងារឲ្យបានច្រើនជាអតិបរិមាហើយបើមានការរងផលប៉ះពាល់ គឺត្រូវធ្វើយ៉ាងម៉េចកុំឲ្យកម្មករនិយោជិតមានប្រាក់ខែស្មើសូន្យ»៕
វីដេអូ៖