.jpg)
កងទ័ពមួកខៀវកម្ពុជានៅក្នុងបន្ទាយនៅប្រទេសស៊ូដង់។ រូបថត សហការី
ភ្នំពេញៈ សាច់ញាតិរបស់ស្ដ្រីកងទ័ពមួកខៀវដែលឆ្លងជំងឺកូវីដ ១៩ ចំនួន ៩ នាក់ នៅភូមិព្រែកត្រែង សង្កាត់សិត្បូ ក្រុងតាខ្មៅត្រូវបានយកមកធ្វើចត្តាឡីស័ក ខណៈអ្នកជាសះស្បើយពីជំងឺកូវីដ ១៩ ម្នាក់នៅខេត្តត្បូងឃ្មុំ បានធ្វើតេស្ដវិជ្ជមានជាថ្មី ក្រោយពីចាកចេញពីមន្ទីរពេទ្យអស់ពេលជាច្រើនថ្ងៃ ហើយមនុស្ស ៤៣ នាក់ ដែលប៉ះពាល់ផ្ទាល់ និងប្រយោលជាមួយអ្នកលាប់ជំងឺកូវីដនៅខេត្តត្បូងឃ្មុំក៏ត្រូវធ្វើចត្តាឡីស័កដែរ។
លោក គួយ ប៊ុនធឿន ប្រធានមន្ទីរសុខាភិបាលខេត្តកណ្ដាលប្រាប់ភ្នំពេញប៉ុស្ដិ៍ម្សិលមិញថា អាជ្ញាធរកំពុងស្វែងរកអ្នកដែលអាចប៉ះពាល់ជាមួយស្ដ្រីកងទ័ពមួកខៀវនេះផ្សេងទៀត។
លោកថា៖ «ស្ដ្រីទ័ពមួកខៀវវ័យ ២៧ ឆ្នាំហ្នឹង ធ្វើតេស្ដវិជ្ជមានកាលពីល្ងាចថ្ងៃទី ៨ ហើយព្រឹកថ្ងៃទី ៩ យើងបានយកអ្នកផ្ទះរបស់គាត់ ៩ នាក់ តាមអ្វីដែលគាត់ប្រាប់ មកធ្វើចត្តាឡីស័កហើយលទ្ធផលតេស្ដលើអ្នកទាំង ៩ កាលពីយប់ថ្ងៃទី ៩ គឺអវិជ្ជមាន»។
លោក អ៊ុំ ឡេង ចៅសង្កាត់សិត្បូបានធ្វើរបាយការណ៍មួយផ្ញើទៅកាន់សាលាក្រុងតាខ្មៅកាលពីថ្ងៃម្សិលមិញថា ស្ដ្រីកងទ័ពមួកខៀវអាយុ ២៧ ឆ្នាំរូបនេះ គឺបានធ្វើដំណើរមកផ្ទះនៅភូមិព្រែកត្រែង សង្កាត់សិត្បូកាលពីថ្ងៃទី ៣០ ខែកក្កដា ហើយបានធ្វើបាយសម្លជូនចាស់ៗចែកលុយក្មេងៗ និងបានយកចង្ហាន់ទៅប្រគេនព្រះសង្ឃនៅវត្តជម្ពូប្រឹក្ស។
របាយការណ៍ដែលឃើញចែកចាយនៅលើបណ្តាញសង្គមសរសេរថា ស្ដ្រីរូបនេះត្រូវបានធ្វើតេស្ដវិជ្ជមានក្រោយពីកើតមានអាការក្ដៅខ្លួនខ្លាំង និងហៀរសំបោរ។ របាយការណ៍នោះបញ្ជាក់ថា៖ «បច្ចុប្បន្នប្រជាពលរដ្ឋមានការព្រួយបារម្ភខ្លាំងដោយអ្នកជំងឺបានប៉ះពាល់ជាមួយអ្នកជិតខាងជាច្រើន។ អាស្រ័យហេតុនេះសូមលោកអភិបាលក្រុងមេត្តាជ្រាបជារបាយការណ៍ និងចាត់វិធានការបន្តដោយក្ដីអនុគ្រោះ»។
