.jpg)
លោក ប្រាក់ សុខុន ក្នុងពិធីសាទរខួប ១០៩ ទិវានារីអន្តរជាតិ ៨ មីនាពីម្សិលមិញនៅទីស្តីការក្រសួង។ រូបថត ហ្វេសប៊ុក
ភ្នំពេញៈ ក្រសួងការបរទេស និងសហប្រតិបត្តិការអន្តរជាតិ និងក្រសួងកិច្ចការនារីពីម្សិលមិញបានចេញសារសំខាន់ៗអបអរសាទរខួបលើកទី ១០៩ ទិវានារីអន្តរជាតិ ៨ មីនា ក្រោមប្រធានបទ «មានសន្តិភាព មានការលើកកម្ពស់សមភាពយេនឌ័រ» ដើម្បីរំឭកពីប្រវត្តិនៃចលនាតស៊ូរបស់នារីទូទាំងសកលលោកក្នុងការទាមទារសិទ្ធិស្មើភាពផ្នែកនយោបាយ សេដ្ឋកិច្ច និងសង្គម។
រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិលោក ប្រាក់ សុខុន ថ្លែងក្នុងពិធីអបអរទិវានេះនៅទីស្ដីការក្រសួងពីម្សិលមិញថា ប្រធានបទនៃខួបលើកទី ១០៩ នៃទិវានារីអន្តរជាតិឆ្នាំនេះគឺ «មានសន្តិភាពមានការលើកកម្ពស់សមភាពយេនឌ័រ»។ ប្រធានបទនេះមានខ្លឹមសារដ៏ជ្រាលជ្រៅបង្ហាញអំពីសារៈសំខាន់មិនអាចខ្វះបាននៃសន្តិភាពក្នុងការលើកកម្ពស់សិទ្ធិស្មើភាពរបស់ស្ដ្រីនៅក្នុងសង្គម។
លោករដ្ឋមន្ដ្រីថ្លែងថា៖ «ខ្ញុំសូមថ្លែងអំណរគុណដ៏ស្មោះចំពោះក្រុមការងារយេនឌ័ររបស់ក្រសួងយើង ដែលបានរៀបចំកម្មវិធីអបអរសាទរនេះឡើង ដើម្បីរំឭកពីការតស៊ូយ៉ាងស្វិតស្វាញរបស់ស្ដ្រីទូទាំងសកលលោកក៏ដូចជា នៅកម្ពុជាក្នុងបុព្វហេតុទាមទារនូវសិទ្ធិ ស្មើភាពខាងសេដ្ឋកិច្ច សង្គម និងនយោបាយ។ កាលពីជាង ១០០ ឆ្នាំមុន សិទ្ធិទាំងនោះពុំត្រូវបានផ្ដល់ជូនស្ដ្រីនោះឡើយ ហើយសូម្បីតែសព្វថ្ងៃក៏នៅមានការខ្វះខាតច្រើនក្នុងប្រទេសមួយចំនួនផងដែរ»។
លោក ប្រាក់ សុខុន លើកឡើងថា បុព្វបុរសខ្មែរតាំងពីសម័យអាណាចក្រនគរបានឲ្យតម្លៃទៅស្ដ្រីថាជាអ្នកផ្ដល់ពន្លឺសុភមង្គលសម្រាប់គ្រួសារដូចពាក្យចាស់ពោលថា «សំណាបយោងដី ស្រីយោងប្រុស»។ បច្ចុប្បន្នការលើកកម្ពស់សមភាពយេនឌ័រ គឺជាអាទិភាពមួយនៃគោលនយោបាយអភិវឌ្ឍន៍ជាតិកម្ពុជា។ ប៉ុន្ដែកិច្ចការនេះមិនអាចសម្រេចលទ្ធផលល្អបានឡើយនៅក្នុងបរិបទដែលប្រទេសមានសង្គ្រាម អសន្តិសុខ និងអស្ថិរភាពនយោបាយ។
