The Phnom Penh Post Search

Search form




Logo of Phnom Penh Post newspaper Phnom Penh Post - សាធារណរដ្ឋ​ឆែក​អនុវត្ត​គម្រោង​ទឹកស្អាត​ដល់​ពលរដ្ឋ​ជិត​ ១ ​ម៉ឺន​គ្រួសារ




សាធារណរដ្ឋ​ឆែក​អនុវត្ត​គម្រោង​ទឹកស្អាត​ដល់​ពលរដ្ឋ​ជិត​ ១ ​ម៉ឺន​គ្រួសារ

Content image - Phnom Penh Post
សិក្ខាសាលា​ស្តីពី​ការអនុវត្ត​គម្រោង​ធ្វើឲ្យ​ប្រសើរ​​ឡើង​នូវ​វិស័យ​ទឹកស្អាត និង​អនាម័យ​​ឆ្នាំ​ ២០២០-២០២៣ របស់​ស្ថានទូត​ឆែក​ ដែល​ចូលរួម​ដោយ​លោក Vlastimil Tesar ​ឯកអគ្គរដ្ឋទូត​សាធារណរដ្ឋ​ឆែក​ប្រចាំ​កម្ពុជា និង​លោក អម សុភា អភិបាលរង​ខេត្ត​កំពង់ឆ្នាំង​។ រូបថត សហការី

សាធារណរដ្ឋ​ឆែក​អនុវត្ត​គម្រោង​ទឹកស្អាត​ដល់​ពលរដ្ឋ​ជិត​ ១ ​ម៉ឺន​គ្រួសារ

កំពង់ឆ្នាំងៈ ស្ថានទូត​សាធារណរដ្ឋ​ឆែក​ប្រចាំ​កម្ពុជា​កំពុង​អនុវត្ត​គម្រោង​ធ្វើឱ្យ​ប្រសើរ​ឡើង​នូវ​វិស័យ​ទឹកស្អាត និង​អនាម័យ​រយៈពេល​ ៤ ​ឆ្នាំ​ជួយ​ឱ្យ​ពលរដ្ឋ​ចំនួន ៩ ៦៦២ ​គ្រួសារ​ នៅ​ស្រុក​ចំនួន​ ២ គឺ​ស្រុក​សាមគ្គី​មានជ័យ និង​ស្រុក​ទឹកផុស ខេត្ត​កំពង់ឆ្នាំង ទទួល​បាន​ទឹកស្អាត​ និង​បង្គន់​អនាម័យ​ប្រើប្រាស់​។

គម្រោង​នេះ​គឺ​អនុវត្ត​ចាប់ពី​ខែ​កក្កដា​ឆ្នាំ​ ២០២០ ​ទៅ​ដល់​ខែមិថុនា​ឆ្នាំ​ ២០២៣ ជួយ​ទៅ​ប្រជាពលរដ្ឋ​នៅក្នុង​ភូមិ​ចំនួន​ ៤៥ ​ក្នុង​ឃុំ​ចំនួន​ ៨​។

សេចក្ដី​ប្រកាស​ព័ត៌មាន​របស់​ស្ថានទូត​ឆែក​ប្រចាំ​កម្ពុជា​កាលពី​ថ្ងៃទី​ ៨ កញ្ញា​បញ្ជាក់​ថា ការអនុវត្ត​គម្រោង​ទឹកស្អាត និង​អនាម័យ​នេះ​គឺ​ផ្ដោត​សំខាន់​ទៅលើ​សាលា​បឋមសិក្សា​ចំនួន​ ១៦ ដែល​សិស្ស​នឹង​ត្រូវ​បាន​អប់រំ​ឱ្យ​អនុវត្ត​អនាម័យ​ស្អាត ហើយ​សាលារៀន​ដែល​ត្រូវ​ជ្រើសរើស​នឹង​ទទួលបាន​ទឹកស្អាត​ថ្មី និង​បន្ទប់ទឹក​អនាម័យ​ថ្មី​សម្រាប់​ប្រើប្រាស់​។

គម្រោង​នេះ​នឹង​សហការ​ជាមួយ​វិស័យ​ឯកជន​នៅក្នុង​តំបន់ និង​ការបណ្ដុះបណ្ដាល​ទៅដល់​បុគ្គលិក​ផ្គត់ផ្គង់​ទឹកស្អាត​។ ការសិក្សា​ពី​លទ្ធភាព​ដំបូង​រួមទាំង​ការវាយតម្លៃ​លម្អិត​លើ​ប្រភព​ទឹក​ផឹក​នាពេល​បច្ចុប្បន្ន និង​ការដោះស្រាយ​តាម​បច្ចេកទេស​ដែល​ត្រូវ​ធ្វើ​ឡើង​ដោយ​ក្រុម​អ្នកជំនាញ​ប្រទេស​ឆែក​។