ភ្នំពេញ ប៉ុស្ដិ៍ មិនអាចសុំការបញ្ជាក់បន្ថែមពីលោក អ៊ុំ ឡេង បានទេដោយសារទូរស័ព្ទរបស់លោកពុំមានអ្នកទទួល។
លោក នូ សុវណ្ណារ៉ា អភិបាលក្រុងតាខ្មៅបានថ្លែងថា ពិតជាមានសមាជិកគ្រួសារចំនួន ៩ នាក់ របស់ស្ដ្រីកងទ័ពមួកខៀវត្រូវបានយកទៅធ្វើចត្តាឡីស័កមែន ប៉ុន្តែលោកអះអាងថា មិនទាន់ទទួលបានរបាយការណ៍ពីខាងសង្កាត់នៅឡើយទេ។ លោកថា៖ «យើងកំពុងទាក់ទងចៅសង្កាត់ សួរព័ត៌មានឱ្យច្បាស់អំពីការចេញឯកសារហ្នឹងដែលផ្សព្វផ្សាយនៅតាមហ្វេសប៊ុកទៅវិញ ប៉ុន្តែឯកសារហ្នឹងមិនទាន់មកដល់ក្រុងនៅឡើយទេ»។
ចំណែកលោក គួយ ប៊ុនធឿន បញ្ជាក់ថាមន្ទីរសុខាភិបាលនឹងចេញរបាយការណ៍មួយដើម្បីឆ្លើយបំភ្លឺបន្ថែមជុំវិញរបាយការណ៍ដែលចេញផ្សាយដោយចៅសង្កាត់សិត្បូ។ លោកថា៖ «ខ្ញុំមិនទាន់បានជួបគាត់ (ចៅសង្កាត់) ទេ ប៉ុន្តែគ្រាន់តែឮថាគាត់គ្រាន់តែឮតគ្នាថា ប៉ុន្តែអត់ទាន់ប្រាកដផងហ្នឹង»។
រដ្ឋបាលខេត្តកណ្ដាលបានចេញសេចក្តីជូនដំណឹងច្រានចោលរបាយការណ៍របស់ចៅសង្កាត់សិត្បូ និងបានអះអាងថា របាយការណ៍របស់ចៅសង្កាត់រូបនេះធ្វើឡើងមិនត្រឹមត្រូវគ្មានប្រភពច្បាស់លាស់ដែលខុសពីការចុះអង្កេតតាមដានស្រាវជ្រាវរបស់មន្ត្រីជំនាញសុខាភិបាល និងការផ្ដល់ព័ត៌មានពីអ្នកជំងឺ និងក្រុមគ្រួសារអ្នកជំងឺ។
លោកស្រី ឱ វណ្ឌឌីន អ្នកនាំពាក្យក្រសួងសុខាភិបាលបញ្ជាក់ថា ក្នុងចំណោមកងទ័ពមួកខៀវទាំង ៨០ នាក់ ដែលធ្វើដំណើរពីប្រទេសម៉ាលីមកដល់កម្ពុជាកាលពីថ្ងៃទី ១០ ខែកក្កដា គឺបានធ្វើតេស្ដលើកទី ១ អវិជ្ជមាន និងត្រូវបានបញ្ជូនទៅធ្វើចត្តាឡីស័កនៅមូលដ្ឋានកងទ័ពនៅខេត្តកំពង់ស្ពឺ។