លោកបន្ដថាស្របតាមនិន្នាការជាសកលដែលមានការទទួលស្គាល់កាន់តែទូលំទូលាយចំពោះសារៈសំខាន់នៃតួនាទីរបស់ស្ដ្រីក្នុងការរួមចំណែកសម្រេចគោលដៅអភិវឌ្ឍន៍ប្រកបដោយចីរភាព រាជរដ្ឋាភិបាលកម្ពុជាក៏បានបន្តអនុវត្ដនូវគោលនយោបាយជំរុញការគោរពសិទ្ធិស្មើភាពរបស់ស្ដ្រី។ ព្រមទាំងបានបង្កើនការវិនិយោគធនធាន ដើម្បីបង្កលក្ខណៈឲ្យស្ដ្រីអាចពង្រីក និងលើកកម្ពស់តួនាទីរបស់ខ្លួននៅក្នុងរាល់កិច្ចការសង្គម និងការអភិវឌ្ឍសេដ្ឋកិច្ចជាតិ។
លោកថ្លែងថា៖ «រាជរដ្ឋាភិបាលកម្ពុជាបានចាត់ទុកស្ត្រី គឺជាឆ្អឹងខ្នងនៃប្រទេសជាតិ។ ស្ដ្រីពិតជាបានចូលរួមចំណែកយ៉ាងសំខាន់ក្នុងការថែរក្សាសុខសន្ដិភាព និងជំរុញល្បឿននៃការអភិវឌ្ឍប្រទេស។ ក្នុងចំណោមស្ដ្រីពេញវ័យនៅកម្ពុជាមានចំនួន ៧៩ ភាគរយបានចូលរួមក្នុងកម្លាំង ពលកម្ម បម្រើការងារតាមស្ថាប័នរដ្ឋ និងគ្រឹះស្ថានឯកជនដែលជាអត្រាខ្ពស់ជាងគេនៅក្នុងតំបន់»។
រដ្ឋមន្ដ្រីការបរទេសក៏បានរំឭកថា ចាប់តាំងពីឆ្នាំ ២០០៦ មកទល់បច្ចុប្បន្ន កម្ពុជាបានបញ្ជូនកម្លាំងចូលរួមបេសកកម្មថែរក្សាសន្ដិភាពតាមរយៈអង្គការសហប្រជាជាតិសរុប ៦ ៥៥៦ នាក់ក្នុងនោះមានស្ដ្រី ៣៣៨ នាក់ផងដែរ។ ក្នុងបេសកកម្មនេះក្នុងតំបន់អាស៊ានកម្ពុជាឈរលេខរៀងទី ២ ជាប្រទេសដែលបានបញ្ជូនកងកម្លាំងជានារីនៃប្រទេសដែលបានបញ្ជូនកម្លាំងមួកខៀវ។
លោកស្រី អ៊ាត សោភា រដ្ឋលេខាធិការ និងជាប្រធានក្រុមការងារយេនឌ័រនៃក្រសួងការបរទេស និងសហប្រតិបត្តិការអន្តរជាតិថ្លែងក្នុងពិធីនេះដែរថា ការប្រារព្ធទិវានារីអន្តរជាតិ ៨ មីនាគឺដើម្បីរំឭកអំពីប្រវត្តិនៃចលនាតស៊ូរបស់នារីទូទាំងសកលលោកក្នុងការទាមទារសិទ្ធីស្មើភាពផ្នែកនយោបាយ សេដ្ឋកិច្ច និងសង្គមដែលបានចាប់ផ្តើមតាំងពី ១០៩ ឆ្នាំមុន ហើយមកទល់ពេលនេះក៏នៅតែបន្តខិតខំជំរុញបន្ថែមទៀត។
លោកស្រីថ្លែងថា៖ «ទោះជាក្នុងរយៈពេលកន្លងមកនេះ សិទ្ធិ និងសារៈសំខាន់នៃតួនាទីរបស់ស្ត្រីត្រូវបានទទួលស្គាល់ និងលើកកម្ពស់យ៉ាងទូលំទូលាយហើយកី្ត ក៏ប៉ុន្តែនារីនៅតែជួបបញ្ហារើសអើងដោយផ្ទាល់ និងដោយប្រយោលជាច្រើន ដូចជាសិទិ្ធក្នុងការទទួលការអប់រំ សិទ្ធិទទួលមរតក សិទ្ធិក្នុងការបោះឆ្នោត។ល។ ជាអាទិ៍នៅអារ៉ាប៊ីសាអ៊ូឌីត ស្ត្រីទើបបានទទួលសិទ្ធិបើកបររថយន្តកាលពីឆ្នាំ ២០១៧ នេះទេ»។
