ភ្នំពេញៈ សហព័ន្ធសហជីពកម្ពុជា (CATU) ចេញសេចក្តីថែ្លងការណ៍មួយស្នើឲ្យក្រុមហ៊ុនរូស៊ីង ហ្គាម៉ែន ទទួលយកមន្ត្រីសហជីពមូលដ្ឋាន ៣ រូប ដែលត្រូវបានក្រុមហ៊ុនបញ្ឈប់នោះឲ្យចូលធ្វើការងារវិញ ដើម្បីពួកគេអាចបន្តទ្រទ្រង់ជីវភាពដោយចាត់ទុកការបញ្ឈប់មន្ត្រីខាងលើនេះ មិនមានភ័ស្តុតាងត្រឹមត្រូវដែលធ្វើឡើងដោយអយុត្តិធម៌។
កាលពីថ្ងៃទី ៧ ឧសភា លោក ជ្រុន ថេរ៉ាវង្ស ប្រធាននាយកដ្ឋានវិវាទការងារ បានសម្រេចតាមការស្នើសុំរបស់ក្រុមហ៊ុន រូស៊ីង ហ្គាម៉ែន ដែលធ្វើការបញ្ឈប់លោក កន សុច ជាប្រតិភូជំនួយប្រចាំរោងចក្រលោក ឯក សារុន ជាអនុប្រធានសហជីពកម្ពុជា និងលោក សុខ គង់ លេខាធិការសហជីពមូលដ្ឋានប្រចាំរោងចក្រ។ ការបញ្ឈប់នេះក្រុមហ៊ុនលើកមូលហេតុថា បានប្រព្រឹត្តកំហុសធ្ងន់ធ្ងរដែលមានចែងក្នុងមាត្រា ៨៣ នៃច្បាប់ស្តីពីការងារ។
សេចក្តីថ្លែងការណ៍របស់ CATU ចុះថ្ងៃទី ១១ ឧសភា បានឲ្យដឹងថាកាលពីពាក់កណ្តាលខែមេសា រោងចក្រកាត់ដេរ រូស៊ីង ហ្គាម៉ែន ខូអិលធីឌី បានចោទប្រកាន់មកលើសមាជិក CATU ចំនួន ៣ នាក់ថាបានជួបគ្នារៀបចំផែនការឈប់ធ្វើការទាំងអស់គ្នានៅថ្ងៃទី ៩ មេសា ដើម្បីឲ្យរោងចក្រអនុញ្ញាតកម្មករនិយោជិតទៅផ្ទះពេលចូលឆ្នាំប្រពៃណីជាតិ។ ក្នុងអំឡុងពេលនោះ ក៏មានកម្មករនិយោជិត មួយចំនួនបានឈប់ធ្វើការរយៈពេលប្រហែលជិត ២ ម៉ោងមែន។
CATU បន្តថាចំពោះករណីនៃការឈប់របស់កម្មករនេះគឺមិនពាក់ព័ន្ធនឹងសមាជិកណាម្នាក់ក្នុងចំណោមសហជីពមូលដ្ឋានទាំង ៣ នាក់ខាងលើនោះទេ។ ព្រោះសហជីព គ្មានសមាជិកណាម្នាក់នៅក្នុងផ្នែកដែលកម្មករបានឈប់សម្រាកនោះទេ ហើយការឈប់សម្រាកនេះ ក៏មិនពាក់ព័ន្ធនឹងសហជីពមូលដ្ឋានទាំង ៣ ផងដែរ។ CATU បន្ថែមថាក្រោយមកបើទោះជាកម្មករនិយោជិតបានព្យាយាមជួបចរចាជាមួយរោងចក្រជុំវិញករណីនេះក៏ភាគីរោងចក្រមិនជួបចរចានោះទេ ដោយបានបង្ហាញឆន្ទៈក្នុងការគេចវេះទៀតផង។
CATU បញ្ចាក់ក្នុងសេចក្តីថ្លែងការណ៍ថា៖ «ការបញ្ឈប់ពីការងារនេះនឹងមានការប៉ះពាល់យ៉ាងធ្ងន់ធ្ងរចំពោះកម្មករនិយោជិត ៣ រូបនោះដោយបច្ចុប្បន្ន សេដ្ឋកិច្ចជាតិកំពុងប្រឈមការធ្លាក់ចុះដោយសារជំងឺកូវីដ ១៩ ដែលនឹងបណ្តាលឲ្យពួកគេពិបាករកការងារធ្វើនៅកន្លែងផ្សេង។ ក្នុងចំណោមកម្មករនិយោជិត ៣ នាក់នេះ មានកម្មករនិយោជិត ២ នាក់ ដែលមានកូនតូចក្នុងបន្ទុកដែលត្រូវការទឹកដោះគោ និងការថែទាំសុខភាព និងព្យាបាល»។
