.jpg)
បុរសម្នាក់អានកាសែត Cambodia Daily លេខចុងក្រោយ មុននឹងត្រូវបិទទ្វារ។ រូបថត AFP
ភ្នំពេញៈ ប្រព័ន្ធផ្សព្វផ្សាយនៅកម្ពុជា នឹងស្ថិតនៅក្រោមការគំរាមកំហែងខ្លាំងឡើងក្នុងរយៈកាលឆ្នាំចុងក្រោយ។ នេះបើតាមរបាយការណ៍ថ្មីមួយរបស់សហព័ន្ធអ្នកកាសែតអន្តរជាតិ (IFJ) ខណៈក្រសួងព័ត៌មានអះអាងថា សេរីភាពនៃការបញ្ចេញមតិ និងសារព័ត៌មានត្រូវបានធានា។
នៅក្នុងរបាយការណ៍ដែលមានចំណងជើងថា «ប្រព័ន្ធផ្សព្វផ្សាយរបស់កម្ពុជាស្ថិតនៅក្នុងហានិភ័យ» និងចេញផ្សាយកាលពីថ្ងៃសុក្រ សហព័ន្ធអ្នកកាសែតអន្តរជាតិប្រចាំអាស៊ីប៉ាស៊ីហ្វិក បានធ្វើទឡ្ហីករណ៍ថា រដ្ឋាភិបាលកម្ពុជាបានយក «តុលាការរបស់ប្រទេសខ្លួនធ្វើនយោបាយ រឹតបន្តឹងសេរីភាពនៃការនិយាយស្តី ការប្រមូលផ្តុំ និងសេរីភាពអង្គការ សមាគម និងប្រើហិង្សា និងការដាក់ពន្ធនាគារដើម្បីបង្ក្រាបគណបក្សប្រឆាំងរបស់ខ្លួន សង្គមស៊ីវិល និងប្រព័ន្ធផ្សព្វផ្សាយ»។
របាយការណ៍នេះគូសបង្ហាញអំពីដំណើរវិវឌ្ឍនាពេលថ្មីៗដែលមានតាំងពីការបិទកាសែតឌឹខេមបូឌាដេលី ការបិទវិទ្យុអាស៊ីសេរី ព្រមទាំងករណីបុគ្គលិកអង្គការអាដហុក ៥ នាក់ និងការរំលាយគណបក្សសង្គ្រោះជាតិ និងការដាក់ពន្ធនាគារលោក កឹម សុខា ប្រធានគណបក្សសង្គ្រោះជាតិ។
របាយការណ៍នេះក៏បានបង្ហាញផងដែរអំពីសម្ពាធទៅលើអ្នកកាសែតនៅកម្ពុជាដោយស្រង់សម្តីអ្នកកាសែតក្នុងស្រុកជាច្រើននាក់។ ជាឧទាហរណ៍ អ្នកកាសែតម្នាក់ត្រូវបានស្រង់សម្តីដោយនិយាយថា៖ «វាពិបាកណាស់សម្រាប់អ្នកកាសែតឯករាជ្យក្នុងការរាយការណ៍អំពីបញ្ហារសើបដូចជារឿងនយោបាយ ការកាប់ឈើ ឬអំពើពុករលួយ។ ឥឡូវនេះយើងបារម្ភថា តើយើងត្រូវបានគេឃើញថាជាអ្នករិះគន់រដ្ឋាភិបាលឬអត់? រាល់អ្នកកាសែត [កម្ពុជា] ស្ថិតក្រោមការគំរាមកំហែង»។
ក្នុងបទសម្ភាសជាមួយ IFJ អ្នកកាសែតបរទេស «ដែលធ្វើការនៅប្រព័ន្ធផ្សព្វផ្សាយគាំទ្ររដ្ឋាភិបាល» បានបង្ហាញសម្ពាធចំពោះការីនិពន្ធ។
ពួកគេថ្លែងថា៖ «[ភាពឯករាជ្យក្នុងការងារការីនិពន្ធ] បានផ្តើមបាត់បង់ហើយឥទ្ធិពលក្នុងការងារនេះបានកើនឡើង ខណៈជិតដល់ការបោះឆ្នោត។ ពេលល្ងាចយើងសរសេរត្រឹមត្រូវ ហើយព្រឹកឡើង យើងឃើញថា សាច់រឿងត្រូវបានប្តូរគំនិតផ្សេងៗត្រូវបានបញ្ចូលក្នុងនោះ...ហើយតុល្យភាពត្រូវបានយកចេញ»។
ពាក់ព័ន្ធនឹងការបិទវិទ្យុអាស៊ីសេរីអ្នកកាសែតក៏បានលើកឡើងដែរពីការបាត់បង់ការងារ។
អ្នកកាសែតបរទេសរូបនោះថា៖ «ខ្ញុំជាអ្នកកាសែតជាង ២ ទសវត្សរ៍មកហើយ ហើយនេះជារឿងអាក្រក់បំផុត។ អ្នកកាសែតដែលបិទត្រូវបានបដិសេធមិនផ្តល់កាតអ្នកកាសែត អ្នកខ្លះត្រូវបាននាំយកទៅសួរ...វាពិបាកក្នុងការធ្វើការងារ។ ប្រសិនបើយើងមិនអាចធ្វើការបាន តើយើងអាចចិញ្ចឹមគ្រួសារយើងយ៉ាងដូចម្តេចទៅ?»។
ទន្ទឹមនេះក្រសួងព័ត៌មានបានច្រានចោលរបាយការណ៍របស់មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) ដែលថាសេរីភាពសារព័ត៌មានស្ថិតក្រោមការវាយប្រហារនៅកម្ពុជា។
ឆ្លើយតបកាលពីថ្ងៃសុក្រ ក្រសួងព័ត៌មានបានហៅរបាយការណ៍នោះថាជា «ការវាយតម្លៃគ្មានមូលដ្ឋាន»។
សេចក្តីថ្លែងការណ៍នោះថាការស្រាវជ្រាវរបស់ពួកគេ «ធ្វើឡើងដោយក្រុមអ្នកកាសែតជ្រុលនិយមខ្លះដែលមានចេតនាអាក្រក់គេចវេះពីការទទួលខុសត្រូវ និងទម្លាក់កំហុសលើរដ្ឋាភិបាលកម្ពុជា»។
សេចក្តីថ្លែងការណ៍នេះបន្តថា សេរីភាពនៃការបញ្ចេញមតិត្រូវបានធានានៅកម្ពុជា និង «មានភាពប្រសើរឡើងយ៉ាងលឿនសម្រាប់ប្រព័ន្ធផ្សព្វផ្សាយគ្រប់ប្រភេទ...»៕ PS
