.jpg)
លោក យ៉ែម ជ្រិន ដែលត្រូវចាប់ខ្លួនពីបទចាក់ថ្នាំចម្លងមេរោគអេដស៍ដល់អ្នកភូមិ។ រូបថត ភ្នំពេញប៉ុស្តិ៍
ភ្នំពេញៈ តុលាការកំពូលនឹងប្រកាសសាលដីកាសំណុំរឿងបុរសម្នាក់ឈ្មោះ យ៉ែម ជ្រិន នៅដើមខែក្រោយ បន្ទាប់ពីជំនុំជម្រះកាលពីថ្ងៃ ២០ កញ្ញា ពាក់ព័ន្ធករណីដើរចាក់ថ្នាំបង្កការឆ្លងមេរោគអេដស៍ដល់អ្នកភូមិជិត ៣០០ នាក់ នៅភូមិ-ឃុំរកាស្រុកសង្កែ ខេត្តបាត់ដំបងកាលពីឆ្នាំ ២០១៤ ខណៈរឿងនេះត្រូវបានតុលាការថ្នាក់ក្រោមផ្តន្ទាទោស ២៥ ឆ្នាំ។
នៅក្នុងអង្គសវនាការកាលពីថ្ងៃទី ២០ កញ្ញា ដែលមានវត្តមានលោកចៅក្រម និល ណុន ជាប្រធានក្រុមប្រឹក្សាជំនុំជម្រះ និងមានលោក ឌុចគឹម សន ជាតំណាងមហាអយ្យការនោះ ជនជាប់ចោទ ឈ្មោះ យ៉ែម ជ្រិន បានឆ្លើយប្រាប់ចៅក្រមថា ការដែលគាត់ដើរចាក់ថ្នាំហើយចម្លងមេរោគអេដស៍ទៅពលរដ្ឋបណ្តាលឲ្យស្លាប់នោះ គឺគាត់គ្មានចេតនានោះទេ។
លោក ញ៉ែម ជ្រិន ថា៖ «ខ្ញុំមិនមានចេតនា ធ្វើបែបហ្នឹងទេ ខ្ញុំសូមតុលាការបន្ថយទោសដល់ខ្ញុំផង»។
លោក សំ ចំរើន ជាមេធាវីការពារសិទ្ធិឲ្យជនជាប់ចោទថ្លែងការពារកូនក្តីរបស់លោកថា ពាក់ព័ន្ធករណីឈ្មោះ យ៉ែម ជ្រិន នេះ លោកយល់ឃើញថាគាត់ពិតជាបានសាងនូវកំហុសបណ្តាលឲ្យអ្នកភូមិរកាស្លាប់ដោយសារជំងឺអេដស៍ប្រាកដមែន។ ប៉ុន្តែទង្វើរបស់កូនក្តីលោកនោះគឺជាកំហុសដោយអចេតនាទេ។
លោក បញ្ជាក់ប្រាប់ក្នុងអង្គសវនាការថា បញ្ហានេះដោយសារកូនក្តីលោកមិនបានគិតដល់ ហើយកាលពីពេលនោះប្រសិនបើមានខាងមន្ទីរសុខាភិបាលចុះទៅពិនិត្យណែនាំឲ្យបានដិតដល់នោះប្រហែលជាកូនក្តីរបស់លោកមិនបានជាប់ពន្ធនាគារច្រើនឆ្នាំដែរ។
លោកថា៖ «ខ្ញុំសុំឲ្យតុលាការកំពូលបន្ធូរបន្ថយទោសដល់កូនក្តីខ្ញុំព្រោះរឿងនេះកើតឡើងដោយអចេតនាទេ។ ម្យ៉ាងក៏ជាផលវិបាកសង្គមដែរ ប្រសិនបើមានស្ថាប័នចុះទៅទប់ស្កាត់មុននោះប្រហែលជាកូនក្តីខ្ញុំមិនបានបង្កើតនូវកំហុសដែលបណ្តាលឲ្យគាត់មានទោសច្រើនដែរ»។
លោក មេធាវី បញ្ជាក់ថាក្នុងរឿងនេះវាត្រូវតែអីចឹង ព្រោះរឿងនេះជារឿងបច្ចេកទេសសុទ្ធសាធ តែយើងក៏មិនមែនជាអ្នកចេះដែរ តែគ្រាន់តែហេតុការណ៍វាបង្ហាញមកបែបនេះ។ បើមានមន្ត្រីជំនាញចុះត្រួតពិនិត្យឲ្យបានដិតដល់ អ៊ីចឹងទៅទើបបណ្តាលឲ្យមានរឿងនេះកើតធំដល់តែមានរឿងធំក៏មានព្យនៈកម្មធំដែរ។ បើមានការទប់ស្កាត់ទាន់ពីស្ថាប័នជំនាញនោះប្រហែលជាកូនក្តីរបស់លោកក៏មិនអាចជាប់ទោសច្រើនឆ្នាំ។
គួររំឭកថា លោក យ៉ែម ជ្រិន ត្រូវបានសាលាដំបូងខេត្តបាត់ដំបង ចោទប្រកាន់ ៣ បទល្មើស ដែលបទល្មើសទី ១ ប្រព្រឹត្តក្នុងចេតនាចម្លងមេរោគអេដស៍ទៅអ្នកដទៃតាមមាត្រា ១៨, ៥០ នៃច្បាប់ស្តីពីការបង្ការ និងការប្រយុទ្ធទប់ស្កាត់ការរីករាលដាលមេរោគអេដស៍/ជំងឺអេដស៍, ទី២ ឃាតកម្មដោយអំពើឃោរឃៅតាមមាត្រា ២០៥ នៃក្រមព្រហ្មទណ្ឌ និងទី៣ បើកកន្លែងពិគ្រោះព្យាបាលជំងឺដោយគ្មានការអនុញ្ញាតពីក្រសួងសុខាភិបាល។
បទចោទទាំងនេះត្រូវបានតុលាការថ្នាក់ក្រោមផ្តន្ទាទោសដាក់ពន្ធនាគារ ២៥ ឆ្នាំ និងបង្គាប់ឲ្យបង់ប្រាក់ពិន័យចំនួន ៥ លានរៀល ចូលថវិការដ្ឋ ដោយសារបើកមន្ទីរព្យាបាលគ្មានសុំអាជ្ញាប័ណ្ណ និងពិន័យជាប្រាក់សងជំងឺចិត្តផ្សេងទៀតពី ២ លានដល់ ១២ លានរៀល ដល់ជនរងគ្រោះចំនួន ១០៧ នាក់ (អនីតិជន ២២ នាក់)។ មិនសុខចិត្តនឹងសាលក្រមជនជាប់ចោទបានប្តឹងទាស់ទៅសាលាឧទ្ធរណ៍ហើយត្រូវឧទ្ធរណ៍តម្កល់ទោសដដែល។
ក្រោយជំនុំជម្រះលោក និល ណុន ប្រធានក្រុមប្រឹក្សាជំនុំជម្រះថ្លែងថា សាលដីកាសំណុំរឿងនេះនឹងប្រកាសនៅថ្ងៃទី ៤ ខែ តុលា ខាងមុខ៕
