The Phnom Penh Post Search

Search form




Logo of Phnom Penh Post newspaper Phnom Penh Post - សហជីព ៦ បន្ត​ជំរុញ​ឲ្យ​ដំឡើង​ប្រាក់​ឈ្នួល $១៦០

សហជីព ៦ បន្ត​ជំរុញ​ឲ្យ​ដំឡើង​ប្រាក់​ឈ្នួល $១៦០

កម្មករ​តវ៉ា​ទាម​ទារ​ប្រាក់​ខែ​គោល​ ១៦០ ដុល្លារ កាល​ពី​ដើម​ខែ​មករា​។
កម្មករ​តវ៉ា​ទាម​ទារ​ប្រាក់​ខែ​គោល​ ១៦០ ដុល្លារ កាល​ពី​ដើម​ខែ​មករា​។ ហេង ជីវ័ន

សហជីព ៦ បន្ត​ជំរុញ​ឲ្យ​ដំឡើង​ប្រាក់​ឈ្នួល $១៦០

ភ្នំពេញៈ តំណាង​សហព័ន្ធ សហជីព និង​សមាគម​ចំនួន ៦ បាន​ស្នើ​សុំ​សា​ជា​ថ្មី​ម្តង​ទៀត​ដល់​រាជ​រដ្ឋាភិបាល​ក្រុមហ៊ុន​អ្នក​ផលិត ក្រុមហ៊ុន​អ្នក​បញ្ជា​ទិញ​ឲ្យ​ដោះស្រាយ​ជា​បន្ទាប់​នូវ​ការ​ទាម​ទារ​មួយ​ចំនួន​ដែល​ក្នុង​នោះ​ក៏​មាន​ប្រាក់​ឈ្នួល​គោល​សម្រាប់​កម្មករ​វិស័យ​កាត់​ដេរ និង​ស្បែក​ជើង​ចំនួន ១៦០ ដុល្លារ ឲ្យ​បាន​នៅ​ក្នុង ឆ្នាំ​២០១៤ នេះ។

យោង​តាម​សេចក្តី​ថ្លែង​ការណ៍​រួម​មួយ​របស់​សហជីព​ទាំង ៦ ដែល​ចេញ​កាល​ពី​ម្សិលមិញ​បាន​លើក​ឡើង​ថា ស្ថានភាព​រឹត​បន្តឹង​សិទ្ធិ​សេរីភាព​មក​លើ​កម្មករ​នៅ​តែ​មាន និង​កាន់​តែ​ធ្វើ​ឲ្យ​មាន​ការ​ប៉ះពាល់​យ៉ាង​ធ្ងន់ធ្ងរ​ដល់​សិទ្ធិ​ជា​មូលដ្ឋាន​របស់​កម្មករ​និយោជិត។ សំណើ​ចំនួន ៦ ចំណុច​ដែល​សហព័ន្ធ សហជីព និង​សមាគម​បាន​ស្នើ​ទៅ​រដ្ឋាភិបាល​ក្រុមហ៊ុន​អ្នក​ផលិត និង​ក្រុមហ៊ុន​អ្នក​បញ្ជា​ទិញ គឺ​ត្រូវ​ដំឡើង​ប្រាក់​ឈ្នួល​អប្បបរមា​សម្រាប់​កម្មករ​និយោជិត​វិស័យ​កាត់​ដេរ និង​ស្បែក​ជើង ១៦០ ដុល្លារ​ឲ្យ​បាន​យ៉ាង​យូរ​ត្រឹម ខែ​តុលា ឆ្នាំ​២០១៤ ដោយ​ចរចា​ជាមួយ​សហជីព​ឯករាជ្យ​ដែល​បាន​តវ៉ា​កន្លង​មក។

