.jpg)
តំណាងសហជីពដាក់ញត្តិនៅក្រសួងការងារពីថ្ងៃចន្ទ។ រូបថត Central
ភ្នំពេញៈ តំណាងសហព័ន្ធ និងសហជីពចំនួន ១៤ កាលពីថ្ងៃទី ២២ ខែមិថុនា បានរួមគ្នាដាក់ញត្តិទៅលោក អ៊ិត សំហេង រដ្ឋមន្ដ្រី ក្រសួងការងារ និងបណ្តុះបណ្តាលវិជ្ជាជីវៈ ស្នើសុំឱ្យលុបចោលសេចក្ដីសម្រេចចុះថ្ងៃទី ២ ខែមិថុនា ឆ្នាំ ២០២០ ស្តីពីការពន្យារពេល បើកប្រាក់អតីតភាពការងារឆ្នាំ ២០១៩-២០២០ របស់កម្មករ និយោជិតគ្រប់ស្ថាប័នទាំងអស់។
លោក សុខ គីន ប្រធានសហព័ន្ធសហជីពសំណង់ និងព្រៃឈើកម្ពុជាជាតំណាងសហជីព ១ រូប ដែលបានចូលរួមដាក់ញត្ដិទៅរដ្ឋមន្ដ្រី ក្រសួងការងារ បានប្រាប់ភ្នំពេញប៉ុស្ដិ៍ថា តំណាងសហភាពសហព័ន្ធធំៗចំនួន ១៤ តំណាងឱ្យវិស័យសណ្ឋាគារ ទេសចរណ៍ សេវាកម្ម និងសំណង់នៅកម្ពុជាបានចូលរួមដាក់ញត្តិគឺដើម្បីស្នើសុំឱ្យលុបចោលសេចក្ដីសម្រេចស្តីពីការពន្យារពេលបើកប្រាក់អតីតភាពការងារឆ្នាំ ២០១៩ និងឆ្នាំ ២០២០។
លោកថ្លែងថា៖ «បើប្រកាសលេខ ០១៨/២០ ចុះថ្ងៃទី ២ ខែ មិថុនា ឆ្នាំ ២០២០ ស្តីពីការពន្យារពេលបើកប្រាក់អតីតភាពឆ្នាំ ២០១៩ និងឆ្នាំ ២០២០ របស់ក្រសួងនេះ នៅតែអនុវត្ដនោះ កម្មករនិយោជិតនឹងមិនទទួលបាននូវប្រាក់អតីតភាពនោះទេ ដូច្នេះទើបយើងស្នើឱ្យលុបសេចក្ដីជូនដំណឹងនេះវិញ»។
លោក សុខ គីន បានឱ្យដឹងថា នៅពេលតំណាងសហជីពទាំង ១៤ យកញត្ដិទៅដាក់នៅក្រសួងការងារនៅថ្ងៃទី ២២ ខែមិថុនា លោក និន វណ្ណៈ មន្ដ្រីទទួលបន្ទុកផ្នែកដោះស្រាយវិវាទ និងកូដកម្មនៃក្រសួងការងារបានមកទទួលញត្ដិ និងបានសន្យាថានឹងជូនដំណឹងដល់ថ្នាក់ដឹកនាំសហព័ន្ធសហជីពវិញនាសប្តាហ៍ក្រោយ។
លោកថ្លែងថា៖ «គេយកញត្ដិរបស់យើងទៅពិចារណា ប៉ុន្ដែការឆ្លើយតបភ្លាមៗនោះ វាមិនមានលក្ខណៈអ្វីជាផ្លូវការទេ។ ក្នុងដំណាក់កាលនេះ យើងមិនសូវសង្ឃឹមថានឹងទទួលបានដំណោះស្រាយណាមួយនោះទេ ប៉ុន្ដែយើងត្រូវតែធ្វើព្រោះថា រឿងនេះវាជាប្រយោជន៍របស់កម្មករនិយោជិត»។
តាមលិខិតរបស់តំណាងសហព័ន្ធ និងសហជីពទាំង ១៤ ដែលបានដាក់ទៅលោក អ៊ិត សំហេង បច្ចុប្បន្ននិយោជកបានព្យួរការងារកម្មករនិយោជិតរាប់ម៉ឺននាក់ដោយសារជំងឺកូវីដ ១៩ ដែលក្នុងអំឡុងពេលជាមួយគ្នានេះ កម្មករនិយោជិតត្រូវបាត់បង់ការងារ និងប្រាក់ចំណូលប្រចាំខែជាបន្តបន្ទាប់។
លិខិតថា៖ «កម្មករនិយោជិតត្រូវប្រឈមនឹងបញ្ហាមួយចំនួនដូចជាត្រូវសងកម្ចីប្រចាំខែទាំងប្រាក់ដើម និងការប្រាក់ ការចំណាយលើសេវាព្យាបាលជំងឺ សមាជិកគ្រួសារ និងការចំណាយលើតម្រូវការចាំបាច់មូលដ្ឋានប្រចាំថ្ងៃជាច្រើនទៀត»។
តំណាងសហជីពក៏បានស្នើក្រសួងការងារជំរុញនិយោជកឲ្យបន្តបើកប្រាក់រំឭកអតីភាពការងារដែលមានមុនឆ្នាំ ២០១៩ (សម្រាប់ផ្នែកវាយនភណ្ឌកាត់ដេរ និងផលិតស្បែកជើង) និងប្រាក់បំណាច់អតីតភាពការងារថ្មីក្នុងឆ្នាំ ២០២០ (សម្រាប់គ្រប់វិស័យ) ដល់កម្មករ និយោជិត ស្របតាមខ្លឹមសារនៃមាត្រា ៨៩ នៃច្បាប់ស្ដីពីការងារ និងប្រកាសលេខ ៤៤៣ របស់ក្រសួងការងារ ដើម្បីឱ្យកម្មករនិយោជិតទទួលបានប្រាក់ចំណូលខ្លះសម្រាប់ផ្គត់ផ្គង់គ្រួសារ។
ឆ្លើយតបចំពោះការដាក់ញត្ដិនេះលោក ហេង សួរ អ្នកនាំពាក្យក្រសួងការងារ ថ្លែងប្រាប់ភ្នំពេញប៉ុស្ដិ៍នៅថ្ងៃទី ២២ ខែមិថុនា ថា៖ «យើងបានទទួលហើយ សង្ឃឹមថាគ្រប់បុគ្គលទាំងអស់នឹងអានសេចក្តីជូនដំណឹងក្រសួងសាជាថ្មី ហើយរួមគ្នាអនុវត្តតាមសេចក្តីជូនដំណឹងរបស់ក្រសួងដែលមានន័យគ្រប់គ្រាន់ ត្រឹមត្រូវសម្រាប់ជួយរក្សាការងារមនុស្សរាប់លាននាក់ក្នុងកាលៈទេសៈនេះ។ បើរោងចក្រមានលទ្ធភាពនោះប្រហែលជាមិនមានករណីរោងចក្រសហគ្រាសកំពុងព្យួរការងារនោះទេ»៕