តាមការបង្ហាញរបស់លោកស្រី គឺតួលេខជំរឿនប្រជាជនក្នុងខែមីនា ឆ្នាំ ២០១៩ ក្នុងចំណោមប្រជាជនកម្ពុជាជាង ១៥,២ លាននាក់មានស្រីចំនួន ៥១,៥ ភាគរយ (៧.៨៦៩.៩១២ នាក់) រីឯប្រុសមាន ៤៨,៥ ភាគរយ(៧.៤១៨.៥៧៧នាក់)។
លោកស្រីបន្តថា ក្រសួងកិច្ចការនារីបានជ្រើសរើសយកប្រធានបទ «មានសន្តិភាព មានការលើកកម្ពស់សមភាពយេនឌ័រ» សម្រាប់ការអបអរសាទរខួបលើកទី ១០៩ ទិវាអន្តរជាតិនារី ៨ មីនា ឆ្នាំ ២០២០។ ក្នុងគោលបំណងទី ១ គឺ «អរគុណដល់សន្តិភាព» ក៏ដូចជាបំផុសស្មារតី ស្រឡាញ់ថែរក្សាសន្តិភាពដែលបាននាំមកនូវការឯកភាពជាតិ និងទឹកដី។ អនុញ្ញាតឲ្យប្រជាជនកម្ពុជាបានរស់នៅដោយសុខសាន្តក្នុងសេរីភាពរបបប្រជាធិបតេយ្យ និងការអភិវឌ្ឍសេដ្ឋកិច្ចសង្គមលើគ្រប់វិស័យ និងសមាហរណកម្មរបស់ប្រទេសកម្ពុជាក្នុងតំបន់ និងពិភពលោក។ រំលេចអំពីសារៈសំខាន់ និងតម្លៃដែលមិនអាចកាត់ថ្លៃបាននៃសន្តិភាព។
លោកស្រីបន្ថែមថា ប្រធានបទនេះមិនត្រឹមតែបាននាំមកនូវការអភិវឌ្ឍសេដ្ឋកិច្ចសង្គមប៉ុណ្ណោះទេ ថែមទាំងផ្តល់បរិយាកាសអំណោយផលដល់ការងារជំរុញសមភាពយេនឌ័រ និងការលើកកម្ពស់សិទ្ធិ និងពង្រឹងភាពអង់អាចរបស់ស្ត្រីនៅទូទាំងប្រទេសកម្ពុជាទាំងមូល។
ក្រសួងកិច្ចការនារីនៅថ្ងៃទី ៣ ខែមីនា បានចេញសារសំខាន់ៗដើម្បីផ្សព្វផ្សាយក្នុងយុទ្ធនាការអបអរសាទរខួបលើកទី ១០៩ ទិវានារីអន្តរជាតិ ៨ មីនាផងដែរ។ សារៈសំខាន់ៗរបស់ក្រសួងកិច្ចការនារីរួមមាន «អរគុណសម្តេច តេជោនាយករដ្ឋមន្ដ្រីដែលបានដឹកនាំកម្ពុជាឲ្យមានសន្តិភាព»។ «អរគុណសន្តិភាពដែលធ្វើឲ្យប្រទេសជាតិរីកចម្រើនរុងរឿង»។ «រួមគ្នាថែរក្សាសន្តិភាព ធានាបានសមភាពយេនឌ័រប្រកបដោយបរិយាប័ន្ន»។ «វិនិយោគលើសមភាពយេនឌ័រ ដើម្បីកិច្ចអភិវឌ្ឍន៍ប្រកបដោយចីរភាព»។ «ស្ត្រីរួមគ្នាថែរក្សាការពារសន្តិភាព ដើម្បីអភិវឌ្ឍន៍ជាតិ»។«មានសន្តិភាពមានការលើកកម្ពស់សមភាពយេនឌ័រ»៕
