.jpg)
បុរសខ្មែរម្នាក់ និងជនបរទេសម្នាក់នៅមុខសារមន្ទីរជាតិកាលពីម្សិលមិញ។ ហុង មិនា
ភ្នំពេញ: សារមន្ទីរធំៗចំនួន ១០ កន្លែងដែលរក្សាឯកសារ និងវត្ថុបុរាណត្រូវបានបិទជាបណ្តោះអាសន្នមិនអនុញ្ញាតឲ្យភ្ញៀវជាតិ និងអន្តរជាតិចូលទស្សនាជាវិធានការដើម្បីទប់ស្កាត់ការរីករាលដាលនៃការឆ្លងជំងឺកូវីដ ១៩។
លោក ឡុង ប៊ុណ្ណាស៊ីរីវត្ថ រដ្ឋលេខាធិការ និងជាអ្នកនាំពាក្យក្រសួងវប្បធម៌ និងវិចិត្រសិល្បៈបានថ្លែងកាលពីម្សិលមិញថា សារមន្ទីរដែលក្រសួងវប្បធម៌ និងវិចិត្រសិល្បៈបានជូនដំណឹងឲ្យបិទបណ្ដោះអាសន្ននេះមានចំនួន ១០ កន្លែងរួមមានទាំងសារមន្ទីរតូចៗតាមបណ្ដាខេត្តមួយចំនួនទៀត ប៉ុន្ដែលោកមិនបានចាំច្បាស់ពីចំនួនសារមន្ទីរតូចៗទាំងអស់នោះទេ។
លោកបានបន្តថា សារមន្ទីរធំៗទាំង ១០ កន្លែងនេះជាសារមន្ទីរធ្វើសកម្មភាពសកម្មជាងគេ ដោយធ្លាប់បើកបម្រើឲ្យភ្ញៀវជាតិ អន្តរជាតិ និងសាធារណជនចូលទស្សនាជាប្រចាំថ្ងៃ។ សារមន្ទីរទាំងអស់នេះត្រូវបានដាក់តាំងបង្ហាញនូវឯកសារប្រវត្តិសាស្ត្រវត្ថុបុរាណគ្រប់សម័យកាលវត្ថុដែលជាភ័ស្ដុតាងសង្គ្រាម និងវត្ថុអនុស្សាវរីយ៍មួយចំនួនទៀត។
លោកបញ្ជាក់ថា៖ «យើងបានបិទតាំងពីថ្ងៃទី ១៨ ខែមីនា។ រីឯនៅតាមបណ្ដាខេត្តមួយចំនួនក៏មានសកម្មភាពខ្លះដែរដូចជានៅខេត្តបាត់ដំបង កំពង់ធំ សៀមរាប និងខេត្តផ្សេងទៀតក៏ត្រូវបិទដែរ។ រឿងប៉ះពាល់គឺវាប៉ះពាល់ហើយតែគ្រាន់តែតិច និងច្រើនហើយអ្វីដែលសំខាន់គឺយើងទប់ស្កាត់វីរុសកូរ៉ូណានេះ»។
លោក ឡុង កុសល ប្រធាននាយកដ្ឋានផ្សព្វផ្សាយ និងជាអ្នកនាំពាក្យនៃអាជ្ញាធរជាតិអប្សរាថ្លែងពីម្សិលមិញថា សារមន្ទីរដែលស្ថិតនៅក្រោមការគ្រប់គ្រងរបស់អាជ្ញាធរជាតិអប្សរាមានចំនួន ៣ កន្លែងរួមមាន សារមន្ទីរព្រះនរោត្តមសីហនុអង្គរ សារមន្ទីរឡតានី និងសារមន្ទីរវាយនភណ្ឌប្រពៃណីអាស៊ីត្រូវបានបិទមិនអនុញ្ញាតឲ្យភ្ញៀវជាតិ និងអន្តរជាតិចូលទស្សនាចាប់តាំងពីថ្ងៃទី ១៨ ខែមីនាមក។
លោកបន្តថា ការហាមនេះលោកមិនទាន់ដឹងពីពេលវេលាដែលត្រូវបើកដំណើរការឡើងវិញទេ ដោយនឹងបន្តរង់ចាំរហូតដល់ស្ថានភាពជំងឺឆ្លងកូវីដ ១៩ ធូរស្រាល និងរហូតដល់មានការណែនាំថ្មីរបស់រាជរដ្ឋាភិបាលក៏ដូចជាក្រសួងស្ថាប័នពាក់ព័ន្ធនានា។
