ភ្នំពេញៈ រដ្ឋបាលរាជធានីភ្នំពេញ ប្រាប់ម្ចាស់រោងចក្រ សហគ្រាស ឃ្លាំងស្ដុកទំនិញ និងយានដ្ឋានជួសជុលរថយន្តធំៗ ដែលមានស្រាប់ក្នុងរាជធានីភ្នំពេញកុំឲ្យបារម្ភរឿងផ្លាស់ប្តូរទីតាំងទៅជាយក្រុង ខណៈខ្លួននិងសមាគមរោងចក្រកាត់ដេរនៅកម្ពុជា (GMAC) បានព្រមព្រៀងគ្នាលើ ៣ ចំណុចសម្រាប់ដោះស្រាយបញ្ហានេះ។
កាលពីថ្ងៃអង្គារសាលារាជធានីភ្នំពេញបានចេញសេចក្ដីជូនដំណឹងមួយឱ្យម្ចាស់រោងចក្រ សហគ្រាស ឃ្លាំងស្ដុកទំនិញ និងយានដ្ឋានជួសជុលរថយន្តធំៗត្រូវរៀបចំប្ដូរទីតាំងទៅនៅជាយក្រុងតាមបណ្ដោយផ្លូវក្រវាត់ក្រុងទី ៣ ដែលមានប្រវែងជិត ៤៨ គីឡូម៉ែត្រ ចាប់ពីចំណុចស្ពានព្រែកព្នៅ ឆ្លងកាត់ផ្លូវជាតិលេខ ៣ ផ្លូវជាតិលេខ ២ និងផ្លូវជាតិលេខ ២១ ទៅភ្ជាប់នឹងផ្លូវជាតិលេខ ១ ដែលត្រូវសាងសង់រួចនៅឆ្នាំ ២០២១ ដើម្បីបញ្ចៀសការស្ទះ និងគ្រោះថ្នាក់ចរាចរណ៍ញឹកញាប់។
ប៉ុន្តែ ១ ថ្ងៃក្រោយចេញសេចក្តីជូនដំណឹងនេះ រដ្ឋបាលរាជធានីភ្នំពេញ និង GMAC បានជួបពិភាក្សាគ្នាដើម្បីសម្រួលដល់ការផ្លាស់ប្តូរទីតាំងនេះក៏ដូចជាចូលរួមកាត់បន្ថយការកកស្ទះចរាចរណ៍ក្នុងរាជធានីភ្នំពេញ។
ក្រោយបញ្ចប់កិច្ចពិភាក្សា រដ្ឋបាលរាជធានីភ្នំពេញបានចេញសេចក្តីប្រកាសព័ត៌មានមួយដោយមិនតម្រូវឲ្យរោងចក្រសហគ្រាសឃ្លាំងដែលមានស្រាប់នៅក្នុងក្រុងរើទៅជ្រាយក្រុងឡើយ ប៉ុន្តែសម្រាប់ទីតាំងទើបបង្កើតថ្មី នោះ GMAC ត្រូវសម្រួលឲ្យពួកគេទៅសង់នៅជាយក្រុងឬតាមបណ្តាយផ្លូវក្រវាត់ក្រុងទី ៣។
លោក ម៉េត មាសភក្តី អ្នកនាំាពាក្យសាលារាជធានីភ្នំពេញបានប្រាប់ភ្នំពេញប៉ុស្តិ៍បន្ថែមថា ការសម្រួលនេះគឺដើម្បីបង្កការងាយស្រួលដល់ម្ចាស់ទីតាំង ខណៈសាលារាជធានីគ្រោងបញ្ឈប់ឲ្យឡានធំចូលក្នុងក្រុង។
លោកបន្ថែមថាការប្រកាសជាថ្មីនេះក៏ជាការបញ្ជាក់ពីជំហររបស់សាលារាជធានីកុំឲ្យមានការភាន់ច្រឡំផងដែរ។
លោកបញ្ជាក់ថា៖ «យើងបានចេញបញ្ជាក់ជាថ្មីទៀតគឺដើម្បីកុំឲ្យបងប្អូនយើងហ្នឹង មានការយល់ច្រឡំ.អ៊ីចឹងលិខិតថ្មីនេះយើងបញ្ជាក់យ៉ាងច្បាស់ត្រង់កន្លែងរើចេញថា ពុំមានឲ្យអ្នកមានទីតាំងស្រាប់ក្នុងក្រុងហ្នឹងរើចេញទេ»។
លោក ម៉េត មាសភក្តី បានបន្តថា៖ «សម្រាប់អ្នកចង់រកស៊ីថ្មី យើងលើកទឹកចិត្ត ហើយក៏មិនមែនបង្ខំដែរ ព្រោះជាការរកស៊ីរបស់ពួកគាត់ តែគ្រាន់តែលើកទឹកចិត្តឲ្យទៅជាយៗក្រុងទៅ ព្រោះឡានរបស់យើងធំដឹកទំនិញដឹកអី តែតិចទៀត យើងកំណត់ឡានធំមិនឲ្យចូលក្រុងទៅ នាំតែគាត់ពិបាក យើងតម្រង់ទិសគាត់ទុកទេ»។
