.jpg)
លោក អោ អាន អតីតមេដឹកនាំខ្មែរក្រហម។ រូបថត DC-CAM
ភ្នំពេញៈ សហព្រះរាជអាជ្ញាអន្តរជាតិ និងជាតិនៅសាលាក្ដីកាត់ទោសមេដឹកនាំខ្មែរក្រហម (អ.វ.ត.ក) បានរក្សាជំហររៀងៗខ្លួនទៅលើសំណុំរឿង ០០៤/០២ លើជនជាប់ចោទ អោ អាន អាយុ ៨៦ ឆ្នាំ ដោយសហព្រះរាជអាជ្ញាអន្តរជាតិជំរុញឲ្យបញ្ជូនសំណុំរឿងនេះទៅជម្រះ ប៉ុន្តែសហព្រះរាជអាជ្ញាជាតិថ្លែងថា ធ្វើដូច្នេះវាជារឿងខុសច្បាប់ អ.វ.ត.ក។ សហព្រះរាជអាជ្ញាទាំង ២ បានចេញសេចក្ដីប្រកាសកាលពីថ្ងៃអង្គារ បន្ទាប់ពីអង្គបុរេជំនុំជម្រះបានចេញសេចក្ដីប្រកាសមួយកាលពីថ្ងៃព្រហស្បតិ៍សប្ដាហ៍មុនពាក់ព័ន្ធនឹងការប្ដឹងឧទ្ធរណ៍ដីកាដំណោះស្រាយ។
សេចក្ដីសម្រេចរបស់អង្គបុរេជំនុំជម្រះបានសរសេរថា ការដែលសហចៅក្រមស៊ើបអង្កេតជាតិ និងអន្តរជាតិចេញដីកាដំណោះស្រាយ ២ ខ្វែងគ្នា គឺជាការរំលោភលើក្របខ័ណ្ឌគតិយុត្តរបស់ អ.វ.ត.ក។ អង្គបុរេជំនុំជម្រះក៏បានប្រកាសដែរថា ខ្លួនមិនអាចរកសំឡេងភាគច្រើនលើសលប់ ៤ លើ ៥ ក្នុងការចេញសេចក្ដីសម្រេចដោយផ្អែកលើអង្គហេតុបានទេ។
សហព្រះរាជអាជ្ញាអន្តរជាតិលោកស្រី Brenda J. Hollis បានថ្លែងនៅក្នុងសេចក្ដីថ្លែងការណ៍របស់លោកស្រីថា អង្គបុរេជំនុំជម្រះមិនបានចេញសេចក្ដីសម្រេចទេកាលពីថ្ងៃព្រហស្បតិ៍ ប៉ុន្តែបានចេញសេចក្ដីពិចារណា។ លោកស្រីថាសេចក្ដីសម្រេចអាចចេញទៅបានលុះត្រាតែមានសំឡេងចៅក្រម ៤ រូបក្នុងចំណោម ៥ រូបជាសំឡេងភាគច្រើនលើសលប់។
លោកស្រីថ្លែងបន្តថា សវនាការកាលពីថ្ងៃព្រហស្បតិ៍មិនអាចសម្រេចសំឡេងភាគច្រើនលើសលប់ទេ ដោយសារតែមានតែចៅក្រម ៣ រូបប៉ុណ្ណោះដែលបានតម្កល់ដីកាដំណោះស្រាយមិនបញ្ចូនរឿងទៅជម្រះ និងបានមោឃភាពដីកាដំណោះស្រាយបញ្ជូនរឿងទៅជម្រះដោយមានការកែប្រែខ្លះ។
លោកស្រីថ្លែងថា យោងតាមគោលការណ៍នៅពេលដីកាដំណោះស្រាយបញ្ជូនរឿងទៅជម្រះ ដោយសហចៅក្រមស៊ើបអង្កេតម្នាក់មិនត្រូវបានបដិសេធដោយចៅក្រម ៤ រូបនៅដំណាក់អង្គបុរេជំនុំជម្រះនូវសំណុំរឿងនឹងត្រូវបានបញ្ជូនទៅជម្រះ។