សេចក្តី​ថ្លែង​ការណ៍​បន្ត​ថា រដ្ឋាភិបាល​ត្រូវ​រៀបចំ​កំណែ​ទម្រង់​ក្រុម​ប្រឹក្សា​ការងារ​ដោយ​កំណត់​ចំនួន​សមាសភាព​គណៈ​កម្មការ​ឲ្យ​បាន​ស្មើ​គ្នា​រវាង​រដ្ឋាភិបាល និយោជក និង​កម្មករ​និយោជិត (ឧ.៧+៧+៧) ព្រម​ទាំង​ផ្លាស់​ប្តូរ​សមាសភាព​ក្រុម​ប្រឹក្សា​ការងារ​ចាស់ ដោយ​ដាក់​តំណាង​កម្មករ​ពិត​ប្រាកដ និង​មក​ពី​តាម​វិស័យ​ផ្សេងៗ។ មិន​តែ​ប៉ណ្ណោះ​រដ្ឋាភិបាល​ត្រូវ​លុប​ចោល​នូវ​បម្រាម​ការ​ជួប​ជុំ​ជា​សាធារណៈ និង​ការ​ដាក់​លក្ខខណ្ឌ​មិន​អាច​ចុះ​បញ្ជិការ​សហជីព​បាន ដែល​ធ្វើ​ឲ្យ​ប៉ះពាល់​ដល់​សិទ្ធិ​កម្មករ​យ៉ាង​ខ្លាំង។

សេចក្តី​ថ្លែង​ការណ៍​បន្ត​ទៀត​ថា រាជ​រដ្ឋាភិបាល ក្រុមហ៊ុន និង​តុលាការ​ត្រូវ​ស្វែង​រក​ចាប់​ខ្លួន​ជន​ល្មើស​ដែល​បាន​បាញ់ និង​ប្រើ​អំពើ​ហិង្សា​មក​លើ​កម្មករ​កាល​ពី​ថ្ងៃ ទី២ និង ទី៣ ខែ​មករា យក​មក​ផ្តន្ទាទោស។ រដ្ឋាភិបាល​ក្រុមហ៊ុន និង​តុលាការ​ត្រូវ​បញ្ឈប់​ជា​បន្ទាន់​នូវ​ការ​ប្តឹង​ប្តល់​បំភិត​បំភ័យ មក​លើ​កម្មករ​និយោជិត និង​តំណាង​សហជីព​ព្រម​ទាំង​ដក​ពាក្យ​បណ្តឹង​ទាំង​អស់​ដែល​បាន​ប្តឹង​នាពេល​កន្លង​មក និង​រដ្ឋាភិបាល​ត្រូវ​ធានា​ថា ច្បាប់​ស្តីពី​សហជីព​ត្រូវ​តែ​ស្រប​ទៅ​នឹង​រដ្ឋ​ធម្មនុញ្ញ ច្បាប់​ការងារ និង​អនុ​សញ្ញា​អន្តរជាតិ​ខាង​ការងារ។

លោក ប៉ាវ ស៊ីណា ប្រធាន​សម្ព័ន្ធ​សហជីព​ចលនា​កម្មករ​ថ្លែង​ថា ក្នុង​ករណី​ដែល​មិន​មាន​ដំណោះស្រាយ​សម្រាប់​ការ​ស្នើ​សុំ​ជា​ពិសេស​ការ​ដំឡើង​ប្រាក់​ឈ្នួល​គោល ១៦០ ដុល្លារ​នៅ​ក្នុង​ឆ្នាំ​នេះ​ទេ នោះ​ការ​តវ៉ា​ទ្រង់​ទ្រាយ​ធំ​ជា​ថ្មី​អាច​នឹង​កើត​មាន​ឡើង។

លោក​បាន​បន្ត​ថា៖ «ការ​តវ៉ា​ទ្រង់​ទ្រាយ​ធំ អាច​នឹង​ចេញ​ជា​រូប​រាង​ឡើង ដោយ​សារ​ការ​ស្នើ​សុំ​របស់​យើង ជា​ពិសេស​របស់​កម្មករ​មិន​ទាន់​មាន​ដំណោះស្រាយ ដូច​ដែល​ពួក​គេ​ចង់​បាន​នៅ​ក្នុង​ឆ្នាំ​នេះ»៕

អត្ថបទគួរចាប់អារម្មណ៍