ភ្នំពេញៈ លោក W. Patrick Murphy ឯកអគ្គរដ្ឋទូតវិសាមញ្ញ និងពេញសមត្ថភាពនៃសហរដ្ឋអាមេរិកប្រចាំកម្ពុជាបានថ្លែងថា សហរដ្ឋអាមេរិក ប្តេជ្ញាចិត្តជួយប្រទេសកម្ពុជាក្នុងការដោះស្រាយបញ្ហាប្រឈមនឹងការខ្វះទឹក និងអាកាសធាតុ និងជួយប្រទេសកម្ពុជា ដើម្បីទាក់ទាញការវិនិយោគពីបរទេសប្រកបដោយគុណភាពខ្ពស់ថែមទៀត។
ការថ្លែងរបស់លោក W. Patrick Murphy ធ្វើឡើងខណៈដែលលោកជួបជាមួយលោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម និងលោក ឆាយ ថន រដ្ឋមន្ត្រីក្រសួងផែនការកាលពីថ្ងៃចន្ទ។
លោក W. Patrick Murphy បានសរសេរនៅលើបណ្តាញ Twitter របស់លោកកាលពីថ្ងៃចន្ទថា៖ «កិច្ចប្រជុំប្រកបដោយបរិយាកាសរីករាយជាមួយឯកឧត្តម លឹម គានហោ រដ្ឋមន្ត្រីក្រសួងធនធានទឹក និងឧតុនិយមពិភាក្សាអំពីបញ្ហាទឹក និងអាកាសធាតុសំខាន់ៗរបស់ប្រទេសកម្ពុជា។ សហរដ្ឋអាមេរិកប្តេជ្ញាជួយតាមរយៈគំនិតផ្តួចផ្តើមទន្លេមេគង្គក្រោមភាពជាដៃគូប្រកបដោយនិរន្តរភាពជាមួយគណៈកម្មការទន្លេមេគង្គ និងតាមរយៈការផ្តល់ការគាំទ្រផ្សេងៗទៀត»។
លោក W. Patrick Murphy បានសរសេរថា៖ «ជួបជាមួយរដ្ឋមន្ត្រីក្រសួងផែនការ ឯកឧត្តម ឆាយ ថន នៅថ្ងៃនេះ (ថ្ងៃចន្ទ) បានពិភាក្សាអំពីការបន្តកិច្ចសហប្រតិបត្តិការ ដើម្បីជួយប្រទេសកម្ពុជាឱ្យសម្រេចបាននូវគោលដៅអភិវឌ្ឍន៍ប្រកបដោយចីរភាព និងធាតុផ្សំសំខាន់ៗដែលត្រូវការដើម្បីទាក់ទាញការវិនិយោគបរទេសឱ្យមានគុណភាពខ្ពស់បន្ថែមទៀត»។
លោកស្រី Emily Zeeberg អ្នកនាំពាក្យស្ថានទូតអាមេរិកប្រចាំកម្ពុជាបានឆ្លើយតបដូចទៅនឹងអ្វីដែលលោក Murphy បានសរសេរនៅលើបណ្តាញ Twitter របស់លោក។
លោក ចាន់ យុត្ថា អ្នកនាំពាក្យក្រសួងធនធានទឹក និងលោក ណុប កនណាវុឌ្ឍ អ្នកនាំពាក្យក្រសួងផែនការមិនអាចទាក់ទងដើម្បីសុំការបញ្ជាក់បន្ថែមបានទេ។
ទោះយ៉ាងណាសារព័ត៌មាន Fresh News បានស្រង់សម្ដីលោក លឹម គានហោ មកចុះផ្សាយថាលោករដ្ឋមន្ត្រីរូបនេះបានស្នើលោក W. Patrick Murphy ពិនិត្យលទ្ធភាពជួយដល់ក្រសួងធនធានទឹក ពិសេសលើការងារបច្ចេកទេស។ ឆ្លើយតបនឹងសំណូមពររបស់លោករដ្ឋមន្ត្រីក្រសួងធនធានទឹក លោកឯកអគ្គរដ្ឋទូតនឹងពិនិត្យលទ្ធភាព ដើម្បីសហការជាមួយក្រសួងធនធានទឹក និងឧតុនិយមពិសេសលើផ្នែកបច្ចេកទេស។
Fresh News ក៏បានស្រង់សម្ដីលោក ឆាយ ថន ផងដែរថា លោកបានស្នើឲ្យអាមេរិកជួយផ្តល់កិច្ចសហប្រតិបត្តិការពង្រឹង និងកសាងសមត្ថភាពធនធានមនុស្សរបស់កម្ពុជា។ «ក្នុងជំនួបនោះដែរ សមភាគីទាំង ២ បានប្តេជ្ញារួមគ្នាបន្តពង្រឹង និងពង្រីកកិច្ចសហប្រតិបត្តិការរវាងក្រសួងផែនការជាមួយទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ (USAID) រួមនឹងដៃគូអភិវឌ្ឍន៍មួយចំនួនទៀតរួមមាន UNFPA, UNICEF ផងដែរ»។
សេចក្តីប្រកាសព័ត៌មាន MRC កាលពីចុងខែធ្នូឆ្នាំមុនបញ្ជាក់ថា លំហូរទឹកនៅស្ថានីយវារីអគ្គិសនីជីងហុងប្រទេសចិនត្រូវកាត់បន្ថយជាង ៥០ ភាគរយ ដោយសារការធ្វើតេស្តឧបករណ៍ទំនប់ទឹកចាប់ពីថ្ងៃទី ១ ដល់ថ្ងៃទី ៤ ខែមករា ដែលធ្វើឱ្យប៉ះពាល់ដល់កម្រិតទឹកទន្លេនៅក្នុងប្រទេស ថៃ ឡាវ និងកម្ពុជា។ នៅប្រទេស កម្ពុជា កម្រិតទឹកនៅតាមដងទន្លេមេគង្គក្នុងខេត្តស្ទឹងត្រែង ក្រចេះ កំពង់ចាម ភ្នំពេញ កោះខែល និងអ្នកលឿងនឹងធ្លាក់ចុះចន្លោះពី ០.០២ ម៉ែត្រ ទៅ ០,២៥ ម៉ែត្រចាប់ពីថ្ងៃទី ១៥ ដល់ថ្ងៃទី ១៨ ខែមករា៕