តាមសេចក្តីប្រកាស ចំណុចទាំង ៣ ដែលរដ្ឋបាលរាជធានីភ្នំពេញបានឯកភាពជាមួយ GMAC រួមមានទី១ បង្កើតក្រុមការងាររួមមួយដែលមានសមាសភាពពីភាគីពាក់ព័ន្ធដើម្បីប្រជុំកំណត់ប្រភេទនិងទំហំរថយន្តដឹកទំនិញធុនធ្ងន់ចេញចូលរាជធានីភ្នំពេញ តម្រាយផ្លូវហាមឃាត់ និងកំណត់ពេលវេលាម៉ោងចេញចូល សំដៅកាត់បន្ថយការកកស្ទះចរាចរណ៍នៅរាជធានីភ្នំពេញ។
ទី២ ក្រុមការងាររួមនេះនឹងធ្វើការប្រជុំរៀងរាល់ ១ ខែម្តងឬ ៣ ខែម្តងតាមការចាំបាច់ដើម្បីពិភាក្សារកដំណោះស្រាយ ក្នុងការកាត់បន្ថយការកកស្ទះចរាចរណ៍ក្នុងរាជធានីភ្នំពេញ និងដោះស្រាយបញ្ហាកង្វល់ ចំណែកទី ៣ រដ្ឋបាលរាជធានីភ្នំពេញនឹងជួយសម្រួលបែបបទតាមសេវាច្រកចេញចូលតែមួយ និងជួយកាត់បន្ថយពេលវេលាដោយផ្ទាល់ចំពោះការសាងសង់រោងចក្រដែលមានក្រឡាផ្ទៃក្រោម ៣ ០០០ ម៉ែត្រក្រឡា (បីពាន់ម៉ែត្រការ៉េ) ដើម្បីឆាប់បានដំណើរការសាងសង់។
លោក កាំង ម៉ូនីកា អគ្គលេខាធិការរងសមាគមរោងចក្រកាត់ដេរកម្ពុជា (GMAC) ប្រាប់ភ្នំពេញប៉ុស្តិ៍ពីម្សិលមិញថា វិធានការរបស់សាលារាជធានីភ្នំពេញគឺជាការត្រឹមត្រូវ។ តែនៅចំពោះមុខមានទាំងចំណុចវិជ្ជមាននិងអវិជ្ជមានដោយវិស័យឯកជនត្រូវប្រឈមបញ្ហាមួយចំនួនព្រោះការផ្លាស់ប្តូរទៅជាយក្រុងអាចប្រឈមនឹងការខ្វះធនធានមនុស្សនិងចង្វាក់ផលិតកម្ម។
យ៉ាងណាក្ដី លោកថា៖ «សម្រាប់ជាទស្សនវិស័យវែងឆ្ងាយ ការដែលទៅនៅជាយក្រុងក៏ល្អដែរ ព្រោះបរិយាកាសរបស់រោងចក្រ ការដឹកជញ្ចូនតាមផ្លូវក្រវាត់ក្រុង ឆ្ពោះទៅកាន់កំពង់ផែហ្នឹង ហើយ
ការស្នាក់នៅរបស់បងប្អូនកម្មករហ្នឹង នៅក្បែរៗហ្នឹង អាចមានលក្ខណៈទូលាយជាង។ អ៊ឹចឹងហើយ បានយើងសម្រួលដល់អ្នកដែលមានបំណងចង់បង្កើតថ្មីគួរទៅរកទីតាំងតាមការណែនាំឲ្យហើយទៅ»។
លោក គង់ សុវណ្ណ ទីប្រឹក្សាផ្នែកសុវត្ថិភាពចរាចរណ៍និងជាប្រធានអង្គការដៃគូសុវត្ថិភាពចរាចរណ៍គាំទ្រវិធានការសាលារាជធានីភ្នំពេញដែលតម្រូវឲ្យរោងចក្រ ឃ្លាំង និងសហគ្រាសធំៗ ដែលប្រើប្រាស់ឡានដឹកទំនិញធំ ដាក់ទីតាំងនៅជាយក្រុង។ លោកបន្តថា ការធ្វើដូច្នេះ បើទោះជាភ្លាមៗហាក់លំបាកសម្រាប់ម្ចាស់ទីតាំងក្ដី តែវាមានផលល្អសម្រាប់បញ្ចៀសការកក់ស្ទះចរាចរណ៍និងជួយទប់ស្កាត់គ្រោះថ្នាក់ដែលបង្កឡើងដោយឡានធំនេះ។
លោកថា៖ «ខ្ញុំសង្ឃឹមថា សាលារាជធានីភ្នំពេញ និងដៃគូពាក់ព័ន្ធក្នុងគណៈកម្មការដែលគ្រោងនឹងបង្កើតនេះ គួរតែមានវិធានការបែបណាល្អនិងដោះស្រាយបែបណាសម្រាប់ឡានរបៀបម៉េច ដែលអាចចេញចូលក្រុងក្នុងពេលខាងមុខ។ រឿងនេះពេលមានដំណោះស្រាយ គួរមានវេទិកាសាធារណៈពិភាក្សាគ្នា ផ្តល់ចំណេះដឹងដល់ពលរដ្ឋឬតាមយៈវិទ្យុក្តី ទូរទស្សន៍ក្តី ផ្សព្វផ្សាយឲ្យបានដឹងគ្រប់គ្នា»៕