ភ្នំពេញៈ លោក ឃួង ស្រេង អភិបាលសាលារាជធានីភ្នំពេញបានឲ្យដឹងថា មានក្រុមហ៊ុនចំនួន ៦ កំពុងត្រូវបានវាយតម្លៃជាលើកចុងក្រោយ ដើម្បីចម្រាញ់យក ៣ ក្រុមហ៊ុនក្នុងការផ្ដល់សិទ្ធិលើការប្រមូលសំរាមទូទាំងរាជធានីភ្នំពេញ ខណៈលោកមើលឃើញពីប្រសិទ្ធភាពរបស់ក្រុមហ៊ុនទាំងនោះថា អាចធ្វើឲ្យទីក្រុងនេះមានសោភណភាពប្រសើរជាងមុន។
កាលពីខែមីនាកន្លងទៅសាលារាជធានីភ្នំពេញបានប្រកាសថា មានក្រុមហ៊ុនចំនួន ២០ ក្នុងនោះក៏មានក្រុមហ៊ុនបរទេសផងដែរដែលបានដាក់ពាក្យដេញថ្លៃប្រមូលសំរាមនៅក្នុងរាជធានីភ្នំពេញ ខណៈរដ្ឋាភិបាលសម្រេចបែងចែករាជធានីភ្នំពេញជា ៣ តំបន់ ដើម្បីងាយស្រួលគ្រប់គ្រងការប្រមូលសំរាម។
លោក ឃួង ស្រេង បានលើកឡើងនៅទីស្តីការគណៈរដ្ឋមន្ត្រីអំឡុងពេលលោកដឹកនាំក្រុមការងារចូលរួមក្នុងសន្និសីទសារព័ត៌មានស្ដីពី «វឌ្ឍនភាព និងទិសដៅការងារបន្ដរបស់រដ្ឋបាលរាជធានីភ្នំពេញ» កាលពីម្សិលមិញថា បច្ចុប្បន្ននេះ ពលរដ្ឋក្នុងរាជធានីភ្នំពេញបានកើនឡើងជាង ៣ លាននាក់ដែលចំនួននេះបានបង្កើតសំរាមយ៉ាងហោចណាស់ជាង ៣ ០០០ តោនក្នុង ១ ថ្ងៃៗ។
លោកបន្តថា៖ «ក្រុមហ៊ុន ១ គឺប្រមូលបានតែ ១ ពាន់តោនទេ ដូច្នេះការផ្តល់សិទ្ធិឲ្យក្រុមហ៊ុន ៣ មានសិទ្ធិប្រមូលសំរាមនេះគឺប្រកបដោយសុក្រឹត។ បើមិនដូច្នេះទេ បញ្ហាសំរាមនៅក្នុងរាជធានីភ្នំពេញនៅតែប្រឈម។ ដូច្នេះហើយទើបក្រសួងសេដ្ឋកិច្ចចង្អុលបង្ហាញឲ្យរដ្ឋបាលរាជធានីភ្នំពេញ ជ្រើសរើសក្រុមហ៊ុនប្រមូលសំរាមជាលក្ខណៈអន្តរជាតិ។ កិច្ចការងារនេះយើងបានធ្វើមួយចំនួនធំហើយដោយសព្វថ្ងៃយើងបានរើសក្រុមហ៊ុន ៦ ដែលយើងនឹងចម្រាញ់យកតែ ៣ ក្រុមហ៊ុនទេដើម្បីធ្វើប្រតិបត្តិការ»។
ជាមួយគ្នានេះលោក ឃួង ស្រេង បានអំពាវនាវដល់ពលរដ្ឋឲ្យចូលរួមទុកដាក់សំរាមឲ្យបានត្រឹមត្រូវដើម្បីចូលរួមចំណែកធ្វើឲ្យរាជធានីភ្នំពេញក្លាយជាទីក្រុងស្អាត ព្រោះបើគ្មានការចូលរួមពីពលរដ្ឋនោះទេ ទោះមានក្រុមហ៊ុនប៉ុន្មានក៏មិនអាចគ្រប់គ្រងសំរាមបានល្អដែរ។
លោកជឿជាក់ថា ការផ្តល់សេវាប្រមូលសំណល់រឹងសំរាមនៅរាជធានីភ្នំពេញ នឹងមានស្ថានភាពប្រសើរឡើងក្នុងពេលដ៏ខ្លីខាងមុខនេះ។