លោកស្រី យ៉ាង សុភ័ណ្ឌ ប្រធាន CATU ប្រាប់ភ្នំពេញប៉ុស្តិ៍ពីម្សិលមិញថា ករណីនេះគឺជារឿងហួសចិត្តដែលប្រធាននាយកដ្ឋានវិវាទការងារនៃក្រសួងការងារ និងបណ្ដុះបណ្ដាលវិជ្ជាជីវៈ បើកផ្លូវឲ្យនាយកក្រុមហ៊ុន រូស៊ីង ហ្គាម៉ែន បញ្ឈប់តំណាងសហជីព ៣ នាក់ពីការងារទាំងអយុត្តិធម៌។
ជាមួយគ្នានេះលោកស្រីក៏បានបញ្ចាក់ដែរថា CATU នឹងដាក់ពាក្យបណ្តឹងទៅអ្នកបញ្ជាទិញអន្តរជាតិ ដើម្បីឲ្យជួយអន្តរាគមន៍ហើយក្នុងនោះក៏នឹងបន្តដាក់ពាក្យបណ្តឹងទៅរដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ ដើម្បីពិនិត្យមើលករណីនេះឡើងវិញផងដែរ។
លោកស្រីបញ្ជាក់ថា៖ «ខ្ញុំនឹងប្រើប្រាស់សិទ្ធិក្នុងការប្តឹងឧបាស្រ័យនេះ។ ប៉ុន្តែស្របពេលនឹងប្តឹងនេះខ្ញុំមើលឃើញនាយកដ្ឋាន ប្រើប្រាស់សិទ្ធិមួយក្នុងការសម្រេចករណីនេះគឺខុសមិនត្រឹមត្រូវ។ ព្រោះករណីនេះរោងចក្រ គេគ្រាន់តែស្នើព្យួរការងារតែប៉ុណ្ណោះ។ លិខិតដែលខ្ញុំទទួលបាន ១ ហ្នឹងមិនទាក់ទងនឹងការស្នើសុំបញ្ឈប់ទេ។ តែក្រោយមកយើងមិនដឹងថា គេបានយោបល់ ឬស្នើអ្វីបន្តទៀតគឺខ្ញុំអត់ដឹង។ ស្រាប់តែជាចេញលិខិតមក អនុញ្ញាតឲ្យក្រុមហ៊ុនបញ្ឈប់ទៅវិញ»។
លោក ហេង សួរ អ្នកនាំពាក្យក្រសួងការងារបណ្តុះបណ្តាលវិជ្ជាជីវៈប្រាប់ពីម្សិលមិញថា សំណុំរឿងនេះគឺមន្ត្រីនៃក្រសួងការងារបានអនុវត្តទៅតាមច្បាប់ត្រឹមត្រូវ។ ពួកគេបានញុះញង់កម្មករឲ្យប្រព្រឹត្តកំហុសធ្ងន់ធ្ងរដែលត្រូវឲ្យមានការអនុវត្តទៅតាមច្បាប់ការងារ។
លោកថា ក្នុងករណីសហជីពដែលត្រូវបានបញ្ឈប់នេះមិនពេញចិត្តនឹងសេចក្តីសម្រេចនោះគឺមានពេល ២ ខែ ដើម្បីធ្វើការតវ៉ាទៅរដ្ឋមន្ត្រីក្រសួងទទួលបន្ទុកវិស័យការងារ។ ព្រោះរដ្ឋមន្ត្រីមានសិទ្ធិលុបចោល ឬកែសម្រួលសេចក្តីសម្រេចនេះ។ លោកបន្តថា៖ «មន្ត្រីបានអនុវត្តទៅតាមច្បាប់ និងលិខិតបទដ្ឋាន។ ការទទួល ឬមិនទទួលគឺភាគីនីមួយៗមាននីតិវិធីប្តឹងឧបាស្រ័យបន្ត»៕