លោកស្រីថ្លែងថា៖ «ដើម្បីអនុវត្តសេចក្តីសម្រេចនេះ ពួកគាត់បានណែនាំថា ដីកាបញ្ជូនរឿងទៅជំនុំជម្រះដែលបានកែប្រែ ឯកសារនៃ «សេចក្តីពិចារណា» របស់អង្គបុរេជំនុំជម្រះ និងសំណុំរឿងនៃរឿងក្តី ០០៤/០២ ត្រូវបញ្ជូនទៅអង្គជំនុំជម្រះសាលាដំបូង ដើម្បីឲ្យការជំនុំជម្រះក្តីប្រឆាំងនឹង អោ អាន អាចចាប់ផ្តើមបាន»។
លោកស្រីបន្តថា៖ «អាស្រ័យហេតុដូច្នេះ សហព្រះរាជអាជ្ញាអន្តរជាតិនឹងបំពេញកិច្ចស្របតាមវិធានផ្ទៃក្នុងរបស់ អ.វ.ត.ក និងត្រៀមរៀបចំសម្រាប់ការជំនុំជម្រះ»។
ក៏ប៉ុន្តែលោកស្រី ជា លាង សហព្រះរាជអាជ្ញាជាតិថ្លែងតាមរយៈសេចក្ដីថ្លែងការណ៍ដាច់ដោយឡែកថា អង្គបុរេជំនុំជម្រះពិតជាបានចេញសេចក្ដីសម្រេចកាលពីថ្ងៃព្រហស្បតិ៍សប្ដាហ៍មុន ដោយបានប្រកាសជាឯកច្ឆន្ទថា ការចេញដីកាដំណោះស្រាយរបស់សហចៅក្រមស៊ើបអង្កេត ២ ដែលខ្វែងគ្នាគឺជារឿងខុសច្បាប់ និងរំលោភលើវិធានរបស់ អ.វ.ត.ក។
លោកស្រីថ្លែងថា៖ «សហព្រះរាជអាជ្ញាជាតិសង្កេតឃើញថា ដីកាដំណោះស្រាយ (ដីកាបញ្ជូនរឿងទៅជំនុំជម្រះ) របស់សហចៅក្រមស៊ើបអង្កេតអន្តរជាតិ គឺខុសច្បាប់ស្របតាមអំណាចសាលដីការបស់អង្គបុរេជំនុំជម្រះដែលបានប្រកាសថា «ការចេញដីកាដំណោះស្រាយពីរ ដែលផ្ទុយគ្នារបស់សហចៅក្រមស៊ើបអង្កេត គឺខុសច្បាប់ ហើយរំលោភបំពានទៅលើក្របខ័ណ្ឌគតិយុត្តរបស់ អ.វ.ត.ក»។
លោក អោ អាន ត្រូវបានគេដឹងថា ជាអនុលេខាភូមិភាគកណ្ដាល និងជាសមាជិកគណៈកម្មការភូមិភាគកណ្ដាល និងជាលេខានៃតំបន់ ៤១ នៅភូមិភាគកណ្ដាលក្នុងរបបខ្មែរក្រហម។ លោកត្រូវបានសហចៅក្រមស៊ើបអង្កេតអន្តរជាតិចោទប្រកាន់កាលពីឆ្នាំ ២០១៦ ពីបទប្រល័យពូជសាសន៍ ឧក្រិដ្ឋកម្មប្រឆាំងមនុស្សជាតិ និងឃាតកម្ម។
ប៉ុន្តែនៅឆ្នាំ ២០១៨ សហចៅក្រមស៊ើបអង្កេតជាតិបានច្រានចោលរាល់ការចោទប្រកាន់លើរូបលោកដោយលើកឡើងពីមូលហេតុថា លោកមិនស្ថិតក្រោមយុត្តាធិការបុគ្គលនៃច្បាប់របស់ អ.វ.ត.ក ទេ ពោលគឺមិនមែនជាមេដឹកនាំកំពូលនៃរបបខ្មែរក្រហម ឬអ្នកទទួលខុសត្រូវខ្ពស់បំផុតនៃបទឧក្រិដ្ឋ៕
