ភ្នំពេញៈ «សារមន្ទីរមគ្គុទ្ទេសក៍តេជោសែន» នៃវិមានឈ្នះ-ឈ្នះ នឹងអនុញ្ញាតឲ្យសាធារណជនចូលទស្សនា ៤ ថ្ងៃ ក្នុង ១ សប្តាហ៍ គឺនៅថ្ងៃពុធ សុក្រ សៅរ៍ និងថ្ងៃអាទិត្យ ចាប់ពី ម៉ោង ២ ដល់ម៉ោង ៥ ល្ងាច។ នេះបើយោងតាមសេចក្តីជូនដំណឹងរបស់គណៈកម្មការ សាងសង់វិមានឈ្នះ-ឈ្នះ ចេញផ្សាយកាលពីថ្ងៃទី ៥ ខែ កុម្ភៈ ឆ្នាំ ២០១៩។
តាមសេចក្តីជូនដំណឹង ដែលចុះហត្ថលេខាដោយលោក ណឹម សុវត្ថិប្រធានក្រុមការងារសិក្សាស្រាវជ្រាវសាងសង់សំណង់ វិមានឈ្នះ-ឈ្នះនេះបានឲ្យដឹងថា ក្នុងរយៈពេល ៥ សប្ដាហ៍ ចុងក្រោយបន្ទាប់ពីការសម្ពោធវិមានឈ្នះ-ឈ្នះ និងអបអរសាទរ ខួបលើកទី ២០ នៃទិវានយោបាយ ឈ្នះ-ឈ្នះ បានធ្វើឲ្យវិមាន ឈ្នះ ឈ្នះ ទទួលបានការទាក់ទាញ និងយកចិត្ដទុកដាក់ពីសំណាក់សាធារណជនជាតិ និងអន្ដរជាតិ មកចូលទស្សនាជាប់ជាប្រចាំជារៀងរាល់ព្រឹក ល្ងាច និងយប់។
សេចក្ដីជូនដំណឹងបន្ដថា៖ «បច្ចុប្បន្ន ក្រុមការងារ បានបន្ដនិរន្តរភាពក្នុងដំណាក់កាលអន្ដរកាលរបស់ខ្លួន ដោយទទួលភារកិច្ចដ៏ធំធេងលើស្មារតីទទួលខុសត្រូវ និងម្ចាស់ការខ្ពស់»។
សេចក្ដីជូនដំណឹងដដែលបញ្ជាក់ថា ការកំណត់ពេលវេលាឲ្យចូលទស្សនានេះ គឺដោយសារសមាជិកក្រុមការងារទទួលបន្ទុកវិមានឈ្នះ-ឈ្នះ សមត្ថភាពនៅមានកម្រិត ក្នុងការផ្តល់សេវា និងបច្ចេកទេសមិនឆ្លើយតបទៅនឹងទីតាំងដែលទើបចាប់ផ្តើមកសាងនេះ ដូចជា បរិវេណតូច ការគ្រប់គ្រងសេវាបច្ចេកទេស អគ្គិសនី និងសណ្តាប់ធ្នាប់ ចេញចូល នៅមានកម្រិតទៅតាមទំហំសេចក្តីត្រូវការរបស់ទស្សនិកជនជាតិ-អន្តរជាតិ។
លោក ណឹម សុវត្ថិ បានឲ្យដឹងបន្ថែមកាលពីម្សិលមិញថា គណៈកម្មការក៏អនុញ្ញាតឲ្យមន្ត្រីរាជការមកពីតាមក្រសួងស្ថាប័ន និងក្រុមកម្មសិក្សានីមួយៗ ដែលបានស្នើសុំជាផ្លូវការអាចចូលសិក្សាស្រាវជ្រាវ ក្រៅពីពេលវេលាកំណត់ខាងលើបាន។ ដោយឡែកនៅតំបន់ សុខដុមនីយកម្ម តំបន់សួនតេជោសន្តិភាព រូបចម្លាក់ និងបរិវេណជុំវិញ អនុញ្ញាតឲ្យចូលទស្សនាជាធម្មតា។
លោកថ្លែងទៀតថា គណៈកម្មការសាងសង់វិមានឈ្នះ-ឈ្នះ បានរៀបចំក្រុមការងារ ផ្ដល់ព័ត៌មានមួយ នៅខាងមុខវិមានឈ្នះ-ឈ្នះ ជាបណ្ដោះអាសន្ន ដើម្បីចែករំលែកព័ត៌មាន ព្រមទាំងការយល់ដឹងអំពីការតាំងពិព័រណ៍ និងការបញ្ចាំងខ្សែវីដេអូបឋម ដើម្បីជាការសិក្សាស្វែងយល់ជាមុន។
គួររំឭកថា វិមានឈ្នះ-ឈ្នះ បានបើកការដ្ឋានសាងសង់កាលពីថ្ងៃទី ២៥ ខែកុម្ភៈ ឆ្នាំ ២០១៦ បន្ទាប់ពីការសាងសង់អស់រយៈពេលជាង ២ ឆ្នាំ វិមានឈ្នះ-ឈ្នះ ត្រូវបានសម្ពោធជាផ្លូវការ កាលពីថ្ងៃទី២៩ ខែធ្នូ ឆ្នាំ ២០១៨។ «សារមន្ទីរមគ្គុទេ្ទសក៍តេជោសែន» នៃវិមានឈ្នះ-ឈ្នះ បានរៀបរាប់ពីប្រវត្តិ ទិវាចងចាំនៃដំណើរឆ្ពោះទៅផ្ដួលរំលំរបបប្រល័យពូជសាសន៍ «ប៉ុលពត» កាលពីថ្ងៃទី ២០ ខែមិថុនា ឆ្នាំ ១៩៧៧ និងសកម្មភាពដឹកនាំប្រទេសជាតិរបស់លោកនាយករដ្ឋមន្រ្ដី ហ៊ុន សែន ចាប់តាំងពីក្រោយថ្ងៃជ័យជម្នះ ៧ មករា រហូតដល់ការអនុវត្តគោលនយោបាយ ឈ្នះ-ឈ្នះ របស់លោកសព្វថ្ងៃនេះ៕