លោកស្រីបញ្ជាក់ថា លុះធ្វើចត្តាឡីស័កបានចំនួន ១៣ ថ្ងៃ កងទ័ពមួកខៀវទាំង ៨០ នាក់ បានធ្វើតេស្ដលើកទី ២ នៅថ្ងៃទី ២៣ កក្កដា ទើបបានរកឃើញ ៤ នាក់ មានលទ្ធផលតេស្ដវិជ្ជមាន ហើយតម្រូវឱ្យអ្នកអវិជ្ជមានចំនួន ៧៦ នាក់ទៀត ធ្វើចត្តាឡីស័កចំនួន ១៤ ថ្ងៃឡើងវិញ។
លោកស្រីបន្ថែមថា ក្នុងចំណោមកងទ័ពមួកខៀវ ៧៦ នាក់ គឺមាន ៤ នាក់ទៀត មានលទ្ធផលវិជ្ជមានក្រោយពីការធ្វើតេស្ដលើកទី ៣ នៅថ្ងៃទី ២៧ កក្កដា ហើយក៏តម្រូវឱ្យអ្នកអវិជ្ជមានផ្សេងទៀតចំនួន ៧២ នាក់ ត្រូវធ្វើចត្តាឡីស័ក ១៤ ថ្ងៃឡើងវិញ ប៉ុន្តែបានអនុញ្ញាតឱ្យចេញពីកន្លែងធ្វើចត្តាឡីស័កនៅមូលដ្ឋានកងទ័ពមកធ្វើចត្តាឡីស័កនៅតាមផ្ទះរៀងៗខ្លួន។
លោកស្រីបន្ត៖ «៧២ នាក់នេះ ត្រូវបានឱ្យធ្វើចត្តាឡីស័កបន្ត ១៤ ថ្ងៃថែមទៀត ប៉ុន្តែដោយសារអ្នកទាំងនេះធ្វើតេស្ដអវិជ្ជមាន ៣ លើក ហើយក៏មានការចាត់ចែងឱ្យធ្វើចត្តាឡីស័កនៅតាមផ្ទះ ប៉ុន្តែត្រូវធ្វើតេស្ដនៅថ្ងៃទី ១៣ នៃថ្ងៃចត្តាឡីស័ក និងបានរកឃើញស្ដ្រីកងទ័ពមួកខៀវម្នាក់ ឆ្លងជំងឺកូវីដ និងត្រូវក្រសួងរាយការណ៍កាលពីថ្ងៃទី ៩ សីហា»។
លោកស្រីបញ្ជាក់ថា នៅពេលធ្វើចត្តាឡីស័កនៅផ្ទះស្ដ្រីរូបនេះ គឺរស់នៅដាច់ដោយឡែកពីគ្រួសារ ប៉ុន្តែបានប្រើប្រាស់បន្ទប់ទឹករួមជាមួយគ្រួសារ និងតែងពាក់ម៉ាស់ជាប់ជាប្រចាំ។ ចំណែកកងទ័ពមួកខៀវអវិជ្ជមានចំនួន ៧១ នាក់ផ្សេងទៀត ដែលកំពុងធ្វើចត្តាឡីស័កនៅផ្ទះគឺត្រូវយកមកធ្វើចត្តាឡីស័កនៅមូលដ្ឋានទ័ពនៅខេត្តកំពង់ស្ពឺឡើងវិញដែរ។
ចំណែកនៅខេត្តត្បូងឃ្មុំ មន្ត្រីខេត្តនេះរាយការណ៍ថា អ្នកជំងឺម្នាក់ដែលព្យាបាលជាសះស្បើយ និងអនុញ្ញាតឱ្យចេញពីមន្ទីរពេទ្យអស់ជាច្រើនថ្ងៃបានលាប់ជំងឺកូវីដ ១៩ ឡើងវិញ ហើយមានអ្នកប៉ះពាល់ផ្ទាល់ និងប្រយោលជាមួយអ្នកលាប់ជំងឺនេះចំនួន ៤៣ នាក់ ត្រូវបានយកមកធ្វើចត្តាឡីស័ក។
