The Phnom Penh Post Search

Search form




Logo of Phnom Penh Post newspaper Phnom Penh Post - សហជីព, សមាគម ១៣ ស្នើ​ឲ្យ​មាន​ការ​ចរចា​បញ្ហា​ប្រាក់​អត្ថ​ប្រយោជន៍​កម្មករ

សហជីព, សមាគម ១៣ ស្នើ​ឲ្យ​មាន​ការ​ចរចា​បញ្ហា​ប្រាក់​អត្ថ​ប្រយោជន៍​កម្មករ

កម្មករ​រោងចក្រ ហ៊ុយ ចៀន ធ្វើ​ការ​ដើរ​ក្បួន​តវ៉ា​មក​កាន់​រដ្ឋសភា​កន្លង​មក។
កម្មករ​រោងចក្រ ហ៊ុយ ចៀន ធ្វើ​ការ​ដើរ​ក្បួន​តវ៉ា​មក​កាន់​រដ្ឋសភា​កន្លង​មក។ ផា លីណា

សហជីព, សមាគម ១៣ ស្នើ​ឲ្យ​មាន​ការ​ចរចា​បញ្ហា​ប្រាក់​អត្ថ​ប្រយោជន៍​កម្មករ

ភ្នំពេញៈ ថ្នាក់​ដឹក​នាំ​សហព័ន្ធ​សហជីព និង​សមាគម​ដែល​ជា​សមាជិក​របស់​សហភាព​ជាតិ​កម្ពុជា​ការពារ​កម្មករ​បាន​ដាក់​សំណើ​ទៅ​លោក​រដ្ឋ​មន្ត្រី​ក្រសួង​ការងារ ស្នើ​ឲ្យ​មាន​ការ​រៀបចំ​ការ​ចរចា ស្តី​អំពី​ប្រាក់​អត្ថ​ប្រយោជន៍​ផ្សេងៗ​សម្រាប់​កម្មករ​និយោជិត​ក្នុង​វិស័យ​កាត់ដេរ​សម្លៀក​បំពាក់ និង​ស្បែក​ជើង។

យោង​តាម​លិខិត​ដាក់​ជូន​រដ្ឋ​មន្ត្រី​ក្រសួង​ការងារ លោក អ៊ិត សំហេង កាល​ពី​សប្តាហ៍​មុន​ដែល​មាន​ចុះ​ហត្ថលេខា​មេ​ដឹក​នាំ​សហព័ន្ធ​សហជីព និង​សមាគម​ចំនួន ១៣ ហើយ​ដែល ភ្នំពេញ ប៉ុស្តិ៍ ទើប​ទទួល​បាន​កាល​ពី​ម្សិល​មិញ បាន​ស្នើ​សុំ​ឲ្យ​មាន​ការ​ចរចា​អំពី​ប្រាក់​អត្ថ​ប្រយោជន៍ សម្រាប់​កម្មករ​និយោជិត​ក្នុង​វិស័យ​កាត់​ដេរ​សម្លៀក​បំពាក់​និង​ស្បែក​ជើង។

តាម​សំណើ​ក្នុង​លិខិត​នោះ​មាន ៣ ចំណុច​សំខាន់​គឺ៖ «ការ​ផ្តល់​ប្រាក់​ថ្លៃ​បាយ​ថ្ងៃ​ត្រង់​ជូន​កម្មករ និយោជិត ក្នុង​មួយ​ខែ​ចំនួន ២៦ ដុល្លារ​សុំ​ដំឡើង​ប្រាក់​សោហ៊ុយ​ធ្វើ​ដំណើរ​និង ថ្លៃ​ឈ្នួល​ផ្ទះ​ឲ្យ​បាន​គ្រប់ ២០ ដុល្លារ ក្នុង​មួយ​ខែ និង​សូម​ឲ្យ​ក្រសួង​ការងារ​ធ្វើ​ការ​ចុះ​បញ្ជិកា​សហជីព ដោយ​មិន​ចាំ​បាច់​តម្រូវ​ឲ្យ​មាន​លិខិត​ថ្កោល​ទោស​ដែល​ចេញ​ដោយ​ក្រសួង​យុត្តិធម៌»។

លោក សាត់ ឈាងហួ ប្រធាន​សហភាព​ជាតិ​កម្ពុជា​ការពារ​កម្មករ បាន​និយាយ​កាល​ពី​ថ្ងៃ​ម្សិល​មិញ​ថា សព្វ​ថ្ងៃ​នេះ​ក្រសួង​សហជីព និង​និយោជក កំពុង​តែ​ដំណើរ​ការ​ចរចា​ពី​ការ​ដំឡើង​ប្រាក់​ឈ្នួល​សមរម្យ ជូន​កម្មករ និយោជិត ប៉ុន្តែ ហាក់​ដូច​ជា​មិន​អាច​ផ្តល់​ជូន​តាម​តម្រូវ​ការ​របស់​កម្មករ និយោជិត ដែល​អាច​ទទួល​យក​បាន​នោះ​ទេ។

លោក សាត់ ឈាងហួ បន្ត​ទៀត​ថា៖ «ដោយ​សារ​តែ​កម្មករ​មាន​បញ្ហា​ទាក់​ទង​នឹង​ប្រាក់​អត្ថ​ប្រយោជន៍​នេះ ទើប​ពួក​គេ​បាន​ស្នើ​សុំ​មក​សហជីព​យើង ឲ្យ​អន្តរាគមន៍​ជួយ​ដល់​ពួក​គេ។ ប្រសិន​បើ​មិន​មាន​ការ​ចរចា​ណា​មួយ​ទេ កម្មករ​រាប់​រយ​នាក់ នឹង​ប្រមូល​ផ្តុំ​គ្នា​ធ្វើ​ការ​តស៊ូ​មតិ​លើ​ចំណុច​នេះ»។

លោក​រដ្ឋ​មន្ត្រី អ៊ិត សំហេង ធ្លាប់​ថ្លែង​ប្រាប់​ក្រុម​អ្នក​សារ​ព័ត៌មាន​ថា ការ​ចរចា​រឿង​ប្រាក់​អត្ថ​ប្រយោជន៍​ផ្សេងៗ​របស់​កម្មករ នឹង​លើក​យក​មក​ពិភាក្សា​គ្នា​បន្ទាប់​ពី​ការ​ចរចា​បញ្ហា​ប្រាក់​ឈ្នួល​ត្រូវ​បាន​ចប់​សព្វ​គ្រប់។ លោក​ក៏​ស្នើ​ឲ្យ​កម្មករ​យោគ​យល់ និង​រង់ចាំ​ក្រសួង​ធ្វើ​ការ​ដោះ​ស្រាយ​ផង​ដែរ៕

អត្ថបទគួរចាប់អារម្មណ៍