.jpg)
មន្ត្រីចុះសួរសុខទុក្ខពលករកំពុងធ្វើចត្តាឡីស័កនៅបន្ទាយមានជ័យ។ រូប សហការី
ភ្នំពេញៈ សារព័ត៌មានរបស់ប្រទេសអូស្ត្រាលីបានចុះផ្សាយថា ប្រទេសកម្ពុជា គឺជាប្រទេសមួយក្នុងចំណោមប្រទេសដីគោកដ៏តិចតួច ដែលគ្មានករណីស្លាប់ដោយសារជំងឺកូវីដ ១៩ ទោះបីជាមានប្រព័ន្ធសុខាភិបាលដែលទទួលបានការគាំទ្រហិរញ្ញវត្ថុតិចតួចក៏ដោយ។
បន្ទាប់ពីមានការលើកឡើងដូចនេះអ្នកនាំពាក្យក្រសួងសុខាភិបាលលោកស្រី ឱ វណ្ណឌីន បានឱ្យ ភ្នំពេញ ប៉ុស្តិ៍ ដឹងថា វាជាការផ្តល់នូវភាពយុត្តិធម៌សម្រាប់ប្រទេសកម្ពុជា និងការទទួលយកនូវការពិតដែលកម្ពុជាបានខិតខំក្នុងការទប់ស្កាត់ការចម្លងនូវវីរុសកូវីដ ១៩ បានល្អប្រសើរ។
លោកស្រីថា ប្រទេសកម្ពុជា មិនមានអ្នកស្លាប់ ដោយវីរុសកូវីដ ១៩ ដែលកន្លងមកមានជនបរទេស និងមតិអន្តរជាតិមួយចំនួនហាក់មានមន្ទិលសង្ស័យថា កម្ពុជាមានការលាក់លៀមនូវករណីឈឺក៏ដូចជាករណីស្លាប់ដោយសារជំងឺកូវីដ។
លោកស្រី ឱ វណ្ណឌីន បានមានប្រសាសន៍ថា៖ «ឥឡូវនេះ យុត្តិធម៌បានផ្តល់មកឱ្យកម្ពុជាពិតប្រាកដហើយ ក៏មានការទទួលស្គាល់ច្បាស់លាស់អំពីការខិតខំប្រឹងប្រែងរបស់កម្ពុជា ដែលធ្វើបានល្អប្រសើរក្នុងការដាក់វិធានការទប់ស្កាត់ការចម្លងនូវវីរុសកូវីដ ១៩»។
បើតាមអ្នកនាំពាក្យរូបនេះក្រុមគ្រូពេទ្យកម្ពុជានឹងបន្តប្រើប្រាស់នូវសមត្ថភាពផ្ទាល់ខ្លួនដើម្បីបម្រើសេវាជូនដល់ប្រជាពលរដ្ឋហើយលោកស្រីសង្ឃឹមថា តាមរយៈបទពិសោធនៃការគ្រប់គ្រង និងការឆ្លើយតបនៃការរីករាលដាលជំងឺកូវីដ ១៩ នឹងមានអត្ថប្រយោជន៍បំផុតសម្រាប់កម្ពុជាក្នុងការបន្តនូវវិធានការនានាក្នុងការត្រៀមលក្ខណៈរួចជាស្រេចទុកជាមុនសម្រាប់ប្រយុទ្ធប្រឆាំងទៅនឹងជំងឺឆ្លងផ្សេងៗទៀតនៅពេលខាងមុខ។
ដោយឡែកលោកនាយករដ្ឋមន្ត្រី ហ៊ុន សែន បានប្រកាសកាលពីថ្ងៃទី ២២ ខែមករាថា លោកនឹងចាក់ម្ជុលទី ១ ដបដូសទី ១ នៃវ៉ាក់សាំងកូវីដ ១៩ ដើម្បីផ្តល់ជំនឿទុកចិត្តរបស់ប្រជាជនកម្ពុជា ហើយអ្នកដែលចាក់វ៉ាក់សាំងជូនលោក គឺជាគ្រូពេទ្យការពារលោកផ្ទាល់តែម្តង។