លោក កែវ វណ្ណៈ ប្រធានមន្ទីរសុខាភិបាលខេត្តត្បូងឃ្មុំបានប្រាប់ភ្នំពេញប៉ុស្ដិ៍ពីម្សិលមិញថា បុរសជនជាតិខ្មែរដែលមានអាយុ ២៩ ឆ្នាំដែលមកពីប្រទេសអារ៉ាប៊ីសាអ៊ូឌីត ហើយបានមកដល់ប្រទេសកម្ពុជាកាលពីថ្ងៃទី ១០ ខែកក្កដា ឆ្នាំ ២០២០ គឺត្រូវធ្វើចត្តាឡីស័កនៅភ្នំពេញ និងធ្វើតេស្ដលើកទី ១ អវិជ្ជមាន។
លោកបន្តថា ក្រោយពីបានធ្វើតេស្ដលើកទី ២ មានលទ្ធផលវិជ្ជមាន បុរសរូបនេះត្រូវបានដាក់ឱ្យព្យាបាលនៅមណ្ឌលសុខភាពចាក់អង្រែហើយមិនត្រូវអនុញ្ញាតឱ្យចេញពីមន្ទីរពេទ្យឡើយ ក្រោយធ្វើតេស្ដលើកទី ៣ នៅតែវិជ្ជមាននៅឡើយ។ ប៉ុន្តែបុរសរូបនេះត្រូវបានអនុញ្ញាតឱ្យចេញពីមន្ទីរពេទ្យ និងបានធ្វើដំណើរទៅផ្ទះនៅភូមិកណ្ដាល ឃុំគរ ស្រុកត្បូងឃ្មុំ ក្រោយពីធ្វើតេស្ដលើកទី ៤ និងលើកទី ៥ អវិជ្ជមាន។
លោកថា៖ «លុះមកដល់ការធ្វើតេស្ដម្ដងទៀតនៅថ្ងៃទី ២៣ កក្កដាមានលទ្ធផលអវិជ្ជមាន និងតេស្ដម្ដងទៀតនៅថ្ងៃទី ២៦ កក្កដា មានលទ្ធផលអវិជ្ជមានគឺមកដល់ថ្ងៃទី ២៨ កក្កដា ទើបត្រូវបានអនុញ្ញាតឱ្យចេញពីមន្ទីរពេទ្យត្រឡប់មកផ្ទះ។ រហូតមកដល់ថ្ងៃទី ៧ បានយើងយកសំណាកមកធ្វើតេស្ដឡើងវិញ ហើយនៅថ្ងៃទី ៨ លទ្ធផលចេញវិជ្ជមាន។ នៅពេលយើងដឹងភ្លាម យើងបានទៅយកគាត់មកដាក់ព្យាបាលវិញភ្លាម»។
លោកថា មនុស្សចំនួន ៤៣ នាក់ នៅភូមិកណ្ដាល ឃុំគរគឺត្រូវបានរកឃើញថា បានប៉ះពាល់ជាមួយអ្នកលាប់ជំងឺនេះក្នុងនោះមានចំនួន ៩ នាក់ ជាអ្នកប៉ះពាល់ផ្ទាល់ត្រូវបានយកមកធ្វើចត្តាឡីស័កនៅវិទ្យាល័យ ហ៊ុន សែន សួង នៅក្រុងសួង និង ៣៤ នាក់ ត្រូវបានយកទៅធ្វើចត្តាឡីស័កនៅសាលាបឋមសិក្សានៅក្នុងភូមិរបស់អ្នកជំងឺតែម្ដង។
គិតត្រឹមថ្ងៃម្សិលមិញកម្ពុជាបានរាយការណ៍ករណីជំងឺកូវីដថ្មីចំនួន ៣ នាក់ទៀត ដែលធ្វើឱ្យករណីឆ្លងសរុបកើនដល់ ២៥១ នាក់ និងអ្នកជាសះស្បើយថ្មីចំនួន ២ នាក់ ដែលធ្វើឱ្យចំនួនជាសះស្បើយកើនដល់ ២១៩ នាក់ ហើយអ្នកកំពុងបន្តសម្រាកព្យាបាលមានចំនួន ៣២ នាក់៕
វីដេអូ៖