លោកបញ្ជាក់ថា៖ «បើបិទសារមន្ទីរជាតិបែបនេះ ខ្ញុំគិតថាវាប៉ះពាល់គឺវាប៉ះពាល់ហើយ ប៉ុន្ដែវាមិនប៉ះពាល់អ្វីធ្ងន់ធ្ងរទេ ព្រោះស្ថានភាពយើងក៏ដូចជាស្ថានភាពពិភពលោកអ៊ីចឹងដូចគ្នា គ្រាន់តែថា វាប៉ះពាល់តិច ឬច្រើនហើយអ្វីដែលសំខាន់ យើងត្រូវតែការពារវីរុសឆ្លងកូរ៉ូណានេះ ព្រោះវារីករាលដាលខ្លាំង។ ដូច្នេះបើយើងបើកបន្តវានាំឲ្យមានការឆ្លងពីគ្នាទៅវិញទៅមក»។
លោកស្រី ចន្ដា ក្លេ ប្រធានសមាគមទេសចរណ៍កម្ពុជាបានគាំទ្រចំពោះចំណាត់ការរដ្ឋាភិបាលតាមរយៈក្រសួងសុខាភិបាល និងក្រសួងវប្បធម៌ និងវិចិត្រសិល្បៈនេះព្រោះវាជាចំណាត់ការទប់ស្កាត់ទៅលើការរីករាលដាលនៃការឆ្លងជំងឺកូវីដ ១៩ នេះ។ លោកស្រីជំរុញឲ្យមន្ត្រីពាក់ព័ន្ធថ្នាក់ក្រោមដែលទទួលខុសត្រូវសារមន្ទីរត្រូវគោរព និងអនុវត្តអនុសាសន៍នេះ។
លោកស្រីបញ្ជាក់ថា៖ «ជាធម្មតាបើការបិទសារមន្ទីរជាតិបែបនេះវាតែងតែប៉ះពាល់រដ្ឋគឺគ្មានចំណូលចូលរដ្ឋទាំងឯកជន ក៏គ្មានចំណូល និងប្រជាពលរដ្ឋដែលប្រកបរបរទាក់ទងវិស័យទេសចរណ៍នេះក៏គ្មានចំណូលដែរ អ៊ីចឹងវាប៉ះពាល់អ៊ីចឹង ប៉ុន្ដែសំខាន់យើងទប់ស្កាត់ជំងឺឆ្លងនេះទាំងអស់គ្នា»។
តាមសេចក្ដីប្រកាសព័ត៌មានរបស់ក្រសួងវប្បធម៌ និងវិចិត្រសិល្បៈចុះថ្ងៃទី ១៨ ខែមីនា ដែលភ្នំពេញប៉ុស្ដិ៍ទទួលបានពីម្សិលមិញឲ្យដឹងថា ដោយមើលឃើញពីផលប៉ះពាល់នៃការរីករាលដាលជាសកលនៃជំងឺរលាកផ្លូវដង្ហើម (កូវីដ ១៩) នាពេលបច្ចុប្បន្ន ក្រសួងវប្បធម៌សូមផ្អាកការចូលទស្សនាសារមន្ទីរទូទាំងប្រទេសចាប់ពីថ្ងៃទី ១៨ ខែ មីនា ឆ្នាំ ២០២០ នេះតទៅ។
ចំពោះការបើកឲ្យចូលទស្សនាសារមន្ទីរឡើងវិញក្រសួងនឹងជូនដំណឹងនាពេលក្រោយ។ ក្រសួងបញ្ជាក់ថា ដូច្នេះសូមលោក-លោកស្រីប្រធានមន្ទីរវប្បធម៌ និងវិចិត្រសិល្បៈរាជធានី-ខេត្ត សាធារណជន សមាគមមគ្គុទ្ទេសក៍ទេសចរណ៍ ទីភ្នាក់ងារទេសចរណ៍ ក្រុមហ៊ុនទេសចរណ៍ ភ្ញៀវទេសចរជាតិ អន្តរជាតិ សារមន្ទីរជាតិអង្គរ (ខេត្តសៀមរាប) និងសារមន្ទីរឯកជនទាំងអស់ជ្រាបជាព័ត៌មាន និងអនុវត្តចាប់ពីថ្ងៃទី ១៨ ខែ មីនា ឆ្នាំ ២០២០ តទៅ៕