លោកមានប្រសាសន៍ថា៖ «តម្លៃខ្លួនខ្ញុំ គឺខ្ញុំត្រូវតែធ្វើដើម្បីឱ្យប្រជាជនកម្ពុជា។ នៅពេលដែលចាក់វ៉ាក់សាំងរួច ខ្ញុំនឹងធ្វើសន្និសីទសារព័ត៌មាន នៅមន្ទីរពេទ្យកាល់ម៉ែតតែម្តងដើម្បីធ្វើការបញ្ជូនសារថា កម្ពុជាបានចាប់ផ្តើមចាក់វ៉ាក់សាំងកូវីដ ១៩ ហើយ»។
លោកនាយករដ្ឋមន្ត្រីលើកឡើងក្នុងពេលអញ្ជើញសម្ពោធសមិទ្ធផលថ្មីៗរបស់ក្រសួងសាធារណការ និងដឹកជញ្ជូនកាលពីសប្តាហ៍មុនថា អ្វីដែលលោកចង់បានគឺមុនចូលឆ្នាំថ្មីប្រពៃណីជាតិខ្មែរ កម្ពុជាត្រូវទទួលនូវការចាក់វ៉ាក់សាំងចំនួន ៥០ ម៉ឺននាក់ ព្រោះនៅពេលខាងមុខនេះវ៉ាក់សាំងចំនួន ៣០ ម៉ឺនដូស នឹងមកដល់កម្ពុជាសម្រាប់ចាក់មនុស្ស ១៥ ម៉ឺននាក់ ហើយខាងប្រទេសចិននឹងជំរុញឱ្យកម្ពុជាទទួលបានចំនួន ៦០ ម៉ឺនដូស។
លោកមានប្រសាសន៍ថា៖ «ក្នុងស្ថានភាពនេះ យើងមិនអាចរង់ចាំតទៅទៀតទេ យើងត្រូវទាក់ទងរកវ៉ាក់សាំង ដើម្បីយកមកចាក់ជូនប្រជាពលរដ្ឋយើងឥតគិតថ្លៃ និងឈរលើគោលការណ៍ស្ម័គ្រចិត្ត។ ប្រទេសចិន បានទទួលជោគជ័យទាំងស្រុងក្នុងការផលិតវ៉ាក់សាំងកូវីដ ១៩ ចំនួន ២ ប្រភេទនោះគឺ ស៊ីណូវ៉ាក់ ផលិតដោយក្រុមហ៊ុនឯកជន និងស៊ីណូហ្វាម ផលិតដោយរដ្ឋាភិបាលចិន ហើយយើងនឹងប្រើទាំង ២ ទាំងស៊ីណូហ្វាម និងស៊ីណូវ៉ាក់»។
ជាមួយគ្នានេះដែរ លោក ហ៊ុន សែន ក៏បានប្រកាសផងដែរថា វ៉ាក់សាំងស៊ីណូហ្វាមនឹងមកដល់កម្ពុជានៅខែកុម្ភៈ ហើយលោកនឹងទៅទទួលយកវ៉ាក់សាំងនេះដោយខ្លួនឯងនៅព្រលានយន្តហោះអន្តរជាតិភ្នំពេញតែម្តង។
បើតាមក្រសួងសុខាភិបាលគិតត្រឹមថ្ងៃទី ២៤ ខែ មករា ឆ្នាំ ២០២១ កម្ពុជាមានអ្នកឆ្លងវីរុសកូវីដ ១៩ ចំនួន ៤៥៨ នាក់ ក្នុងនោះមានអ្នកត្រូវបានព្យាបាលជាសះស្បើយចំនួន ៤០៥ នាក់ និងអ្នកកំពុងសម្រាកព្យាបាលមានចំនួន ៥៣ នាក់៕
វីដេអូ៖
