ភ្នំពេញៈ ពលរដ្ឋខ្មែរចំនួន ៣០ នាក់ដែលត្រូវបានសហរដ្ឋអាមេរិកសម្រេចបញ្ជូនត្រឡប់មកកាន់ប្រទេសកម្ពុជាវិញ ពួកគេបានមកដល់អាកាសយានដ្ឋានអន្តរជាតិភ្នំពេញហើយកាលពីថ្ងៃទី ២២ ខែសីហា ឆ្នាំ ២០១៨។
លោក ប្រុក ម៉ៃឧត្តម អ្នកនាំពាក្យអគ្គនាយកដ្ឋានអត្តសញ្ញាណនៃក្រសួងមហាផ្ទៃបានមានប្រសាសន៍ថា៖ «ពួកគេបានមកដល់ព្រលានយន្តហោះកាលពីថ្ងៃពុធនៅវេលាម៉ោង ៨ ព្រឹក។ ពួកគេទាំងអស់ដែលត្រូវបានបញ្ជូនមកពេលនេះគឺមានចំនួន ៣០ នាក់។ សុខភាពរបស់ពួកគេល្អអាចធ្វើដំណើរបាន នេះបើផ្អែកលើរបាយការណ៍របស់យើង»។
លោក ម៉ៃឧត្តម ថ្លែងថាអ្នកដែលត្រូវបញ្ជូនមកមួយចំនួនមិនទាន់បានទំនាក់ទំនងជាមួយក្រុមគ្រួសាររបស់ពួកគេដែលរស់នៅកម្ពុជានៅឡើយទេ។
លោកថ្លែងថា៖ «យើងមិនទាន់បានបែងចែក ឬស្វែងរកសាច់ញាតិ និងក្រុមគ្រួសាររបស់ពួកគេទេ។ មានអង្គការក្រៅរដ្ឋាភិបាលក្នុងស្រុកមួយបានជួយមើលថែ និងជួយស្វែងរកក្រុមគ្រួសារ និងសាច់ញាតិរបស់ពួកគេ ហើយយើងក៏ជួយពួកគេដែរ។ ពួកគេនឹងស្នាក់នៅអង្គការក្រៅរដ្ឋាភិបាលនោះរយៈពេល ៣ ខែ។ តាមរូបរាងខាងក្រៅពួកគេមើលទៅគឺសុខសប្បាយជាធម្មតាទេ ប៉ុន្តែយើងមិនដឹងថាមានអ្វីនៅក្នុងចិត្ត និងគំនិតរបស់ពួកគេទេពីព្រោះពួកគេបានទៅរស់នៅសហរដ្ឋអាមេរិកចាប់តាំងពីពួកគេនៅក្មេងៗហើយពួកគេមានគ្រួសាររបស់ពួកគេ»។
លោក តាន់ សុនិច នាយកប្រតិបត្តិអង្គការ Khmer Vulnerability Aid Organization បានឲ្យដឹងថា មាន ៦ នាក់បានទាក់ទងទៅក្រុមគ្រួសាររបស់ពួកគេរួចហើយ ហើយ ៦ នាក់ផ្សេងទៀតដែលនៅសល់ពីការបញ្ជូនមកលើកមុនគឺកំពុងនៅក្នុងអង្គការនៅឡើយ។
លោកថ្លែងថា៖ «យើងនឹងបន្តជួយពួកគេ និងបង្រៀនពួកគេអំពីវប្បធម៌ហើយយើងសង្ឃឹមថា ពួកគេនឹងមិនមានបញ្ហាសុខភាពធ្ងន់ធ្ងរទេដោយសារតែវាពិបាកសម្រាប់ពួកគេក្នុងការសម្របជីវិតរបស់ពួកគេនៅទីនេះ»។
លោក សុនិច បានបន្ថែមថា៖ «យើងមិនទាន់ឃើញនរណាម្នាក់មានបញ្ហាសុខភាពទេ។ យើងនឹងបន្តស្វែងរកក្រុមគ្រួសារឲ្យពួកគេ និងបន្តជួយពួកគេរហូតដល់ពួកគេអាចជួយខ្លួនឯងបាន»៕ NS