លោកបានបញ្ជាក់ថា៖ «បើទោះបីនៅក្នុងថ្ងៃអនាគតមានក្រុមហ៊ុនច្រើនក្នុងការប្រមូលសំរាមក៏ដោយ ក៏ត្រូវមានការសហការឲ្យបានពេញលេញជុំវិញការបញ្ចេញសំរាមមកខាងក្រៅ។ (ពលរដ្ឋ) មិនមែនចេះតែនឹកឃើញបញ្ចេញសំរាមតាមតែចិត្តនោះទេ ព្រោះគ្មានអ្នកណាប្រមូលទាន់ទេ។ យើងនឹងរៀបចំកាលវិភាគឲ្យបានត្រឹមត្រូវទៅថ្ងៃអនាគតហ្នឹង សម្រាប់ការទុកដាក់សំរាមនេះ ដែលយើងនឹងទទួលបានទីក្រុងមួយដ៏ស្អាតទាំងអស់គ្នា»។
លោក ម៉េត មាសភក្តី អ្នកនាំពាក្យសាលារាជធានីភ្នំពេញបានប្រាប់ភ្នំពេញប៉ុស្តិ៍បន្ថែមថា ក្រុមហ៊ុនទាំង ៦ ដែលជាប់ក្នុងដំណាក់កាលវាយតម្លៃជាចុងក្រោយនេះ គឺមានទាំងក្រុមហ៊ុនខ្មែរ និងក្រុមហ៊ុនបរទេស ប៉ុន្តែលោកមិនអាចប្រាប់លម្អិតអំពីឈ្មោះ និងព័ត៌មាននានា ជុំវិញក្រុមហ៊ុនទាំង ៦ នេះបានទេ។
លោកបន្តថា៖ «ការងារស្ថិតក្នុងដំណាក់កាលដេញថ្លៃ យើងមិនអាចបង្ហើបព័ត៌មានជុំវិញក្រុមហ៊ុនគេបានទេ តែនៅពេលណាដែលជាប់ហើយ អាហ្នឹងបានយើងអាចប្រាប់បាន។ ក្រុមហ៊ុនទាំង ៦ នេះគឺមានក្រុមហ៊ុនបរទេសដែរ ហើយចំពោះដំណើរការរបស់ក្រុមហ៊ុនទាំងនោះក៏មិនអាចជម្រាបកម្អិតបានដែរ ប៉ុន្តែយើងនឹងព្យាយាមឲ្យបានលឿនបំផុត»។
កាលពីថ្ងៃទី ២២ តុលា ឆ្នាំមុនលោកនាយករដ្ឋមន្ត្រី ហ៊ុន សែន បានប្រកាសដកសិទ្ធិពីក្រុមហ៊ុនស៊ីនទ្រីដែលធ្លាប់ប្រមូលសំរាមផ្តាច់មុខមកឲ្យរដ្ឋបាលសាលារាជធានីភ្នំពេញគ្រប់គ្រងបណ្តោះអាសន្នសិន មុននឹងរកក្រុមហ៊ុនថ្មីមកជំនួសបាន ក្រោមហេតុផលថា ក្រុមហ៊ុនស៊ីនទ្រីពុំមានសមត្ថភាពក្នុងការបន្តប្រមូលសំរាមបាន។
លោក សឿន សារ៉ន នាយកប្រតិបត្តិនៃសមាគមធាងត្នោតបានលើកឡើងកាលពីម្សិលមិញថា លោកមិនបានដឹងច្បាស់ពីនីតិវិធីនៃការដេញថ្លៃប្រមូលសំរាមរបស់រដ្ឋបាលសាលារាជធានីភ្នំពេញទេ។ ហេតុដូច្នេះលោកមិនអាចវាយតម្លៃពីដំណើរការនេះថា មានលក្ខណៈបែបណានោះទេ។ ប៉ុន្តែលោកថាការសម្រេចកែប្រែឲ្យមានក្រុមហ៊ុនប្រមូលសំរាមច្រើន គឺជារឿងល្អ ហើយវាកាន់តែប្រសើរ បើការបែងចែងការគ្រប់គ្រងរបស់ក្រុមហ៊ុនទាំង ៣ ក្នុងពេលខាងមុខបានត្រឹមត្រូវ។
លោកបញ្ជាក់ថា៖ «ដោយសារតែមានក្រុមហ៊ុនតែមួយទើបរដ្ឋាភិបាលពិចារណាឲ្យមានក្រុមហ៊ុនចំនួនច្រើន ព្រោះតែទទួលបានពាក្យត្អូញត្អែររបស់ពលរដ្ឋមួយចំនួនអ៊ីចឹង។ ក្នុងនាមជាពលរដ្ឋ ខ្ញុំគិតថា រដ្ឋាភិបាលនឹងបង្កើតជម្រើសឲ្យបានច្រើនសម្រាប់ពលរដ្ឋ ហើយក្រុមហ៊ុន ៣ នេះនឹងមានការបែងចែកការទទួលខុសត្រូវឲ្យបានច្បាស់លាស់ជាពិសេសទីតាំង ដើម្បីងាយស្រួលក្នុងការគ្រប់គ្រង»៕