.jpg)
រូបថតរបស់ជនរងគ្រោះក្នុងរបបខ្មែរក្រហមនៅសារមន្ទីរប្រល័យពូជសាសន៍ទួលស្លែងត្រូវបានគេដាក់ពណ៌និងផ្លាស់ប្តូរដើម្បីបង្ហាញស្នាមញញឹម។ ហ្វេសប៊ុក
ភ្នំពេញៈ សារព័ត៌មាន Vice Asia បានសម្រេចលុបខ្លឹមសារនៃបទសម្ភាសជាមួយជនជាតិអៀកឡង់ឈ្មោះ Matt Loughrey ចេញពីបណ្តាញផ្សព្វផ្សាយរបស់ខ្លួន និងចេញសារសុំទោសជាសាធារណៈចំពោះក្រុមគ្រួសារជនរងគ្រោះ និងប្រជាជនកម្ពុជាចំនួន ២ លើក ក្រោយពីមានប្រតិកម្មពីសាធារណជនជាតិ អន្តរជាតិ និងវិធានការរបស់ក្រសួងវប្បធម៌ និងវិចិត្រសិល្បៈ។ នេះបើតាមសេចក្តីជូនដំណឹងក្រសួងវប្បធម៌ និងវិចិត្រសិល្បៈនៅថ្ងៃទី ១៩ ខែមេសាឆ្នាំ ២០២១ នេះ។
សេចក្តីជូនដំណឹងនេះបន្តថា លើកទី ១ កាលពីថ្ងៃសុក្រ ទី ៩ ខែមេសា បណ្ដាញសារព័ត៌មាន VICE Asia បានចុះផ្សាយបទសម្ភាសមួយជាមួយ Matt Loughrey វិចិត្រករ ដែលបានកែប្រែរូបថតជនរងគ្រោះពីមន្ទីរស-២១ នៅកម្ពុជា ទៅជារូបគូល័រ ដែលរូបថតទាំងនោះធ្លាប់ប្រើប្រាស់ដោយរបបខ្មែរក្រហមនាអំឡុងឆ្នាំ ១៩៧៥ ដល់ ១៩៧៩។
អត្ថបទផ្សព្វផ្សាយនេះបានបង្ហាញរូបថតជនរងគ្រោះក្នុងសម័យខ្មែរក្រហមដែលច្នៃដោយលោក Loughrey ខុសពីការពិត។ សាច់រឿងអត្ថបទនេះ មិនបានឆ្លើយតបទៅនឹងកម្រិតស្តង់ដានៃវិចារណកថា របស់ VICE Asia ឡើយ ហេតុដូច្នេះទើបអត្ថបទខាងលើត្រូវដកចេញពីបណ្តាញសារព័ត៌មាន។
សារព័ត៌មាន VICE Asia ឱ្យដឹងថា «យើងខ្ញុំសោកស្ដាយ ពន់ពេកចំពោះកំហុសដែលកើតមាន ហើយយើងខ្ញុំនឹងបន្តតាមដានពីភាពខ្វះខាតលើដំណើរការនៃការកែសម្រួលអត្ថបទមុនពេលចេញផ្សាយ»។
បើតាមក្រសួងវប្បធម៌ បញ្ជាក់ថា សារព័ត៌មាន VICE Asia បានសរសេរសូមទោសលើកទី ២ ថា “យើងខ្ញុំបានចំណាយពេលប៉ុន្មានថ្ងៃកន្លងមកនេះ ដើម្បីពិនិត្យឡើងវិញនូវកង្វះខាតក្នុងការចេញផ្សាយអត្ថបទរបស់ Matt Loughrey។ យើងខ្ញុំ មានការសោកស្តាយយ៉ាងខ្លាំងចំពោះការឈឺចាប់បណ្តាលមកពីអត្ថបទនេះ និងសូមអភ័យទោសដោយស្មោះចំពោះក្រុមគ្រួសារជនរងគ្រោះ និងប្រជាជនក្នុងប្រទេសកម្ពុជា»។
សារព័ត៌មាន VICE Asia បន្តថា៖ «បច្ចុប្បន្ន យើងខ្ញុំកំពុងទាក់ទងផ្ទាល់ជាមួយសហគមន៍ និងបុគ្គលមួយចំនួន ដើម្បីបញ្ជាក់ពីបញ្ហានេះ។ យើងខ្ញុំនឹងបន្តខិតខំត្រួតពិនិត្យ និងថ្លឹងថ្លែងយ៉ាងហ្មត់ចត់ចំពោះអត្ថបទដែលត្រូវចុះផ្សាយក្នុងបណ្តាញរបស់យើងខ្ញុំ ដើម្បីធានាថានឹងមិនឲ្យមានការខ្វះខាតកើតមានឡើងជាថ្មីម្ដងទៀតឡើយ»។
ក្រសួងវប្បធម៌ និងវិចិត្រសិល្បៈ កាលពីថ្ងៃទី ១១ ខែមេសា ឆ្នាំ ២០២១ បានស្នើដល់សារព័ត៌មាន VICE Asia ឱ្យលុបរូបជនរងគ្រោះជំនាន់ខ្មែរក្រហមដែលខ្លួនយកពីមន្ទីរស-២១ ទៅបង្ហោះតែបែរជាកែខុសពីស្ថានភាពដើម។
ការស្នើនេះបានធ្វើឡើង បន្ទាប់ពីសារព័ត៌មាន VICE Asia នេះបានផ្សាយអត្ថបទមួយក្រោមចំណងជើងថា These People Were Arrested by the Khmer Rouge and Never Seen Again (ពលរដ្ឋទាំងនេះ ត្រូវបានចាប់ខ្លួនដោយពួកខ្មែរក្រហម ហើយបាត់ខ្លួនជារៀងរហូត)។ អត្ថបទនេះបានផ្សាយពីថ្ងៃទី ៩ ខែមេសា ឆ្នាំ ២០២១ ដែលបានយករូបថតជនរងគ្រោះជំនាន់ខ្មែរក្រហមទៅកែច្នៃជាពណ៌ធម្មជាតិ និងបានច្នៃឲ្យខុសពីស្ថានភាពជាក់ស្តែង អំឡុងពេលដែលជនរងគ្រោះទទួលរងនូវការគំរាមកំហែងពីសំណាក់ពួកខ្មែរក្រហម៕