លោក Vlastimil Tesar ភារធារី​ស្តីទី​នៃ​ស្ថានទូត​សាធារណរដ្ឋ​ឆែក​ថ្លែង​ថា​ទឹកស្អាត និង​បង្គន់​អនាម័យ​ជា​អាទិភាព​មួយ​របស់​សាធារណរដ្ឋ​ឆែក​នៅ​កម្ពុជា​ហើយ​ឆែក​ចាត់ទុក​ការផ្គត់ផ្គង់​ទឹកស្អាត​មាន​សុវត្ថិភាព​ជា​ធាតុ​សំខាន់​សម្រាប់​សុខភាព​ប្រជាជន​។

លោក​ថា​៖ «​ប្រសិន​បើ​ទឹក​មិនមាន​គុណភាព​តាម​ស្តង់ដា​សមរម្យ​ទេ​នោះ វា​អាច​បង្ក​ឱ្យ​មាន​បញ្ហា​សុខភាព​ធ្ងន់ធ្ងរ​។ ម្យ៉ាងទៀត ការសម្អាត និង​អនាម័យ​ត្រឹមត្រូវ​គឺ​ពិតជា​ចាំបាច់​ណាស់ ជាពិសេស​ពេល​មាន​រោគរាតត្បាត​អាច​ជួយ​ឱ្យ​ប្រជាជន​មាន​សុវត្ថិភាព និង​មាន​សុខភាព​ល្អ​»​។

គម្រោង​មាន​ទឹកប្រាក់​ ១ ​លាន​ដុល្លារ​នេះ​គឺជា​គម្រោង​ទី​ ១៧ ស្ដីពី​ការលើកកម្ពស់​អនាម័យ​ និង​ទឹកស្អាត​ដែល​អនុវត្ត​ដោយ​អង្គការ​ឆែក Diaconia ECCB មជ្ឈមណ្ឌល​មនុស្សធម៌​ និង​កិច្ចសហប្រតិបត្តិការ​អភិវឌ្ឍន៍ ក្រុមហ៊ុន​ឆែក G-servis និង​សាកលវិទ្យាល័យ​វិទ្យាសាស្ត្រ​ជីវិត​របស់​ឆែក ដើម្បី​ធានា​នូវ​គុណភាព​បច្ចេកទេស​របស់​គម្រោង​ហើយនឹង​សហការ​គ្នា​ជាមួយ​អង្គការ​ជីវិត​ថ្លៃថ្នូរ ជា​អង្គការ​ដៃគូ​នៅ​កម្ពុជា​។

កាលពី​ថ្ងៃទី​ ៨ កញ្ញា សាលាខេត្ត​កំពង់ឆ្នាំង​បាន​បើក​សិក្ខាសាលា​ស្តីពី​ការអនុវត្ត​គម្រោង​ធ្វើឲ្យ​ប្រសើរ​​ឡើង​នូវ​វិស័យ​ទឹកស្អាត និង​អនាម័យ​​ឆ្នាំ​ ២០២០-២០២៣ របស់​ស្ថានទូត​ឆែក​នេះ​ដែល​ចូលរួម​ដោយ​លោក Vlastimil Tesar ​ឯកអគ្គរដ្ឋទូត​សាធារណរដ្ឋ​ឆែក​ប្រចាំ​កម្ពុជា និង​លោក អម សុភា អភិបាលរង​ខេត្ត​កំពង់ឆ្នាំង​។

រដ្ឋបាលខេត្ត​នេះ​រំពឹងថា គម្រោង​នេះ​នឹង​ជួយ​សហគមន៍​ឲ្យ​ទទួលបាន​ទឹកស្អាត​ប្រើ និង​យល់ដឹង​ពី​ការប្រើ​បង្គន់ និង​អនាម័យ​ក៏​ដូច​ជួយ​ពង្រឹង​សមត្ថភាព​គណៈកម្មការ​គ្រប់គ្រង​ទឹក​ឱ្យ​មាន​ប្រសិទ្ធភាព​៕

អត្ថបទគួរចាប់អារម្មណ៍